တႄႇႁူဝ်လိူၼ် ၵျႃၼ်ႊၼႆႉမႃးၵၢင်ႉၵႄႇလႄႈ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ သူင်ႇလိၵ်ႈၸူး ၵူၼ်းမိူင်း ဢၼ်ပႃးသဵၼ်ႈၸိုဝ်ႈ တႃႇႁၢပ်ႇၵၢၼ်သိုၵ်းမႂ်ႇထႅင်ႈ ဢၼ်လႆႈလိၵ်ႈပဵၼ်ၼႂ်း ဝဵင်းဢေးတႃႇယႃႇ ၊ တူၼ်ႈတီး ၊ ဝဵင်းၼမ်ႉၸၢင်လႄႈ ပိုၼ်ႉတီႈ လၢႆလၢႆၸႄႈဝဵင်း ဝႃႈၼႆ ။
တႃႇႁၢပ်ႇၵၢၼ်သိုၵ်း ၸုပ်ႈ 14 ၼႆႉ ၵၢင်ႉၵႄႇၼႂ်းပွၵ်ႉ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း သူင်ႇလိၵ်ႈၸူး ၵူၼ်းမိူင်း ၸူၵ်းမႄး ။ ၽႂ်ပႃးသဵၼ်ႈၸိုဝ်ႈၵေႃႈ တေလႆႈၵႂႃႇႁၢပ်ႇၵၢၼ်သိုၵ်း ပေႃးၽႂ်ဢမ်ႇၵႂႃႇ တေလႆႈပၼ်ငိုၼ်း ၼပ်ႉႁူဝ်သႅၼ်ပျႃး ဝႃႈၼႆ ။
ဝၼ်းတီႈ 10/06/2025 ယၢမ်းၵၢင်ၼႂ် ၵၢင်ႉၵႄႇပွၵ်ႉယွမ်ႇတႂ်ႈသိုၵ်းမၢၼ်ႈ သူင်ႇသဵၼ်ႈၸိုဝ်ႈၵူၼ်းၼုမ်ႇဢၼ်ပႃးၼႂ်းတႃႇႁၢပ်ႇၵၢၼ်သိုၵ်းၸူးၼႂ်းပွၵ်ႉ ၵၢၼ်ႇတႃႇ ၊ သူၺ်ႇတွင်ႇ ၊ ၸဵင်ႇပၢၼ်း ဝဵင်းတူၼ်ႈတီး ။ လၢတ်ႈဝႃႈႁႂ်ႈမႃးၸူၵ်းၶႅပ်းဝႂ် ၽႂ်ၸူၵ်းလႆႈၵေႃႉ တၵ်းလႆႈၵႂႃႇၾိုၵ်းၵၢၼ်သိုၵ်းၸွမ်း သိုၵ်းမၢၼ်ႈ ၸုပ်ႈ 14 ဝႃႈၼႆ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တႄႇၼႂ်းဝူင်ႈၼႆႉၵႂႃႇ ၵၢင်ႉၵႄႇၽူႈမီးပုၼ်ႈၽွၼ်းၶဝ် တေႁႃ လူင်းၵဵပ်းၵူၼ်းတႃႇႁၢပ်ႇၵၢၼ်သိုၵ်း ၸုပ်ႈ 14 ယဝ်ႉ ၊ မိူဝ်ႈဝႃးၼႆႉ ၼႂ်းပွၵ်ႉ ၵၢၼ်ႇတႃႇ ၵၢင်ႉၵႄႇၼႂ်းပွၵ်ႉ ႁႃၵဵပ်းၵူၼ်းတႃႇႁၢပ်ႇၵၢၼ်သိုၵ်းထႅင်ႈယူႇယဝ်ႉ ”- ဝႃႈၼႆ ။
တီႈဝဵင်းတူၼ်ႈတီး ပေႃးၵူၼ်းပႃးသဵၼ်ႈၸိုဝ်ႈၵႂႃႇၽိုၵ်းၵၢၼ်သိုၵ်းၼၼ်ႉ ပေႃးဢမ်ႇပၼ်ငိုၼ်း ငိူင်ႉဝႄႈဢမ်ႇလႆႈ ၊ လႆႈၵႂႃႇဢုပ်ႇဢူဝ်းငူပ်ႉငီႉၵၼ်တင်း ၵၢင်ႉၵႄႇပွၵ်ႉၽႂ်ပွၵ်ႉမၼ်းယဝ်ႉ။ လႆႈပၼ်ငိုၼ်းၼပ်ႉႁူဝ်သႅၼ်ပျႃး – ၵူၼ်းပိုၼ်ႉတီႈလၢတ်ႈ ။
ၼၢင်းယိင်းပိုၼ်ႉတီႈဢႃယု 25 လၢတ်ႈၽူႈတွႆႇႁွၵ်ႈဝႃႈ -“ မၢင်ပွၵ်ႉလႆႈပၼ် 10 ထိုင် 30 သႅၼ်ၸိူဝ်းၼႆႉလူးၵွၼ်ႇ ပွၵ်ႉ႞ လႄႈ ပွၵ်ႉ႞ ဢမ်ႇမိူၼ်ၵၼ် ။ပွၵ်ႈၼႆႉ တၢင်းပွၵ်ႉတႃႈရူတ်ႉ ( ကားကွင်းရပ်ကွက် ) ၽႂ်ပႃးသဵၼ်ႈၸိုဝ်ႈ တေလႆႈပၼ် 1ၵေႃႉ 3သႅၼ် ၊ တေလႆႈပၼ်ၼႂ်းၶၢဝ်းတၢင်းၼိုင်ႈဝူင်ႈၶႃႈဝႃႇ”- ဝႃႈၼႆ ။
တီႈဝဵင်းတူၼ်ႈတီးၼႆႉ ၵူၼ်းဢၼ်ဢမ်ႇပႃးသဵၼ်ႈၸိုဝ်ႈ တႃႇႁၢပ်ႇၵၢၼ်သိုၵ်းၼၼ်ႉၵေႃႈ လႆႈပၼ်ငိုၼ်းတႃႇၵမ်ႉၸွႆႈ ၵူၼ်းၵႂႃႇႁၢပ်ႇၵၢၼ်သိုၵ်း ။ ပွၵ်ႉၼိုင်ႈလႄႈပွၵ်ႉၼိုင်ႈ လႆႈပၼ်ဢမ်ႇမိူၼ်ၵၼ်။ မၢင်ပွၵ်ႉ လႆႈပၼ် 5 မိုၼ်ႇ ၊ မၢင်ပွၵ်ႉ လႆႈပၼ် 3 မိုၼ် ။ ပွၵ်ႉဢၼ် ဢၼ်လႆႈသႂ်ႇငိုၼ်းၼမ်သုတ်း ပဵၼ်ပွၵ်ႉလၢၼ်းမတေႃႇ ၊ သူၺ်ႇတွင်ႇ (ရွှေတောင်) ၊ မဵဝ်ႉမ( မြို့မ ) ၊ ၵၢၼ်ႇဢွၵ်ႉ ( ကန်အောက် ) ၊ ပျီႇတေႃႇသႃႇ ( ပြည်တော်သာ) ၊ ပွၵ်ႉပႃႇမႆႉ ( သစ်တော ) ၊ ပွၵ်ႉၼမ်ႉၵတ်း ( ရေအေးကွင်း ) ၸိူဝ်းၼႆႉ ဝႃႈၼႆ ။
ၵူၼ်းၼုမ်ႇၸိူဝ်းၵႂႃႇၾိုၵ်းၸုပ်ႈဢွၼ်တၢင်း ၸိူဝ်းၼၼ်ႉ ထုၵ်ႇသူင်ႇတူဝ်ၵႂႃႇၼႃႈသိုၵ်းသေ ၵႂႃႇတၢႆၼႃႈသိုၵ်းတင်းၼမ်။ ၵွပ်ႈၼႆလႄႈ ပေႃႈမႄႈ ၵူၼ်းၼုမ်ႇၼႂ်းပွၵ်ႉ ဢမ်ႇၶႂ်ႈသူင်ႇလုၵ်ႈလၢင်းၸဝ်ႈၵဝ်ႇၵႂႃႇၾိုၵ်းၵၢၼ်သိုၵ်း ။ ၵူၼ်းပႃးသဵၼ်ႈၸိုဝ်ႈ မီးၼွၵ်ႈမိူင်းၸိူဝ်းၼၼ်ႉၵေႃႈ ၵၢင်ႉၵႄႇၸႂ်ႉပွၵ်ႈမႃးႁိူၼ်းၶိုၼ်း ပေႃးဢမ်ႇပွၵ်ႈမႃးတေ တီႉၺွပ်းၵူၼ်းတီႈႁိူၼ်း လွၵ်ႈငိူင်ႈပႃးထႅင်ႈၼင်ၼႆ – ၵူၼ်းပိုၼ်ႉတီႈလၢတ်ႈ ။
ပေႃးၽွင်းသိုၵ်းမၢၼ်ႈၵဵပ်းၵူၼ်းမိူင်းတႃႇၾိုၵ်းၵၢၼ်သိုၵ်းၼႆႉ ၶႂ်ႈႁႂ်ႈၵူၼ်းပိုၼ်ႉတီႈၾၢင်ႉၵၼ်ၵႂႃႇမႃး ယၢမ်းၵၢင်ၶမ်ႈၵၢင်ၶိုၼ်း ၊ ပေႃးထုၵ်ႇတီႉၺွပ်းၵႂႃႇယဝ်ႉ တိုၼ်းဢမ်ႇၸၢင်ႈၸွႆႈဢဝ်တူဝ်မႃးၶိုၼ်း- ၵူၼ်းပိုၼ်ႉတီႈလၢတ်ႈ ။
ယၢမ်းလဵဝ် တီႈဝဵင်းတူၼ်ႈတီးၼႆႉ ဢမ်ႇဝႃႈ ၵၢင်ၼႂ် ၊ၵၢင်ၶမ်ႈ ၾၢႆႇတၢင်းပလိၵ်ႈသိုၵ်းမၢၼ်ႈ ၵူတ်ႇထတ်း ရူတ်ႉၵႃး ဢမ်ႇမီးဝတ်းဝႂ် ၼႂ်းပွၵ်ႉၼႂ်းယွမ် ယဝ်ႉသေဢမ်ႇၵႃး ၊ ၵၢင်ႉၵႄႇၼႂ်းပွၵ်ႉၵေႃႈ ႁၢင်ႈႁႅင်း သူင်ႇလိၵ်ႈၸူးၵူၼ်းမိူင်း တႃႇႁၢပ်ႇထၢမ်းၵၢင်သိုၵ်းမၢၼ်ႈ ႁဵတ်းႁႂ်ႈၵူၼ်းမိူင်း ယူႇယၢပ်ႇဢမ်ႇမီးလွင်ႈႁူမ်ႈလူမ်ႈ – ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ