ပလိၵ်ႈမၢၼ်ႈ ၵေႃႉၼိုင်ႈ တီႈႁူင်းပလိၵ်ႈၵျၢႆႉထူဝ်ႇ မိူင်းမွၼ်း လၼ်ႇၵွင်ႈယိုဝ်း ၶႃႈတူဝ်တၢႆၵႂႃႇ တီႈႁွင်ႈယူႇသဝ်းမၼ်းၸၢႆး ၼႂ်းဝၼ်းတီႈ 08/06/2025 ၼႆႉ။

ဝၼ်းၼၼ်ႉ ယၢမ်းၵၢင်ၼႂ် ၽွင်းမၼ်းၸၢႆး မီးယူႇတီႈႁွင်ႈထႅဝ်ၵေႃႉလဵဝ် ၼႂ်းဝၢင်းလုမ်းပလိၵ်ႈ ၼၼ်ႉသေ ၶႃႈတူဝ်တၢႆၵႂႃႇ။ ပူၼ်ႉမႃးပႆႇပေႃးႁိုင်ၼၼ်ႉ မၼ်းၸၢႆး တီႉၺွပ်းၵူၼ်းႁိူၼ်း ဢၼ်ၸမ်ၸႂ်ၵၼ်တင်း တပ်ႉသိုၵ်းသေ ယွၼ်းငိုၼ်း 400 သႅၼ်၊ ဝၢႆးၼၼ်ႉ ၾၢႆႇတပ်ႉသိုၵ်း မိပ်ႇငႅၼ်းမၼ်းၸၢႆးလႄႈ ထိုင်တီႈၶႃႈတူဝ်တၢႆၵႂႃႇ – ၵူၼ်းၸမ်ၸႂ်တင်း ႁူင်းပလိၵ်ႈ တွပ်ႇဝႆႉတီႈသိုဝ်ႇ Than Lwin Times ၼင်ႇၼႆ။

ၵဵဝ်ႇၵပ်းလွင်ႈၼႆႉသေ ၾၢႆႇပလိၵ်ႈသိုၵ်းမၢၼ်ႈတႄႉ ဢွၵ်ႇၶၢဝ်ႇဝႆႉဝႃႈ ၽွင်းၵူတ်ႇထတ်းရူတ်ႉၵႃး ဢမ်ႇမီးဝႂ်လၢႆႊသိၼ်ႊ တီႈတၢင်းၶဝ်ႈဝဵင်းၵျၢႆႉထူဝ်ႇၼၼ်ႉ ၺႃးသိုၵ်း PDF ယိုဝ်းတၢႆ ဝႃႈၼႆ။