ၸဝ်ႈသၢင်ႇတီႈဝတ်ႉထမ်မဝိႁႃရ ပွၵ်ႉရတၼႃႇသီႇရိ ဝဵင်းတူၼ်ႈတီး လူင်းလဵၼ်ႈၼမ်ႉတီႈၼမ်ႉမုတ်း ဝိၼ်ႇၵပႃႇ (ဝင်္ကဘာရေထွက်) သမ်ႉမႅၼ်ႈၽွင်းၾူၼ်တူၵ်းႁႅင်း ၼမ်ႉၼွင်းသေ ထုၵ်ႇလႆလွင်ႈၸွမ်းၼမ်ႉၵႂႃႇ လူႉလွၼ်ႇ 2 တူၼ်။

မိူဝ်ႈဝႃး ဝၼ်းတီႈ 08/06/2025 ယၢမ်းႁူဝ်ၶမ်ႈ 5 မူင်း ၸဝ်ႈသၢင်ႇ တီႈဝတ်ႉထမ်မဝိႁႃရ 5 တူၼ် လူင်းဢၢပ်ႇၼမ်ႉ တီႈၼမ်ႉမုတ်းဝိၼ်ႇၵပႃႇ။ ၽွင်းၾူၼ်တူၵ်းႁႅင်း ၼမ်ႉၵိုင်ႉၵၢင်ႉႁႅင်းၼၼ်ႉ တႃႇ 3 တူၼ် ၼႅတ်ႈလႅၼ်ႈၶိုၼ်ႈၾင်ႇ။ ၵိုတ်း 2 တူၼ် ဢွၵ်ႇဢမ်ႇတၼ်းပူၼ်ႉလႄႈ လႆလွင်ႈၸွမ်းႁႅင်းၼမ်ႉႁၢႆလၢႆပႅတ်ႈ။ ထိုင်မႃးမိူဝ်ႈၼႆႉ ယၢမ်းၵၢင်ၼႂ်မွၵ်ႈ 3 မူင်း ၸင်ႇႁၼ်တူဝ်တၢႆၶဝ်ၸဝ်ႈၶိုၼ်း ဝႃႈၼႆ။ 

ၵူၼ်းၸၢႆး ၸုမ်းၵႂႃႇၸွႆႈထႅမ်ႁႃတူဝ်ၸဝ်ႈသၢင်ႇၼၼ်ႉ လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဝႃး ၸဝ်ႈသၢင်ႇလူင်း ဢၢပ်ႇၼမ်ႉသေ လႆလွင်ႈၸူမ်ၼမ်ႉႁၢႆၵႂႃႇသွင်ပႃး၊ ၸူမ်မိူဝ်ႈ 5 မူင်းႁူဝ်ၶမ်ႈ။ ၼႂ်ၼႆႉ ၵၢင်ၼႂ်မွၵ်ႈ  3 မူင်းၼႆႉ ၸင်ႇႁႃႁၼ်ၶိုၼ်း ၊ ၾူၼ်ၵေႃႈ တူၵ်းႁႅင်းၼႃႇ။ ၼမ်ႉၵေႃႈၼွင်းယႂ်ႇၼႃႇ။ ၵူၼ်းၼႂ်းပွၵ်ႉၼႂ်းယွမ်ႇ ဢွၼ်ၵၼ်ၸွႆႈႁႃလႄႈ ၸင်ႇႁၼ်ၶိုၼ်းၼႂ်ၼႆႉၸဵမ်ၸဝ်ႉ။ ၶၢပ်ႈတူဝ်ၶဝ်ၸဝ်ႈတႄႉ ဢဝ်ၵႂႃႇဝႆႉတီႈႁူင်းယႃ ၸဝ်ႈၸၢမ်ႇထုၼ်းယဝ်ႉ”- ဝႃႈၼႆ။

ၸဝ်ႈသၢင်ႇသွင်တူၼ် ဢၼ်လႆႈလူႉလွၼ်ႇလွင်ႈၼမ်ႉၵႂႃႇၼၼ်ႉ ပဵၼ်ၵူၼ်းတၢင်း ဝဵင်းပၢင်လွင်း၊ သီႇသႅင်ႇသေ မႃးႁဵၼ်းလိၵ်ႈဝႆႉတီႈဝတ်ႉထမ်မဝိႁႃရ ဢၼ်မီးၼႂ်းပွၵ်ႉၶျၢၼ်းမျႃႉတႃႇသီႇ တီႈဝဵင်းတူၼ်ႈတီး – ၵူၼ်းပိုၼ်ႉတီႈလၢတ်ႈၼင်ႇၼႆ။

ယၢမ်းလဵဝ် ပဵၼ်ၶၢဝ်းၾူၼ်လႄႈ ၶႂ်ႈႁႂ်ႈၾၢင်ႉလဵၼ်ႈၼမ်ႉၼႂ်းၼွင်ၼႂ်းႁွင်ႈၼမ်ႉ ယွၼ်ႉၼမ်ႉ ၸၢင်ႈၵိုင်ႉၵၢင်ႉ ၼွင်းၶိုၼ်ႈ၊ ဢွၼ်တၢင်းၵေႃႈ တီႈႁွင်ႈၼမ်ႉ ဝိၼ်ႇၵပႃႇၼၼ်ႉၵေႃႈ မီးၵူၼ်းယၢမ်ႈၸူမ်ၼမ်ႉတၢႆၼႆ –  ၵူၼ်းၸၢႆးပိုၼ်ႉတီႈလၢတ်ႈ။

တေႃႈလဵဝ်ၼႆႉ ပဵၼ်ၶၢဝ်းၾူၼ်လႄႈ ၼမ်ႉႁူၺ်ႈၼမ်ႉလွႆ ၸၢင်ႈၵိုင်ႉၵၢင်ႉၼွင်း၊ ယွၼ်ႉၼၼ် ဢမ်ႇၶႂ်ႈႁႂ်ႈ လုၵ်ႈဢွၼ်ႇလူင်းလဵၼ်ႈၼမ်ႉ ၼႂ်းၶူးၼႂ်းႁွင်ႈ။ ယွၼ်ႉမီးၽေးၼမ်။ တီႈၼမ်ႉမုတ်း (ႁူဝ်ၼမ်ႉ) ဝိၼ်ႇၵပႃႇၼႆႉ မိူဝ်ႈၵူႈပီၵေႃႈ ၵႆႉမီးလုၵ်ႈဢွၼ်ႇၸူမ်ၼမ်ႉတၢႆ။ ၵွပ်ႈၼႆ ၶႂ်ႈႁႂ်ႈပေႃႈမႄႈလုၵ်ႈဢွၼ်ႇ သင်ႇလၢတ်ႈဝႆႉ လုၵ်ႈလၢင်းၽႂ်မၼ်း ႁႂ်ႈၾၢင်ႉ၊ ယႃႇလူင်းလဵၼ်ႈၼမ်ႉ လိုမ်းႁၢင်ႈလိုမ်းတူဝ် – ဝႃႈၼႆ။   

မိူၼ်ၼင်ႇၼႆ ၼႂ်းဝၼ်းတီႈ 25/05/2025 ၼၼ်ႉၵေႃႈ လုၵ်ႈဢွၼ်ႇ ဢႃယု 9 ၶူပ်ႇ ဢၼ်ပၢႆႈၽေးသိုၵ်း မႃးယူႇဝႆႉတီႈသူၺ်ႇၺွင်ႇ ၼၼ်ႉၵေႃႈ ပလၢတ်ႈတူၵ်းၶူဝ်မႆႉပူၵ်ႇသေ လွင်ႈၼမ်ႉတၢႆၵေႃႉၼိုင်ႈ။