တႄႇႁၢင်လိူၼ်မေႊၼႆႉမႃး ၾူၼ်တူၵ်းဢမ်ႇထၢတ်ႇ ႁဵတ်းႁႂ်ႈတူၼ်ႈမႆႉလူမ်ႉ ၊ သဵၼ်ႈတၢင်းလူႉၵွႆ ၾႆးၾႃႉၶၢတ်ႇ ၊ ၼမ်ႉၶၢတ်ႇ တီႈၼႂ်းၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း သိုၵ်းမၢၼ်ႈသမ်ႉ ဢမ်ႇပၼ်ၸႂ်ႉၾူၼ်းထႅင်ႈ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ်။
ၼၢင်းယိင်း ၵူၼ်းမိူင်းဝဵင်းယႂႃႇငၢၼ်ႇ လၢတ်ႈၽူႈတွႆႇႁွၵ်ႈဝႃႈ -“ၸဵမ်မိူဝ်ႈ ၾူၼ်တူၵ်းဢမ်ႇထၢတ်ႇ ႁၢင်လိူၼ် မေႊၼႆႉမႃး ၾႆးဢမ်ႇမႃးၼႆႉမီး 15 ဝၼ်းယဝ်ႉ၊ ၼမ်ႉၵေႃႈ ဢမ်ႇလႆႈ၊ ယွၼ်ႉတူၼ်ႈမႆႉ လူမ်ႉတဵင်တၢင်း ၊ တဵင်တေႃႈၼမ်ႉလႄႈ ၼမ်ႉၵေႃႈဢမ်ႇလႆႈ မီးၸမ် 10 ဝၼ်းယဝ်ႉ၊ လႅတ်ႇဢွၵ်ႇမႃးၼႆႉ တိုၵ်ႉမီးမိူဝ်ႈဝႃး မိူဝ်ႈၼႆႉၵူၺ်း”- ဝႃႈၼႆ။
ယွၼ်ႉၾႆးၾႃႉ ဢမ်ႇလႆႈလႄႈ မိူဝ်ႈဝႃး ဝၼ်းတီႈ 04/06/2025 ယၢမ်းဝၢႆးဝၼ်း ၵူၼ်းမႄးၾႆးၵေႃႉၼိုင်ႈ ၶိုၼ်ႈသဝ်လၵ်းၾႆး ဢၢၼ်းၵႂႃႇမႄးၾႆးၾႃႉ၊ ထုၵ်ႇၾႆးၾႃႉသျွတ်ႉတၢႆ ပဵၼ်တီႈၼႂ်းၵႄႈ ဝၢၼ်ႈၵုင်းသိမ်ႇ (သိမ်ကုန်း) လႄႈ ၼွင်လူင် (အင်းကြီး)။
ၼၢင်းယိင်း ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဝႃး ၾူၼ်ၵေႃႈ ဢမ်ႇတူၵ်းယဝ်ႉလႄႈ ၵူၼ်းမႄးၾႆး ၵေႃႉၼိုင်ႈ မႃးၶိုၼ်ႈသဝ်ၾႆး ဢၢၼ်းမႄးၾႆးပၼ်ၵူၼ်းဝၢၼ်ႈၼႆ။ ၽွင်းၼၼ်ႉ လႅပ်ႈၶဝ်တေၵိုင်ႉၵၢင်ႉ ပွႆႇၾႆးၾႃႉႁိုဝ်ဢမ်ႇႁူႉ။ ဢဝ်ၾႆးသျွတ်ႉပႃးမၼ်းသေ တၢႆၶမ်သဝ်ၾႆးၼၼ်ႉၶႃႈဢိူဝ်ႈ။ ၶဝ်တေဢမ်ႇပွင်ႇ ၵၼ်လီလီယူဝ်ႉ။ ယွၼ်ႉၼၼ် ၶဝ်ၵေႃႈၼႅတ်ႈပိၵ်ႉပႅတ်ႈၾႆးၶိုၼ်းၵမ်းလဵဝ်။ တေႃႇထိုင်ယၢမ်းလဵဝ် ၾႆးၾႃႉ ၵေႃႈဢမ်ႇလႆႈၶိုၼ်းယဝ်ႉ”- ဝႃႈၼႆ။
ၵေႃႉဢၼ်ၶိုၼ်ႈမႄးၾႆးသေ ၺႃးၾႆးသျွတ်ႉတၢႆထင်တီႈၼၼ်ႉ ၸိုဝ်ႈႁွင်ႉၵူဝ်ႇတႃးလေး (ကိုသားလေး) ဢႃ ယု 20 ပၢႆ ပဵၼ်ၵူၼ်းဝၢၼ်ႈယေႇၶျၢၼ်းပျိၼ်ႇ (ရေချမ်းပြင်) ႁဵတ်းၵၢၼ် တီႈႁွင်ႈၵၢၼ်ၾၢႆႇၾႆးၾႃႉ တီႈဝဵင်း ယႂႃႇငၢၼ်ႇ လႆႈႁူႉၼင်ႇၼႆ။
လိူဝ်ၼၼ်ႉ တႄႇႁူဝ်လိူၼ်မေႊၼႆႉမႃးတေႃႇထိုင် ၼႂ်းႁူဝ်လိူၼ်ၵျုၼ်ႊ ၾၢႆႇတၢင်းသိုၵ်းမၢၼ်ႈ ထႅမ်ႁႅင်း သိုၵ်း ၶဝ်ႈၼႂ်းဝၢၼ်ႈၼပၢၼ်းၵျီးထႅင်ႈ။ ၽွင်းသိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈဝၢၼ်ႈမႃး ဢမ်ႇပၼ်ၸႂ်ႉၾူၼ်း မိုဝ်းထိုဝ်၊ ဢမ်ႇပၼ်ၵပ်းသိုပ်ႇတိတ်းတေႃႇၵၼ် ၵူတ်ႇထတ်းၵူၼ်းၶဝ်ႈဢွၵ်ႇၼႂ်းဝၢၼ်ႈႁၢဝ်ႈႁႅင်း ႁဵတ်းႁႂ်ႈ ၵူၼ်းပိုၼ်ႉတီႈ ယၢပ်ႇၽိုတ်ႇၵိၼ်းၸႂ် – ဝႃႈ ၼႆ။
ၼၢင်းယိင်းပိုၼ်ႉတီႈ ဝဵင်းယႂႃႇငၢၼ် လၢတ်ႈၽူႈတွႆႇႁွၵ်ႈဝႃႈ – “တီႈဝၢၼ်ႈၼပၢၼ်းၵျီးတႄႉ ၶဝ်ထတ်းၵူၼ်း ၶဝ်ႈဢွၵ်ႇႁႅင်းၼႃႇ ပေႃးတေၵႂႃႇမႃးၵေႃႈ လႆႈပၼ်ဝႆႉမၢႆၾၢင်တီႈၵဵတ်ႉလၢၼ်ႇသေဢမ်ႇၵႃး တေၵႂႃႇလၢႆ မူင်းၼႆ လႆႈလၢတ်ႈပႃး ယဝ်ႉၵေႃႈ လႆႈလူင်းလၢႆးမိုဝ်းထႅင်ႈ၊ ပေႃးတေၵႂႃႇတၢင်းလႂ်ၵေႃႈ လႆႈၵူဝ်ၼႃႇ ၊ ၾူၼ်း ၸိူဝ်းၼႆႉၵေႃႈ ဢမ်ႇႁတ်းၸႂ်ႉၾၢႆႇၼႃႈၶဝ်”- ဝႃႈၼႆ။
ယၢမ်းလဵဝ် တီႈၼႂ်းၸႄႈဝဵင်းယႂႃႇငၢၼ်ႇ ဢိူင်ႇဝၢၼ်ႈၵုင်းသိမ်ႇ ၾႆးၾႃႉၶၢတ်ႇ ၊ ၼမ်ႉဢမ်ႇလႆႈ ၊ လႅင်းၾူၼ်းလႅင်းဢိၼ်ႊတိူဝ်ႊၼႅတ်ႊ ဢမ်ႇလႆႈႁဵတ်းႁႂ်ႈၵူၼ်းပိုၼ်ႉတီႈ ယူႇယၢပ်ႇ ၵိၼ်းၸႂ်ဝႆႉ – ၵူၼ်းပိုၼ်ႉတီႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ