လူင်ပွင်ၸိုင်ႈ မိူင်းဝႅတ်ႉၼၢမ်း ၸီႉသင်ႇ ႁႂ်ႈၶွမ်ႊပၼီႊၾၢႆႇၵၢၼ်ၵပ်းသိုပ်ႇၶဝ် ပိၵ်ႉဢိုတ်းပႅတ်ႈ Telegram  ယွၼ်ႉဢမ်ႇပၼ်တင်းႁူမ်ႈမိုဝ်း ၼႂ်းၵၢၼ်တိုၵ်းတေႃးၽဵဝ်ႈမူၺ်ႉ ၵၢၼ်ၽိတ်ႈရႃႇၸဝတ်ႈ ၼႂ်းမိူင်းဝႅတ်ႉ ၼၢမ်း ဝႃႈၼႆ။

ဝၼ်းတီႈ 21/05/2025 ၼႆႉ ႁွင်ႈၵၢၼ် ၽွင်းလူင်ၾၢႆႇပၢႆးၸၢၵ်ႈ မိူင်းဝႅတ်ႉၼၢမ်း ဢွၵ်ႇလိၵ်ႈပိုၼ်ၽၢဝ်ႇ ၽိုၼ် ၼိုင်ႈ။ ၼႂ်းၼၼ်ႉပႃးဝႆႉဝႃႈ ဝၼ်းတီႈ 2 လိူၼ်ၵျုၼ်ႊၼႆႉ ဝႆႉပဵၼ်ဝၼ်းလိုၼ်းသုတ်းသေ ႁႂ်ႈၶွမ်ႊပၼီႊ ၾၢႆႇ ၵၢၼ်ၵပ်းသိုပ်ႇၶဝ် ပိၵ်ႉဢိုတ်းပႅတ်ႈ Telegram ဝႃႈၼႆ။

ႁွင်ႈၵၢၼ် ၽွင်းလူင်ၾၢႆႇၵၢၼ်ၵပ်းသိုပ်ႇ လၢတ်ႈဝႃႈ – ၶျွင်ႉ Telegram ၼႂ်းမိူင်းဝႅတ်ႉၼၢမ်း တႃႇ 9,600 ၶျႂင်ႉ (68%) ၼႆႉ ၵဵဝ်ႇၶွင်ႈၵၼ်တင်း ၵၢၼ်လွၵ်ႇလႅၼ်ၵိၼ်ငိုၼ်း၊ ၵၢၼ်ၵႃႉၶၢႆယႃႈမဝ်းၵမ်လႄႈတင်း လွင်ႈၵေႃႇ ၵၢၼ်ႁၢႆႉ ၸိူဝ်းၼႆႉ။ ၵဵဝ်ႇလူၺ်ႈလွင်ႈၸိူဝ်းၼႆႉ မိူဝ်ႈပူၼ်ႉမႃးၵေႃႈ ၸုမ်းပလိၵ်ႈၶဝ် ယၢမ်ႈပၼ်ၾၢင်ႉဝႆႉယူႇ ဝႃႈၼႆ။

တႃႇတေၵူတ်ႇထတ်း ၵူၼ်းႁဵတ်းၽိတ်းမၢႆမီႈၸိူဝ်းၼၼ်ႉၼႆသေ ယူႇတီႈ Telegram ဢမ်ႇယွမ်းသူင်ႇပၼ် ၶေႃႈမုလ်း ဢၼ်ၾၢႆႇလူင်ပွင်ၸိုင်ႈ တုၵ်းယွၼ်းလႄႈ ဢမ်ႇပၼ်တင်းႁူမ်ႈမိုဝ်းၸွမ်း ၼႆယဝ်ႉ။

Telegram ၼႆႉပဵၼ် application ဢၼ်မီးၵူၼ်းၸႂ်ႉတိုဝ်းၼမ် မိူၼ်ၵၼ်တင်း Facebook လႄႈ Instagram ။ တေႃႇထိုင်ဝၼ်းတီႈ 23 လိူၼ်မေႊၼႆႉတႄႉ တီႈမိူင်းဝႅတ်ႉၼၢမ်း တိုၵ်ႉၸႂ်ႉတိုဝ်း Telegram လႆႈယူႇ – သိုဝ်ႇၶၢဝ်ႇ Reuters ဢွၵ်ႇဝႆႉၼင်ႇၼႆ။