တၢင်းပဵၼ် ၶႆႈဝတ်းယႂ်ႇ လၢမ်းၽႄႈၼႂ်းသူၼ်သတ်း တီႈမိူင်းဝႅတ်ႉၼၢမ်း (Vietnam) ႁၢဝ်ႈႁႅင်း သိူဝ်တင်း သၢင်ႇသီႈ လူႉတၢႆၸမ် 50 တူဝ်ၼႆ ႁွင်ႈၵၢၼ်ၶၢဝ်ႇ မိူင်းဝႅတ်ႉၼၢမ်း ပိုၼ်ၽၢဝ်ႇပဵၼ်တၢင်းၵၢၼ်ဝႆႉ ၼင်ႇၼႆ။

တႄႇႁၢင် လိူၼ်ဢေႃႊၵတ်ႊသ်ပူၼ်ႉမႃး မူင်ႈမႅင်းတၢင်းပဵၼ်ၶႆႈဝတ်းယႂ်ႇ H5N1 လၢမ်းၽႄႈ ၼႂ်းသူၼ်သတ်း Vuon Xoai လႄႈ My Quynh ဢၼ်မီးတီႈဝဵင်းႁူဝ်ႇၶျီႊမိၼ်ႊတင်း ၸႄႈမိူင်းႁိမ်းႁွမ်း ၼႂ်းမိူင်းဝႅတ်ႉၼၢမ်းသေ သၢင်ႇသီႈ 3 တူဝ်လႄႈ သိူဝ် 40 ပၢႆ လူႉတၢႆၵႂႃႇ ဝႃႈၼႆ။

ဢိင်ၼိူဝ်လွင်ႈၼႆႉ ၽူႈမီးပုၼ်ႈၽွၼ်းၶဝ် လၢမ်းၶၢတ်ႈဝႃႈ ၵူၼ်းလဵင်ႉသတ်း တီႈသူၼ်သတ်းၼၼ်ႉ လႅပ်ႈဢဝ် ၵႆႇဢၼ်ၸပ်းတၢင်းပဵၼ်ဝႆႉ လဵင်ႉလူၶဝ်လႄႈ သၢင်ႇသီႈတင်းသိူဝ် သိုပ်ႇၸပ်းတၢင်းပဵၼ် လူႉတၢႆၵႂႃႇ ဝႃႈၼႆ။

ၸုမ်းပၢႆးယူႇလီလုမ်ႈၾႃႉ တိုၵ်းသူၼ်းဝႆႉဝႃႈ ဢွင်ႈတီႈၸပ်းတၢင်းပဵၼ်ၸိူဝ်းၼႆႉ ႁႂ်ႈငိူင်ႉဝႄႈလွင်ႈၵိၼ်ၼိူဝ်ႉ လွင်ႈ ၵိၼ်ၼိူဝ်ႉဢမ်ႇသုၵ်းဢမ်ႇလိပ်းၸိူင်ႉၼၼ် ဝႃႈၼႆ။

မူင်ႈမႅင်းတၢင်းပဵၼ်ၼႆႉ တိတ်းၸပ်းတီႈတူဝ်သတ်းတိူဝ်းၼမ်၊ ဢၼ်တိတ်းၸပ်းတီႈၵူၼ်းၼႆႉၵေႃႈ ယွၼ်ႉပိူဝ်ႈ ၵူၼ်း ၵႂႃႇယူႇၸမ် ယိပ်းတိူဝ်ႉ တူဝ်သတ်းဢၼ်မီးတၢင်းပဵၼ်ၸိူဝ်းၼၼ်ႉလႄႈ ၸင်ႇလႆႈလၢမ်းၽႄႈတိတ်းၸပ်းမႃး ဝႃႈၼႆ။

မိူဝ်ႈပီၵၢႆ တၢင်းပဵၼ်ၶႆႈဝတ်းယႂ်ႇ တိတ်းၸပ်းၵူၼ်း မီးၸမ် 900 ၵေႃႉ၊ ၼႂ်းၼၼ်ႉ လူႉတၢႆၵႂႃႇမွၵ်ႈ 500 ၼႆ ပိုၼ်ၽၢဝ်ႇပႃးဝႆႉၼင်ႇၼႆ။

ဢၢင်ႈဢိင် – Voice of Myanmar