ၶၢဝ်းၽွင်းဝၢၼ်ႈမိူင်းယုင်ႈၼႆႉ ၵူၼ်းမိူင်းႁူမ်ႈတုမ် ၽၢတ်ႇႁိူၼ်းယေးသေ ၶဝ်ႈမိူင်းထႆးတင်းၼမ်။ ၼႂ်းၵႄႈၼၼ်ႉ သမ်ႉၺႃးပၵ်းပိူင်ၸိုင်ႈမိူင်း မိူင်းထႆး – မိူင်းမၢၼ်ႈ ႁိပ်ႇထႅင်ႈလႄႈ ယူႇယၢပ်ႇၼႂ်းၵႄႈမိူင်းပိူၼ်ႈ။

ၼႂ်းပီ 2025 ၼႆႉ ပၼ်ႁႃလွင်ႈဝတ်းဝႂ်ၼမ်ၶိုၼ်ႈမႃး။ ၸိူဝ်းတေႃႇဝီႊသႃႊပႆႇ လႆႈၸိူဝ်းၼႆႉၵေႃႈ မီးတင်းၼမ်။ ၵမ်ႈၼမ် ပၼ်သဵၼ်ႈၸိုဝ်ႈတႃႇတေႃႇဝီႊသႃႇသေ သဵင်ႈငိုၼ်းဝႆႉယဝ်ႉသေတႃႉ ပႆႇလႆႈတွၵ်ႇၸုမ်ႈ ပဵၼ်တၢင်းၵၢၼ် ၵေႃႈမီး။ ၵူၺ်းၵႃႈ လွင်ႈႁၢႆးငၢၼ်းတူဝ် 90 ဝၼ်းတႄႉ တိုၵ်ႉလႆႈႁဵတ်းမိူၼ်ၵဝ်ႇ။ ၸိူဝ်းဢမ်ႇပွင်ႇၸႂ်သမ်ႉ ဢမ်ႇလႆႈႁၢႆးငၢၼ်းတူဝ်လႄႈ ၺႃးတၢမ်ႇငိုၼ်းၵၼ် ၵေႃႈမီး။

ၸွမ်းၼင်ႇ ၼႂ်းပၵ်းပိူင်ထႆး မီးဝႆႉတႄႉ ႁႅင်းၵၢၼ် ၸိူဝ်းယိပ်းဝႆႉ ပပ်ႉၶၢမ်ႈမိူင်း သီလႅင် သီၶဵဝ် ၸိူဝ်းၼႆႉ တၵ်းလူဝ်ႇလႆႈ ႁၢႆးငၢၼ်းတူဝ် ၸွမ်းၼင်ႇ တတ်းမၵ်းဝႆႉၶၢဝ်းယၢမ်း။

ဝႂ်ႁၢႆးငၢၼ်းတူဝ်ၼႆႉ ဢမ်ႇၸႂ်ႈတႃႇၵႂႃႇယွၼ်းၶႂၢင်ႉယူႇၼႂ်းမိူင်းထႆး မၼ်းပဵၼ်ဝႂ်ဢၼ်ၵႂႃႇၸႅင်ႈၼႄ ၾၢႆႇ ၵူတ်ႇထတ်း ၵူၼ်းၶဝ်ႈမိူင်းၶဝ်ဝႃႈ ႁဝ်းတိုၵ်ႉယူႇသဝ်းၼႂ်းမိူင်းထႆး ၼႆၼၼ်ႉ ၵူၺ်း။ သင်ဝႃႈ တဵမ် 90 ဝၼ်းလႄႈ ဢမ်ႇၵႂႃႇႁၢႆးငၢၼ်းတူဝ်ၸိုင် တၵ်းၺႃးတၢမ်ႇငိုၼ်း ဢမ်ႇယွမ်း 2,000 ဝၢတ်ႇၼႆ – ၸဝ်ႈၼႃႈ တီႈၾၢႆႇၵဵဝ်ႇၶွင်ႈပိုၼ်ၽၢဝ်ႇဝႆႉ။

ၵွၼ်ႇပႆႇတဵမ် 90 ဝၼ်းၵေႃႈ ၵႂႃႇႁၢႆးငၢၼ်းတူဝ်လႆႈလူင်ၼႃႈ15 ဝၼ်း (ႁိုဝ်ဢမ်ႇၼၼ်) ဝၢႆးတဵမ် 90 ဝၼ်း ယဝ်ႉ ၸင်ႇၵႂႃႇႁၢႆးငၢၼ်းတူဝ်ႈၵေႃႈလႆႈ။ ၵူၺ်းၵႃႈ တေဢမ်ႇလႆႈပူၼ်ႉ 7 ဝၼ်းၼႆ မိူၼ်ၼင်ႇ ၵူႈၵေႃႉႁူႉ ၼၼ်ႉယဝ်ႉ။

ယၢမ်းလဵဝ်ၼႆႉသမ်ႉ ၵူၼ်းၵဝ်ႇ ၸိူဝ်းပႂ်ႉဝီႊသႃႊလႄႈ ဝႂ်ႁဵတ်းၵၢၼ် – ၼႂ်းလိူၼ်ဢေႊပရိူဝ်ႊလ် – မေႊ-ၵျုၼ်ႊၼႆႉ ၸဝ်ႈၼႃႈတီႈထႆး ပၼ်ဝႂ်ႁၢႆးငၢၼ်းတူဝ်ဝႆႉပဵၼ်ဝႂ်ၸူဝ်ႈၶၢဝ်းၵူၺ်း။ ဝႂ်ၸူဝ်ႈၶၢဝ်းဢၼ်လႆႈမႃး ၼႆႉ ပဵင်းမွၵ်ႈဝတ်း (မၢႆၾၢင်ၼႆႉၵူၺ်း) သမ်ႉပဵၼ်ၸေႈ ဢၼ်ယႅၵ်ႈဝႆႉသီ မိူၼ်ၼင်ႇ – ၶၢဝ်၊ ၶဵဝ်၊ သွမ်ႇ လႄႈ သီၵမ်ႇ။ 

ၼႂ်းၼၼ်ႉ ဢမ်ႇတႅမ်ႈဝႆႉပႃး ဝၼ်းမူတ်းဢႃယု ၊ ပႃးဝၼ်းၵႂႃႇတေႃႇမႃးၼၼ်ႉၵူၺ်း။ ၸင်ႇဝႃႈ တေတဵမ် 90 ဝၼ်းမိူဝ်ႈလႂ်ၼႆ လႆႈၼပ်ႉဢဝ်ႁင်းၵူၺ်း။ သင်ဢမ်ႇပွင်ႇၸႂ် ဢမ်ႇၼပ်ႉသွၼ်ႇမႅၼ်ႈသေ ပူၼ်ႉၵႂႃႇ 90 ဝၼ်းၸိုင် ၺႃးတၢမ်ႇငိုၼ်းဢမ်ႇႁၢင်ႉ။

ၵူၼ်းႁဵတ်းၵၢၼ် ၼႂ်းဢေႊၵျႅၼ်ႊသီႊ ႁပ်ႉႁဵတ်းဝတ်းဝႂ် ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ၵူၼ်းလူင်ၶဝ်ဝႃႈ ပေႃးဢမ်ႇႁၢႆးငၢၼ်းဢမ်ႇလႆႈ ၼႆႉၼၼ်ႉၼႃႇ။ ၶဝ်တင်ႈၸႂ်ႁဵတ်းၼၼ်ႉၼႃႇ ၾၢႆႇ မၢၼ်ႈၶဝ် ၼၢၼ်းတူၵ်းလူင်းပၼ်ၼႃႇလူး။ ထႆးၶဝ်ၵေႃႈဝႃႈ ၵူၼ်းၵေႃႈၵူၼ်းမိူင်းသူၵူၺ်း သူဢမ်ႇၶႂ်ႈ ႁဵတ်းပၼ်လီလီၼႆ ၶဵင်ႇၶႃၵၼ်ၼၼ်ႉၼႃႇ။ ဢၼ်ၽူႈပွင်မိူင်း မိူင်းထႆး – မိူင်းမၢၼ်ႈ ၶႃၵၼ်တႄႉ ဢမ်ႇၵႃႈႁိုဝ် ဢၼ်လႆႈၶၢမ်ႇတၢမ်ႇ ယၢပ်ႇၸွမ်းသမ်ႉ ပဵၼ်ႁႅင်း ၵၢၼ် ၼၼ်ႉယဝ်ႉ။ ထႆးတႄႉ ၶႂ်ႈႁဵတ်းပၼ်ၼႃႇ ယဝ်ႉ မၢၼ်ႈသမ်ႉဢမ်ႇယွမ်းၼၼ်ႉၼႃႇ”- ဝႃႈၼႆ။

ဢၼ်ၸဝ်ႈၼႃႈတီႈ သွင်ၸိုင်ႈမိူင်းႁဵတ်းယူႇယၢမ်းလဵဝ်ၼႆႉ ႁဵတ်းႁႂ်ႈႁႅင်းၵၢၼ်ယၢၼ်မိူင်း လႆႈယၢပ်ႇၸႂ် ၸွမ်းၼႂ်းၵႄႈမၼ်းလႄႈ သဵင်ႈငိုၼ်းၸွမ်းထႅင်ႈၵူၺ်း၊ ဢမ်ႇမီးၽွၼ်းလီသင် –  ၵူၼ်းဢၼ်ႁပ်ႉႁဵတ်း ဝတ်းၸွႆႈႁႅင်းၵၢၼ် ဢွၼ်ၵၼ်လၢတ်ႈၼင်ႇၼႆ။  

ၼႂ်းပီ 2025 ၼႆႉ ဝၢႆးသေ ႁႅင်းၵၢၼ် ၵႂႃႇပၼ်သဵၼ်ႈၸိုဝ်ႈ တႃႇတေႃႇဝီႊသႃႊယဝ်ႉၼၼ်ႉ ၸဝ်ႈၼႃႈတီႈ ၶဝ်ပၼ်ဝႆႉ ဝႂ်ႁၢႆးငၢၼ်းတူဝ်ၸူဝ်ႈၶၢဝ်း။ ဝႂ်ဢွၼ်တၢင်းသုတ်း ဢၼ်ၶဝ်ပၼ်ၼႂ်းလိူၼ်ၾႅပ်ႊပိဝ်ႊရီႊ (လိူၼ်ထူၼ်ႈ 2 ) ပီ 2025 ၼႆႉ ပဵၼ်သီၶၢဝ် ၊ ၼႂ်းလိူၼ်ထူၼ်ႈ 5 (မေႊ) ၼႆႉ တဵမ် 90 ဝၼ်း။

သင်ဢဝ်ဝႂ်သီၶၢဝ်ၼၼ်ႉ ၵႂႃႇလၢႆးငၢၼ်းတူဝ်သေ တေႃႇဢႃယုမႃး တေလႆႈမႃးၶႅပ်းဝႂ် သီသွမ်ႇ၊ ပေႃး ဢဝ်ဝႂ်သီသွမ်ႇၼၼ်ႉ ၵႂႃႇတေႃႇဢႃယုမႃး သမ်ႉတေလႆႈမႃးၶႅပ်းဝႂ်သီၵမ်ႇ။ ဝၢႆးသီၵမ်ႇယဝ်ႉ တေပဵၼ် ထႅင်ႈ သီၶဵဝ်ၼႆ ၽူႈႁဵတ်းၵၢၼ်ၼႂ်းၸုမ်းဢေႊၵျႅၼ်ႊ ႁပ်ႉႁဵတ်းဝတ်းဝႂ် ၵေႃႉၼိုင်ႈ ပိုၼ်ၽၢဝ်ႇလၢတ်ႈ ၼိူဝ်ဢွၼ်ႊလၢႆႊ ဝႆႉၼင်ႇၼႆ။

ပေႃးၵဵဝ်ႇလူၺ်ႈလွင်ႈ ၽၢတ်ႊသပွတ်ႊလႄႈ ဝီႊသႃႊၼႆႉမႃး တီႈတႄႉမၼ်း ဢမ်ႇလွတ်ႈလႆႈ ၽူႈၵဵဝ်ႇ ၶွင်ႈၾၢႆႇမိူင်းမၢၼ်ႈ။ ၵူၺ်းၵႃႈ မိူင်းမၢၼ်ႈသမ်ႉ တေႁဵတ်းသင်ၵေႃႈ ဢမ်ႇတႅၵ်ႇလႅင်း။ လွင်ႈၸိူဝ်းၼႆႉ ၶဝ်တေဢဝ်ပုၼ်ႈၽွၼ်း ၵႄႈလိတ်ႈပၼ်ၸိူင်ႉႁိုဝ်ၼႆၵေႃႈ ဢမ်ႇသႂ်ႇၸႂ်ၵမ်ႉၸွႆႈသင်ပၼ်။ မိူဝ်ႈလဵဝ် 2025 ပေႃးတူၵ်းၶိုင်ႈယဝ်ႉၵေႃႈ ႁႅင်းၵၢၼ်ၸိူဝ်းယွၼ်းဝီႊသႃႊ ပႆႇလႆႈမီးတင်းၼမ်တင်းလၢႆ ၼႆယဝ်ႉ။

ၼႂ်းၵႄႈငဝ်းလၢႆးမိူင်းမၢၼ်ႈလႅၵ်ႈလၢႆႈၼႆႉ ၼႂ်းသၽႃးမိူင်းထႆးၵေႃႈ လႆႈဢုပ်ႇၵၼ်လၢႆလွင်ႈ ၊ ဢိင်ၼိူဝ် လွင်ႈတေႃႇဝတ်းဝႂ်ႁႅင်းၵၢၼ်ယၢၼ်မိူင်းၼႆႉ ၾၢႆႇမၢၼ်ႈ ဢမ်ႇတူင်ႉၼိုင်သင်ပၼ်ၵေႃႈ ၾၢႆႇထႆးတေ ၸတ်းၵႂႃႇႁင်းၵူၺ်းၼႆ ၶၢဝ်ႇလိုဝ်းဝႆႉယူႇၵမ်းၼိုင်ႈ။

ၵူၺ်းၵႃႈ ၾၢႆႇမၢၼ်ႈသမ်ႉဝႃႈ ဢမ်ႇၸႂ်ႈၵူၼ်းထႆးလႄႈ လူင်ပွင်ၸိုင်ႈထႆး တေၸတ်းလွင်ႈၼႆႉၵႂႃႇႁင်း ၵူၺ်း ဢမ်ႇလႆႈၼႆသေ ပဵၼ်လွင်ႈၶွင်ႈၶမ်ၵၼ်ဝႆႉၼႆ ၽူႈၸွႆႈႁႅင်းၵၼ်ၵေႃႉၼိုင်ႈလၢတ်ႈ။

မိူဝ်ႈလဵဝ် ႁႅင်းၵၢၼ်ယၢၼ်မိူင်း ၸိူဝ်းဝီႊသႃႊမူတ်းဝႆႉၸိူဝ်းၼႆႉ လူင်ပွင်ၸိုင်ႈထႆး ႁပ်ႉတေႃႇပၼ်ယဝ်ႉ ဝႃႈၼႆသေတႃႉ ထိုင်မိူဝ်ႈလဵဝ် ဢၼ်ပႆႇတွၵ်ႇၸုမ်ႈဝီႊသႃႊပၼ်ပဵၼ်တၢင်းၵၢၼ် မီးတင်းၼမ်။

မိူဝ်ႈၽူႈၵဵဝ်ႇၶွင်ႈၶဝ် ပိုၼ်ၽၢဝ်ႇလၢတ်ႈတႄႉ ႁႅင်းၵၢၼ်ဢၼ်ယၢမ်ႈမီးဝႆႉ ဝႂ်ႁဵတ်းၵၢၼ် work permit ၸိူဝ်းၼၼ်ႉ ဝၢႆးသေဢႃယုမူတ်းၵႂႃႇယဝ်ႉ သင်တေႃႇထႅင်ႈ တေၸႂ်ႉလႆႈတႃႇၶၢဝ်းတၢင်း 2 ပီ ။

ဝႃႈၼၼ်သေတႃႉ ၵူၼ်းၸိူဝ်းဢၼ် ဝတ်းဝႂ်မူတ်းဢႃယု ၼႂ်း 2024 သေ တေႃႇဝႆႉထႅင်ႈၼၼ်ႉ  ထိုင် ၵၢင်ပီ 2025 ယင်းပႆႇလႆႈဝႂ်မၼ်းပဵၼ်တၢင်းၵၢၼ်။ ၵႂႃႇလႂ်မႃးလႂ်ၵေႃႈယၢပ်ႇ တိုၵ်ႉလႆႈဢဝ် ဝႂ်ဢၼ်ပၼ် ဝႆႉသဵၼ်ႈၸိုဝ်ႈ Name List ၵႅမ်တူဝ်ဝႆႉၵူၺ်း။ မၢင်တီႈ ၺႃးၸဝ်ႈၼႃႈတီႈၶဝ် လၢတ်ႈဝႃႈ ၸူဝ်ႈယိပ်းဝႆႉ Name List ဢွၵ်ႇၶၢဝ်းတၢင်းၵႆ ဢမ်ႇလႆႈၼႆလူးၵွၼ်ႇ ၽူႈမီးတူဝ်ထူပ်းၵေႃႉၼိုင်ႈလၢတ်ႈ။

ဢိင်ၼိူဝ်လွင်ႈၼႆႉ ႁႅင်းၵၢၼ်ၵူၼ်းၼုမ်ႇ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“မိူဝ်ႈလဵဝ် ၵူၼ်းယူႇမိူင်းထႆးၵေႃႈလီ ၵူၼ်းၸိူဝ်းဢၼ်ပႆႇမႃးၽႅဝ်မိူင်းထႆးၵေႃႈယႃႇ ၶဝ်ၶၢင်းၵၼ်ဝႃႈ တႃႇ လႆႈဝီႊသႃႊၶဝ်ႈမိူင်းထႆးၼႆႉယၢပ်ႇၼႃႇ။ ၵမ်ႈၼမ် ဢွၼ်ၵၼ်ၶၢမ်ႈၵႂႃႇ ဝႅတ်ႉၼၢမ်းႁႃႉ၊ မလေႊသျႃႊႁႃႉ ၼႆၸိူဝ်းၼႆႉၵူၺ်းယဝ်ႉ။ ၵမ်ႈၽွင်ႈ ယင်းၵႂႃႇၽႅဝ် ၵူဝ်ႊရီႊယိူဝ်ႊၸၢၼ်းပုၼ်ႉ။ ၵွပ်ႈဝႃႈ မိူင်းထႆးၼႆႉ ပၼ်ႁႃပၢတ်ႊသပွတ်ႊ ဝီႊသႃႇ မၼ်းယၢပ်ႇ”- ဝႃႈၼႆ။

ၼႂ်းၶၢဝ်းတၢင်း သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ ၵူၼ်းမိူင်းၸိူဝ်းၵႂႃႇႁဵတ်းၵၢၼ် ၼႂ်းမိူင်းထႆး ဢမ်ႇထၢင်ႇလႆႈႁဵတ်းၵၢၼ် ႁႃႁွမ်ငိုၼ်းလီလီ။ ၺႃးသိုၵ်းမၢၼ်ႈ ၵဵပ်းၶွၼ်ႇ ၊ ၵႃႈဝတ်းၵႃႈဝႂ် ပုင်ႈၶိုၼ်ႈသုင် လၢႆပုၼ်ႈ။ ၵူၼ်းၼုမ်ႇ ၸိူဝ်းလူဝ်ႇႁႃတၢင်းၶိုၼ်ႈယႂ်ႇတၢင်ႇၸိုင်ႈမိူင်းၸိူဝ်းၼႆႉၵေႃႈ ယွၼ်ႉပၼ်ႁႃဝီႊသႃႊ ၸိူဝ်းၼႆႉလႄႈ ဢမ်ႇထၢင်ႇႁၢင်ႈလႆႈသုၼ်ႇလီသင် ၊ ၶႂ်ႈႁႂ်ႈဝၢၼ်ႈမိူင်းၸဵဝ်းၵတ်းယဵၼ်သေ ၶႂ်ႈႁႂ်ႈၽူႈပွင် ဝၢၼ်ႈမိူင်းၶဝ် တူၺ်းထိုင်ပၼ်ၵူၼ်းမိူင်းတဵမ်ထူၼ်ႈယဝ်ႉၼႆ – ၵူၼ်းၼုမ်ႇ ၵေႃႉၼိုင်ႈ လၢတ်ႈၼင်ႇၼႆ။