ဝၼ်းတီႈ 25/05/2025 ၼႆႉ ၸွမ်ၽွင်းလူင် မိူင်းၶႄႇ လီႇၶျႅၼ်ႇတင်း ၸွမ်ၸိုင်ႈမိူင်းဢိၼ်ႇတူဝ်ႇၼီးသျႃး ပရႃႇပူဝ်ႇဝူဝ်ႇ သူႇပီႇယႅၼ်ႇတူဝ်ႇ ႁူပ်ႉဢုပ်ႇၵၼ် လွင်ႈတႃႇတိူဝ်းၶႂၢၵ်ႈၵၢၼ်ၵပ်းသိုပ်ႇၵႃႉၶၢႆလႄႈ ၵၢၼ်လူင်းတိုၼ်းလၢင်း ဝႃႈၼႆ။
ၸွမ်ၽွင်းလူင် မိူင်းၶႄႇ ႁွတ်ႈထိုင်တီႈဝဵင်းလူင်ၵျႃႇၵႃႇတႃႇ မိူင်းဢိၼ်ႇတူဝ်ႇၼီးသျႃး ၼႂ်းဝၼ်းတီႈ 24 ယၢမ်းဝၢႆးဝၼ်း။ တီႈၼႂ်းပၢင်ႁပ်ႉတွၼ်ႈ ၸဝ်ႈၵၢၼ်ပၢႆးမၢၵ်ႈမီး မိူင်းဢိၼ်ႇတူဝ်ႇ ၼီးသျႃး – မိူင်းၶႄႇၼၼ်ႉ ၾၢႆႇမိူင်းၶႄႇ ႁွင်ႉဢဝ်ၵႂႃႇပႃး ၸဝ်ႈၵၢၼ်ပၢႆးမၢၵ်ႈမီးၸိုဝ်ႈသဵင်ယႂ်ႇ 60 ၵေႃႉ။
ၸွမ်ၽွင်းလူင် မိူင်းၶႄႇၼႆႉ ဢွၵ်ႇၶၢဝ်းတၢင်း ၵႂႃႇဢႅဝ်ႇလႄႇ တီႈမိူင်းဢိၼ်ႇတူဝ်ႇၼီးသျႃး (ၸိုင်ႈမိူင်းပၢႆးမၢၵ်ႈမီး ယႂ်ႇလိူဝ်ပိူၼ်ႈသုတ်း ၼႂ်းၵုၼ်ၶဵဝ်ဢေးသျႃး ၸဵင်ႇၸၢၼ်းဝၼ်းဢွၵ်ႇ) တႃႇၶၢဝ်း တၢင်း 3 ဝၼ်း၊ ပဵၼ်ၵၢၼ်ဢွၵ်ႇၶၢဝ်းတၢင်းၼွၵ်ႈမိူင်း ၵမ်းႁႅၵ်ႈ ၼႂ်းပီ 2025 ဝႃႈၼႆ။
မိူင်းဢိၼ်ႇတူဝ်ႇၼီးသျႃးတင်း မိူင်းၶႄႇၼႆႉ ၶဝ်ႈပဵၼ်လုၵ်ႈၸုမ်း BRICS ဝႆႉ။ ၼႂ်းၼၼ်ႉမီးပႃး ၸိုင်ႈမိူင်း ၸိူဝ်းတိုၵ်ႉႁုၼ်ႈမုၼ်းၶိုၼ်ႈယႂ်ႇ 20 မိူင်း။
ၸွမ်ၽွင်းလူင်မိူင်းၶႄႇ လၢတ်ႈဝႃႈ – လွင်ႈၶဵင်ႇတႃႉၾၢႆႇၼွၵ်ႈ ၼမ်ၶိုၼ်ႈမႃးသေတႃႉ ၵၢၼ်ပၢႆးမၢၵ်ႈမီးမိူင်းၶႄႇ ၼႂ်းပီၼႆႉတႄႉ ပဵၼ်ဢၼ်ၶိုၼ်ႈယႂ်ႇၼမ်ႁႅင်းဝႆႉ ဝႃႈၼႆ။
ၸွမ်ၸိုင်ႈမိူင်းဢိၼ်ႇတူဝ်ႇၼီးသျႃးတႄႉ ၽိတ်ႈမွၵ်ႇႁွင်ႉ ႁႂ်ႈၸဝ်ႈၵၢၼ်ပၢႆးမၢၵ်ႈမီး မိူင်းၶႄႇ တိူဝ်းမႃးလူင်းတိုၼ်းလၢင်း ၼႂ်းမိူင်းဢိၼ်ႇတူဝ်ႇၼီးသျႃး ၼမ်ၼမ် ဝႃႈၼႆ။
ၵၢၼ်ၵပ်းသိုပ်ႇၵႃႉၶၢႆ ၵႄႈၵၢင်မိူင်းၶႄႇတင်း မိူင်းဢိၼ်ႇတူဝ်ႇၼီးသျႃး မိူဝ်ႈပီၵၢႆပူၼ်ႉမႃးၼႆႉ မီး 147.8 ပီႊလီႊယၼ်ႊ ဢမေႊရိၵၼ်ႊတေႃႊလႃႊ ၼမ်ၶိုၼ်ႈမႃး 6.1% – သိုဝ်ႇၶၢဝ်ႇ DVB ဢွၵ်ႇဝႆႉ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ