ဝၼ်းတီႈ 21/05/2025 ၼႆႉ မိူင်းၵျပၢၼ်ႊ ၸတ်းႁဵတ်းပၢင်ပိုတ်ႇ ပၢင်ပွႆးတမ်းဝၢင်းၼႄ ၶိူင်ႈယိပ်းၵွင်ႈၵၢင်ႇ ၾၢႆႇၵႅတ်ႇၶႄႁႄႉၵင်ႈလႄႈ ၾၢႆႇႁူမ်ႇလူမ်ႈၵူႈမိူင်းမိူင်း (DSEI) တီႈႁိမ်းဝဵင်းလူင် တူဝ်ႇၵျူဝ်ႇ မိူင်းၵျပၢၼ်ႊ။

ၼႂ်းပၢင်ပွႆးၼၼ်ႉ လႆႈတမ်းဝၢင်းၼႄဝႆႉ ၶိူင်ႈမၢၵ်ႇၼူၾႆး မိူင်းၵျပၢၼ်ႊ၊ ႁိူဝ်းသိုၵ်းလႄႈ ၶိူင်ႈၵွင်ႈၵၢင်ႇ ထႅင်ႈတင်းၼမ်။ ပၢင်ပွႆးပီၼႆႉ လႆႈၸတ်းႁဵတ်းယႂ်ႇလိူဝ်သေ မိူဝ်ႈပီ 2023 ၼၼ်ႉ 2 ပုၼ်ႈ၊ မီးၶွမ်ႊပၼီႊ 471 ဢၼ် ၼႂ်း 33 ၸိုင်ႈမိူင်း ပႃးၶွမ်ႊပၼီႊၼႂ်းမိူင်းၵျပၢၼ်ႊ မႃးၶဝ်ႈႁူမ်ႈတမ်းဝၢင်းၼႄ ၶိူင်ႈယိပ်းၵွင်ႈၵၢင်ႇ။

ဝၢႆးလင် မိူင်းၵျပၢၼ်ႊ ႁုပ်ႈယိုတ်းၶိုၼ်း လွင်ႈႁႄႉႁၢမ်ႈ ၾၢႆႇတေႃႉသူင်ႇသိုဝ်ႉၶၢႆ ၶိူင်ႈၶူဝ်း ဢၼ်ၸႂ်ႉတိုဝ်းၼႂ်းၵၢၼ်သိုၵ်းယဝ်ႉ ႁိုင်မႃးၶၢဝ်းတၢင်းသိပ်းပီ မိူင်းၵျပၢၼ်ႊ ၸင်ႇတႄႇယၢင်ႈၶဝ်ႈမႃး တီႈၼႂ်းလွင်ႈႁူမ်ႈမိုဝ်းၵၼ်ႁဵတ်းသၢင်ႈ ၵၢၼ်ၵႅတ်ႇၶႄၼႂ်းလုမ်ႈၾႃႉ ဢၼ်မိူင်းဢမေႊရိၵၼ်ႊလႄႈတင်း မိူင်းယူႊရူပ်ႊၶဝ် ႁၼ်လီၵမ်ႉထႅမ်ပၼ်ႁႅင်းၸွမ်း – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။