ဝၼ်းတီႈ 06/11/2024 ၼႆႉ ၶိုၼ်းလႆႈႁၼ် မူၺ်တူၵ်းသုမ်ႇဝႆႉ တီႈၼိူဝ်လွႆ ၽူႊၵျီႊ(Fuji) ဢၼ်ပဵၼ်လွႆၸိုဝ်ႈ သဵင်ယႂ်ႇ တီႈမိူင်းၵျပၢၼ်ႊ ၽူႈလူင်ႉလႅၼ်ႇ ၾၢႆႇၶႅပ်းႁၢင်ႈလႄႈ ၵူၼ်းၼႂ်းပိုၼ်ႉတီႈ သျီႊၸူႊဢူဝ်ႊၶႃႊ ထၢႆႇၶႅပ်းႁၢင်ႈလွႆသေ တၢင်ႇၶိုၼ်ႈၼိူဝ် Social Media ဝႃႈ လႆႈႁၼ်မူၺ်သုမ်ႇၶိုၼ်း တီႈၼိူဝ်လွႆၽူႊၵျီႊယဝ်ႉ ဝႃႈၼႆ။

ယွၼ်ႉၾိင်ႈၾႃႉရႃႇသီႇ ႁွၼ်ႉမႆႈႁႅင်းမႃးလႄႈ ပီၼႆႉ ႁဵတ်းႁႂ်ႈမူၺ် တီႈၼိူဝ် လွႆၽူႊၵျီႊ ႁၢႆၵႂႃႇ။

ပေႃးထိုင်မႃး ၼႂ်းဝၼ်းတီႈ 2 လိူၼ်ဢွၵ်ႊထူဝ်ႊပိူဝ်ႊ ၵူႈပီၸိုင် မူၺ်တေၵႆႉတူၵ်းသုမ်ႇဝႆႉ တီႈၼိူဝ်ၸိၵ်းလွႆၽူႊၵျီႊ။ မိူဝ်ႈပီပူၼ်ႉမႃးၼႆႉတႄႉ ပဵၼ်ၼႂ်းဝၼ်းတီႈ 5 လိူၼ်ဢွၵ်ႊထူဝ်ႊပိူဝ်ႊ။

ပီၼႆႉ တေပဵၼ် ယွၼ်ႉမူၺ်တူၵ်းသုမ်ႇ တီႈၼိူဝ်ၸိၵ်းလွႆၽူႊၵျီႊ တူၵ်းလိုၼ်း ဢမ်ႇၼၼ် ယွၼ့်မွၵ်ႇၵုမ်ႈသုမ်ႇဝႆႉတီႈၼိူဝ်ၸိၵ်းလွႆလႄႈ ဢမ်ႇလႆႈႁၼ် မူၺ်တူၵ်းၵေႃႈ ပဵၼ်လႆႈၼႆ ၾၢႆႇၾိင်ႈၾႃႉၾူၼ်လူမ်း မိူင်းၵျပၼ်ႊ လၢတ်ႈၼင်ႇၼႆ။

ပီၼႆႉၵေႃႈ မိူၼ်မိူဝ်ႈပီ 2023 ပူၼ်ႉမႃး ယွၼ်ႉႁႅင်းတၢင်ႉမႆႈလတ်းၽၢၼ်ႇလႄႈ ၶၢဝ်းမႆႈမိူင်းၵျပၼ်ႊ ပီၼႆႉ မႆႈလိူဝ်ႁႅင်း။

တႄႇဢဝ်လိူၼ်ၵျူႊလၢႆႊ – လိူၼ်သႅပ်ႊထႅမ်ႊပိူဝ်ႊၼႆ့ ပဵၼ်ၶၢဝ်းရႃႇသီႇ ၵူၼ်းသူၼ်ၸႂ် ၶိုၼ်ႈလွႆၶဝ် ဢွၼ်ၵၼ်ပႆၶိုၼ်ႈလွႆ။ ၶၢဝ်းၼႆႉ မူၺ်တေတူၵ်းသုမ်ႇဝႆႉ တီႈၼိူဝ်ၸိၵ်းလွႆၽူႊၵျီႊတႃႇသေႇ။ ၵူၺ်းၵႃႈ ပီၼႆႉတႄႉ ယွၼ်ႉမူၺ်တူၵ်း တူၵ်းလိုၼ်းသေ ပဵၼ်လွႆလွမ်ႈဝႆႉ။ ၼႂ်းၶၢဝ်းတၢင်း 130 ပီၼႆႉ ပဵၼ်ၵမ်းႁႅၵ်ႈ ၼႆယဝ်ႉ။

လွႆၽူႊၵျီႊ(Fuji) ၼႆႉ တၢင်းသုင်မီး 12,388 ထတ်း/ ပေႇ (3,776 မီႇတႃႇ) ပဵၼ်လွႆသုင်သုတ်း ၼႂ်းမိူင်းၵျပၢၼ်ႊ သေဢမ်ႇၵႃး ပဵၼ်မိၵ်ႈမၢႆ ၸိုဝ်ႈလိုဝ်းလင် ၵိုၵ်းမိူင်းၵျပၢၼ်ႊ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။