သိုၵ်းမၢၼ်ႈ ၵဵပ်းငိုၼ်းၵူၼ်းမိူင်းဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ၵူႈလိူၼ် မၢင်လိူၼ် ဢမ်ႇမီးႁူဝ် ၶေႃႈသင်ၵေႃႈ ယွၼ်းငိုၼ်းလၢႆလၢႆ ၵူၼ်းမိူင်းပဵၼ်ဢၼ်ယၢပ်ႇၽိုတ်ႇၵိၼ်းၸႂ်။
တႄႇႁၢင်လိူၼ်တီႊသႅမ်ႊပိူဝ်ႊ ပီ 2024 ၼၼ်ႉမႃး သိုၵ်းမၢၼ်ႈ ယွၼ်းငိုၼ်းၵူၼ်းမိူင်း ဝၢၼ်ႈၼပၢၼ်းၵျီး ၸႄႈဝဵင်းယႂႃႇငၢၼ်ႇ ၵူႈလိူၼ် ထိုင်မႃးၶၢဝ်းတၢင်း 6 လိူၼ်ယဝ်ႉလႄႈ ႁဵတ်းႁႂ်ႈၵူၼ်းပိုၼ်ႉတီႈ ယၢပ်ႇၽိုတ်ႇၵိၼ်းၸႂ် ဢမ်ႇမီးလွင်ႈႁူမ်ႇလူမ်ႈ ဝႃႈၼႆ။
ၼၢင်းယိင်း ၵူၼ်းမိူင်းဝဵင်းယႂႃႇငၢၼ်ႇ လၢတ်ႈၽူႈတွႆႇႁွၵ်ႈဝႃႈ – “ငိုၼ်းဢၼ်လႆႈပၼ်ၼႆႉ မီးၸမ် 6 လိူၼ် ယဝ်ႉ ၊ လႆႈပၼ်ၵူႈလိူၼ် ၵူႈႁိူၼ်း ၊ ယွၼ်ႉသင်လႆႈပၼ်ဢၼ်ဝႃႈၼၼ်ႈတႄႉ ဢမ်ႇႁူႉ၊ ယွၼ်ႉၶဝ် မီးၵွင်ႈ ၵၢင်ႇလႄႈ ၽႂ်ၵေႃႈဢမ်ႇႁတ်းထၢမ်ၶဝ် ၊ လႆႈၵူဝ်ယူႇတႃႇသေ ၊ တႃႇၵိၼ်တႄႉ တႃႇၸၢႆႇလူမ်ၸႂ်တႄႉ ဢမ်ႇ သိူဝ်းဝႃႈယဝ်ႉ။ ၵုမ်ႇႁႃသေပၼ်ၶဝ်ၵူၺ်းယဝ်ႉ။ ငိုၼ်းတႄႉယွၼ်းယူႇ ၵူၺ်းၵႃႈ ၼွၵ်ႈဝၢၼ်ႈၵေႃႈၶဝ် ဢမ်ႇပၼ်ဢွၵ်ႇ ၊ ယွၼ်ႉၼၼ် တႃႇၵႂႃႇႁႃၵိၼ်ၸၢင်ႈပိူၼ်ႈၵေႃႈဢမ်ႇငၢႆႈ”- ဝႃႈၼႆ။
ဢၼ်သိုၵ်းမၢၼ်ႈ ယွၼ်းငိုၼ်းယူႇၵူႈလိူၼ်ၼႆႉတႄႉပဵၼ်တၢင်းဝၢၼ်ႈပႃႇတိုင်း(ဢၢင်ႇတေႃး) ၊ ဝၢၼ်ႈလႄႇ ၵၢႆး (လယ်ကိုင်းရွာ) ၊ ဝၢၼ်ႈမျႃးၵလေး(မျှားကလေးရွာ) ဢၼ်မီးၼႂ်းၸႄႈဝဵင်းယႂႃႇငၢၼ်ႇ။ လႆႈပၼ်ငိုၼ်း တီႈသိုၵ်းမၢၼ်ႈၼိုင်ႈလိူၼ် 20,000 ပျႃး ဝႃႈၼႆ။
တႄႇႁူဝ်လိူၼ်မေႊၼႆႉမႃး ၾၢႆႇတၢင်းသိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼပၢၼ်းၵျီး ဢဵၼ်ႁႅင်း 200 ပၢႆ။ ၽွင်းသိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈဝၢၼ်ႈမႃး ဢမ်ႇပၼ်ၸႂ်ႉၾူၼ်းမိုဝ်းထိုဝ် ၊ ဢမ်ႇပၼ်ၵပ်းသိုပ်ႇ တိတ်းတေႃႇၵၼ်၊ ယိုတ်းပႃးမိုဝ်းထိုဝ်ၵူၼ်းဝၢၼ်ႈသေ ပေႃႉထုပ်ႉတီႉၺွပ်း ၵူၼ်းဝၢၼ်ႈၵႂႃႇပႃး ဝႃႈၼႆ။
ၼႂ်းၶေႃႈပိုၼ်ၽၢဝ်ႇ DSNDA ပႃးဝႆႉဝႃႈ – “ၼႂ်းဝၼ်းတီႈ 04/05/2025 ၽွင်းသိုၵ်းမၢၼ်ႈထႅမ်ႁႅင်းသိုၵ်း ၶဝ်ႈ ၼႂ်းဝၢၼ်ႈသိမ်း ဢဝ်ၾူၼ်းၵူၼ်းဝၢၼ်ႈၼပၢၼ်းၵျီး 2,000 လုၵ်ႈ၊ တဵမ်ဝူင်ႈယဝ်ႉ ၸင်ႇပၼ်ၶိုၼ်း၊ ၾၢႆႇတင်း သိုၵ်းမၢၼ်ႈ ပၵ်းတပ်ႉဝႆႉတီႈ ၼႂ်းဝၢၼ်ႈသေ တဵၵ်းၸႂ်ႉၵူၼ်းဝၢၼ်ႈၸွမ်းၼင်ႇၶဝ်ၶႂ်ႈပဵၼ် ၊ ပေႃးဢမ်ႇႁဵတ်း ပၼ်သမ်ႉ ဢဝ်ၶိူင်ႈၵွင်ႈၵၢင်ႇ ပိုတ်းယိုဝ်းၼႂ်းဝၢၼ်ႈပႃး”- ဝႃႈၼႆ။
ငိုၼ်းဢၼ်ၵဵပ်း လႆႈမႃးတီႈ ၵူၼ်းဝၢၼ်ႈမီး 80 သႅၼ်ပၢႆ။ ဢမ်ႇႁိုင်သင် ၽူႈၵွၼ်းသၢႆသိုၵ်း(စစ်ကြောင်းမှူး) ဢၼ်ၸႂ်ႉၵဵပ်းငိုၼ်းၼၼ်ႉၵေႃႈၶၢႆႉလၢႆႈၼႃႈသိုၵ်းၵႂႃႇ။ ၵူၼ်းဝၢၼ်ႈတိုၵ်ႉ တေလႆႈထူၺ်ႈၸႂ်လူမ်ၵူၺ်း ၼႂ်း လိူၼ်ၼႆႉသမ်ႉ ပေႃးၶိုင်ၵဵပ်းငိုၼ်းယူႇထႅင်ႈယဝ်ႉၼႆ ၵူၼ်းပိုၼ်ႉတီႈ လၢတ်ႈၼင်ႇၼႆ။
ၼွၵ်ႈလိူဝ် ၵဵပ်းငိုၼ်းဢမ်ႇမီးႁူဝ်ၶေႃႈယဝ်ႉ သိုၵ်းမၢၼ်ႈ မႂ်ငိုၼ်းၵူၼ်းဝၢၼ်ႈ ၸိူဝ်းၵႂႃႇတႅပ်းမႆႉမႃး တႃႇသၢင်ႈႁိူၼ်းယေးၸဝ်ႈၵဝ်ႇယူႇသဝ်း။ သိုၵ်းမၢၼ်ႈယွၼ်းငိုၼ်း 3 သႅၼ်ပျႃးတေႃႇထိုင် 9 သႅၼ်ပျႃး။ ၵူၼ်းဝၢၼ်ႈ တႃႇလင်ႁိူၼ်း 10 ပၢႆ လႆႈပၼ်ငိုၼ်းၵႂႃႇ ဝႃႈၼႆ။
တီႈဝဵင်းယႂႃႇငၢၼ်ႇၼႆႉ ၵူၼ်းပိုၼ်ႉတီႈ ဢမ်ႇလႆႈၸႂ်သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းလႄႈ ဢွၼ်ၵၼ် ၶဝ်ႈထိူၼ်ႇယိပ်းၵွင်ႈ ယိုဝ်းသိုၵ်းမၢၼ်ႈၶိုၼ်း။ ယၢမ်းလဵဝ် သိုၵ်းမၢၼ်ႈပလိၵ်ႈမၢၼ်ႈ ဢမ်ႇပၵ်းတပ်ႉၼႂ်းဝဵင်း သေတႃႉ မိူဝ်းတင်ႈၵဵတ်ႉ/ လၢၼ်ႇသေ ပႂ်ႉၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း ၵႆႉထႅမ်ႁႅင်းသိုၵ်းၶိူဝ်းယႂ်း ႁဵတ်း ႁႂ်ႈၵူၼ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ဝႃႈၼႆ။
ၼႂ်းဝၼ်းတီႈ 08/05/2025 ၼၼ်ႉၵေႃႈ သိုၵ်းမၢၼ်ႈ ထႅမ်ႁႅင်းသိုၵ်း ၶဝ်ႈမႃးၼႂ်းဝၢၼ်ႈၵုင်းသိမ်ႇသေ လၢတ်ႈ ဝႃႈ ၵပ်းသိုပ်ႇတိတ်းတေႃႇၵၼ်တင်း PDF တီႉၺွပ်းၵႂႃႇၵူၼ်းဝၢၼ်ႈ လႆႈပၼ်ငိုၼ်းထုတ်ႇတူဝ်ဢဝ်ၶိုၼ်း 300 သႅၼ်ပျႃး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ