ၵူၼ်းမိူင်းမၢၼ်ႈတူင်ႈပဵင်း သွင်ၵေႃႉ မႃးၽုၵ်ႇယႃႈလႅင်တီႈမိူင်းတႆးပွတ်းၸၢၼ်းသေ ႁွင်ႉႁူၺ်းၵူၼ်းမိူင်း ပိုၼ်ႉတီႈ ႁႂ်ႈသႂ်ႇငိုၼ်းႁူမ်ႈလူင်းတိုၼ်းလၢင်းၸွမ်းယဝ်ႉ လွၵ်ႇလႅၼ်ဢဝ်ငိုၼ်းပိူၼ်ႈပၢႆႈ ၼပ်ႉႁူဝ်သႅၼ်သႅၼ်။
ၵူၼ်းဝဵင်းလိူဝ်ႇ ၸၢႆးၵေႃႉၼိုင်ႈလႄႈ ယိင်းၵေႃႉၼိုင်ႈ လုၵ်ႉဝဵင်းလိူဝ်ႇ(မၼ်းတလေး) မႃး မိူင်းတႆးပွတ်း ၸၢၼ်း မႃးၽုၵ်ႇယႃႈလႅင် (ဝႃႊၵျီႊၼီႊယႃႊ) တီႈၼႂ်းၸႄႈဝဵင်းၵုၼ်ႁဵင် ၸဵမ်မိူဝ်ႈႁၢင်ပီ 2024 (ပီၵၢႆ) ပူၼ်ႉမႃး။ ၸိူဝ်းၶဝ်ႁူၺ်းၵူၼ်းပိုၼ်ႉတီႈ ႁႂ်ႈႁူမ်ႈလူင်းတိုၼ်းလၢင်းၼႂ်းၵၢၼ်ၽုၵ်ႇသွမ်ႈ။ ၵူၼ်းမိူင်းၼႂ်းၸႄႈဝဵင်း ၵုၼ်ႁဵင်၊ ၵႃလီႉ၊ မိူင်းသူႈ၊ မိူင်းၵိုင်၊ လၢႆးၶႃႈ ၸိူဝ်းၼႆႉႁူမ်ႈလူင်းတိုၼ်းလၢင်း။ ထိုင်မႃးၼႂ်းႁူဝ်လိူၼ်မေႊၼႆႉ ၸၢဝ်းမၢၼ်ႈ 2 ၵေႃႉၼၼ်ႉ တိတ်းတေႃႇၵေႃႈဢမ်ႇလႆႈ။ ငိုၼ်းတွင်းဢၼ်ၵူၼ်းမိူင်းလူင်းတိုၼ်းလၢင်းဝႆႉ ၸွမ်းၼၼ်ႉ ၵေႃႈပႃးၵႂႃႇၸွမ်း ဢမ်ႇယွမ်း 5 သႅၼ်သႅၼ်ပျႃး – ၵူၼ်းမိူင်းဝဵင်းလၢႆးၶႃႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈၼင်ႇၼႆ။
“မၢၼ်ႈ 2 ၵေႃႉၼၼ်ႉ ၸိုဝ်ႈႁွင်ႉ ၵူဝ်ႇလႃႉပျေႉလႄႈ မထႅတ်ႉၸူႉၼၢႆႇ ၼႆဝႃႇ။ ၶႃပဵၼ်ၵူၼ်းမိူင်း မၼ်းတလေး။ ၶႃမႃးဢွၼ်ၽုၵ်ႇဢွၼ်ႁဵတ်းၸဵမ်ႁၢင်ပီ ပီၵၢႆ။ ထိုင်မႃးႁူဝ်လိူၼ်မေႊ ၼႆႉ ၶႃသွင်ၵေႃႉ ႁၢႆသႅပ်းႁၢႆသွႆပႅတ်ႈ။ တိတ်းတေႃႇတင်းၾူၼ်းၵေႃႈဢမ်ႇလႆႈ။ ၸွမ်းၶႂ်ႈႁႃၶႃထိုင် မၼ်းတလေးၵေႃႈဢမ်ႇႁၼ်။ ၵႂႃႇတူၺ်း တီႈႁိူၼ်းၶႃ တီႈပၢင်ႇဢူႈလူင်ၵေႃႈဢမ်ႇမီးၽႂ်။ လႆႈႁူႉဝႃႈ ၶႃၶၢႆႁိူၼ်းၶၢႆၶူဝ်းသေသွင်ႉၸဵမ်လႂ်ယဝ်ႉ”- ဝႃႈၼႆ။
မၢၼ်ႈ 2 ၵေႃႉပီႈၼွင်ႉၼႆႉ လၢတ်ႈတီႈၵူၼ်းပိုၼ်ႉတီႈဝႃႈ ၽွင်းယူႇဝဵင်းလိူဝ်ႇၵေႃႈ ယၢမ်ႈႁဵတ်းၵၢၼ်ၽုၵ်ႇ ယႃႈလႅင်ၼႆႉမႃး၊ သမ်ႉမႃးဢွၼ်ၵူၼ်းထုင်ႉၵုၼ်ႁဵင်၊ မိူင်းသူႈ၊ လၢႆးၶႃႈ၊ မိူင်းၵိုင် ၸုပ်ႈၵမ်း 1 ၶၢဝ်းတၢင်း 6 လိူၼ် သမ်ႉဢွင်ႇမၢၼ်လႆႈၼမ်ႉတွၼ်းတႄႉလႄႈ ယၢမ်းလဵဝ် ဢၢၼ်းတေၽုၵ်ႇသွမ်ႈၸုပ်ႈၵမ်း 2 ဝႃႈၼႆ။
ၽွင်းၵူၼ်းမိူင်းထူပ်းၽေးသိုၵ်းသိူဝ်၊ ၽေးသၽႃႇဝ သိင်ႇဝႅတ်ႉလွမ်ႉလူႉ၊ ၽေးပၢႆးမၢၵ်ႈမီးတူၵ်းယူႇၼႆႉ လွင်ႈလႅၼ်ၵိၼ်ငိုၼ်းၵၼ်ၵေႃႈ ႁၢႆႉႁႅင်းမႃးၵူႈမိုဝ်ႉၵူႈဝၼ်း၊ ယွၼ်ႉၼၼ် ၶႂ်ႈ ႁႂ်ႈၵူၼ်းမိူင်းယႃႇယုမ်ႇငၢႆႈ ၶႂ်ႈ ႁႂ်ႈၾၢင်ႉၵၼ်ၼႆ – ၼၢင်းယိင်းၵူၼ်းမိူင်း ထုၵ်ႇလႅၼ်ငိုၼ်းၵႂႃႇၵေႃႉၼိုင်ႈ ပၼ်ၾၢင်ႉဝႆႉၼင်ႇၼႆ။
“ၵူၼ်းဢၼ်လႅၼ်ၵႂႃႇၼၼ်ႉ မိူၼ်ႁၢင်ႈႁႅင်းမႃးတႄႉတႄႉ၊ မႃးဢဝ်လွင်ႈယုမ်ႇယမ်တီႈၵူၼ်းပိုၼ်ႉတီႈသေ လႅၼ်ၵႂႃႇ၊ ၵူၼ်းမိူင်းႁဝ်းၶႃႈၵေႃႈ ယွၼ်ႉမီးၸႂ်လေႃးၽႃႉလႄႈ ထုၵ်ႇလႅၼ်၊ ယွၼ်ႉၼၼ် ၵၢၼ်သင်သေ ဢမ်ႇဝႃႈ ဢမ်ႇလူဝ်ႇမီးၸႂ်လေႃးၽႃႉသေ ႁဵတ်းသၢင်ႈၵႂႃႇ ဢမ်ႇၶႂ်ႈႁႂ်ႈယုမ်ႇၽႂ်ငၢႆႈငၢႆႈ”- ဝႃႈၼႆ။
ယႃႈလႅင် (ဝႃႊၵျီႊၼီႊယႃႊ) ၼႆႉ ဢွၵ်ႇတီႈမီးၾိင်ႈၾႃႉရႃႇသီႇမႆႈ။ ၼွၵ်ႈလိူဝ် တီႈမိူင်းမၢၼ်ႈတူင်ႈပဵင်းယဝ်ႉ ၼႂ်းမိူင်းတႆးပွတ်းၸၢၼ်းၼႆႉ ဝဵင်းလၢင်းၶိူဝ်း ၽုၵ်ႇယႃႈလႅင် ႁႃၵိၼ်လဵင်ႉတွင်ႉပဵၼ်ပိူင်လူင်။ ယႃႈလႅင်ၼႆႉ ဢဝ်ၸႂ်ႉတႃႇႁဵတ်းလႅၼ်းယႃႈ ပဵၼ်ပိူင်လူင်။ လိူဝ်ၼၼ်ႉၵေႃႈၸႂ်ႉႁဵတ်းယႃႈယႃ ယူတ်းယႃတၢင်းပဵၼ်ၵေႃႈလႆႈ။ ယႃႈလႅင်ဢွၵ်ႇဝဵင်းလၢင်းၶိူဝ်းၼႆႉ လူင်ပွင်ၸိုင်ႈမိူင်းမၢၼ်ႈၵူႈသိုပ်ႇၵူႈပၢၼ် ဢဝ်သူင်ႇၶၢႆဢွၵ်ႇၼွၵ်ႈမိူင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ