မိူဝ်ႈဝၼ်းတီႈ 09/05/2025 ၼႆႉ ႁူဝ်ၼႃႈ သိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ၵႂႃႇၶဝ်ႈႁူမ်ႈပၢင်ၼႄ ၾၢင်ႁၢင်ႈသိုၵ်း တီႈဝဵင်းမေႃႇသၵူဝ်ႇ မိူင်းရတ်ႉသျႃးသေ လႆႈႁူပ်ႉထူပ်းၵၼ်တင်း ၸွမ်ၸိုင်ႈမိူင်းၶႄႇ သျီၵျိၼ်ႉၽိင် ဝၢႆးသိုၵ်းမၢၼ်ႈယိုတ်းမိူင်းမႃး ၶၢဝ်းတၢင်း 4 ပီပၢႆၼႆႉ သိုၵ်းမၢၼ်ႈ လႆႈႁူပ်ႉတင်း ၸွမ်ၸိုင်ႈမိူင်းၶႄႇၼၼ်ႉ ပဵၼ်ပွၵ်ႈၵမ်းႁႅၵ်ႈ။

ထိုင်ဝၼ်းတီႈ 10 ၼႆႉ သိုၵ်းမၢၼ်ႈ ပွၵ်ႈၽႅဝ်ၶိုၼ်းမိူင်းမၢၼ်ႈသေ ႁိုင်ၶၢဝ်းတၢင်းသွင်ဝၼ်း ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇႁူင်းႁဵၼ်း ၼႂ်းၸႄႈဝဵင်းတီပႄးယိၼ်း တိူင်းၸႄႈၵႅင်း ၸၢၵ်ႇမၢၵ်ႇတိူဝ်ႉၺႃး မေႃသွၼ် 2 ၵေႃႉလႄႈ လုၵ်ႈႁဵၼ်း 21 ၵေႃႉ လူႉတၢႆ ယဝ်ႉၵေႃႈ မၢတ်ႇၸဵပ်းထႅင်ႈတင်းၼမ်။

မိူၼ်ၼႆ တီႈဝဵင်းမိူင်းငေႃႉ၊ မၢၼ်ႈတူင်ႈ၊ ၼွင်ၶဵဝ် ၼႂ်းၼႃႈတီႈသိုၵ်းတဢၢင်းၵုမ်းၵမ် ၸိူဝ်းၼႆႉ။ လိူဝ်ၼၼ်ႉ တီႈဝဵင်းယတေႉတွင်ႇ မိူင်းရၶႅင်ႇ၊ ဝဵင်းသူၺ်ႇၵျိၼ်ႇ၊ ၵျၢႆႉထူဝ်ႇ၊ ဝဵင်းၶျွင်းဢူး၊ ဝႅတ်ႉလႅၵ်ႉ၊ မေႃႇလူးလႄႈ ဝဵင်းၸၢင်ႉၵိုဝ် (ၸိၼ်ႉၵူး) ၸိူဝ်းၼႆႉၵေႃႈ ၺႃးသိုၵ်းမၢၼ်ႈ ပွႆႇမၢၵ်ႇသႂ်ႇႁၢဝ်ႈႁႅင်း။

ၶၢဝ်းတၢင်း 3 ဝၼ်းၼႆႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇဢမ်ႇယွမ်း 11 ၵမ်း၊ လုၵ်ႈဢွၼ်ႇ၊ မေႃသွၼ် ဢိၵ်ႇပႃးၵူၼ်းပိုၼ်ႉတီႈ လူႉတၢႆ 43 ၵေႃႉ မၢတ်ႇၸဵပ်းထႅင်ႈ 140 ပၢႆ၊ သဵၼ်ႈမၢႆၼႆႉ ၸုမ်းသိုဝ်ႇၶၢဝ်ႇ People’s Spring ၵဵပ်းမၢႆသေ တႅမ်ႈဢွၵ်ႇဝႆႉ ၸွမ်းၼင်ႇယိုၼ်ႈထိုင်လႆႈ။ လွင်ႈၵူၼ်းလူႉတၢႆ မၢတ်ႇၸဵပ်းၼႂ်းပိုၼ်ႉတီႈတႄႉ ၸၢင်ႈတိူဝ်းၼမ်လိူဝ်ၵဝ်ႇထႅင်ႈ ဝႃႈၼႆ။