ၼၢႆးၼႃႈမႃးႁႃသိုဝ်ႉၼဵင်ႈ တီႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်းပီၼႆႉ တဵၵ်းၵႃႈၶၼ်ၼဵင်ႈလိူဝ်ႁႅင်း၊ ၸဝ်ႈသူၼ်ယၢပ်ႇၽိုတ်ႇၵၢၼ်ႁႃၵိၼ်လဵင်ႉတွင်ႉ တေဢမ်ႇၶၢႆၵေႃႈသမ်ႉ လူဝ်ႇငိုၼ်း တေၶၢႆၵေႃႈ ဢမ်ႇလႆႈ ၼမ်ႉတွၼ်းသင်။

ၵႃႈၶၼ်ၼဵင်ႈယမ်း ၼႂ်းဢိူင်ႇလိၼ်းဝေး (လင်းဝေး) ၊ တပိၼ်ႇပျေႃႇ (တပင်ပျော်) ၊ ၵျွၵ်ႉၵူႇပျိၼ်ႇ (ကျောက် ကူပြင်) ၊ ၵုင်းသိမ်ႇ (သိမ်ကုန်း) ၸႄႈဝဵင်းယႂႃႇငၢၼ်ႇ ဢၼ်ယၢမ်ႈလႆႈၼိုင်ႈၸွႆႉ 4,000 ပျႃးၼၼ်ႉ တႄႇဢဝ် ႁူဝ်လိူၼ်မေႊၼႆႉမႃး ယွမ်းလူင်းထိုင် 3,000 – 2,300 ပျႃးၵူၺ်းယဝ်ႉ ဝႃႈၼႆ။

ၼၢင်းယိင်း ၸဝ်ႈသူၼ်ၼဵင်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“တီႈၼႂ်းဝၢၼ်ႈၵုင်းသိမ်ႇၼႆႉ မီးၵူၼ်းႁပ်ႉ သိုဝ်ႉၼဵင်ႈယမ်း 4 ၸဝ်ႈ၊ ၶဝ်ပႂ်ႉသိုဝ်ႉၼဵင်ႈတီႈၵူၼ်းဝၢၼ်ႈမႃးၶၢႆပၼ်။ ၵူၼ်းႁပ်ႉသိုဝ်ႉၼဵင်ႈ ၸိူဝ်းၼႆႉၵေႃႈ ၶဝ်ၼင်ႇၵၼ်ဢုပ်ႇၵုမ်ၵၼ်ဝႆႉယဝ်ႉ။ ပေႃးပဵၼ်ၶၢဝ်းၼဵင်ႈၼုမ်ႇဢွၵ်ႇ မိူၼ်ၼင်ႇ ယၢမ်းလဵဝ်ၼႆႉ ၶဝ်တဵၵ်းၵႃႈ မၼ်းလိူဝ်ႁႅင်းၼႃႇ။ ပေႃးႁၢင်ပီ ၵူၺ်းဢေႃႈ ၶၼ်ၼဵင်ႈလႆႈသုင်”- ဝႃႈၼႆ။

ယၢမ်းလဵဝ်တီႈဝဵင်းယႂႃႇငၢၼ်ႇ ၶၼ်ၼဵင်ႈဢမ်ႇလီ၊ ၶူဝ်းၶွင်ၵိၼ်ယႅမ်ႉသမ်ႉ ၵႃႈယႂ်ႇၶၼ်သုင်၊ ငိုၼ်းၶဝ်ႈလႄႈ ငိုၼ်းဢွၵ်ႇဢမ်ႇၵိုင်ႇငၢမ်ႇၵၼ်။ ၵူၼ်းမိူင်းသမ်ႉ ၵုမ်ႇလႆႈထွမ်ႇၶၢဝ်ႇငၢဝ်းၵၢၼ်သိုၵ်းသိူဝ်ယူႇၵူၺ်း ဢမ်ႇ ၸၢင်ႈႁႃၵိၼ်လဵင်ႉတွင်ႉလီလီ။   

ၼႂ်းလိူၼ်ဢေႊပရိူဝ်ႊပူၼ်ႉမႃး ၵႃႈၶၼ်ၼဵင်ႈလႆႈထိုင် ၼိုင်ႈၸွႆႉ 4,500 ပျႃး ၊ ထိုင်မႃးၼႂ်းလိူၼ်မေႊၼႆႉ ၵႃႈၶၼ်ၼဵင်ႈယမ်း လူင်းထိုင် 2,300 ပျႃး ၵူၼ်းပိုၼ်ႉတီႈလၢတ်ႈ။

ၼၢင်းယိင်း ပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၵူၼ်းမႃးႁႃသိုဝ်ႉၼဵင်ႈႁႅင်ႈတႄႉ ဢမ်ႇပေႃးၶႆႈမီးယဝ်ႉ ၊ ပေႃး ထိုင်မႃးၶၢဝ်းၾူၼ် ဢမ်ႇမီးတီႈတၢၵ်ႇမၼ်းလႄႈ ၵူၼ်းပိုၼ်ႉတီႈၵေႃႈ လႆႈၶၢႆဢၼ်ယမ်းဢဝ် ၊ ၼဵင်ႈႁႅင်ႈတႄႉ လႆႈၼိုင်ႈၸွႆႉ 15,000 ၸိူဝ်းၼႆႉ။ ၵူၼ်းႁဵတ်းမၼ်းတႄႉ မီးယူႇ ဢမ်ႇမီးၵူၼ်းသိုဝ်ႉမၼ်း ၊ မိူဝ်ႈဢွၼ်တၢင်းတႄႉ ၵူၼ်းဝၢၼ်ႈဢဝ်ၵႂႃႇၶၢႆတီႈတင်း ၵျွၵ်ႉသႄႇ ၸိူဝ်းၼႆႉ။ ၽွင်းဝၢၼ်ႈမိူင်းသုၵ်ႉသၵ်ႉမႃးၼႆႉ ၽႂ်ၵေႃႈဢမ်ႇၵႂႃႇၶၢႆယဝ်ႉ”- ဝႃႈၼႆ။

ယၢမ်းလဵဝ် တီႈဝဵင်းယႂႃႇငၢၼ်ႇ ၶဝ်ႈသၢၼ်ၼိုင်ႈထူင်လႆႈသိုဝ်ႉ 8 မိုၼ်ႇထိုင် 1သႅၼ်ပျႃး ၊ ၼမ်ႉမၼ်းပုင်း လဵၵ်ႉ 6 မိုၼ်ႇပျႃး၊ ၶႆႇၵႆႇၼိုင်ႈလုၵ်ႈ 500 ပျႃး၊ ၼိူဝ်ႉမူႇၼိုင်ႈၸွႆႉ 40,000 ပျႃး။

ဝဵင်းယႂႃႇငၢၼ်ႇၼႆႉ ၵူႈပွၵ်ႈပဵၼ်ဝဵင်း ဢၼ်ဢမ်ႇမီးၸုမ်းလုၵ်ႉၽိုၼ်ႉ၊ ပဵၼ်ဝဵင်းဢၼ်မီးတၢင်းႁၢင်ႈလီလႄႈ ၵတ်းယဵၼ်ဝဵင်းၼိုင်ႈသေ ၵူၼ်းမိူင်းပိုၼ်ႉတီႈ ႁဵတ်းၵၢၼ်ၽုၵ်ႇသွမ်ႈၼဵင်ႈ ၊ မၢၵ်ႇၸွၵ်း ၊ ၵေႃႇၾီႇသေ ႁႃၵိၼ်လဵင်ႉတွင်ႉၵတ်းၵတ်းယဵၼ်ယဵၼ်ၵူၺ်း။