မိူဝ်ႈဝၼ်းတီႈ 28/04/2025 ၵူၼ်းမိူင်းသႅၼ်ဝီၵေႃႉၼိုင်ႈ ၶီႇရူတ်ႉၶိူင်ႈ ဢွၵ်ႇၶၢဝ်းတၢင်းၵႂႃႇတၢင်း ဝဵင်းမူႇၸေႊ ယၢမ်းပွၵ်ႈမႃးၶိုၼ်း ၺႃးၵူၼ်းယိပ်းၵွင်ႈၵၢင်ႇသွင်ၵေႃႉ ၸူၼ်ၸွမ်းတၢင်း ႁိမ်းၵဵတ်ႉ/ လၢၼ်ႇ 105 လၵ်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ၵႄႈၵၢင်သဵၼ်ႈတၢင်းဝဵင်းသႅၼ်ဝီ – ၵူတ်ႉၶၢႆ – မူႇၸေႊၼႆႉ မီးၸုမ်းယိပ်းၵွင်ႈၵၢင်ႇလၢႆလၢႆၸုမ်း ၵုမ်းၵမ်ဝႆႉ သေတႃႉ ဢမ်ႇမီးၸုမ်းလႂ်ႁပ်ႉပုၼ်ႈၽွၼ်း ဢဝ်ႁူမ်ႇလူမ်ႈပၼ်ၵူၼ်းမိူင်း ႁႂ်ႈပေႃးလွတ်ႈၽေးတႄႉတႄႉၼႆ ၵူၼ်းမိူင်းဝဵင်းသႅၼ်ဝီ ၵေႃႉၼိုင်ႈ လၢတ်ႈၼႄၼင်ႇၼႆ။

“လုင်းႁိမ်းႁိူၼ်းႁဝ်းၼႆႉ မၼ်းမီးတၢင်းလူဝ်ႇႁႄ တေလႆႈၵႂႃႇမူႇၸေႊၶိုၵ်ႉၶၵ်ႉၼႆ ၸူးဢဝ်ရူတ်ႉၶိူင်ႈ ၵႂႃႇႁင်းၵူၺ်းမၼ်း။ မၼ်းၵႂႃႇၸွမ်းသဵၼ်ႈတၢင်းလူင်ၵူၺ်း။ ၽိူဝ်ႇပူၼ်ႉဢေးသျႃးဝေႃး ႁိမ်း 105 လၵ်းၼၼ်ႉ မီး ၵူၼ်းသွင်ၵေႃႉ ပႃးၵွင်ႈႁႄ ပႂ်ႉၸူၼ်ၸွမ်းတၢင်း။ ရူတ်ႉၶိူင်ႈမၼ်းၵေႃႈ ပႃးၵႂႃႇၸွမ်း။ ငိုၼ်းမၼ်းၵေႃႈဢဝ်ၵႂႃႇ။ ၵတ်ႉၵႃႈ ဢမ်ႇယိုဝ်း၊ ဢမ်ႇပေႃႉထုပ်ႉ မၼ်းႁႄမႃးလႃႈ။ မၼ်းထိုင်ႁိူၼ်းၶိုၼ်းၸင်ႇလႆႈ ပၼ်ၵႃႈၶၢတ်ႈ ရူတ်ႉၶိူင်ႈ။ ၸုမ်းယိပ်းၵွင်ႈၵၢင်ႇၼမ်လၢႆလၢႆၵူၺ်း ဢမ်ႇမီးၸုမ်းလႂ် တူၺ်းထိုင်ပၼ်ၵူၼ်းမိူင်းတႄႉတႄႉ”။

ၼႂ်းမိူင်းတႆးပွတ်းႁွင်ႇၼႆႉ တင်ႈတႄႇပဵၼ်ၽႅၼ်ယၼ်ႇသိုၵ်း 1027 မႃး ၸုမ်းယိပ်းၵွင်ႈၵၢင်ႇ ၼမ်လိူင်ႇမႃး သေ ပၢင်တေႃႇလွင်းၵေႃႈၼမ်လိူင်ႇ ပိုတ်ႇပဵၼ်တၢင်းၵၢၼ်ၼမ်ႁႅင်းလႄႈ ႁဵတ်းႁႂ်ႈမီးၽူႈလၵ်ႉ ၵူၼ်းၸူၼ် ၼမ်လိူင်ႇမႃး။ ယွၼ်ႉၼၼ်လႄႈ လွင်ႈၸူၼ်ၵၼ်၊ ၶႃႈႁႅမ်၊ ပေႃႉထုပ်ႉၵၼ်တၢႆၸိူဝ်းၼႆႉၵေႃႈ ၵိူတ်ႇပဵၼ်မႃး။

တႅမ်ႈ – ၽူၺ်းၼုမ်ႇ