ပႃႇတီႇၵၢၼ်မိူင်း မိူင်းသိင်ႊၵပူဝ်ႊ ဢၼ်ႁႅင်းယႂ်ႇလႄႈ လႆႈယိပ်းဢႃႇၼႃႇ ပၢၼ်ႇပွင်ၸိုင်ႈမိူင်းမႃးပၢၼ်သိုပ်ႇပၢၼ် ဢၼ်ပဵၼ် ပႃႇတီႇ People Action Party (PAP) ၼၼ်ႉ သိုပ်ႇၶဝ်ႈပၢင်လိူၵ်ႈတင်ႈ မိူဝ်ႈဝၼ်းတီႈ 03/05/2025 ၼၼ်ႉသေ ဢွင်ႇပေႉၵၢၼ်လိူၵ်ႈတင်ႈထႅင်ႈ။
ပႃႇတီႇ PAP ၼႆႉ ပဵၼ်ဢၼ်ဢွင်ႇပေႉပၢင်လိူၵ်ႈတင်ႈမႃးၵပ်းတၢမ်းၵၼ်ဢမ်ႇထၢတ်ႇ ၵမ်းထူၼ်ႈ 14 ယဝ်ႉ ဝႃႈၼႆ။
ယၢမ်းလဵဝ် ႁူဝ်ပဝ်ႈပႃႇတီႇ ပဵၼ်ၸွမ်ၽွင်းလူင် မိူင်းသိင်ႊၵပူဝ်ႊ လေႃႊရႅၼ်ႉသ်ဝွင်ႊ ၊ မၼ်းၸၢႆးၼႆႉ ၸင်ႇ ႁႃႁပ်ႉပဵၼ်ႁူဝ်ပဝ်ႈပႃႇတီႇ မိူဝ်ႈပီၵၢႆၼႆႉၵူၺ်းလႄႈ လႆႈဝႃႈပၢင်လိူၵ်ႈတင်ႈၵမ်းၼႆႉ ပဵၼ်ပွၵ်ႈၵမ်းႁႅၵ်ႈ တွၼ်ႈ တႃႇမၼ်းၸၢႆး ဝႃႈၼႆ။
ပၢင်လိူၵ်ႈတင်ႈၵမ်းၼႆႉ ပႃႇတီႇၵၢၼ်မိူင်း PAP ၶေႉၶဵင်ႇတႃႇတီႈၼင်ႈ ၽူႈတႅၼ်း 97 တီႈ ဢွင်ႇပေႉလႆႈ တီႈၼင်ႈ 87 တီႈ၊ လႆႈၶႅပ်းမႄးတီႈၵူၼ်းမိူင်း 65.6 ပိူဝ်ႊသႅၼ်ႊ ပိုၼ်ၽၢဝ်ႇၼင်ႇၼႆ။
သိုဝ်ႇၶၢဝ်ႇရၢႆႊထိူဝ်ႊတႄႉ တႅမ်ႈတၢင်ႇဝႆႉဝႃႈ – ၵူၼ်းမိူင်းသိင်ႊၵပူဝ်ႊၼႆႉ လႆႈပိုင်ႈဢိင်ၸႂ်ယႂ်ႇၼႂ်းၵၢၼ်တေႃႉ သူင်ႇၶူဝ်းၵုၼ်ႇတၢင်းၼမ်ႉမႃးပၢၼ်သိုပ်ႇပၢၼ်။ ပႃႇတီႇ PAP ဢၼ်လႆႈဢႃႇၼႃႇပၢၼ်ႇပွင်ၸိုင်ႈမိူင်းမႃး ပၢၼ်သိုပ်ႇပၢၼ်ၼၼ်ႉၵေႃႈ ပေႉၼႂ်းၵၢၼ်ၸတ်းပွင်ပၢႆးမၢၵ်ႈမီး လၢႆးတၢင်းၵၢၼ်တေႃႉသူင်ႇၶူဝ်းၵုၼ်ႇၼႆႉ လီလီ။
ၵွပ်ႈၼႆလႄႈ ၵူၼ်းမိူင်းၸင်ႇလိူၵ်ႈၶိုၼ်းပႃႇတီႇၶဝ် ပဵၼ်လူင်ပွင်ၸိုင်ႈထႅင်ႈ၊ ယိူင်းဢၢၼ်း တႃႇႁႂ်ႈဢမ်ႇ လႆႈမႆႈၸႂ် ၼႂ်းၵၢၼ်ပၢႆးမၢၵ်ႈမီးၸိုင်ႈမိူင်းလႄႈ တေဢမ်ႇလႆႈႁူပ်ႉလွင်ႈၶဵင်ႇတႃႉ ဢၼ်လီမႆႈၸႂ် – ၼႂ်းငဝ်း လၢႆးပၢႆးမၢၵ်ႈမီးလုမ်ႈၾႃႉတူၵ်း ၼႂ်းဝၼ်းမိူဝ်ႈၼႆႉ – ဝႃႈၼႆ။
ပႃႇတီႇၵၢၼ်မိူင်း PAP မိူင်းသိင်ႊၵပူဝ်ႊၼႆႉ လႆႈဝႃႈၶဝ်ႈပႃးၼႂ်းပႃႇတီႇၵၢၼ်မိူင်း ဢၼ်လႆႈဢႃႇၼႃႇ ၸိုင်ႈ မိူင်းမႃးၶၢဝ်းယၢမ်းႁိုင်သုတ်းၼႂ်းလုမ်ႈၾႃႉ ဢၼ်ၼိုင်ႈ – သိုဝ်ႇၶၢဝ်ႇ Reuters ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ