ၸွမ်းၼင်ႇမိူင်းၶႄႇ ၶဝ်ႈၵႄႈၵၢင်ၶပ်းၶိုင်ပၼ်သေ ၼႂ်းဝၼ်းတီႈ 28-29 /04/2025 ပူၼ်ႉမႃးၼႆႉ သိုၵ်းမၢၼ်ႈယိုတ်းမိူင်း တင်း သိုၵ်းတဢၢင်း TNLA ႁူပ်ႉထူပ်းဢုပ်ႇဢူဝ်းၵၼ် တီႈၶုၼ်ႊမိင်ႊ မိူင်းၶႄႇ။

တီႈပၢင်ဢုပ်ႇဢူဝ်းၵၼ်ၼၼ်ႉ သိုၵ်းမၢၼ်ႈဝႃႈ ဝဵင်းမိူင်းၵုတ်ႈ၊ မိူင်းမိတ်ႈ၊ ၼွင်ၶဵဝ်၊ ၵျွၵ်ႉမႄး၊ သီႇပေႃႉ ဢၼ်သိုၵ်းတဢၢင်း TNLA ယိုတ်းလႆႈဝႆႉၼၼ်ႉ ႁႂ်ႈပွႆႇပၼ်ၶိုၼ်းသေ  ႁႂ်ႈထွႆထွၼ်ပၼ် ၵႂႃႇယူႇသဝ်းဝႆႉတီႈ ၸႄႈဝဵင်း ၼမ်ႉသၼ်ႇ တင်း မၢၼ်ႈတူင်ႈ၊ ဢိင်ၼိူဝ်လွင်ႈၼႆႉ သိုၵ်းတဢၢင်းဢမ်ႇၽွမ်ႉလႄႈ ပၢင်ဢုပ်ႇဢူဝ်းဢမ်ႇလႆႈၶေႃႈတူၵ်းလူင်းသင်သေ လႆႈယင်ႉၵိုတ်းပႅတ်ႈ၊ ပေႃးထိုင်လိူၼ်ဢေႃႊၵတ်ႉသ် ၸင်ႇတေႁူပ်ႉဢုပ်ႇၵၼ်ထႅင်ႈ ဝႃႈၼႆ။

ၼင်ႇႁိုဝ်တေပိုတ်ႇၶိုၼ်းလႆႈ သဵၼ်ႈတၢင်းၵႃႉၶၢႆ လႅၼ်လိၼ် တႆး – ၶႄႇ၊ တႃႇတေမီးလွင်ႈၼိမ်သဝ်းၼႂ်းပိုၼ်ႉတီႈလႄႈ ၼင်ႇႁိုဝ် တေၵိုတ်းတိုၵ်းၵၼ်လႆႈ မိူၼ်သိုၵ်းၵဝ်ႈၵၢင်ႉၼၼ်ႉ မိူင်းၶႄႇႁိပ်ႈၼႅတ်ႈၶပ်းၶိုင် ႁႂ်ႈဢုပ်ႇဢူဝ်းၵၼ်တင်းသိုၵ်းမၢၼ်ႈ-  TNLA ပိုၼ်ၽၢဝ်ႇဝႆႉၼင်ႇၼႆ။

ဝၢႆးပၢင်ဢုပ်ႇဢူဝ်း ဢမ်ႇလႆႈၶေႃႈတူၵ်းလူင်သင်သေ ယင်ႉၵိုတ်းပႅတ်ႈယဝ်ႉ ၼႂ်းဝၼ်းတီႈ 2/5/2025  ၵၢင်ၶမ်ႈလႄႈ ဝၼ်းတီႈ 3/5/2025  ၵၢင်ၼႂ် မွၵ်ႈ 9 မူင်းၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ၼႂ်းၸႄႈဝဵင်းမိူင်းၵုတ်ႈ ၼႃႈတီႈသိုၵ်းတဢၢင်းၵုမ်းၵမ်။ တႅၵ်ႇတိူဝ်ႉ ၵူၼ်းၸၢႆးၵေႃႉၼိုင်ႈ လူႉတၢႆ ႁိူၼ်းယေးလူႉၵွႆထႅင်ႈ။

ၸုမ်းသိုၵ်းဢူၺ်းလီပွတ်းႁွင်ႇ 3 ၸုမ်း ဢၼ်ပႃး သိုၵ်းတဢၢင်းဝႆႉၼၼ်ႉ ပိုၼ်ၽၢဝ်ႇၵိုတ်းတိုၵ်းဝႆႉထႅင်ႈ တေႃႇထိုင် လိူၼ်မေႇၼႆႉသဵင်ႈ။ ၵူၺ်းၵႃႈ ၼႂ်းၸႄႈဝဵင်ၼွင်ၶဵဝ် ပွတ်းထုင်ႉတွင်းၶမ်းၼၼ်ႉ တိုၵ်ႉသိုပ်ႇပဵၼ်ပၢင်တိုၵ်းၵၼ်တင်း သိုၵ်းမၢၼ်ႈဝႆႉႁၢဝ်ႈႁႅင်း။