ဝၼ်းတီႈ 30/04/2025 ယၢမ်းႁူဝ်ၶမ်ႈ ၸုမ်းၸွႆႈထႅမ်ၵူၼ်းတူၵ်းၶွၵ်ႈ ၵၢၼ်မိူင်း AAPP ပိုၼ်ၽၢဝ်ႇဢွၵ်ႇဝႃႈ ၶၢဝ်းတၢင်းလိူၼ်ဢေႊပရိူဝ်ႊၼႆႉ ၵူၼ်းမိူင်းလႆႈတၢႆယွၼ်ႉသိုၵ်းမၢၼ်ႈ ၶႃႈႁႅမ်မီးၵႂႃႇ 96 ၵေႃႉ။

တႄႇဢဝ် ဝၼ်းတီႈ 01-30/04/2025 ၶၢဝ်းတၢင်း 30 ဝၼ်းၼႆႉ သိုၵ်းမၢၼ်ႈ ယိုတ်းမိူင်း ၸႂ်ႉလၢႆးတၢင်းၵူႈ ၾၢႆႇၾၢႆႇသေ ၶႃႈႁႅမ်တၢႆၵူၼ်းမိူင်း တင်းပတ်းပိုၼ်ႉမိူင်းႁူမ်ႈတုမ် ၼၢင်းယိင်း 48 ၵေႃႉ၊ ၵူၼ်းၸၢႆး 48 ၵေႃႉ။ ၼႂ်းၼၼ်ႉ လုၵ်ႈဢွၼ်ႇ ဢႃယုပႆႇတဵမ် 18 ပီ 21 ၵေႃႉ လိူဝ်ၼၼ်ႉ ၵူၼ်းမိူင်းတႃႇ 72 ၵေႃႉ လႆႈတၢႆၵႂႃႇယွၼ်ႉ မၢၵ်ႇၶိူင်ႈမိၼ်သိုၵ်းမၢၼ်ႈၼမ်လိူဝ်ပိူၼ်ႈသုတ်း ဝႃႈၼႆ။  

တႄႇႁၢင်လိူၼ်မၢတ်ႊၶျ်မႃး ၵူၼ်းမိူင်းႁူမ်ႈတုမ်ပတ်းပိုၼ်ႉ ႁူပ်ႉၺႃးၽေးၽႅၼ်ႇလိၼ်ဝႆႁၢဝ်ႈႁႅင်းသေ သိုၵ်း ၸၢဝ်းၶိူဝ်းၵူႈၸုမ်းၸုမ်း ဢွၼ်ၵၼ်ပိုၼ်ၽၢဝ်ႇၵိုတ်းတိုၵ်းမႃး။ သိုၵ်းမၢၼ်ႈ ၵေႃႈ ပိုၼ်ၽၢဝ်ႇၵိုတ်းတိုၵ်းၸွမ်း ပဵၼ်တၢင်းၵၢၼ်သေတႃႉ ႁၢၼ်ႉတေႃႇထိုင်ယၢမ်းလဵဝ် ယင်းတိုၵ်ႉသိုပ်ႇႁႅၼ်းသိုၵ်းလေႃႇတိုၵ်း ၼႂ်းၼႃႈတီႈ သိုၵ်းၸၢဝ်းၶိူဝ်းၵုမ်းၵမ်ဝႆႉယူႇ။

ၼႂ်းၶေႃႈပိုၼ်ၽၢဝ်ႇ ၸုမ်းၸွႆႈထႅမ်ၵူၼ်းတူၵ်းၶွၵ်ႈၵၢၼ်မိူင်း ၵဵပ်းၶေႃႈမုလ်းဝႆႉၼၼ်ႉ ပိူင်းၼႄဝႆႉပႃးဝႃႈ ၼႂ်းၶၢဝ်းတၢင်း သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ၵူၼ်းမိူင်းၸိူဝ်းႁဵတ်းၵၢၼ်တီႊမူဝ်ႊၶရေႊသီႊ ၺႃးသိုၵ်းမၢၼ်ႈၶႃႈႁႅမ်တၢႆၵႂႃႇတႃႇ 6,589 ၵေႃႉ ဝႃႈၼႆ။

လိူဝ်ၼၼ်ႉ ၸုမ်းၼၢင်းယိင်းမိူင်းႁူမ်ႈတုမ်ၵေႃႈ ယၢမ်ႈဢွၵ်ႇၽိုၼ်ႁၢႆးငၢၼ်းဝႆႉဝႃႈ ၼၢင်းယိင်း ၸိူဝ်းၺႃးသိုၵ်းမၢၼ်ႈ ၶႃႈႁႅမ်တၢႆၵႂႃႇ လိူၼ်ၵျႅၼ်ႊၼိဝ်ႊရီႊ 86 ၵေႃႉ၊ လိူၼ်ၾႅပ်ႊပိဝ်ႊရီႊ 66 ၵေႃႉ၊ လိူၼ်မၢတ်ႊၶျ် 66 ၵေႃႉ ဝႃႈၼႆ။

ၶေႃႈမုလ်းၸိူဝ်းၼႆႉ ၾၢႆႇၸုမ်းၼၢင်းယိင်းမိူင်းႁူမ်ႈတုမ် (BWU) တင်း ၸုမ်းၸွႆႈထႅမ်ၵူၼ်းတူၵ်းၶွၵ်ႈ ၵၢၼ်မိူင်း (AAPP) ၵဵပ်းႁွမ်မႃး ၸွမ်းၼင်ႇယိုၼ်းထိုင်လႆႈၼၼ်ႉၵူၺ်း။ လွင်ႈလူႉတၢႆမၢတ်ႇၸဵပ်း ၼႂ်းပိုၼ်ႉတီႈ ၸၢင်ႈမီးၼမ်လိူဝ်ၼႆႉထႅင်ႈယူႇ ဝႃႈၼႆ။

တႅမ်ႈ – ၽူၺ်းၼုမ်ႇ