မိူဝ်ႈဝၼ်းတီႈ 29/04/2025 ယၢမ်းၵၢင်ၼႂ် 8 မူင်းတေႃႇ တၢမ်းၶမ်ႈမွၵ်ႈ 4 မူင်း သိုၵ်းမၢၼ်ႈ ၸႂ်ႉၶိူင်ႈမိၼ်သေ ပွႆႇမၢၵ်ႇထၢတ်ႈငူၼ်ႉ(ၵွင်ႉ) လႄႈ ပွႆႇမၢၵ်ႇၶိူင်ႈၵွင်ႈလူင်သႂ်ႇ ဢွင်ႈတီႈတပ်ႉပၢင်သဝ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။

ၽွင်းတပ်ႉသိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ႁိမ်းတပ်ႉပၢင်သဝ်း မၢႆ (902) တီႈဝၢၼ်ႈတွင်းၶမ်းယူႇၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇထၢတ်ႈငူၼ်ႉ (ၵွင်ႉ) သႂ်ႇၼႂ်းဢွင်ႈတီႈ သိုၵ်းတဢၢင်းယူႇတႃႇ 11 လုၵ်ႈ။ ပွႆႇမၢၵ်ႇၶိူင်ႈၵွင်ႈလူင်ႁႅင်း 120 MM သႂ်ႇ 26 လုၵ်ႈၼႆ –  ႁွင်ႈၵၢၼ် ၶၢဝ်ႇၾၢႆႇတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ပိုၼ်ၽၢဝ်ႇဢွၵ်ႇဝႆႉ ၼင်ႇၼႆ။

“သိုၵ်းမၢၼ်ႈ ပိုၼ်ၽၢဝ်ႇၵိုတ်းတိုၵ်း တေႃႇလိူၼ်ဢေႊပရိူဝ်ႊၼႆႉသဵင်ႈ ဝႃႈၼၼ်သေတႃႉ ၸွမ်းၼႂ်းပိုၼ်ႉတီႈတႄႉ သိုၵ်းမၢၼ်ႈ ယင်းတိုၵ်ႉသိုပ်ႇထႅမ်ႁႅင်းသိုၵ်းသေ လေႃႇတိုၵ်းသိုၵ်းတဢၢင်းယူႇ။ လိူဝ်ၼၼ်ႉ ယင်းဢဝ်ၶိူင်ႈမိၼ် ပွႆႇမၢၵ်ႇသႂ်ႇၼႂ်းပိုၼ်ႉတီႈဢမ်ႇပဵၼ်ပၢင်တိုၵ်းၵၼ်ပႃးထႅင်ႈ”။

လႆႈႁူႉဝႃႈ မိူဝ်ႈပူၼ်ႉမႃး ဝၼ်းတီႈ 24/04/2025 ၼၼ်ႉၵေႃႈ သိုၵ်းမၢၼ်ႈ ၸႂ်ႉၶိူင်ႈမိၼ်သေ ပွႆႇမၢၵ်ႇထၢတ်ႈငူၼ်ႉ (ၵွင်ႉ) သႂ်ႇၼႂ်းၸႄႈဝဵင်းၼွင်ၶဵဝ် တႃႇ 8 လုၵ်ႈလႄႈ မၢၵ်ႇၶိူင်ႈၵွင်ႈလူင် တႃႇ 27 လုၵ်ႈ ဝႃႈၼႆ။

ၼင်ႇႁိုဝ် တေၵုမ်းထိင်းလႆႈၶိုၼ်း ဝဵင်းၼွင်ၶဵဝ်ၼႆႉ ၾၢႆႇသိုၵ်းမၢၼ်ႈ ၸႂ်ႉလၢႆးတၢင်း ၵူႈၾၢႆႇၾၢႆႇသေ ႁႅၼ်းသိုၵ်းလေႃႇတိုၵ်း တပ်ႉသိုၵ်းတဢၢင်း TNLA တင်း သိုၵ်းထၼု DPLA ၶိုၼ်းႁၢဝ်ႈႁႅင်း။

တႅမ်ႈ – ၽူၺ်းၼုမ်ႇ