မိူဝ်ႈၼႆႉ ဝၼ်းတီႈ 22/04/2025 တႄႇဢဝ်ယၢမ်းၵၢင်ၼႂ်ၸဝ်ႉ 5 မူင်းမႃး သိုၵ်းမၢၼ်ႈတင်း သိုၵ်းၵဝ်ႈၵၢင်ႉ MNDAA ပိၵ်ႉသဵၼ်ႈတၢင်း တီႈဢိူင်ႇႁူဝ်ယလႄႈ တၢင်းၶဝ်ႈဢွၵ်ႇဝဵင်းမိူင်းယႆ ၸိူဝ်းၼႆႉ ယွၼ်ႉသၢႆၵႃးသိုၵ်းမၢၼ်ႈ ၼပ်ႉႁူဝ်ပၢၵ်ႇ မုင်ႈၸူးတၢင်းလႃႈသဵဝ်ႈ။  

ၵူၼ်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “ဢလူဝ်ႈ …… ၶဝ်ပိၵ်ႉပၼ်သဵၼ်ႈတၢင်းၼႆႉ ပေႇၸႂ်ယဝ်ႉ ရူတ်ႉၵႃးၼႆႉ တိုၼ်းဝႃႈ ဢမ်ႇၸၢင်ႈၵႂႃႇမႃးလႆႈသေဢိတ်း။ ၶဝ်တႄႇပိၵ်ႉ ယၢမ်းၵၢင်ၼႂ်ၸဝ်ႉ 5 မူင်း တေႃႇထိုင် ၵၢင်ဝၼ်းၼႆႉ ၶဝ်ယင်းပႆႇပိုတ်ႇသဵၼ်ႈတၢင်း။ ၵႃးၼႆႉ ၵိုတ်းၶမ်ဝႆႉ တီႈၵဵတ်ႉမိူင်းယႆလႄႈ တီႈႁူင်းႁဵၼ်းဝၢၼ်ႈၾႃႉၽႃႇ ၼမ်ဝႃႈၼမ်ယဝ်ႉ။ ၵူၺ်းၵႃႈ ရူတ်ႉ ၶိူင်ႈတႄႉ ပၼ်ၵႂႃႇမႃးယူႇ”- ဝႃႈၼႆ။

ယၢမ်းလဵဝ် ဢၼ်ယူႇတီႈ သိုၵ်းမၢၼ်ႈတင်း သိုၵ်းၵဝ်ႈၵၢင်ႉၶဝ် ပိၵ်ႉသဵၼ်ႈတၢင်းဝႆႉၼႆႉ တီႈၵဵတ်ႉမိူင်းယႆၼၼ်ႉ သိုၵ်းမၢၼ်ႈ ပႂ်ႉဝႆႉ။ တီႈၵဵတ်ႉႁူဝ်ယၼၼ်ႉသမ်ႉ သိုၵ်းၵဝ်ႈၵၢင်ႉ ပႂ်ႉဝႆႉ ဝႃႈၼႆ။

“မိူဝ်ႈၼႆႉ ယၢမ်းၵၢင်ၼႂ်ၸဝ်ႉမွၵ်ႈ 5 မူင်း တေႃႇထိုင် ယၢမ်းၵၢင်ၼႂ် 6:30 မူင်းၼႆႉ ၵႃးသိုၵ်းမၢၼ်ႈ လုၵ်ႉမၢၼ်ႈ ၵၢတ်ႈ တၢင်ႉယၢၼ်းသေ လတ်းမႃးတၢင်းမိူင်းယႆၼႆႉ ဢမ်ႇယွမ်း 100 လမ်း ၶဝ်မုင်ႈၼႃႈၸူးလႃႈသဵဝ်ႈ ဢေႃႈ။ ၵႃးသိုၵ်းမၢၼ်ႈၼႆႉ ႁၼ်ၶဝ်တၢင်ႇမႃး ၶိူင်ႈၵွင်ႈၵၢင်ႇ၊ ၵူၼ်းသိုၵ်း၊ (ယိၵ်ႉၶႃႇ) ၶွင်ၵိၼ်ယႅမ်ႉ၊ ၵႃးတၢင်ႇလုၵ်ႈမႄးၶဝ် ပေႃးတဵမ်ၵူႈလမ်းယဝ်ႉ။ ပေႃးဢဝ် ႁူဝ်ၵူၼ်းဝႃႈတႄႉ ၼပ်ႉႁူဝ်ႁဵင် မၼ်းၶႃႈယဝ်ႉ”- ၵူၼ်းပိုၼ်ႉတီႈ ဝဵင်းမိူင်းယႆ သိုပ်ႇလၢတ်ႈၼႄၼင်ႇၼႆ။

မိူဝ်ႈၼႆႉ ယၢမ်းၵၢင်ၼႂ် သၢႆၵႃးသိုၵ်းမၢၼ်ႈ ဢၼ်လုၵ်ႉတၢင်း ဝဵင်းတၢင်ႉယၢၼ်းမႃးၼၼ်ႉ ၶဝ်တေပၼ်ႇမႃး တၢင်းမၢၼ်ႈၵၢတ်ႈ – မိူင်းပၢတ်ႇ – မိူင်းယႆ – ႁူဝ်ယ – ၼမ်ႉပွင်ႈ – လႃႈသဵဝ်ႈ ၸိူဝ်းၼႆႉ။ ပဵၼ်ၵႃးလူင် တႃႇ 126 လမ်း ၵႃးဢွၼ်ႇ မွၵ်ႈ 80 လမ်း ႁူမ်ႈၵၼ်ဢမ်ႇယွမ်း 200 လမ်း။

မိူဝ်ႈဝၼ်းတီႈ 18/04/2025 ယၢမ်းၵၢင်ၼႂ်ၼၼ်ႉၵေႃႈ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ သင်ႇပိၵ်ႉသဵၼ်ႈ တၢင်းဝႆႉ ၵမ်းၼိုင်ႈ ၼၼ်ႉသမ်ႉ သိုၵ်းၵဝ်ႈၵၢင်ႉ ဢဝ်ၵႃး 10 လမ်းပၢႆ လုၵ်ႉလႃႈသဵဝ်ႈ မႃးႁပ်ႉၵူၼ်းၼင်ႈ လုမ်း လူင်ပွင်ၸိုင်ႈမၢၼ်ႈ တီႈဝဵင်းမိူင်းယႆ ၼၼ်ႉၵေႃႈ ႁဵတ်းႁႂ်ႈၵူၼ်းမိူင်း ထူပ်းတၢင်းယၢပ်ႇၽိုတ်ႇလွင်ႈ ၵႂႃႇမႃး မိူဝ်ႈဝၼ်းၼၼ်ႉ ပဵၼ်ဝၼ်းၵၼ်ႇတေႃး ၵျွင်း ဝၢႆးသွၼ်းၼမ်ႉ သၢင်းၵျၢၼ်ႇလႄႈ ၵူၼ်းဝၢၼ်ႈမွၵ်ႈ 5 ဝၢၼ်ႈ ဢၼ်ယူႇၾၢႆႇၸၢၼ်းဢိူင်ႇႁူဝ်ယၼၼ်ႉ ဢမ်ႇလႆႈမႃးၵၼ်ႇတေႃႇၵျွင်း ၼႆယဝ်ႉ။