မိူဝ်ႈၼႆႉ ဝၼ်းတီႈ 22/04/2025 ယၢမ်းၵၢင်ၼႂ်မွၵ်ႈ 8 မူင်း ၵႃးသိုၵ်းမၢၼ်ႈ ၵႃးလူင် 100 လမ်းပၢႆ ၵႃးဢွၼ်ႇ 80 လမ်း တေႃႉတၢင်ႇဢဝ် ၵူၼ်းသိုၵ်းတင်း ၶိူင်ႈၵွင်ႈၵၢင်ႇ ၶဝ်ႈမႃးၶိုၼ်း ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵႃးသိုၵ်းမၢၼ်ႈ ဢၼ်ၶဝ်ႈမႃးဝဵင်းလႃႈသဵဝ်ႈၼႆႉ လုၵ်ႉတၢင်း ဝဵင်းတၢင်ႉယၢၼ်း၊ မိူင်းယႆ ၸိူဝ်းၼႆႉၶဝ်ႈမႃးၼၼ်ႉ ၸွမ်းသဵၼ်ႈတၢင်းလူင် ၾၢႆႇသိုၵ်းၵဝ်ႈၵၢင်ႉ ဢိုတ်းသဵၼ်ႈတၢင်းဝႆႉ ဢမ်ႇပၼ်ၵူၼ်းမိူင်းလတ်းၵႂႃႇမႃးၼႆ ၵူၼ်းမိူင်းၼမ်ႉပွင်ႈ ၵေႃႉၼိုင်ႈ လၢတ်ႈၼႄၼင်ႇၼႆ။

“ၵၢင်ၼႂ်ၼႆႉ ၽွင်းၵႃးသိုၵ်းမၢၼ်ႈ ၶဝ်တေမႃး သိုၵ်းၵဝ်ႈၵၢင်ႉၶဝ် ဢိုတ်းသဵၼ်ႈတၢင်းဝႆႉ ဢမ်ႇပၼ်ၵူၼ်း မိူင်းၵႂႃႇမႃးယူႇ ၵမ်းၼိုင်ႈ။ ဝၢႆးလင် သၢႆၵႃးသိုၵ်းမၢၼ်ႈ ပူၼ်ႉၵႂႃႇယဝ်ႉ ၸင်ႇပၼ်ႁႂ်ႈၵူၼ်းမိူင်းၵႂႃႇမႃး။ တူၺ်း တႄႉ ၾၢႆႇမိူင်းၶႄႇ လႅပ်ႈတေဢဝ်ဝဵင်းလႃႈသဵဝ်ႈ ႁဵတ်းဝဵင်းတူဝ်ယၢင်ႇ။ ပေႃးတူၺ်းငဝ်းလၢႆးမိူဝ်ႈလဵဝ် သၢႆ သိုၵ်းမၢၼ်ႈၼႆႉ ၶဝ်ႈမႃးၶိုၼ်း ၼႂ်းဝဵင်းလႃႈသဵဝ်ႈ ၼမ်တႄႉၼမ်ဝႃႈ”။

ၵႃးသိုၵ်းမၢၼ်ႈ ဢၼ်ၶဝ်ႈမႃးၼႂ်းဝဵင်းလႃႈသဵဝ်ႈၼႆႉ ပဵၼ်ၵႃးလူင် တႃႇ 126 လမ်း ၵႃးဢွၼ်ႇသမ်ႉ မွၵ်ႈ 80 လမ်း တင်းမူတ်း မီး 200 လမ်းပၢႆ။ ၼႂ်းၼၼ်ႉ ပႃးလုၵ်ႈလၢင်းၼၢင်းမေး ဢိၵ်ႇလုၵ်ႈဢွၼ်ႇ ၸိူဝ်းပဵၼ် မုင်ႉႁေႃႁိူၼ်း ၵူၼ်းသိုၵ်းမၢၼ်ႈသေဢမ်ႇၵႃး ၶိူင်ႈၶူဝ်းႁိူၼ်း ၸိူဝ်းၼႆႉၵေႃႈ တေႃႉတၢင်ႇမႃးတင်းသဵင်ႈ ဝႃႈၼႆ။

မိူဝ်ႈၼႆႉ ယၢမ်းၵၢင်ၼႂ် မွၵ်ႈ 9 မူင်း ၵႃးသၢႆသိုၵ်းမၢၼ်ႈ ၶဝ်ႈထိုင်ၵႂႃႇ ၼႂ်းဝဵင်းလႃႈသဵဝ်ႈၶိုၼ်း။ ၵႂႃႇၵိုတ်းၶပ်ႉ ထႅဝ်ၵၼ်ဝႆႉၸွမ်းၵၢင်ဝဵင်းလႃႈသဵဝ်ႈသေ ၵူၼ်းမိူင်းဝဵင်းလႃႈသဵဝ်ႈ လႆႈႁၼ်သၢႆၵႃးသိုၵ်းမၢၼ်ႈ ၶဝ်ႈၵႂႃႇၼႂ်း ၸၼ်ႉၸွမ်လူင် ဝဵင်းလႃႈသဵဝ်ႈတင်းၼမ်ၼႆ ၵူၼ်းမိူင်း ဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈ ၼင်ႇၼႆ။

“ၼႂ်းဝဵင်းတႄႉၵေႃႈ ၶဝ်ဢမ်ႇဢိုတ်းသဵၼ်ႈတၢင်းသင်ၼင်ႇၵဝ်ႇ။ ၼႂ်းၵႃးၶဝ်ၼၼ်ႉ ႁၼ်ၶဝ်တၢင်ႇမႃး ပုင်းပေႇပႃႇ ၼမ်ႉမၼ်းႁႄ။ မိူဝ်ႈလဵဝ် ၵႃးသိုၵ်းမၢၼ်ႈ ႁေႃႈၶဝ်ႈၵႂႃႇၼႂ်း ၸၼ်ႉၸွမ်ၼၼ်ႉ ပဵၼ်ၽုင်ပဵၼ်ၵေလူင်ဝႆႉ”။

မိူဝ်ႈဝႃး ဝၼ်းတီႈ 21/04/2025 သမ်ႉ သိုၵ်းၵဝ်ႈၵၢင်ႉ ပူတ်းပႅတ်ႈၶိုၼ်းတုင်း (ၸွမ်ပိဝ်) ၶဝ် ဢၼ်ပူၵ်းဝႆႉ ၸွမ်းၼႂ်း ၵၢင်ဝဵင်းလႃႈသဵဝ်ႈလႄႈ ၸွမ်းၶူဝ်ဢေႇတီႇ ၸိူဝ်းၼၼ်ႉ ဝႃႈၼႆ။  

ဢိင်ၼိူဝ် သိုၵ်းမၢၼ်ႈ ဢဝ်ႁႅင်းသိုၵ်း ႁႅင်းၶိူင်ႈၵွင်ႈၵၢင်ႇၶဝ်ႈမႃးၼႂ်းဝဵင်းလႃႈသဵဝ်ႈၶိုၼ်းၼႆႉသေ ၵူၼ်းမိူင်း ၼႂ်းပိုၼ်ႉတီႈ ဝဵင်းလႃႈသဵဝ်ႈလႄႈ ႁိမ်းႁွမ်းဝဵင်းလႃႈသဵဝ်ႈ ဢွၼ်ၵၼ်မႆႈၸႂ် ၵူဝ်သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ပဵၼ်ပၢင်တိုၵ်းၵၼ်ထႅင်ႈ ၼႂ်းၸိုင်ႈတႆးပွတ်းႁွင်ႇ။

တႅမ်ႈ – ၽူၺ်းၼုမ်ႇ