မိူဝ်ႈဝၼ်းပီမႂ်ႇသွၼ်းၼမ်ႉ 17/04/2025 ၼၼ်ႉ သိုၵ်းမၢၼ်ႈပွႆႇၵူၼ်းတူၵ်းၶွၵ်ႈ 4893 ၵေႃႉ ၼႂ်းၼၼ်ႉ ပႃးၵူၼ်း တူၵ်းၶွၵ်ႈယွၼ်ႉၵၢၼ်မိူင်း 378 ၵေႃႉၵူၺ်းၼႆ ၸုမ်းတူင်ႉၼိုင် သုၼ်ႇလႆႈသုၼ်ႇပဵၼ်ၵူၼ်းတူၵ်းၶွၵ်ႈ ယွၼ်ႉၵၢၼ်မိူင်း မိူင်း ႁူမ်ႈတုမ် PPNM ပိုၼ်ၽၢဝ်ႇဝႆႉၼင်ႇၼႆ။
ၵူၼ်းတူၵ်းၶွၵ်ႈ ယွၼ်ႉၵၢၼ်မိူင်း ၸိူဝ်းလႆႈဢွၵ်ႇမႃးၼၼ်ႉ ပဵၼ်ၵူၼ်းၸိူဝ်းတူၵ်းၶွၵ်ႈဝႆႉ ၼႂ်းၶွၵ်ႈ ဢိၼ်းၸဵင်ႇ (အင်းစိန်) တႃႈၵုင်ႈ တင်း ဢူဝ်းၽူဝ်ႇ (အိုးဘို) ဝဵင်းလိူဝ်ႇ ၼမ်လိူဝ်ပိူၼ်ႈသုတ်းသေ ဢၼ်ပူၼ်ႉဢွၵ်ႇၶွၵ်ႈမႃး ပဵၼ် ၸၢႆး 221 ၵေႃႉ လႄႈ ယိင်း 157 ၵေႃႉ ဝႃႈၼႆ။
ၸွမ်းၼင်ႇ ၸုမ်းတူင်ႉၼိုင်သုၼ်ႇလႆႈသုၼ်ႇပဵၼ်ၵူၼ်းတူၵ်းၶွၵ်ႈ ယွၼ်ႉၵၢၼ်မိူင်း မိူင်းႁူမ်ႈတုမ် ၵဵပ်းၶေႃႈမုၼ်းဝႆႉၼၼ်ႉ ၶွၵ်ႈၶင် ၼႂ်းမိူင်းႁူမ်ႈတုမ် တင်းမူတ်းမီးယူႇ 33 တီႈ ၼႂ်းၼၼ်ႉ သိုၵ်းမၢၼ်ႈပွႆႇၵူၼ်းတူၵ်းၶွၵ်ႈ ယွၼ်ႉၵၢၼ်မိူင်းမႃး တႃႇ 21 ဢွင်ႈတီႈၵွႆး။
ၵူၼ်းတူၵ်းၶွၵ်ႈ ၸိူဝ်းထုၵ်ႇသိုၵ်းမၢၼ်ႈပွႆႇဢွၵ်ႇမႃး တႃႇ 4893 ၵေႃႉ ၼႂ်းဝၼ်းပီမႂ်ႇသွၼ်းၼမ်ႉၼၼ်ႉ လႆႈႁပ်ႉပၢၵ်ႇ ႁဵတ်း ၶေႃႈၵိၼ်ၵႅၼ်ႇၵၼ်တင်း သိုၵ်းမၢၼ်ႈဝႆႉ ၸွမ်းၼင်ႇ ၶေႃႈၼွင်ႇငိူၼ်ႈၶႆ ၾိင်ႈမိူင်းၽိတ်းပၵ်းပိူင် တွၼ်ႈ 401 တွၼ်ႈၽႄ 1 ၼၼ်ႉဝႃႈ “သင်ဝႃႈ ပူၼ်ႉပႅၼ် တၢင်းၽိတ်းထႅင်ႈၸိုင် တေလႆႈၺႃးတူတ်ႈမႂ်ႇၵွႆးဢမ်ႇၵႃး တူတ်ႈတၢမ်ႇၵဝ်ႇဢၼ်ထုၵ်ႇပွႆႇဝၢင်းပၼ်ၼႆႉၵေႃႈတေၶိုၼ်းလႆႈႁပ်ႉပႃး ” ဝႃႈၼႆ။
ၸုမ်းၸွႆႈထႅမ် ၵူၼ်းတူၵ်းၶွၵ်ႈၵၢၼ်မိူင်း AAPP ႁၢႆးငၢၼ်းပိုၼ်ၽၢဝ်ႇဢွၵ်ႇဝႆႉဝႃႈ တႄႇသိုၵ်းမၢၼ်ႈပိုၼ်ၽၢဝ်ႇယိုတ်းဢႃႇ ၼႃႇ ဝၢၼ်ႈမိူင်းမႃး ၶၢဝ်းတၢင်း 4 ပီပၢႆ ၵူၼ်းၸိူဝ်းထုၵ်ႇသိုၵ်းမၢၼ်ႈတီႉ ၺွပ်းၵႂႃႇ မီး 29030 ၵေႃႉ။ ၼႂ်းၼၼ်ႉ တႃႇၵူၼ်း 22197 ၵေႃႉ ယင်းတိုၵ်ႉထုၵ်ႇသိုၵ်းမၢၼ်ႈၵုမ်းၵမ်ဝႆႉသေ တႃႇ 10769 ၵေႃႉသမ်ႉ ၺႃးတူတ်ႈတၢမ်ႇတူၵ်းၶွၵ်ႈဝႆႉ ဝႃႈၼႆ။
တႅမ်ႈ- ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ