သိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈၵႂႃႇတၢင်းဝၢၼ်ႈဢိူင်ႇ ၼႂ်းဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ႁၢမ်ႈၵူၼ်းမိူင်းပိုၼ်ႉတီႈ ၸႂ်ႉၾူၼ်းမိုဝ်းထိုဝ်ပႃး ဝႃႈၼႆ။

တႄႇဝၼ်းတီႈ 15/04/2025 မႃး ၾၢႆႇတင်းသိုၵ်းမၢၼ်ႈ ဢဝ်ဢဵၼ်ႁႅင်းသိုၵ်း 100 ပၢႆ ထူဝ်းသိုၵ်းၶဝ်ႈၼႂ်းဝၢၼ်ႈလိၼ်းဝေး (လင်းဝေး) ၊ ၵျွၵ်ႉတေႃး (ကျောက်တော) ၊ တၽၢၼ်းပိၼ်ႇ (သဖန်းပင်) ၊ ပႄႇၵိၼ်း (ပါယ်ကင်း ) ၸိူဝ်းၼႆႉ ဝႃႈၼႆ။

ၼၢင်းယိင်း ဢႃယု 30 ပီ ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈၶဝ် ထႅမ်ႁႅင်းသိုၵ်းမႃး တၢင်းၼွၵ်ႈဝၢၼ်ႈ ၊ တေႃႈလဵဝ်ၼဵင်ႈၵေႃႈဢမ်ႇႁတ်းၵႂႃႇၵဵပ်း၊ ပေႃးၶဝ်ၶဝ်ႈမႃးၼႂ်းဝၢၼ်ႈ ၶဝ်တတ်းပႅတ်ႈလႅင်းၾူၼ်း၊ ၾူၼ်းၵေႃႈဢမ်ႇပၼ်ၸႂ်ႉ၊ ပေႃးသိုၵ်းမၢၼ်ႈ ၶဝ်ပူၼ်ႉၵႂႃႇယဝ်ႉ ၸင်ႇၸၢင်ႈၸႂ်ႉၾူၼ်းလႆႈၶိုၼ်း ၊ ၾၢႆႇတၢင်းၼွၵ်ႈဝၢၼ်ႈ ၵႆႉလႆႈငိၼ်းသဵင်ၵွင်ႈသဵင်မၢၵ်ႇ”- ဝႃႈၼႆ။

ရူတ်ႉၵႃး ဢၼ်ၶဝ်ၶီႇမႃးၼၼ်ႉၵေႃႈ မႃးပႅတ်ႈဝႆႉၸွမ်းဝၢၼ်ႈသေ တူဝ်ၶဝ်တႄႉ လူင်းရူတ်ႉ ပႆၶဝ်ႈဝၢၼ်ႈ ၵႂႃႇလတ်းဝၢၼ်ႈၼိုင်ႈယဝ်ႉဝၢၼ်ႈၼိုင်ႈလူင်ၵႂႃႇ – ၵူၼ်းပိုၼ်ႉတီႈလၢတ်ႈၼင်ႇၼႆ။

“ၵႃး ဢၼ်ၶဝ်ၶီႇမႃးၼၼ်ႉၵေႃႈ မႃးပႅတ်ႈဝႆႉၸွမ်းဝၢၼ်ႈ ၊ မီး 3-4 လမ်း ၊ ပဵၼ်ၵႃးၽႂ်ၵေႃႈ ဢမ်ႇႁူႉ ၊ လႅပ်ႈပဵၼ် ၵႃးဢၼ်ၶဝ် ယိုတ်းဢဝ်လၢႆမႃးတီႈၵူၼ်းမိူင်း ၸိူဝ်းၼၼ်ႉၵူၺ်း။ မိူဝ်ႈ ဢွၼ်တၢင်းၵေႃႈ ၶဝ်ယၢမ်ႈဢဝ်ၵႃး ဝၢၼ်ႈႁဝ်းၵႂႃႇၸိူင်ႉၼႆယဝ်ႉ။ တေႃႇထိုင်ဝၼ်းမိူဝ်ႈၼႆႉ ဢမ်ႇလႆႈၶိုၼ်းလူး။ ဢၼ်ၶဝ်မႃးၵမ်းၼႆႉ ၶဝ်မႃးလိုဝ်ႈတီႈ ႁူင်းႁဵၼ်း တီႈဝၢၼ်ႈႁဝ်းၼႆႉ ၶိုၼ်းၼိုင်ႈ။ ၶဝ်သင်ႇၵူၼ်းဝၢၼ်ႈ တိုၼ်းတေဢမ်ႇလႆႈၾူၼ်းၼႆ။ ထႅင်ႈဝၼ်းၼိုင်ႈ ၶဝ်ၵေႃႈပႅတ်ႈရူတ်ႉၵႃးဝႆႉတီႈဝၢၼ်ႈႁဝ်းသေ ၶဝ်သိုပ်ႇပႆၵႂႃႇတၢင်းဝၢၼ်ႈ တၢင်းဢွၵ်ႇပုၼ်ႉထႅင်ႈ” – ဝႃႈၼႆ ။  

လိူဝ်ၼၼ်ႉ ၼႂ်းဝၼ်းတီႈ 12/04/2025 ယၢမ်းၵၢင်ၼႂ်ၸဝ်ႉ 1 မူင်း ၵူၼ်းဢမ်ႇႁူႉၾၢႆႇ ၶဝ်ႈႁႅမ်ၵူၼ်းပိုၼ်ႉတီႈ ဝၢၼ်ႈတၽၢၼ်းပိၼ်ႇ တၢႆ 4 ၵေႃႉ ၊ ၼႂ်းၼၼ်ႉ ပႃးလုၵ်ႈဢွၼ်ႇႁဵၼ်းလိၵ်ႈၸၼ်ႉ 8 ၵေႃႉၼိုင်ႈ ၊ ဝၢႆးလင်ၼႆႉ ၾၢႆႇတင်းသိုၵ်းမၢၼ်ႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈမႃး – ၵူၼ်းပိုၼ်ႉတီႈလၢတ်ႈ။

“မိူဝ်ႈဝၼ်းတီႈ 12 ၵၢင်ၼႂ်ၸဝ်ႉၼၼ်ႉ မီးၵူၼ်းဢမ်ႇႁူႉၾၢႆႇ ၶဝ်ႈႁႅမ်ၵူၼ်းဝၢၼ်ႈတၽၢၼ်းပိၼ်ႇ 4 ၵေႃႉ ၊ ၼႂ်းၼၼ်ႉ ပႃးလုၵ်ႈဢွၼ်ႇၵေႃႉၼိုင်ႈ ၊ ၶဝ်ႈႁႅမ်ၼႂ်းႁိူၼ်းၵမ်းလဵဝ်ယဝ်ႉ ၊  ၵူၼ်းဢၼ်ထုၵ်ႇၶႃႈႁႅမ်ၼၼ်ႉ ပဵၼ်လုၵ်ႈၸုမ်းပိဝ်ႇၸေႃးထီး ဢၼ်ပဵၼ်ၶွၼ်ႉတဝ်ႉသိုၵ်းမၢၼ်ႈၼၼ်ႉၼႆ ၊ ပဵၼ်ၽႂ်ၸုမ်းလႂ် ၶႃႈႁႅမ်ၵႂႃႇတႄႉတႄႉၼႆတႄႉ ၽႂ်ၵေႃႈဢမ်ႇႁူႉ”- ဝႃႈၼႆ။

ဝဵင်းယႂႃႇငၢၼ်ႇၼႆႉ ၵူႈပွၵ်ႈပဵၼ်ဝဵင်းဢၼ်ဢမ်ႇမီးၸုမ်းလုၵ်ႉၽိုၼ်ႉ၊ ပဵၼ်ဝဵင်းဢၼ်မီးတၢင်းႁၢင်ႈလီလႄႈ ၵတ်းယဵၼ်ဝဵင်းၼိုင်ႈ။ ၵွပ်ႈၼႆ သိုၵ်းမၢၼ်ႈၵေႃႈ ဢမ်ႇမႃးပၵ်းတပ်ႉယူႇသဝ်း။ ၵူၺ်းၵႃႈ ၸူဝ်ႈသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ ၵူၼ်းပိုၼ်ႉတီႈ ၶဝ်ႈထိူၼ်ႇယိပ်းၵွင်ႈ ယိုဝ်းသိုၵ်းမၢၼ်ႈလႄႈ ယၢမ်းလဵဝ် သိုၵ်းမၢၼ်ႈပလိၵ်ႈမၢၼ်ႈ ဢမ်ႇပၵ်းတပ်ႉသေတႃႉ မိူဝ်းတင်ႈၵဵတ်ႉ/ လၢၼ်ႇ သေပႂ်ႉၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း။