တႄႇဝၼ်းတီႈ 16/04/2025 ယၢမ်းဝၢႆးဝၼ်း 2 မူင်းမႃး သိုၵ်းမၢၼ်ႈဢဝ်ၶိူင်ႈမိၼ်မႅင်းမီႈ Helicopter မွၵ်ႈသၢမ်လမ်း သေ လတ်းဝဵင်းလႃႈသဵဝ်ႈ-သႅၼ်ဝီ-ၵူတ်ႉၶၢႆ-မူႇၸေႊ ၵႂႃႇၵႂႃႇမႃးမႃးႁၢၼ်ႉတေႃႇထိုင် မိူဝ်ႈဝႃး ဝၼ်းတီႈ 17/04/2025  ယၢမ်းၵၢင်ဝၼ်း။

မိူဝ်ႈဝၼ်းတီႈ 16/04/2025 ၶိူင်ႈမိၼ် သိုၵ်းမၢၼ်ႈ ႁႄႊလီႊၵွပ်ႊတိူဝ်ႊ လုၵ်ႉတၢင်း ဝဵင်းမူႇၸေႊ မႃးလူင်းတီႈၶူင်ႇႁိူဝ်းမိၼ် ဝဵင်းလႃႈသဵဝ်ႈ 2 လမ်းၼႆ ၸၢႆးထုၼ်း ၵူၼ်းမိူင်းဝဵင်းလႃႈသဵဝ်ႈ လၢတ်ႈ ၽူႈတွႆႇႁွၵ်ႈၼင်ႇၼႆ။

“ႁဝ်းငိၼ်းဝႃႈ ၽူႈမီးၸၼ်ႉသိုၵ်းမၢၼ်ႈမႃး။ ႁွင်ႉမႃးပႃးတူဝ်တႅၼ်းလူင်ပွင်ၸိုင်ႈမိူင်းၶႄႇႁႄ။ လၢႆၵေႃႉတႄႉၵေႃႈ ဢမ်ႇ လႆႈႁူႉၸွမ်း။ မိူဝ်ႈဝႃး  17/04/2025  ၶဝ်မီးပၢင်ၵုမ်ၵၼ်တီႈႁူင်းႁႅမ်း ၸၢင်ႉသွင်တူဝ် (ဆင်နှစ်ကောင်)။ ၸွမ်းသဵၼ်ႈ တၢင်းၼၼ်ႉ သိုၵ်းၵဝ်ႈၵၢင်ႉၶဝ် ဢိုတ်းတၢင်းႁႄ ဢဝ်ႁူမ်ႇလူမ်ႈဝႆႉ ၼမ်ထူၼ်ႈယဝ်ႉ” –  ဝႃႈၼႆ။

မိူဝ်ႈဝႃးဝၼ်းတီႈ 17/04/2025 ယၢမ်းၵၢင်ဝၼ်း မွၵ်ႈ 1 မူင်းၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ် သႅၼ်း Helicopter လုၵ်ႉတၢင်းမူႇၸေႊ မုင်ႈၼႃႈမႃးၸူး တၢင်းဝဵင်းလႃႈသဵဝ်ႈၼႆ ၸၢႆးဢွင်ႇ ၵူၼ်းမိူင်း ၼႂ်းဝဵင်းမူႇၸေႊလၢတ်ႈၼႄၼင်ႇၼႆ။

“ၸူဝ်ႈလၢႆဝၼ်းမႃးၼႆႉ သိုၵ်းမၢၼ်ႈၶဝ် တေႃႉၵူၼ်းၶဝ် တၢင်ႇၵႃးမႃး ၼိုင်ႈလမ်း မီးမွၵ်ႈ 50 ၵေႃႉၼႆႉၼေႈ။ လုၵ်ႉတၢင်း လႂ်မႃးၵေႃႈဢမ်ႇႁူႉ။ ၼႂ်းဝဵင်းၵေႃႈ ၶဝ်သၢၼ်ႈၵျႃႉ။ ၶိူင်ႈမိၼ်ၶဝ်ၵေႃႈ သၢၼ်ႈၵျႃႉ။ ၶဝ်ႁဵတ်းႁင်ၵေႃႈဢမ်ႇႁူႉ။ ၵႂႃႇၵႂႃႇမႃး မႃး”

ယွၼ်ႉလူင်ပွင်ၸိုင်ႈမိူင်းၶႄႇ ပၼ်ႁႅင်းဢီး မိပ်ႇငႅၼ်းၼိူဝ် ၸုမ်းသိုၵ်းၵဝ်ႈၵၢင်ႉလႄႈ ၸင်ႇလႆႈတူၵ်းလူင်းယွမ်းထွႆ ဢွၵ်ႇ ဝဵင်းလႃႈသဵဝ်ႈၶိုၼ်း။ မီးၶၢဝ်ႇႁူင်လိုဝ်းဝႃႈ သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ တူၵ်းလူင်းၵၼ်ဝႆႉ ႁႂ်ႈသိုၵ်းမၢၼ်ႈ ၶဝ်ႈမႃးၵုမ်း ၵမ်ၶိုၼ်း ၼႂ်းဝဵင်းလႃႈသဵဝ်ႈ တႃႇ 12 ပွၵ်ႉ။ သိုၵ်းၵဝ်ႈၵၢင်ႉၵေႃႈ တေယူႇၾၢႆႇၼွၵ်ႈဝဵင်းလႃႈသဵဝ်ႈသေ လွမ်ႉႁွပ်ႈ သိုၵ်း မၢၼ်ႈၸိူဝ်းယူႇၼႂ်းဝဵင်းလႃႈသဵဝ်ႈဝႆႉ – ၵူၼ်းလႃႈသဵဝ်ႈလၢတ်ႈၼင်ႇၼႆ။

လႆႈႁူႉဝႃႈ ဢွၼ်တၢင်းသုတ်း သိုၵ်းမၢၼ်ႈ တေႁႂ်ႈႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈဢွၵ်ႇ (လဝက) ၊ ၾၢႆႇပၢႆးပၺ်ႇၺႃႇ၊ ၾၢႆႇပၢႆးယူႇလီ ၸိူဝ်းၼႆႉ ၶဝ်ႈမႃးႁဵတ်းၵၢၼ်ၵႂႃႇလူင်ႈၼႃႈ။ ဝၢႆးလင်ၸင်ႇ ႁႂ်ႈႁွင်ႈၵၢၼ်ၾၢႆႇတပ်ႉသိုၵ်း ၶဝ်ႈမႃးၸွမ်း တၢင်းလင် ဝႃႈၼႆပႃး။

ၽူႈၸမ်ၸႂ် ၼႂ်းတပ်ႉသိုၵ်းတဢၢင်းၵေႃႉၼိုင်ႈ တႅမ်ႈတၢင်ႇပိုၼ်ၽၢဝ်ႇဝႆႉ ၼိူဝ်သိုဝ်ႇတူင်ႇဝူင်းၵူၼ်းဝႃႈ – “တႄႇမိူဝ်ႈၼႆႉ ဝၼ်းတီႈ 18/04/2025 ၵႂႃႇ ဝဵင်းလႃႈသဵဝ်ႈ တေႁွတ်ႈၵႂႃႇၶိုၼ်း ၼႂ်းမိုဝ်းသိုၵ်းမၢၼ်ႈယဝ်ႉ။ သိုၵ်းမၢၼ်ႈ တေတႄႇၶဝ်ႈ ဝဵင်းလႃႈသဵဝ်ႈယဝ်ႉ။ ၾၢႆႇၸွပ်ႇၶၢဝ်ႇ ၸယၽ ၶဝ်တေတႄႇ ၶဝ်ႈ မိူဝ်ႈၼႆႉ ၼႆသေတႃႉၸုမ်းပလိၵ်ႈ တင်း ၸုမ်းၸွပ်ႇၶၢဝ်ႇ ၸယၽ ၶဝ် ပေႃးၼုင်ႈသိူဝ်ႈၶူဝ်းၵူၼ်းမိူင်းသေ ၽႅဝ်ဝႆႉၼႂ်းဝဵင်းလႃႈသဵဝ်ႈ ၸဵမ်မိူဝ်ႈလၢႆဝၼ်းပူၼ်ႉမႃးယဝ်ႉ” ဝႃႈၼႆ။

လိူဝ်ၼၼ်ႉ ၾၢႆႇလူင်ပွင်ၸိုင်ႈမိူင်းၶႄႇၵေႃႈ တေမႃးတင်ႈလုမ်းၵပ်းသၢၼ် ၵဵဝ်ႇလူၺ်ႈၵၢၼ်မၢၵ်ႈမီးဝႆႉ ၼႂ်းဝဵင်းလႃႈသဵဝ်ႈၵွႆး ဢမ်ႇၵႃး ၾၢႆႇသိုၵ်းၵဝ်ႈၵၢင်ႉၵေႃႈ တေတင်ႈလုမ်းၵပ်းသၢၼ်ဝႆႉပႃးထႅင်ႈ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉ တင်းသွင်ၸုမ်းတႄႉ ယင်းပႆႇပိုတ်ႇပၢၵ်ႇ ပိုၼ်ၽၢဝ်ႇဢွၵ်ႇ ပဵၼ်တၢင်းၵၢၼ် ႁႂ်ႈၵူၼ်းမိူင်းလႆႈႁူႉၸွမ်း။