ယွၼ်ႉပိူဝ်ႈၽႅၼ်ႇလိၼ်ဝႆၼႆႉသေ ႁူင်းႁေႃသႃသၼႃ ၵူၼ်ႇပင်းလူႉၵွႆၵႂႃႇ မွၵ်ႈ  9600 လင်ယဝ်ႉၼႆ ၽွင်းလူင်ၾၢႆႇသႃသၼႃ လၢတ်ႈၵႂႃႇတီႈပၢင်ၵုမ် လူင်တႃႇၸွႆႈထႅမ်ၽေးသၽႃႇဝ  ဢၼ်ၸတ်းႁဵတ်းၵႂႃႇမိူဝ်ႈဝၼ်းတီႈ 12/04/2025 ၼၼ်ႉၼင်ႇၼႆ။

 ဢၼ်လူႉၵွႆၵူၼ်ႇပင်းၵႂႃႇၼႆႉ ပဵၼ် ထၢတ်ႈၸေႇတီႇ  5402 သူႇ၊ ဝတ်ႉဝႃးၽႃသိူဝ်ႇ 3841 လင်၊ ႁေႃသိၼ်ၼၢႆးၶၢဝ် 187 လင် ၊ ၵျွင်းၽြႃး 50 လင် ၊ ပလီႇ (ၵျွင်းၵြႃး) 136 လင်၊ ၵျွင်းႁိၼ်ႇတူႇ 26 လင်၊ ၵျွင်းၶႄႇ 1 လင်။ ပဵၼ်ၼႂ်းတိူင်း ၸႄႈၵႅင်း၊ တိူင်းတႃႈလိူဝ်ႇ၊ ပႃႇၵိူဝ်၊ မၵူၺ်း၊ ၼေႇပျီႇတေႃႇ၊ မိူင်းတႆးလႄႈ မိူင်းယၢင်းၽိူၵ်ႇ ၸိူဝ်းၼႆႉ။ သင်ၶၸဝ်ႈလႆႈလူႉလွၼ်ႇ 159 တူၼ်၊ ၼၢႆးၶၢဝ် 55 ၸဝ်ႈ၊ ၽူႈႁဵတ်းၵၢၼ်သႃသၼႃၶရိယၢၼ်ႇ  9 ၵေႃႉ၊ ဢိတ်ႇသလမ်ႇ 673 ၵေႃႉ၊ ႁိၼ်ႇတူႇ 16 ၵေႃႉသေ ဢၼ်ႁၢႆဝႆႉတႄႉပဵၼ် ရႁၢၼ်း 3 ၸဝ်ႈလႄႈ ၸၢဝ်းဢိတ်ႉသလၢမ်ႇ 63 ၵေႃႉ ဝႃႈၼႆ။

 လိူဝ်ၼၼ်ႉ ႁွင်ႈၵၢၼ်ၾၢႆႇသႃသၼႃ လႆႈလူင်းၵူတ်ႇထတ်းတူၺ်းဝတ်ႉဝႃးလႄႈႁူင်းႁေႃ ၸိူဝ်းၵူၼ်ႇပင်းၸိူဝ်းၼၼ်ႉ – ဢၼ်လႅဝ်ၽႅဝ်ႉဢမ်ႇၸၢင်ႈယူႇသဝ်းၶိုၼ်းသေဢိတ်းၼႆႉ မီး 43 လင်၊ ႁူင်းသဝ်း 5 လင်၊ သင်ဝႃႈၶိုၼ်းမႄးၵုမ်းၵေႃႇသေ ယူႇတႄႉ ယူႇလႆႈၶိုၼ်းၼၼ်ႉသမ်ႉမီး 20လင် ႁူင်းသဝ်း 22 လင်၊ ဢၼ်လူႉၵွႆဢိတ်းဢိတ်းၵူၺ်းသမ်ႉမီး  4 လင် ဝႃႈၼႆ။

ဢၢင်ႈဢိင်-DVB