ႁူဝ်လိူၼ်ဢေႊပရိူဝ်ႊၼႆႉ သိုၵ်းမၢၼ်ႈသင်ႇႁႂ်ႈၵူၼ်းဝၢၼ်ႈၼမ်ႉၽိူၵ်ႇ(တွင်ႇထီႇပႂႃႇ) ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ၶဝ်ႈႁၢပ်ႇၵၢၼ်သိုၵ်း ၽွင်းၵူၼ်းမိူင်းၵပ်ႉၵိၼ်းတႃႇယူႇတႃႇၵိၼ်။
ၵူၼ်းမိူင်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ- “ ပၢႆလိူဝ်ႁႃၵိၼ်ယၢပ်ႇသေ သိုၵ်းမၢၼ်ႈၵေႃႈ ၵဝ်းယူႇၾၢႆႇၼိုင်ႈ။ သိုၵ်းမၢၼ်ႈၶဝ်ယွၼ်းမႃး ၸဵမ်မိူဝ်ႈႁူဝ်လိူၼ် ၼႆႉယဝ်ႉ။ ၼႂ်းဝၢၼ်ႈတွင်ႇထီႇပႂႃႇၼႆႉ ႁႂ်ႈလႆႈၵႂႃႇႁၢပ်ႇ ၵၢၼ်သိုၵ်း 2 ၵေႃႉ ၵူၼ်းလူင်ၼႂ်း ဝၢၼ်ႈၼမ်ႉ ၵႂႃႇဢဝ်ငိုၼ်းတွင်းပၼ်သေ လႆႈယွၼ်းငူပ်ႉငီႉ ၵႄႈတူဝ်ဝႆႉ” ဝႃႈၼႆ။
လိူဝ်ၼၼ်ႉ ၵူၼ်းမိူင်းၼႂ်းၸႄႈဝဵင်းပၢင်လွင်း ၵေႃႉၼိုင်ႈ လၢတ်ႈတီႈသိုဝ်ႇၶၢဝ်ႇၶမ်းသႃးငၢဝ်းဝႃႈ −“ တီႈၼႂ်းဢိူင်ႇဝၢၼ်ႈၼမ်ႉၽိူၵ်ႇၼႆႉ ဢမ်ႇၵွမ်ႉၵႃႈသိုၵ်းမၢၼ်ႈၵူၺ်း မိူၼ်ၼင်ႇပျီႇတူႉၸိတ်ႉပဢူဝ်း PNO ၵႆႉမီးလွင်ႈၵဵပ်းၶွၼ်ႇယွၼ်းငိုၼ်း ၵဵပ်းၵူၼ်းၵႂႃႇႁၢပ်ႇထၢမ်းၵၢၼ်သိုၵ်းမႃးလၢႆပွၵ်ႈယဝ်ႉ။ ၵူၼ်းပိုၼ်ႉတီႈသမ်ႉ ဢမ်ႇၶႂ်ႈၵႂႃႇႁၢပ်ႇၵၢၼ်လႄႈ လႆႈဢဝ်ငိုၼ်းတွင်းသေ ယွၼ်းဢုပ်ႇဢူဝ်းငူပ်ႉငီႉမႃးၵူႈလိူၼ်တေႃႇထိုင်ယၢမ်းလဵဝ်။ တႃႇဢဝ်ငိုၼ်းပၼ် တွၼ်ႈတႃႇၵူၼ်းပိုၼ်ႉတီႈတေဢမ်ႇလႆႈၵႂႃႇႁၢပ်ႇထၢမ်းၵၢၼ်သိုၵ်းၼၼ်ႉ ၵူၼ်းဝၢၼ်ႈ ၼႂ်းဢိူင်ႇတင်းမူတ်း လႆႈႁူမ်ႈၵၼ်ငိုၼ်း ၼိုင်ႈႁိူၼ်း 6 ႁဵင်ပျႃးသေပၼ်ၵႂႃႇ”- ဝႃႈၼႆ။
တႄႇဢဝ်ႁူဝ်ပီ 2024 ဝၢႆးသိုၵ်းမၢၼ်ႈပိုၼ်ၽၢဝ်ႇ ပိူင်ႁၢပ်ႇထၢမ်းၵၢၼ်သိုၵ်းယဝ်ႉၼၼ်ႉ ၼွၵ်ႈလိူဝ် ၼႂ်းၸႄႈဝဵင်းပၢင်လွင်းယဝ်ႉ မိူၼ်ၼင်ႇ ဝဵင်းလူင်တူၼ်ႈတီး၊ ဝဵင်းႁူဝ်ပူင်း၊ ဝဵင်းသီႇသႅင်ႇလႄႈ ဝဵင်းယွင်ႁူၺ်ႈၸိူဝ်းၼႆႉ မီးသိုၵ်းမၢၼ်ႈၵဵပ်းသိုၵ်းၵူၺ်းဢမ်ႇၵႃး ၸုမ်းပျီႇတူႉၸိတ်ပဢူဝ်းၵေႃႈ ၵဵပ်းဢဝ် ၵူၼ်းၼုမ်ႇၵႂႃႇၾိုၵ်းၵၢၼ်သိုၵ်းတင်းၼမ် ၵမ်ႈၽွင်ႈထိုင်တီႈလႆႈဢွၵ်ႇၼႃႈသိုၵ်းသေလူႉတၢႆၵေႃႈမီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ