ၼႂ်းဝၼ်းတီႈ 09/04/2025 ယၢမ်းဝၢႆးဝၼ်းမွၵ်ႈ 3 မူင်း ၶိူင်ႈမိၼ်သိုၵ်းမၢၼ်ႈပွႆႇမၢၵ်ႇ တီႈဝၢၼ်ႈ ၼမ်းၶမ်း ဝဵင်းသိူဝ် ၼႂ်းတိူင်းၸႄႈၵႅင်း ၵူၼ်းမိူင်းတၢႆ မွၵ်ႈ 30 ၵေႃႉ မၢတ်ႇၸဵပ်းထႅင်ႈတင်းၼမ် ၼႂ်းၼၼ်ႉ ပႃးလုၵ်ႈဢွၼ်ႇလႄႈ ၼၢင်းယိင်း။  

ၼႂ်းဝၼ်းၼၼ်ႉ ယၢမ်းဝၢႆးဝၼ်း 3 မူင်း ၶိူင်ႈမိၼ်သိုၵ်းမၢၼ်ႈတိုၵ်း (Jet Fighter) 3 လမ်း ပွႆႇမၢၵ်ႇ သႂ်ႇၼႂ်းဝဵင်းသိူဝ်၊ ယၢမ်းႁူဝ်ၶမ်ႈ မွၵ်ႈ 6 မူင်း ၼႆႉၵေႃႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇထႅင်ႈ 1 လုၵ်ႈ ႁဵတ်းႁႂ်ႈၵူၼ်းဝၢၼ်ႈမၢတ်ႇၸဵပ်းလူႉတၢႆၼမ်။

ပူၼ်ႉမႃး ဝၼ်းတီႈ 7 ယၢမ်းၵၢင်ၶမ်ႈ ၸုမ်းလုၵ်ႉၽိုၼ်ႉ ယိုတ်းၵုမ်းလႆႈ ဝဵင်းဢိၼ်းတေႃႇ ဢၼ် ပဵၼ်ဝဵင်းတိတ်းၸပ်းၵၼ်တင်း ဝဵင်းသိူဝ်ၼၼ်ႉ။ ဝၢႆးလင်ၼၼ်ႉ သိုၵ်းမၢၼ်ႈ လၢမ်းယိုဝ်းၼႂ်းဝဵင်း သိူဝ်မႃးႁၢဝ်ႈႁႅင်း။

မိူၼ်ၼႆ တီႈဝဵင်းၵၼီႇ ၼႂ်းတိူင်းၸႄႈၵႅင်းၵေႃႈ သိုၵ်းမၢၼ်ႈ ၸႂ်ႉၵူၼ်းၶီႇၸွင်ႈမိၼ်သေ ပွႆႇမၢၵ်ႇယိုဝ်းထႅင်ႈ။

ၼႂ်းႁၢင်လိူၼ်ပူၼ်ႉမႃးၼႆႉ ၽႅၼ်ႇလိၼ်ဝႆ (ဢိင်ႇသၼ်ႇ) ႁႅင်းယႂ်ႇ ၼႂ်းတိူင်းၸႄႈၵႅင်းသေ ႁဵတ်းႁႂ်ႈၵူၼ်းမိူင်း မၢတ်ႇၸဵပ်းလူႉတၢႆၼမ်။ ၽွင်းၵူၼ်းမိူင်း တိုၵ်ႉလႆႈၶၢမ်ႇတၢမ်ႇၽေးၽႅၼ်ႇလိၼ်ဝႆယူႇၼႆႉ ၶိူင်ႈမိၼ်သိုၵ်းမၢၼ်ႈသမ်ႉ မႃးပွႆႇမၢၵ်ႇထႅင်ႈ ႁဵတ်းႁႂ်ႈၵူၼ်းမိူင်းလူႉတၢႆၼမ် – သိုဝ်ႇၶၢဝ်ႇ Khit Thit Media ဢွၵ်ႇဝႆႉၼင်ႇၼႆ။