ၸုမ်းပီႈၼွင်ႉၶျၢင်းတင်း ၸုမ်းဢူၺ်းလီၶဝ် ႁူမ်ႈၵၼ်ယိုတ်းၵုမ်းလႆႈ ဝဵင်းၽလၢမ်း (ဝဵင်းဢၼ်ယႂ်ႇလိူဝ်ပိူၼ်ႈထီႉသွင်) ၼႂ်းမိူင်းၶျၢင်း မိူဝ်ႈဝၼ်းတီႈ 09/04/2025 ၼႆႉ ပိုၼ်ၽၢဝ်ႇဝႃႈ ၼႂ်းဝဵင်းၽလၢမ်း ဢမ်ႇမီးသိုၵ်းမၢၼ်ႈယဝ်ႉ ဝႃႈၼႆ။

ၵွပ်ႈၼၼ်လႄႈ ၼႂ်းပၢင်လုၵ်ႉၽိုၼ်ႉၶၢဝ်းႁွင် (ၼူၺ်ႇဢူးတေႃႇလၢၼ်ႇယေး) ၼႆႉ ဝဵင်းဢၼ်ၸုမ်းလုၵ်ႉၽိုၼ်ႉ ယိုတ်းၵုမ်းလႆႈဝႆႉ တင်းမူတ်းမီး 96 ဝဵင်းယဝ်ႉ။

ၸုမ်းပီႈၼွင်ႉၶျၢင်းလႄႈ ၸုမ်းလုၵ်ႉၽိုၼ်ႉၶဝ် တႄႇပိုတ်ႇၼႃႈသိုၵ်းတိုၵ်းတေႃးသိုၵ်းမၢၼ်ႈမႃး ၸဵမ်မိူဝ်ႈၼႂ်းလိူၼ်ၼူဝ်ႊဝႅမ်ႊပိူဝ်ႊ ပီ 2024 ၼႂ်းဝူင်ႈၼႆႉ ယိုတ်းၵုမ်းလႆႈ တပ်ႉမၢၼ်ႈ ၶလယ (268) ဢၼ်ၵိုတ်းဝႆႉၵမ်းလိုၼ်းသုတ်း တီႈဝဵင်းၽလၢမ်း၊ ယိုတ်းလႆႈပႃး ၶိူင်ႈၵွင်ႈၵၢင်ႇမၢၵ်ႇမိုဝ်ႉၸိုၼ်း ယၢမ်းတင်းၼမ် ဝႃႈၼႆ။

ၸုမ်းလုၵ်ႉၽိုၼ်ႉၶဝ် ယိုတ်းၵုမ်းလႆႈ ၶလယ (268) ၸဵမ်မိူဝ်ႈဝၼ်းတီႈ 07/04/2025 သေတႃႉ ယွၼ်ႉလႆႈၵူတ်ႇထတ်းၶိုၼ်း ၼႂ်းၼႃႈလိၼ်ႁႂ်ႈယဝ်ႉလႄႈ ၸင်ႇမႃးပိုၼ်ၽၢဝ်ႇ ၼႂ်းဝၼ်းတီႈ 9 လိူၼ်ၼႆႉ။

ၼႂ်းလိူၼ်ၼႆႉၵူၺ်း တႃႇယိုတ်းဢဝ်လႆႈၶိုၼ်း ဝဵင်းမိူင်းပၢႆး လႅၼ်လိၼ်တႆး – ယၢင်းလႅင်ၼႆသေ သိုၵ်းမၢၼ်ႈႁႅၼ်းသိုၵ်းၶဝ်ႈတိုၵ်း ၼႂ်းပိုၼ်ႉတီႈႁၢဝ်ႈႁႅင်း။

ၾၢႆႇၼိုင်ႈၵေႃႈ တႃႇယိုတ်းၵုမ်းလႆႈဝဵင်းမိူင်းမွၵ်ႇ ၼႂ်းမိူင်းၶၢင်ၼၼ်ႉ သိုၵ်းၶၢင် KIA ၶဝ်ႈတိုၵ်း တပ်ႉပၢင်သဝ်းသိုၵ်းမၢၼ်ႈ ၸိူဝ်းၵိုတ်းလိူဝ်ဝႆႉၼၼ်ႉ ႁၢဝ်ႈႁႅင်း။ မိူၼ်ၼႆ တပ်ႉႁူမ်ႈႁွမ်းသိုၵ်းယၢင်းလႅင်ၵေႃႈ ၶဝ်ႈတိုၵ်းတေႃး တပ်ႉပၢင်သဝ်းသိုၵ်းမၢၼ်ႈ ၼႂ်းဝဵင်းဝေႃးလၶႄႉဝႆႉ – သိုဝ်ႇၶၢဝ်ႇ People’s Spring ဢွၵ်ႇဝႆႉၼင်ႇၼႆ။