ရူတ်ႉၵႃးပိၼ်ႈၼိူဝ် သဵၼ်ႈတၢင်း ၵဵင်းတုင်- တူၼ်ႈတီး ၊ ပိၼ်ႈတီႈတၢင်းလူင်းလွႆ ပၢင်ၽၵ်းၸေႃး (သပေႇသႄႇတွင်ႇ) ၼႂ်းၸႄႈဝဵင်းၵဵင်းတုင် ၵူၼ်း တၢႆ 7 ၵေႃႉ ၊ မၢတ်ႇၸဵပ်း 3 ၵေႃႉ ဝႃႈၼႆ ။
ဝၼ်းတီႈ 8/4/2025 ယၢမ်းၵၢင်ၶမ်ႈ 11 မူင်း ၵႃးတၢင်ႇၵူၼ်း သႅၼ်း Rozer လုၵ်ႉၵဵင်းတုင် တေၵႂႃႇတူၼ်ႈတီး ၊ မႃးပိၼ်ႈတီႈတင်းလူင်းလွႆ လွႆပၢင်ၽၵ်းၸေႃး (စပါယ်ရှယ်တောင် ) တီႈလၵ်း 336/6-7 ။
ၸုမ်းပရႁိတ ၵႂႃႇၸွႆႈထႅမ်လၢတ်ႈၽူႈတွႆႇႁွၵ်ႈဝႃႈ -“ ပဵၼ်ရူတ်ႉၵႃးလႅင်း – သၢႆ မူဝ်းၵွင်းၵိၼ်ႇ ။ တင်းမူတ်းတၢင်ႇၵူၼ်းမႃး 10 ၵေႃႉ။ ၵူၼ်းတၢႆ 7 ၵေႃႉ ပဵၼ်ယိင်း 2 ၵေႃႉ ၊ ၸၢႆး 4 ၵေႃႉ ၊ တေႃႇထိုင်ၵၢင်ဝၼ်းၼႆႉ တူဝ်တၢႆ DB ( Dead Body ) ထႅင်ႈၵေႃႉၼိုင်ႈ ယင်းပႆႇဢဝ်ဢွၵ်ႇလႆႈလႄႈ ဢမ်ႇႁူႉဝႃႈပဵၼ်ယိင်းႁႃႉၸၢႆး။ ၵူၼ်းမၢတ်ႇၸဵပ်း 3 ၵေႃႉၼၼ်ႉတႄႉ သူင်ႇယူတ်းယႃတူဝ်ဝႆႉတီႈ ႁူင်းယႃ ဝဵင်းၵဵင်းတုင်ယဝ်ႉ”- ဝႃႈၼႆ ။
တီႈတင်းလူင်းလွႆ လွႆပၢင်ၽၵ်းၸေႃး (သပေႇၶျေႇတွင်ႇ) ( စပါယ်ရှယ်တောင်) ၼႆႉ ပဵၼ်ဢွင်ႈတီႈ သဵၼ်ႈတၢင်းၸၼ်း ၵႃးၵႆႉပိၼ်ႈ ။ ၵူၼ်းၶပ်းရူတ်ႉၶပ်းလႃး ထုၵ်ႇလီၾၢင်ႉ ယႃႇၶပ်းဝႆး ၊ ယႃႇၵႂႃႇမႃးယၢမ်းၵၢင်ၶမ်ႈၵၢင်ၶိုၼ်း ဝႃႈၼႆ။
ၸုမ်းၸွႆႈထႅမ်လၢတ်ႈဝႃႈ- “ သဵၼ်ႈတၢင်းၼၼ်ႉပဵၼ်တၢင်းၸၼ်း တၢင်းလူင်းလွႆလႄႈ ပေႃးပဵၼ် ၵႃးတၢင်ႇၵူၼ်း ယိင်ႈၶႅၼ်းလီၾၢင်ႉၵၼ် ၊ ဢမ်ႇၶႂ်ႈႁႂ်ႈဝႆႉ မဝ်မၢင် ။ ၼႂ်းလိူၼ်ၼႆႉၵူၺ်း ပဵၼ် 2-3 ပွၵ်ႈယဝ်ႉ”- ဝႃႈၼႆ ။
ဝၼ်းတီႈ 20/3/2025 ၵေႃႈ ၼိူဝ်သဵၼ်ႈတၢင်းလူင်းလွႆတီႈလၵ်းမၢႆ 403/7 လႄႈ 404 /0 ၼၼ်ႉ ရူတ်ႉၵႃးပိၼ်ႈ ႁဵတ်းႁႂ်ႈၵူၼ်းတၢႆ 3 ၵေႃႉ ဝႃႈၼႆ ။
မိူၼ်ၼႆၼင်ႇၵဝ်ႇ ဝၼ်းတီႈ1/3 /2025 ၼၼ်ႉၵေႃႈ တီႈတၢင်းလူင်းလွႆၼၼ်ႉၵူၺ်းၼင်ႇၵဝ်ႇ တီႈလၵ်းမၢႆ 366 ၼၼ်ႉ ၵႃး GI Express ပိၼ်ႈလူင်းလွႆလမ်းၼိုင်ႈ။ ၼၼ်ႉၵေႃႈ မီးၵူၼ်းတၢႆ 7 ၵေႃႉ ၊ မၢတ်ႇၸဵပ်း 15 ၵေႃႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ