ဝၢႆးလင် ႁိူၼ်းတိူၵ်ႈ 30 ၸၼ်ႉ ဢၼ်တိုၵ်ႉၵေႃႇသၢင်ႈဝႆႉ တီႈမိူင်းၵွၵ်ႇ (ၵုင်းထဵပ်ႈ) ၸိုင်ႈထႆး ၵူၼ်ႇပင်းၵႂႃႇ ယွၼ်ႉၽႅၼ်ႇလိၼ်ဝႆ (ဢိင်ႇသၼ်ႇ) ယဝ်ႉ ႁွင်ႈၵၢၼ် ဢိၼ်ႊၵျိၼ်ႊၼီႊယိူဝ်ႊ ၾၢႆႇၵေႃႇသၢင်ႈလႄႈ ၽူႈလူင်ႉလႅၼ်ႇ ၾၢႆႇၵဵဝ်ႇၶွင်ႈၶဝ် လၢႆၾၢႆႇႁူမ်ႈၵၼ်သေ လူတ်းၵူတ်ႇထတ်း ႁိူၼ်းတိူၵ်ႈသုင်ၸိူဝ်းၼႆႉ။
ၼႂ်းၸုမ်းၵူတ်ႇထတ်းၼၼ်ႉ မီးၽူႈၶဝ်ႈၸုမ်း 89 ၵေႃႉ တႄႇဢဝ် ဝၼ်းတီႈ 28/03/2025 လႆႈလူင်းၵူတ်ႇထတ်း ႁိူၼ်းတိူၵ်ႈၼႂ်းၵုင်းထဵပ်ႈလႄႈ တၢင်ႇၸႄႈတွၼ်ႈ ၸိူဝ်းပွင်ႇၶၢဝ်ႇမႃး ႁႂ်ႈၵႂႃႇၵူတ်ႇထတ်းပၼ် တေႃႇထိုင် ဝၼ်းတီႈ 06/04/2025 ၼႆႉ လႆႈၵူတ်ႇထတ်းႁိူၼ်းတိူၵ်ႈ ၸိူဝ်းမီးၼႂ်းပိုၼ်ႉတီႈ ၵုင်းထဵပ်ႈ 559 လင်၊ တၢင်ႇၸႄႈတွၼ်ႈ 6,344 လင် တင်းမူတ်း လႆႈ ၵူတ်ႇထတ်းယဝ်ႉၵႂႃႇ 6,903 လင်ယဝ်ႉ။
ၼႂ်းဢၼ်ၵူတ်ႇထတ်းယဝ်ႉၵႂႃႇၼၼ်ႉ ပႃးႁူင်းယႃၵူၼ်းမိူင်း၊ လုမ်းလူင်ပွင်ၸိုင်ႈ၊ ႁူင်းႁႅမ်းသုၼ်လဵဝ်၊ ႁူင်းလိုဝ်ႈသဝ်း၊ တိူၵ်ႈၶၢႆၵၢတ်ႇ၊ ႁိူၼ်းတိူၵ်ႈသုင်၊ ႁွင်းၶွၼ်ႊတူဝ်ႊလႄႈ ႁိူၼ်းယေး ၵူၼ်းမိူင်း ၸိူဝ်းၼႆႉ။
ၸွမ်းၼင်ႇ လွင်ႈၵူတ်ႇထတ်းသေ ႁိူၼ်းယေး ဢၼ်ဢမ်ႇမီးလွင်ႈလူႉၵွႆ (ၸၼ်ႉသီၶဵဝ်) မီး 6,487 လင်။ ပဵၼ်ၼႂ်းၵုင်းထဵပ်ႈ 511 လင်လႄႈ တၢင်ႇၸႄႈတွၼ်ႈ 5,976 လင်။
ႁိူဝ်းယေး ၸိူဝ်းမီးလွင်ႈလူႉၵွႆဢိတ်းဢွတ်း (ၸၼ်ႉသီလိူင်) သမ်ႉမီး 361 လင်၊ ပဵၼ်ၼႂ်းၵုင်းထဵပ်ႈ 46 လင်လႄႈ တၢင်ႇၸႄႈတွၼ်ႈ 315 လင်။
ႁိူၼ်းၸိူဝ်းလူႉၵွႆ ဢမ်ႇထုၵ်ႇလီယူႇသဝ်း (ၸၼ်ႉသီလႅင်) သမ်ႉမီး 55 လင်၊ ၼႂ်းၼၼ်ႉ ပဵၼ်ၼႂ်းၵုင်းထဵပ်ႈ 2 လင်လႄႈ တၢင်ႇၸႄႈတွၼ်ႈ 53 လင်။
သင်ၶႂ်ႈၵူတ်ႇထတ်းတူၺ်း ႁိူၼ်းယေးၸဝ်ႈၵဝ်ႇၸိုင် ၵပ်းသိုပ်ႇလႆႈတီႈ မၢႆၾူၼ်း 1531 ၊ 02 299 4191 ၊ 02 299 4312 ၵပ်းသိုပ်ႇလႆႈ 24 ၸူဝ်ႈမူင်း ဝႃႈၼႆ။
ယွၼ်ႉၽႅၼ်ႇလိၼ်ဝႆ ၼႂ်းဝၼ်းတီႈ 28 လိူၼ်ပူၼ်ႉမႃးၼၼ်ႉသေ ႁဵတ်းႁႂ်ႈႁိူၼ်းယေးၵမ်ႈၽွင်ႈ မီးႁွႆးတႅၵ်ႇၸတ်ႉ၊ ၵူၼ်းမိူင်း ဢွၼ်ၵၼ်ၵူဝ်ႁႄ တႃႇတေသိုပ်ႇယူႇသဝ်းၼိူဝ်ႁိူၼ်းတိူၵ်ႈသုင်။
လိူဝ်ၼၼ်ႉ ၵူၼ်းၸိူဝ်းယူႇၼိူဝ် ႁိူၼ်းတိူၵ်ႈသုင်သေ ၶၢႆႉၵႂႃႇယူႇသဝ်းတၢင်ႇတီႈလႄႈ လွင်ႈပိုၼ်ၽၢဝ်ႇၶၢႆ ႁိူၼ်းတိူၵ်ႈသုင်၊ ႁွင်ႈၶွၼ်ႊတူဝ်ႊ ၸိူဝ်ႊၼႆႉၵေႃႈ ၼမ်ၶိုၼ်ႈမႃးၼႆ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ