ၽွင်းသိုၵ်းမၢၼ်ႈတင်း သိုၵ်းၶၢင်လႄႈ ၸုမ်းလုၵ်ႉၽိုၼ်ႉ ပိုၼ်ၽၢဝ်ႇၵိုတ်းတိုၵ်းပဵၼ်တၢင်းၵၢၼ်ၼႆႉ ၼႂ်းဝၼ်းတီႈ 07/04/2025 ယၢမ်းၵၢင်ၶမ်ႈ ၸုမ်းလုၵ်ႉၽိုၼ်ႉ ယိုတ်းၵုမ်းလႆႈဝဵင်းဢိၼ်းတေႃႇ ၼႂ်းတိူင်းၸႄႈၵႅင်း ဢၼ်မီးတီႈလႅၼ်လိၼ် တိတ်းၸပ်းတင်းမိူင်းၶၢင် ဝႃႈၼႆ။

ၸုမ်းလုၵ်ႉၽိုၼ်ႉတင်း သိုၵ်းၶၢင် KIA ႁူမ်ႈၵၼ်သေ ယိုတ်းၵုမ်းလႆႈ။ ၼႂ်းဝၼ်းၼၼ်ႉ ယၢမ်းဝၢႆးဝၼ်း ၽွင်းပၢင်တိုၵ်းပဵၼ်ႁၢဝ်ႈႁႅင်းၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇဢမ်ႇယွမ်း 40 ၵမ်း။

မိူဝ်ႈဝၼ်းတီႈ 2 ပူၼ်ႉမႃးၼႆႉ သိုၵ်းမၢၼ်ႈ ယိုတ်းမိူင်းတင်း ၸုမ်းလုၵ်ႉၽိုၼ်ႉ ဢိၵ်ႇပႃး တပ်ႉသိုၵ်းၶၢင် KIA ပိုၼ်ၽၢဝ်ႇၵိုတ်းတိုၵ်းၵၼ် 3 ဝူင်ႈသေတႃႉ သွင်ၾၢႆႇယိုဝ်းတိုၵ်းၵၼ်မႃးႁၢဝ်ႈႁႅင်း၊ ၾၢႆႇသိုၵ်းမၢၼ်ႈ ၸႂ်ႉပႃးၶိူင်ႈမိၼ်တိုၵ်း ၶိူင်ႈၵွင်ႈလူင် ယိုဝ်းၸွႆႈႁၢဝ်ႈႁႅင်း။ 

တႃႇယိုတ်းၵုမ်းလႆႈဝဵင်းဢိၼ်းတေႃႇၼႆႉ ၸုမ်းလုၵ်ႉၽိုၼ်ႉတင်း သိုၵ်းၶၢင် KIA ႁႅၼ်းသိုၵ်းလေႃႇတိုၵ်းမႃး ၸဵမ်မိူဝ်ႈဝၼ်းတီႈ 16/08/2024 ၼၼ်ႉသေ ပၢင်တိုၵ်းႁိုင်မႃးၶၢဝ်းတၢင်း မွၵ်ႈ 8 လိူၼ် ၸင်ႇယိုတ်းၵုမ်းလႆႈ။

တီႈပၢင်တိုၵ်းၼၼ်ႉ တီႉၺွပ်းလႆႈပႃး ႁၢႆးသိုၵ်း ၾၢႆႇသိုၵ်းမၢၼ်ႈ 40 ပၢႆ၊ ယိုတ်းလႆႈပႃး မၢၵ်ႇမိုဝ်ႉၸိုၼ်းယၢမ်း ထႅင်ႈတင်းၼမ်။ ၵဵဝ်ႇၵပ်းလွင်ႈၼႆႉ ၾၢႆႇသိုၵ်းမၢၼ်ႈတႄႉ ပႆႇပိုၼ်ၽၢဝ်ႇ ဢွၵ်ႇသင်။

မိူၼ်ၼႆ မီးၶၢဝ်ႇလိုဝ်းဢွၵ်ႇမႃးဝႃႈ တီႈဝဵင်းၾလႅမ်း ၼႂ်းမိူင်းၶျၢင်းၵေႃႈ ၸုမ်းသိုၵ်းၶျၢင်း ယိုတ်းၵုမ်းလႆႈ ၼႂ်းဝၼ်းတီႈ 07/04/2025 ဝႃႈၼႆသေတႃႉ ယူႇတီႈသိုၵ်းၶျၢင်းတႄႉ ပႆႇပိုၼ်ၽၢဝ်ႇပဵၼ်တၢင်းၵၢၼ်။

ဝၢႆးလင် သိုၵ်းမၢၼ်ႈ ယိုတ်းမိူင်း ၶၢဝ်းတၢင်း 4 ပီပၢႆမႃးၼႆႉ ၼႂ်းမိူင်းႁူမ်ႈတုမ်ပတ်းပိုၼ်ႉ ၸုမ်းလုၵ်ႉၽိုၼ်ႉ ယိုတ်းၵုမ်းလႆႈဝႆႉ 95 ဝဵင်းယဝ်ႉ။

မိူၼ်ၼႆ ၼင်ႇႁိုဝ် တေယိုတ်းၵုမ်းလႆႈထႅင်ႈ ဝဵင်းမၢၼ်ႈမေႃႇ ၼႂ်းမိူင်းၶၢင်ၼၼ်ႉ သိုၵ်းၶၢင် တိုၵ်ႉသိုပ်ႇလေႃႇတိုၵ်း တပ်ႉသိုၵ်းမၢၼ်ႈယူႇ။ ၼႂ်းမိူင်းယၢင်းလႅင်သမ်ႉ ၸုမ်းႁူမ်ႈႁွမ်းသိုၵ်းယၢင်းလႅင်တင်း သိုၵ်းမၢၼ်ႈၵေႃႈ  တိုၵ်ႉသိုပ်ႇပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်း တီႈႁိမ်းဝဵင်းဝေႃးလၶႄႉ – သိုဝ်ႇၶၢဝ်ႇ People’s Spring ဢွၵ်ႇဝႆႉၼင်ႇၼႆ။