ၸုမ်းၽူႈလူင်ႉလႅၼ်ႇ မီးပိုၼ်ႉႁူႉပၢႆးႁၼ် ၶူၼ်ႉၶႂႃႉလဵပ်ႈႁဵၼ်းလွင်ႈၽႅၼ်ႇလိၼ်ဝႆ မိူင်းၶႄႇၶဝ် ဢွၵ်ႇၽိုၼ်လိၵ်ႈႁၢႆးငၢၼ်းဝႃႈ ၼႂ်းမိူင်းၶႄႇ ၸၢင်ႈႁူပ်ႉၺႃးၽေးသၽႃႇဝလူင် ႁၢဝ်ႈႁႅင်းလိူဝ် မိူင်းႁူမ်ႈတုမ်မျၢၼ်ႇမႃႇ ဝႃႈၼႆ။

ၼႂ်းၽိုၼ်လိၵ်ႈႁၢႆးငၢၼ်းၼၼ်ႉ တႅမ်ႈပိူင်းၼႄဝႆႉဝႃႈ -“ၽႅၼ်ႇလိၼ်ဝႆ ဢၼ်ပဵၼ်ၸိူင်ႉမိူင်းႁူမ်ႈတုမ် ႁူပ်ႉၺႃးတင်းႁႅင်း 7.7 မႅၵ်ႊၼီႊၵျုတ်ႉၼႆႉ ဢမ်ႇၸႂ်ႈဝႃႈ တေပဵၼ်ပွၵ်ႈၵမ်းလိုၼ်းသုတ်း။ ၼႂ်းမိူင်းၶႄႇလႄႈ ပိုၼ်ႉတီႈႁိမ်းႁွမ်း မိူင်းၶႄႇၵေႃႈ ယင်းတိုၵ်ႉသိုပ်ႇမီးငဝ်းလၢႆး တႃႇတေႁူပ်ႉၺႃး ၽေးၽႅၼ်ႇလိၼ်ဝႆ ႁၢဝ်ႈႁႅင်းၸိူင်ႉၼၼ် ၼမ်ႁႅင်းဝႆႉ”- ဝႃႈၼႆ။

ၸုမ်းၶူၼ်ႉၶႂႃႉလဵပ်ႈႁဵၼ်း လွင်ႈၽႅၼ်ႇလိၼ်ဝႆ တင်းလုမ်ႈၾႃႉ ဢၼ်ႁူဝ်ၼႃႈၸၼ်ႉသုင် ၾၢႆႇဢိၼ်ႊၵျိၼ်ႊၼီႊယိူဝ်ႊ (အင်ဂျင်နီယာ) ၸုမ်းၽႅၼ်ႇလိၼ်ဝႆ မိူင်းပေႇၵျိၼ်း (‌‌ဘေဂျင်း) ၶူၼ်ႉၶႂႃႉဢွၵ်ႇဝႆႉ ၵွၼ်ႇမိူင်းႁူမ်ႈတုမ် ပႆႇႁူပ်ႉၺႃး ၽေးၽႅၼ်ႇလိၼ်ဝႆ (ဢိင်ႇသၼ်ႇ) ပိုၼ်ၽၢဝ်ႇၵႂႃႇ ၼႂ်းလိၵ်ႈၽိုၼ်ၶၢဝ်ႇ Geodesy and Geodynamics မိူဝ်ႈလိူၼ်မၢတ်ႊၶျ် ဝၼ်းတီႈ 20 ၼၼ်ႉဝႃႈ တင်းႁႅင်းၽႅၼ်ႇလိၼ်ဝႆၼႆႉ တေပဵၼ်မွၵ်ႈ 7.9 မႅၵ်ႊၼီႊၵျုတ်ႉ။

ယွၼ်ႉၽႅၼ်ႇလိၼ်ဝႆႁၢဝ်ႈႁႅင်း ၼႂ်းမိူင်းႁူမ်ႈတုမ် မိူဝ်ႈဝၼ်းတီႈ 28/03/2025 တင်းႁႅင်း 7.7 မႅၵ်ႊၼီႊၵျုတ်ႉ ၼၼ်ႉသေ ယၢမ်းလဵဝ် ၵူၼ်းၼႂ်းမိူင်းႁူမ်ႈတုမ် လူႉတၢႆႁၢႆၵႂႃႇၸွမ်း 3,500 ပၢႆ ၊ ႁိူၼ်းတိူၵ်ႈယႂ်ႇလူင် ဢိၵ်ႇဝတ်ႉဝႃးၽႃသိူဝ်ႇၵဝ်ႇၵႄႇ လူႉၵွႆၵႂႃႇႁၢဝ်ႈႁႅင်း – သိုဝ်ႇၶၢဝ်ႇ South China Morning Post ဢွၵ်ႇဝႆႉၼင်ႇၼႆ။

တႅမ်ႈ – ၽူၺ်းၼုမ်ႇ