မိူဝ်ႈဝၼ်းတီႈ 02/04/2025 ယၢမ်းၵၢင်ၼႂ် 8 မူင်းၶိုင်ႈ ၸုမ်းဢမ်ႇႁူႉၾၢႆႇ ဢဵၼ်ႁႅင်းမွၵ်ႈသၢမ်သီႇၵေႃႉ ဢဝ်ၵွင်ႈငႃ ၸဝ်ႈၶွင်ႁၢၼ်ႉသေ ၸူၼ်ဢဝ်ငိုၼ်းၶမ်း တီႈၸဝ်ႈႁၢၼ်ႉတၢင်း ၶၢႆၵူၼ်းမိူင်းၵႂႃႇ တီႈပွၵ်ႉ 10 ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႂ်းၼႃႈတီႈၵုမ်းၵမ် တပ်ႉသိုၵ်းၵဝ်ႈၵၢင်ႉ MNDAA ၼႆယဝ်ႉ။

ၸဝ်ႈႁၢၼ်ႉတၢင်းၶၢႆ ၵေႃႉၺႃးၸူၼ်ၼၼ်ႉလၢတ်ႈၼႄဝႃႈ – “ၶဝ်ၵူၼ်းၸၢႆးသီႇႁႃႈၵေႃႉ ၶီႇၵႃးမႃး ပႃးၵွင်ႈႁႄ လၢတ်ႈၵႂၢမ်းၶႄႇ တေႃႇၵၼ်သျီးသျီးသေႃးသေႃးယူႇ။ မိူဝ်ႈတႄႇမၼ်းၶဝ်ဝႃႈ ၶႂ်ႈလႆႈၼမ်ႉၵိၼ်ၼႆလႄႈ ၸင်ႇၵႂႃႇဢဝ်ပၼ်၊ ၽိူဝ်ႇၵမ်ႉၼိုင်ႈ ၶဝ်ၵေႃႈဢဝ်ၵွင်ႈႁႄ မႃးၸီႉသႂ်ႇယဝ်ႉၼႃႇ။ ယဝ်ႉၵေႃႈ လၢတ်ႈၵႂၢမ်းမၢၼ်ႈဝႃႈ ယႃႇပေႁွင်ႉၼႆဝႃႇ”- ဝႃႈၼႆ။

လႆႈႁူႉဝႃႈ ၵူၼ်းၸိူဝ်းမႃးၸူၼ်ၼၼ်ႉ သႂ်ႇၽႃႈတူမ်းသူပ်းဝႆႉလႄႈ ဢမ်ႇလႆႈႁၼ်ၼႃႈ ႁူႉၵေႃႉမၼ်း။ ပႃးၵႂႃႇငိုၼ်းမၢၼ်ႈ မွၵ်ႈၼိုင်ႈသႅၼ်ပၢႆလႄႈ ၾူၼ်းသွင်လုၵ်ႈ။ ယွၼ်ႉဝႃႈ မီးၵူၼ်းၶဝ်ႈမႃးသိုဝ်ႉၶူဝ်းၶွင် ၼႂ်းႁၢၼ်ႉတၢင်းၶၢႆထႅင်ႈလႄႈ ၸင်ႇဢမ်ႇပႃးငိုၼ်းၶမ်းၵႂႃႇၼမ် ၼႆယဝ်ႉ။

လွင်ႈၵူၼ်းမိူင်း ၺႃးၸုမ်းဢမ်ႇႁူႉၾၢႆႇ ၸူၼ်ဢဝ်ငိုၼ်းတင်း ၾူၼ်းၵႂႃႇၼႆႉ လႆႈတၢင်ႇလၢတ်ႈတီႈၽူႈမီးပုၼ်ႈၽွၼ်း ၼႂ်းတပ်ႉသိုၵ်းၵဝ်ႈၵၢင်ႉ MNDAA ယဝ်ႉသေတႃႉ ႁၢၼ်ႉတေႃႇထိုင်ယၢမ်းလဵဝ် ယင်းပႆႇႁၼ် တုမ်ႉတွပ်ႇမႃးသင်ၶိုၼ်း ၼႆယဝ်ႉ။

မိူၼ်ၼၼ်ၼင်ႇၵဝ်ႇ မိူဝ်ႈပူၼ်ႉမႃး ၼႂ်းလိူၼ်ႁၢင်လိူၼ်ၾႅပ်ႊပိဝ်ႊရီႊၼၼ်ႉၵေႃႈ ၵူၼ်းၸၢႆးသၢမ်သီႇၵေႃႉ ၶီႇရူတ်ႉၶိူင်ႈ ပႃးၵွင်ႈသေ တတ်းႁႄႉၼႃႈရူတ်ႉၶိူင်ႈ ၵူၼ်းမိူင်းၵေႃႉၼိုင်ႈ တီႈသဵၼ်ႈတၢင်းယေႇၵၢၼ်ႇတွင်ႇ ပွၵ်ႉ 5 ၼၼ်ႉသေ ၸူၼ်ဢဝ်ရူတ်ႉၶိူင်ႈမၼ်းၵႂႃႇ ၼႆယဝ်ႉ။

တင်ႈတႄႇ ၽႅၼ်ယၼ်ႇသိုၵ်း 1027 ၼႆႉသေ သိုၵ်းၵဝ်ႈၵၢင်ႉ ယိုတ်းၵုမ်းလႆႈ ၸႄႈဝဵင်းလႃႈသဵဝ်ႈမႃး ၾၢႆႇသိုၵ်းၵဝ်ႈၵၢင်ႉ ၶတ်းၸႂ်ပိုတ်ႇပၢင်တေႃႇလွင်းမႃး ၵူႈပွၵ်ႉၵူႈယွမ်ႇ ၼႂ်းဝဵင်းလႃႈသဵဝ်ႈၼႆႉ ၶၢဝ်းတၢင်းႁိုင်လၢႆလိူၼ်သေ တိုၵ်ႉတႄႇဢိုတ်းပၢင်တေႃႇလွင်းၵႂႃႇ ဝၢႆးၵူၼ်းမိူင်းတူၵ်းၵိၼ်း ယွၼ်ႉၽႅၼ်ႇလိၼ်ဝႆ (ဢိင်ႇသၼ်ႇ) ႁၢဝ်ႈႁႅင်းၼႆႉၵူၺ်း။

တႅမ်ႈ – ၽူၺ်းၼုမ်ႇ