ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လၢႆလၢႆၸုမ်း ပိုၼ်ၽၢဝ်ႇၵိုတ်းယိုတ်း ပၢင်တိုၵ်းယဝ်ႉသေတႃႉ သိုၵ်းမၢၼ်ႈ ယိုတ်းမိူင်း တိုၵ်ႉသိုပ်ႇၸတ်းပၢင်သိုၵ်းယူႇၶိူဝ်းယႂ်း ၼႂ်းပိုၼ်ႉတီႈ ၸုမ်းယိပ်းၵွင်ႈၶဝ် ဝႃႈၼႆ။   

ယွၼ်ႉၽႅၼ်ႇလိၼ်ဝႆ (ဢိင်ႇသၼ်ႇ) တုမ်ႉတိူဝ်ႉၵူၼ်းမိူင်း လူႉတၢႆႁၢႆမၢတ်ႇၸဵပ်းဝႆႉ ၼပ်ႉႁူဝ်ႁဵင်ၵေႃႉမၼ်းလႄႈ မိူဝ်ႈဝၼ်းတီႈ 01/04/2025 ယၢမ်းတၢမ်းၶမ်ႈၼၼ်ႉ ၸုမ်းဢူၺ်းလီပွတ်းႁွင်ႇ သၢမ်ၸုမ်း မိူၼ်ၼင်ႇ – တပ်ႉသိုၵ်းၵဝ်ႈၵၢင်ႉ MNDAA ၊ သိုၵ်းတဢၢင်း TNLA တင်း သိုၵ်းရၶႅင်ႇ AA ပိုၼ်ၽၢဝ်ႇၵိုတ်းတိုၵ်းတင်း သိုၵ်းမၢၼ်ႈ ၵႂႃႇၾၢႆႇလဵဝ် ႁိုင်ၶၢဝ်းတၢင်းၼိုင်ႈလိူၼ် ၼႆယဝ်ႉ။

ယိူင်းဢၢၼ်း တႃႇႁႂ်ႈၵူၼ်းၼႂ်းမိူင်းၼွၵ်ႈမိူင်း ၸိူဝ်းတေၵႂႃႇၸွႆႈထႅမ်ႁိုဝ် ၸွႆႈထႅမ်ဝႆႉၽေးၽႅၼ်ႇလိၼ်ဝႆၼၼ်ႉ ႁႂ်ႈႁဵတ်းၵၢၼ်လႆႈလွတ်ႈလႅဝ်းသေ ႁႂ်ႈမီးလွင်ႈလွတ်ႈၽေး ၽွင်းဢွၵ်ႇၶၢဝ်းတၢင်းၵႂႃႇၸွႆႈထႅမ် ၊ ၵူၼ်းမိူင်း ၸိူဝ်းတုမ်ႉတိူဝ်ႉမၢတ်ႇၸဵပ်း ယွၼ်ႉၽႅၼ်ႇလိၼ်ဝႆၼၼ်ႉ ႁႂ်ႈၸဵဝ်းလႆႈႁပ်ႉတၢင်းၵမ်ႉၸွႆႈ တီႈၵူၼ်းၼႂ်းမိူင်းၼွၵ်ႈမိူင်းဝႆးဝႆး ၼႆယဝ်ႉ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ၾၢႆႇၸုမ်းဢူၺ်းလီပွတ်းႁွင်ႇ သၢမ်ၸုမ်း ယင်းလၢတ်ႈဝႆႉပႃးဝႃႈ – “တင်ႈတႄႇ လိူၼ်ဢေႊပရိူဝ်ႊ ဝၼ်းတီႈ 1 ၼႆႉမႃး တေဢမ်ႇမီးၵၢၼ်ႁႅၼ်းသိုၵ်းလေႃႇတိုၵ်း သိုၵ်းမၢၼ်ႈဢွၼ်တၢင်း။ သင်ၸုမ်းလႂ်ၸုမ်းၼိုင်ႈ ႁႅၼ်းသိုၵ်းလေႃႇတိုၵ်းမႃးဢွၼ်တၢင်းတႄႉ တေယိုဝ်းၶိုၼ်း ပိူဝ်ႈတႃႇ ပဵၼ်ၵၢၼ်ၵႅတ်ႇၶႄတူဝ်”- ဝႃႈၼႆ။

လူင်ပွင်ၸိုင်ႈၵူၼ်းမိူင်း ၸူဝ်ႈၶၢဝ်း NUG ၵေႃႈ မိူဝ်ႈလိူၼ်မၢတ်ႊၶျ် ဝၼ်းတီႈ 31 ၼၼ်ႉ ပိုၼ်ၽၢဝ်ႇၵႂႃႇဝႃႈ တေၵိုတ်းၵၢၼ် ႁႅၼ်းသိုၵ်းလေႃႇတိုၵ်း သိုၵ်းမၢၼ်ႈ တင်းမိူင်းပတ်းပိုၼ်ႉ တႃႇၶၢဝ်းတၢင်း 2 ဝူင်ႈ ၼႆယဝ်ႉ။

မိူၼ်ၼၼ် ၼင်ႇၵဝ်ႇ ၽူႈၼမ်းၼႂ်းလူင် ၸုမ်းၸၢတ်ႈၸိုင်ႈလုမ်ႈၾႃႉ တူဝ်တႅၼ်းၶိုၵ်ႉတွၼ်း ၾၢႆႇလုမ်းၽွင်းတၢင် မိူင်းမၢၼ်ႈ တင်းၽွင်းလူင်ၾၢႆႇမိူင်းၼွၵ်ႈ မိူင်းသိင်ႊၵပူဝ်ႊၵေႃႈ ပိုၼ်ၽၢဝ်ႇ တုၵ်းယွၼ်းဝႆႉ ႁႂ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း တင်းမူတ်း ႁူမ်ႈတင်းသိုၵ်းမၢၼ်ႈ ၵိုတ်းပၢင်တိုၵ်းသိုၵ်းသိူဝ်ၵၼ် ၸူဝ်ႈၶၢဝ်းသေ ႁူမ်ႈၵၼ်ၵမ်ႉၸွႆႈၵူၼ်းမိူင်း ၸိူဝ်းႁူပ်ႉၽေး ၽႅၼ်ႇလိၼ်ဝႆၵႂႃႇ ဝႃႈၼႆ။

ၵဵဝ်ႇလူၺ်ႈလွင်ႈၵၢၼ်ၵိုတ်းယိုတ်း ပၢင်တိုၵ်းသိုၵ်းသိူဝ် ပတ်းပိုၼ်ႉမိူင်းႁူမ်ႈတုမ်ၼၼ်ႉသေ ၾၢႆႇသိုၵ်းမၢၼ်ႈတႄႉ ပႆႇႁၼ်တုမ်ႉတွပ်ႇသင်ၶိုၼ်း ယင်းတိုၵ်ႉသိုပ်ႇဢဝ် ၶိူင်ႈမိၼ်တင်း ၻရူၼ်ႊ ပွႆႇမၢၵ်ႇသႂ်ႇ ၼႂ်းပိုၼ်ႉတီႈၼႃႈလိၼ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၵုမ်းၵမ်ဝႆႉ လၢႆလၢႆတီႈယူႇ ၼႆယဝ်ႉ။

ၽွင်းၶၢဝ်းၵူၼ်းမိူင်းႁူပ်ႉၽေးၽႅၼ်ႇလိၼ်ဝႆ ႁၢဝ်ႈႁႅင်းသေ ၵူႈမူႇၵူႈၸုမ်း ပႃးၸဵမ်ၵူၼ်းမိူင်း ၼင်ႇၵၼ်ၶတ်းၸႂ် ႁူမ်ႈၵမ်ႉၸွႆႈထႅမ်ၵၼ်ယူႇၼႆႉ သိုၵ်းမၢၼ်ႈ ယင်းဢဝ်ၶိူင်ႈမိၼ်တိုၵ်း ပွႆႇမၢၵ်ႇသႂ်ႇ ၼႂ်းမိူင်းၶၢင်၊ မိူင်းတႆးပွတ်းႁွင်ႇ၊ ပွတ်းၸၢၼ်း၊ မိူင်းရၶႅင်ႇ၊ တိူင်းမၵူၺ်းတင်း တိူင်းၸႄႈၵႅင်း ၸဵမ်ၸိူဝ်းၼႆႉယူႇ ဝႃႈၼႆ။

တႅမ်ႈ – ၽူၺ်းၼုမ်ႇ