ပလိၵ်ႈမၢၼ်ႈသိုၵ်းမၢၼ်ႈ ဝႃႈတေႁဵတ်းတႃႈရူတ်ႉၵႃးဢၼ်မႂ်ႇၼႆသေ ယႃႉႁူဝ်ႉ ၊ ယႃႉလၵ်းသဝ် တီႈလိၼ် ၵူၼ်းဝၢၼ်ႈ တၢင်းပွၵ်ႉၽြႃးၽိူၵ်ႇ (ဘုရားဖြူရပ်ကွက်) ပွၵ်ႉၵၢၼ်ႇၵျီး  (ကံကြီး) ၸိူဝ်းမီးႁိမ်းၸၼ်ႉၸွမ် ပုတ်ႉထ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း။

တႄႇဝၼ်းတီႈ 20-21/3/2025 မႃး ပလိၵ်ႈမၢၼ်ႈ သိုၵ်းမၢၼ်ႈ မႃးယႃႉႁူဝ် လွၵ်းလိၼ် ၵူၼ်းဝၢၼ်ႈ  ဢၼ်မီး ၼိူဝ်သဵၼ်ႈတၢင်းလဵပ်ႈဝဵင်း တင်းၵႂႃႇႁူဝ်ပူင်း ။

ၵူၼ်းၸၢႆး ဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ – “ ၶဝ်လၢတ်ႈတႄႉ ဝႃႈတေႁဵတ်း တႃႈရူတ်ႉၵႃး  ( ကားကြီးကွင်း ) ၼႆ ၊ သဵၼ်ႈတၢင်းဢၼ်မီးတီႈတၢင်းလူင်ဢၼ်ၶဝ်ယႃႉၼၼ်ႉတႄႉ ၶဝ်လၢတ်ႈဝႃႈ တေၶႂၢၵ်ႈတၢင်းၼႆသေ မႃးယႃႉပႅတ်ႈ ၊ သဵၼ်ႈတၢင်းဢၼ် မီးႁိမ်း ၸၼ်ႉၸွမ်ပုတ်ႉထ  ၸိူဝ်းၼၼ်ႉ ၶဝ်ယႃႉမူတ်း ၊ ႁိူၼ်းဢၼ် ႁဵတ်းဝႆႉၸိူဝ်းၼၼ်ႉ ၶဝ်ဝႃႈ ၶၢမ်းတီႈလိၼ်သေသၢင်ႈဝႆႉၼႆသေၶဝ်မႂ်ငိုၼ်း ၼပ်ႉႁူဝ်မိုၼ်ႇမၼ်း ”- ဝႃႈၼႆ ။

မိူၼ်ၼႆၼင်ႇၵဝ်ႇ တီႈဝၢၼ်ႈ ၺဵဝ်ႇမီး ၊ ဝၢၼ်ႈၻူင်ႇၶယႃး ၼႂ်းဢိူင်ႇၽႃမူၼ်း  ၸႄႈဝဵင်းတူၼ်ႈတီး ၼၼ်ႉၵေႃႈ  ပလိၵ်ႈသိုၵ်းမၢၼ်ႈမႃးယႃႉႁူဝ်ႉ ၊ ယႃႉလၵ်းသဝ် တီႈလိၼ်ပဝ်ႇ ဢၼ်ပဵၼ်လွၵ်းဝႆႉၸိူဝ်းၼၼ်ႉ   မွၵ်ႈ 140 ပၢႆ ဢေႊၶိူဝ်ႊဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တင်းသဵင်ႈ မီးမွၵ်ႈ ဢေႊၶိူဝ်ႊ 140 ၊ ပလိၵ်ႈသိုၵ်းမၢၼ်ႈ တင်းၵၢင်ႉၵႄႇၼႂ်းပွၵ်ႉ မႃးယႃႉႁူဝ်ႉ ၸိူဝ်းၼၼ်ႉပႅတ်ႈမူတ်း ၊ တေဢၢင်ႈမႃးႁဵတ်း ၶူင်းၵၢၼ်  တႃႈၵႃးဝႃႈၼႆသေတႃႉ ပႆႇလႆႈႁူႉတႅတ်ႈတေႃး ၊ တင်းၼၼ်ႉပေႃးႁဵတ်းႁိူၼ်းယဝ်ႉယဝ်ႉၼႆ ငိၼ်းဝႃႈလႆႈပၼ်တၢမ်ႇငိုၼ်းဝႃႈၼႆလူးၵွၼ်ႇ ”- ဝႃႈၼႆ ။

တီႈဝဵင်းတူၼ်ႈတီးၼႆႉ ၼႂ်းၶၢဝ်းတၢင်း 10 ပီမႃးၼႆႉ မီးၸဝ်ႈငိုၼ်းသႃး သိုဝ်ႉလိၼ်သူၼ်လိၼ်လွႆ ၼႂ်းၸႄႈဝဵင်း တူၼ်ႈတီးသေ ႁဵတ်းလွၵ်းၶၢႆၶိုၼ်း။  ၵူၼ်းၵႃႉတီႈလိၼ်(ၼၢႆးၼႃႈ)  ပိုၼ်ၽၢဝ်ႇၶၢႆ လွၵ်းလိၼ်  တၢင်းဢွၼ်ႊလၢႆႊ။  ၵူၼ်းပိုၼ်ႉတီႈလၢတ်ႈဝႃႈ – ပူၼ်ႉမႃးဢမ်ႇႁိုင်ၼႆႉ ႁွင်ႈၵၢၼ်ၾၢႆႇၽွင်းငမ်း ၵူႈလွင်ႈလွင်ႈယၢမ်ႈ ဢွၵ်ႇလိၵ်ႈဝႃႈ တေလမ်းႁႃၵူၼ်းၶၢႆလွၵ်းလိၼ် တၢင်းဢွၼ်ႊလၢႆႊ သေ တေဢဝ်လိူင်ႈ ။ ယွၼ်ႉပိူဝ်ႈဢမ်ႇၸႂ်ႈတၢင်းၵၢၼ် – ဝႃႈၼႆ။  

“ပေႃးတေသိုဝ်ႉတီႈလိၼ်ၼႆႉ လူဝ်ႇတူၺ်း ၶေႃႈမုၼ်းမၼ်းလီလီ ၸင်ႇသိုဝ်ႉ ၊ပေႃးဢမ်ႇၼၼ် ပွႆးၸႃးၼၢႆးၼႃႈမၢင်ၸိူဝ်းၼႆႉ   ပေႃးၶဝ်လႆႈႁပ်ႉငိုၼ်းယဝ်ႉ  ၶဝ်ႈဢမ်ႇဢဝ်ပုၼ်ႈၽွၼ်းပၼ်သင်ၶိုၼ်း ၊ ပေႃး ၺႃးသိုၵ်းမၢၼ်ႈယိုတ်းဢဝ်တီႈလိၼ်ၵေႃႈ ႁဝ်းသုမ်းလၢႆ”- ဝႃႈၼႆ ။

ယၢမ်းလဵဝ် တီႈဝဵင်းတူၼ်ႈတီး မီးၵူၼ်းပၢႆႈၽေးသိုၵ်းမႃးယူႇသဝ်းၼမ် ။ ၵၢၼ်သိုဝ်ႉၶၢႆတီႈလိၼ်ၵေႃႈၼမ်။ ၵူၼ်းႁဵတ်းပွႆးၸႃး ၼၢႆးၼႃႈၶၢႆတီႈလိၼ် မီးပႃးၵူၼ်းပိုၼ်ႉတီႈပႃးၸဵမ်ၵူၼ်း တၢင်ႇတီႈၸိူဝ်းမႃးပိုင်ႈမႃးသဝ်း။

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပေႃးပဵၼ်လွၵ်ႈလိၼ် တင်းတူၵ်းဝၢၼ်ႈ ၵၢၼ်ႇၵျီး ၸိူဝ်းၼၼ်ႉ ပေႃးသိုၵ်းမၢၼ်ႈဢမ်ႇယိုတ်းၵေႃႈ ၊ ပျီႇတူႉၸိတ်ႉတေယိုတ်း  ၶဝ်လၢတ်ႈဝႆႉယဝ်ႉ။ ၵွပ်ႈၼႆ ၵူၼ်းၸိူဝ်းသိုဝ်ႉဝႆႉတီႈလိၼ်ၸိူဝ်းၼၼ်ႉဢွၼ်ၵၼ်မႆႈၸႂ်ဝႆႉယူႇ”- ဝႃႈၼႆ ။

ၵူၼ်းပိုၼ်ႉတီႈဢၼ်သိုဝ်ႉလွၵ်းလိၼ်ဝႆႉတီႈဝဵင်းတူၼ်ႈတီးလၢတ်ႈဝႃႈ – ယွၼ်ႉငဝ်းလၢႆးဝၢၼ်ႈမိူင်းဢမ်ႇလီ ၵူၼ်းလၵ်ႉၵူၼ်းၸူၼ်လိူင်ႇလႄႈ  ၵူၼ်းမိူင်းဢမ်ႇႁတ်းဝႆႉငိုၼ်းဝႆႉၼႂ်းမိုဝ်း သေသိုဝ်ႉတီႈလိၼ်ဝႆႉ၊ ၵမ်းၼႆႉသမ်ႉ တေၺႃးယိုတ်းတီႈလိၼ်ထႅင်ႈ ပဵၼ်ဢၼ်ယၢပ်ႇၸႂ် ဢမ်ႇၸၢင်ႈပိုင်ႈၽႂ် ဝႃႈၼႆ ။

မိူၼ်ၼင်ႇၼႆ မိူဝ်ႈပီ 2023 ၼၼ်ႉၵေႃႈ သိုၵ်းမၢၼ်ႈယၢမ်ႈယိုတ်း လွၵ်းလိၼ် တၢင်းဝၢၼ်ႈၺဵဝ်ႇမီးမိူၼ်ၵၼ်    ၵူၼ်းဝၢၼ်ႈသိုဝ်ႉလွၵ်းလိၼ်ဝႆႉၸိူဝ်းၼၼ်ႉ  သုမ်းငိုၼ်းၵႂႃႇ 500 သႅၼ်ပျႃး – ၵူၼ်းပိုၼ်ႉတီႈလၢတ်ႈၼင်ႇၼႆ ။