သိုၵ်းဝႃႉ UWSA တီႉၺွပ်းလႆႈရူတ်ႉတေႃႉၶိူင်ႈၶူဝ်း ၶွင်ၸုမ်းၵျႃးၽႅၼ်ႉ ဢၼ်လုၵ်ႉတၢင်းဝဵင်းႁူဝ်ပၢင်ႇ တေမုင်ႈၼႃႈၵႂႃႇတၢင်း ၼႃႈတီႈၵုမ်းၵမ် တပ်ႉသိုၵ်းၵဝ်ႈၵၢင်ႉ MNDAA ဝႃႈၼႆ။

ပူၼ်ႉမႃး ႁူဝ်လိူၼ်မၢတ်ႊၶျ်ၼႆႉ ၽူႈမီးပုၼ်ႈၽွၼ်းၾၢႆႇတပ်ႉသိုၵ်းဝႃႉ ဢၼ်ပႂ်ႉၵူတ်ႇထတ်းတီႈၶူဝ်ၽႅၼ် (ဖောင်ဆိပ်တံတား) ယၢၼ်ၵႆၵၼ်တင်း ဝဵင်းႁူဝ်ပၢင်ႇ မွၵ်ႈ 2 လၵ်းပၢႆၼၼ်ႉ တီႉၺွပ်းလႆႈ ၾူၼ်းၶိူင်ႈၸႂ်ႉတိုဝ်း ၼႂ်းၵၢၼ်ၵျႃးၽႅၼ်ႉ တႃႇရူတ်ႉၼိုင်ႈလမ်း တီႈၸႄႈဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ ၼႂ်းၼႃႈတီႈသိုၵ်းဝႃႉ ၵုမ်းၵမ် ၼႆယဝ်ႉ။

ရူတ်ႉဢၼ်တေႃႉၶိူင်ႈၸၢၵ်ႈလႄႈ ၾူၼ်းမႃးၼၼ်ႉ ပဵၼ်ရူတ်ႉၽူႈယႂ်ႇၵူၼ်းလူင်ၼႂ်းတပ်ႉသိုၵ်းဝႃႉ UWSA ၵေႃႉၼိုင်ႈ။ ၵူၼ်းၵေႃႉဢၼ်ႁေႃႈရူတ်ႉမႃးတႄႉ ပဵၼ်ၸၢဝ်းၶိူဝ်းၶႄႇ။ ယွၼ်ႉ ၽူႈမီးပုၼ်ႈၽွၼ်းၶဝ် မီးလွင်ႈငမ်းငဝ်းၼိူဝ်ရူတ်ႉၵႃးၼၼ်ႉသေ ၸင်ႇၵူတ်ႇထတ်းတူၺ်း ထူပ်းႁၼ်ၶိူင်ႈၶူဝ်းတႃႇၸႂ်ႉတိုဝ်း ၼႂ်းၵၢၼ်ၵျႃးၽႅၼ်ႉၼႆ – ၵူၼ်းၼႂ်းပိုၼ်ႉတီႈ ဝဵင်းႁူဝ်ပၢင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။  

“ၵႃးလမ်းၼၼ်ႉ မၢႆမၼ်းပဵၼ်ဝႆႉ မၢႆၵႃးၵူၼ်းလူင်ၼႂ်းသိုၵ်းဝႃႉလႄႈ ပေႃးဢမ်ႇထတ်းၺႃးၸိူင်ႉၼႆတႄႉ ဢမ်ႇႁူႉလႆႈ။ ၵမ်ႈၼမ်တႄႉ ပေႃးသႂ်ႇဝႆႉမၢႆၵႃးၵူၼ်းလူင်ၼႆ ၶဝ်ၵႆႉလွတ်ႈၸွမ်းၵဵတ်ႉၸွမ်းလၢၼ်ႇၼႃႇ။ မၢႆၵႃးၵူၼ်းလူင်ၼႆႉ တၢင်းၼႃႈ မၼ်းၵႆႉပဵၼ် သုၼ်သွင်တူဝ်ၸွမ်းၵၼ်၊ ပေႃးတူဝ်ၼႂ်းၵၢင်မၼ်း မီးသုၼ်ႇသၢမ်တူဝ်ၸွမ်းၵၼ်ၸိူဝ်းၼႆႉၵေႃႈ ပဵၼ်မၢႆၵႃး ၵူၼ်းလူင်ယဝ်ႉ။ ၶဝ်ၺွပ်းလႆႈပွၵ်ႈၼႆႉ လႆႈၵႂႃႇၾူၼ်းတႃႇ 100 လုၵ်ႈပၢႆ”- ဝႃႈၼႆ။

မိူၼ်ၼၼ်ၼင်ႇၵဝ်ႇ မိူဝ်ႈပူၼ်ႉမႃး လိူၼ်ၾႅပ်ႊပိဝ်ႊရီႊ ဝၼ်းတီႈ 20 ၼၼ်ႉၵေႃႈ ၾၢႆႇသိုၵ်းဝႃႉၶဝ် တီႉၺွပ်းလႆႈၵူၼ်းႁဵတ်းၵၢၼ်ၵျႃးၽႅၼ်ႉ 105 ၵေႃႉ ၼႂ်းပွၵ်ႉႁူဝ်မိူင်း ဝဵင်းႁူဝ်ပၢင်ႇ၊ တီႉၺွပ်းလႆႈပႃး ၶိူင်ႈၶူဝ်း တႃႇၸႂ်ႉတိုဝ်း ၼႂ်းၵၢၼ်ၵျႃးၽႅၼ်ႉ။ ၵူၼ်းႁဵတ်းၵၢၼ် ၵမ်ႈၽွင်ႈ လၵ်ႉဢွၵ်ႇပၢႆႈၵႂႃႇလႄႈ ယင်းပႆႇတီႉၺွပ်းလႆႈၵေႃႈ ယင်းတိုၵ်ႉမီးထႅင်ႈ ၼႆယဝ်ႉ။

လႆႈႁူႉဝႃႈ ဝၢႆးလင် ၾၢႆႇသိုၵ်းဝႃႉ တႄႇတီႉၺွပ်း ၵူၼ်းႁဵတ်းၵၢၼ်ၵျႃးၽႅၼ်ႉ ၼႂ်းၼႃႈတီႈၵုမ်းၵမ် ၶဝ်ၼၼ်ႉသေ ၵူၼ်းၸိူဝ်းႁဵတ်းၵၢၼ်ၵျႃးၽႅၼ်ႉ ၵမ်ႈၼမ် ဢွၼ်ၵၼ်ၶၢႆႉၶူဝ်း ၶၢႆႉၵူၼ်း ၶၢမ်ႈတႃႈႁိူဝ်း ၵႂႃႇတၢင်းၼႃႈတီႈၵုမ်းၵမ် သိုၵ်းၵဝ်ႈၵၢင်ႉၶိုၼ်း ၼႆယဝ်ႉ။

တႅမ်ႈ – ၽူၺ်းၼုမ်ႇ