ၼႂ်းမိူင်းႁူမ်ႈတုမ်ၼႆႉ မီးၸၢဝ်းၶိူဝ်းဢၼ်လၢၵ်ႇလၢႆ ဢၼ်ၽႃသႃၵႂၢမ်းလၢတ်ႈဢမ်ႇမိူၼ်ၵၼ်။ ၶိူဝ်းလႂ် ၶိူဝ်းၼၼ်ႉ တိုၼ်းမီးၾိင်ႈငႄႈၾိင်ႈထုင်း ၽႃသႃလိၵ်ႈလၢႆးၵႂၢမ်းလၢတ်ႈၽႂ်မၼ်းဝႆႉယူႇ ဝႃႈၼႆသေတႃႉ ၵူႈၸၢဝ်းၶိူဝ်း လႆႈႁပ်ႉသွၼ်ႁဵၼ်းဢဝ် လိၵ်ႈလၢႆးၸၢဝ်းမၢၼ်ႈပဵၼ်ပိူင်ယႂ်ႇၵူၺ်း။

တီႈႁူင်းႁဵၼ်း ဢၼ်ၾၢႆႇပၢႆးပၺ်ႇၺႃႇ ၼႂ်းမိူင်းႁူမ်ႈတုမ်ၸတ်းမႃးၵေႃႈ ဢဝ်ၽႃသႃလိၵ်ႈမၢၼ်ႈၵႂၢမ်းမၢၼ်ႈ ပဵၼ်ပိူင်ယႂ်ႇသေ သွၼ်ပၼ်မႃးၵူၺ်းလႄႈ ၸၢဝ်းၶိူဝ်းၸိူဝ်း ဢမ်ႇၸႂ်ႈမၢၼ်ႈ ဢမ်ႇတွၼ်ႉမီး သုၼ်ႇႁဵတ်းလွင်ႈၽႃသႃလိၵ်ႈလၢႆးၵႂၢမ်းလၢတ်ႈၸဝ်ႈၵဝ်ႇ ၼႂ်းႁူင်းႁဵၼ်းလီလီ။

ၼႂ်းငဝ်းလၢႆးၵၢၼ်ဝၢၼ်ႈၵၢၼ်မိူင်းသုၵ်ႉၼႆႉ ၶႅၼ်းႁၢင်ႈႁၢႆႉ။ ယႃႇဝႃႈတေႁဵၼ်းသွၼ်ဢဝ်လိၵ်ႈလၢႆးၸဝ်ႈၵဝ်ႇ တႃႇၶိုၼ်ႈႁူင်းႁဵၼ်း ဢၼ်ႁွင်ႈၵၢၼ်ၾၢႆႇပၢႆးပၺ်ႇၺႃႇ မိူင်းႁူမ်ႈတုမ် ပိုတ်ႇပဵၼ်တၢင်းၵၢၼ်ဝႆႉၵူၺ်း ၵေႃႈ ပဵၼ်ယၢပ်ႇ။

ပၢၼ်သိုပ်ႇပၢၼ်ၼႆႉ ယွၼ်ႉၸၢဝ်းၶိူဝ်းၸိူဝ်းဢမ်ႇၸႂ်ႈမၢၼ်ႈ ဢမ်ႇမီးသုၼ်ႇလႆႈသွၼ်ႁဵၼ်းဢဝ် လိၵ်ႈလၢႆးၸဝ်ႈၵဝ်ႇလႄႈ ၵမ်ႈၼမ် ႁႃတိုဝ်ႉတၢင်းၽႂ်မၼ်းသေ သွၼ်ပၼ်ၸွမ်းဝတ်ႉဝႃးၽႃသိူဝ်ႇ ၊ ၸွမ်း ႁိူၼ်းယေးၽႂ်မၼ်း ၸိူင်ႉၼႆႉၵူၺ်း။ ၸၢဝ်းၶိူဝ်းတႆးၵေႃႈ မိူၼ်ၼၼ် တႃႇလိၵ်ႈလၢႆးၸဝ်ႈၵဝ်ႇ တေဢမ်ႇ ႁူင်ႈဢမ်ႇႁၢႆၼၼ်ႉ ၵႃႈလႆႈၵၼ်ႉၵူၵ်ႉ တူၺ်းငဝ်းလၢႆးသေ ပိုတ်ႇသွၼ်ဢဝ်ဢွင်ႈတီႈၽႂ်မၼ်း။

ပေႃးထိုင်ၶၢဝ်းမႆႈ ၶၢဝ်းဢိုတ်းႁဵၼ်းလူင်ပွင်ၸိုင်ႈမႃးၵူႈပီပီ တႃႇႁႂ်ႈလုၵ်ႈဢွၼ်ႇ ၵူၼ်းၼုမ်ႇ ပေႃးတေမီး သုၼ်ႇႁဵၼ်းသွၼ်လိၵ်ႈတႆးၼၼ်ႉ ၽူႈႁၵ်ႉၾိင်ႈငႄႈလိၵ်ႈလၢႆးတႆးၵူႈၾၢႆႇၾၢႆႇ ဢွၼ်ၵၼ် ပိုတ်ႇပၢင် သွၼ်လိၵ်ႈလၢႆးတႆးၶၢဝ်းမႆႈမႃး။

ဢမ်ႇဝႃႈ ၼႂ်းမိူင်းသၼ်လွႆၸိုင်ႈတႆးၵူၺ်း ၸၢဝ်းတႆးၸိူဝ်းယူႇၸွမ်းၼႂ်းမိူင်းၶၢင်၊ မိူင်းယၢင်းလႅင်၊ မိူင်း ယၢင်းၽိူၵ်ႇလႄႈ ထုင်ႉလိၼ်ပဵင်း မိူၼ်ၼင်ႇ – တွင်ႁူႇ၊ တႃႈၵုင်ႈ၊ ဝဵင်းလိူဝ်ႇ ၸိူဝ်းၼႆႉၵေႃႈ ၸုမ်းႁၵ်ႉ လိၵ်ႈလၢႆးတႆး ဢွၼ်ၵၼ်ၶတ်းသၢင်ႈမႃးမိူၼ်ၵၼ်။

ပီၼႆႉၵေႃႈ ပီႈၼွင်ႉတႆး ထုင်ႉလိၼ်ပဵင်း ၸႄႈဝဵင်းတွင်ႁူႇ တိူင်းပႃႇၵိူဝ် တေပိုတ်ႇသွၼ်လိၵ်ႈလၢႆးတႆး ၶၢဝ်းမႆႈ မိူၼ်ၵၼ်။ ယွၼ်ႉၵႆၵၼ်တင်းမိူင်းတႆးသၼ်လွႆလႄႈ တႃႇပိုတ်ႇသွၼ် ၼၼ်ႉ မီးလွင်ႈယၢပ်ႇ ၽိုတ်ႇၸိူင်ႉႁိုဝ်၊ လႆႈၶတ်းသၢင်ႈႁၢင်ႈႁႅၼ်းၸိူင်ႉႁိုဝ်ၼႆၼၼ်ႉ ၸၢႆးသႂ်ၸိုၼ်ႈမိူင်း ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉ ၸၢႆးၵွၼ်းၶိူဝ်း ၵႅမ်ႁူဝ်ပဝ်ႈ ၸုမ်း ၵူၼ်းၼုမ်ႇတႆး ဝဵင်းတွင်ႁူႇဝႆႉ ၼင်ႇၼႆ –

ထၢမ် – ဢွၼ်တၢင်းသုတ်း ၶႂ်ႈတွင်ႈထၢမ်ဝႃႈ ပီၼႆႉ ၸွင်ႇတေပိုတ်ႇပၢင်သွၼ်လိၵ်ႈတႆး ၶၢဝ်းမႆႈ ယဝ်ႉၵေႃႈ ႁၢင်ႈႁႅၼ်းဝႆႉၸိူင်ႉႁိုဝ်ၽွင်ႈ?

တွပ်ႇ – ပၢင်သွၼ်ၶၢဝ်းမႆႈတႄႉ မီးၶႃႈဢေႃႈ။ တေပဵၼ်ယူႇၶႃႈ။ ႁၢင်ႈႁႅၼ်းဝႆႉယူႇယဝ်ႉ။ မိူဝ်ႈလဵဝ်တႄႉ တိုၵ်ႉၾိုၵ်းၽွၼ်ႉပၼ်မေႃသွၼ်ၶဝ်ဝႆႉယူႇ။ တေၾိုၵ်းၽွၼ်ႉပၼ် ဝၼ်းတီႈ 16/03/2025 တေႃႇထိုင် ဝၼ်းတီႈ 20/03/2025 ၼႆႉၶႃႈ။ ပၢင်သွၼ်လိၵ်ႈတႆးၵေႃႈ တေတႄႇၵႂႃႇ ဝၼ်းတီႈ 20 ၼႆႉ တေႃႇထိုင် 20/04/2025 ၼႆႉဢေႃႈ။

ထၢမ် – ပီၼႆႉ ႁွင်ႉမေႃသွၼ်တၢင်းလႂ်မႃးသွၼ်ပၼ် ယဝ်ႉၵေႃႈ မီးမီးလၢႆၵေႃႉၶႃႈ?

တွပ်ႇ – ၶႃႈၶဝ်ၵေႃႈ မီးတၢင်းယၢပ်ႇၽိုတ်ႇတႄႉၶႃႈယဝ်ႉ။ ႁႃတၢင်းလႂ်ၵေႃႈ မၼ်းဢမ်ႇမီး။ ႁဝ်းလႆႈၵႂႃႇႁႃ ဢဝ် ပွတ်းတၢင်းဝဵင်းလိူဝ်ႇမႃး။ ႁွင်ႉမေႃသွၼ် တီႈဝတ်ႉ/ ၵျွင်းၽွင်ႇတေႃႇဢူး ၼၼ်ႉမႃး။ လႆႈမႃးမေႃ သွၼ် 6 ၵေႃႉၶႃႈ။ ပေႃးပၢင်ၾိုၵ်းၽွၼ်ႉယဝ်ႉတူဝ်ႈယဝ်ႉ ႁဝ်းၶႃႈ ၸင်ႇတေသူင်ႇပၼ်ၵႂႃႇၵူႈဝၢၼ်ႈဝၢၼ်ႈ ဢၼ်တေပိုတ်ႇသွၼ်လိၵ်ႈတႆး။

ထၢမ် – မိူဝ်ႈၵႆႈငိၼ်းဝႃႈ ပီၼႆႉၵေႃႈ တေသွၼ်ၵႂႃႇၵူႈဝၢၼ်ႈၼႆလႄႈ တေပဵၼ်ဝၢၼ်ႈလၢႆၽွင်ႈ ႁူဝ်ၼပ်ႉ လုၵ်ႈႁဵၼ်း တေမီးမွၵ်ႈၵႃႈႁိုဝ်ၼေႃ?

တွပ်ႇ – တေမီးဝၢၼ်ႈပွၵ်ႉၶူဝ် ၊ ဝၢၼ်ႈသဵၵ်ႉၽူးတွင်ႇ ၊ ဝၢၼ်ႈၼႃးႁီး ၊ ဝၢၼ်ႈႁူၵ်းလၵ်း ၊ ဝၢၼ်ႈၸဵတ်း လၵ်း ၸိူဝ်းၼႆႉ။ ႁူဝ်ၼပ်ႉလုၵ်ႈႁဵၼ်းတႄႉ တေပႆႇၸၢင်ႈၼပ်ႉလႆႈ။ ၼိုင်ႈဝၢၼ်ႈလႂ် 40 – 50 ၼႆႉတႄႉ ဢမ်ႇယွမ်းၶႃႈ။ ပေႃးႁဝ်းၶႃႈ ပိုတ်ႇသွၼ်မႃး ႁဝ်းၶႃႈ ၸင်ႇတေႁူႉသဵၼ်ႈမၢႆမၼ်းတႅတ်ႈတေႃးၶႃႈဢေႃႈ။

ထၢမ် – ၼွၵ်ႈလိူဝ်လိၵ်ႈလၢႆးတႆးယဝ်ႉ တၢင်ႇလွင်ႈၶႃႈလူး ၸွင်ႇတေသွၼ်ပၼ်ယူႇၶႃႈႁႃႉ?

တွပ်ႇ – ၼွၵ်ႈလိူဝ်လိၵ်ႈလၢႆးတႆးယဝ်ႉတႄႉ ႁဝ်းၶႃႈလႆႈၾိုၵ်းပၼ်ပႃးၵၢၼ်ႁႃၵိၼ်လဵင်ႉတွင်ႉဢေႃႈ။ ႁဝ်း ၶႃႈ တိုၼ်းၼပ်ႉသွၼ်ႇပႃး ၸဵမ်မိူဝ်ႈၾိုၵ်းၽွၼ်ႉမေႃသွၼ်ၼႆႉယဝ်ႉ။

ထၢမ် – ဢၼ်ပိုတ်ႇသွၼ်မႃးၵူႈပီပီၼႆႉ လႆႈႁၼ်ၼမ်ႉတွၼ်းမၼ်းမီးသင်မႃးၽွင်ႈ ၊ ယဝ်ႉၵေႃႈ လွင်ႈ ယူပ်ႈယွမ်းၶႃႈလူး မီးၸိူင်ႉႁိုဝ်ၽွင်ႈ?

တွပ်ႇ – ၶႃႈတေယွၼ်းလၢတ်ႈတၢင်းယူပ်ႈယွမ်းဢွၼ်တၢင်းၶႃႈ။ ပေႃးမႃးတူၺ်း ၵၢၼ်ဝၢၼ်ႈၵၢၼ်မိူင်း ၵေႃႈတိုၵ်ႉသုၵ်ႉယုင်ႈ။ တီႈဝၢၼ်ႈဢၼ်တႆးႁဝ်းယူႇၸိူဝ်းၼႆႉၵေႃႈ ပႆႇၼိမ်သဝ်း တိုၵ်ႉမီးပၢင်တိုၵ်းသိုၵ်း သိူဝ်။ မၢင်ဝၢၼ်ႈ ဢၼ်လႆႈပၢႆႈၽေးၵေႃႈမီး။ ၶႂ်ႈလၢတ်ႈတႄႉၵေႃႈ ႁဝ်းၶႃႈ လႆႈယူႇၼႂ်းၵႄႈလွင်ႈယၢပ်ႇ ၽိုတ်ႇ ၸိူဝ်းၼၼ်ႉသေ ပိုတ်ႇသွၼ်မႃး။ ၾိင်ႈငႄႈလိၵ်ႈလၢႆး ၵႂၢမ်းလၢတ်ႈတႆးႁဝ်း ၼင်ႇႁိုဝ် တေဢမ်ႇ ႁၢႆၼၼ်ႉ ႁဝ်းၶႃႈၶတ်းၸႂ်ႁဵတ်းမႃး။

ယူႇတီႈ ပၢင်သွၼ်ၸိူဝ်းၼႆႉသေ လုၵ်ႈဢွၼ်ႇတႆး ၸိူဝ်းဢၼ်ဢမ်ႇမေႃလၢတ်ႈၵႂၢမ်းတႆး ဢမ်ႇမေႃလိၵ်ႈ တႆး ၸိူဝ်းၼႆႉ ၶဝ်မေႃမႃးၶိုၼ်း။ လွင်ႈၶူဝ်းၼုင်ႈတၢင်းဝႂ်တႆးၵေႃႈ ၶဝ်ႁူႉမႃး။ ၾိင်ႈတႆး မိူၼ်ၼင်ႇ လၢႆးႁႆႇ ၵွင်ၸိူဝ်းၼႆႉ လၢႆးၵႃႈတူဝ်းၵႃႈၼူၵ်ႉၸိူဝ်းၼႆႉၵေႃႈ ၶဝ်ႁူႉမႃးလီလီငၢမ်းငၢမ်းၼၼ်ႉၶႃႈယဝ်ႉ။

ထၢမ် – မိူဝ်ႈၵႆႈငိၼ်းဝႃႈ မီးပၢင်တိုၵ်းသိုၵ်းသိူဝ်ၼႆ ပွတ်းတၢင်းတွင်ႁူႇၼႆႉ ၸုမ်းသင်တင်းၸုမ်းသင် ယိုဝ်းတိုၵ်းၵၼ်ၶႃႈၼေႃ?

တွပ်ႇ – ယွၼ်ႉဝႃႈ တွင်ႁူႇၼႆႉ ၸမ်ၸုမ်းသိုၵ်းယၢင်းၽိူၵ်ႇ KNU ၶဝ်တူင်ႉၼိုင်ႈဝႆႉ။ ယဝ်ႉၵေႃႈ PDF ၶဝ် ၵေႃႈမီး။ တီႈတႆးႁဝ်းယူႇသမ်ႉ ပဵၼ်ဝၢၼ်ႈၼွၵ်ႈဢွၼ်ႇၵူၺ်း သိုၵ်းၸိူဝ်းၼႆႉသမ်ႉ မႃးယူႇၸွမ်း ၼႂ်း ဝၢၼ်ႈၵေႃႈမီးလႄႈ ပေႃးပဵၼ်ပၢင်တိုၵ်းၵၼ်တင်း သိုၵ်းမၢၼ်ႈမႃးၵေႃႈ ၵူၼ်းဝၢၼ်ႈ ဢမ်ႇၸၢင်ႈယူႇ သဝ်းလႆႈလီလီ။ မၢင်ဝၢၼ်ႈၵေႃႈ ၵႃႈလႆႈပၢႆႈဢေႃႈ။ တႃႇပိုတ်ႇပၢင်သွၼ် ၸိူဝ်းၼႆႉၵေႃႈ ႁဝ်းၶႃႈ လႆႈ ယွၼ်းၶႂၢင်ႉ ၵူႈၾၢႆႇၾၢႆႇသေ ၸင်ႇတေၸၢင်ႈပိုတ်ႇသွၼ်ဢေႃႈ။

ထၢမ် – တၢင်းယိူင်းဢၢၼ်း ဢၼ်လႆႈပိုတ်ႇပၢင်သွၼ်ၼႆႉၶႃႈလူး သမ်ႉမီးၸိူင်ႉႁိုဝ်ၽွင်ႈၶႃႈ?

တွပ်ႇ – တႆးတွင်ႇဢူႇႁဝ်းၶႃႈၼႆႉ လႆႈယူႇၼႂ်းၵႄႈပိူၼ်ႈၶႃႈၼႃႇၼေႃႈ။ ႁဝ်းၶႃႈၵေႃႈ လႆႈၶတ်းၸႂ်ၶႃႈဢေႃႈ ၼင်ႇႁိုဝ် ၸိူဝ်ႉၶိူဝ်းတႆးႁဝ်း တေဢမ်ႇႁၢႆ။ ႁႂ်ႈလိၵ်ႈလၢႆးတႆး ႁဝ်းဢမ်ႇႁၢႆ။ ၾိင်ႈငႄႈၾိင်ႈထုင်းတႆးၵေႃႈ ၼင်ႇႁိုဝ် တေဢမ်ႇႁၢႆ။ မိူဝ်ႈႁဝ်းႁဵတ်းလႆႈယူႇၼႆႉ ႁဝ်းလူဝ်ႇႁဵတ်းၵႂႃႇတိၵ်းတိၵ်းၶႃႈယဝ်ႉ။ ႁဝ်းၶႃႈ မီး တၢင်းယိူင်းဢၢၼ်းၸိူင်ႉၼၼ်သေ ၸတ်းႁဵတ်းၵႂႃႇဢေႃႈ။

ထၢမ် – ယဝ်ႉၵေႃႈ တႃႇၸတ်းပၢင်သွၼ်ၸိူဝ်းၼႆႉ ဢၼ်လမ်ႇလွင်ႈသုတ်းလႄႈ ဢၼ်ယၢပ်ႇၽိုတ်ႇ တေပဵၼ်သင်ၶႃႈ?

တွပ်ႇ – လွင်ႈယၢပ်ႇၽိုတ်ႇတႄႉ တေလႆႈဝႃႈ လွင်ႈမေႃသွၼ်ၶႃႈဢေႃႈ။ မေႃသွၼ်ၵေႃႈ မီးတၢင်းယၢပ်ႇ ၽိုတ်ႇ။ ငိုၼ်းၵွင်ၵၢင်ၸုမ်းၵူၼ်းၼုမ်ႇႁဝ်းၶႃႈၵေႃႈ မၼ်းဢေႇ။ မၼ်းဢမ်ႇတဵမ်ထူၼ်ႈ။ ဝၢၼ်ႈတႆး ႁဝ်းၶႃႈ ၸိူဝ်းၼႆႉၵေႃႈ မီးလွင်ႈသုၵ်ႉယုင်ႈဢမ်ႇၼိမ်သဝ်း။ တေလႆႈဝႃႈ ဢၼ်လမ်ႇလွင်ႈလႄႈ ဢၼ် ယၢပ်ႇၽိုတ်ႇၵေႃႈ တေမီး 3 တွၼ်ႈၼႆႉၶႃႈ ပဵၼ်ဢဵၼ်ႁႅင်းမေႃသွၼ်၊ ငိုၼ်းၵွင်ၵၢင်လႄႈ ဝၢၼ်ႈတႆး ဢမ်ႇၵတ်းယဵၼ်ၶႃႈ။

ထၢမ် – ပၢင်သွၼ်လိၵ်ႈတႆးၶၢဝ်းမႆႈ တီႈတွင်ႁူႇၼႆႉ ၵမ်ႈၼမ် ပဵၼ်ၸုမ်းလႂ် ၵေႃႉဢွၼ်ၼမ်းၸတ်းမႃး ၵူႈပီပီ တႄႇပိုတ်ႇသွၼ်မႃး မိူဝ်ႈပီလႂ်?

တွပ်ႇ – ၼၼ်ႉတႄႉ ပဵၼ်ၸုမ်းၵူၼ်းၼုမ်ႇတႆး ၸႄႈတွၼ်ႈတွင်ႇဢူႇႁဝ်းၶႃႈၵူၺ်းၶႃႈဢေႃႈ။ မိူဝ်ႈ 2012 ၼၼ်ႉတႄႉ ၵေႃလိၵ်ႈလၢႆးလႄႈၾိင်ႈငႄႈတႆးတိူင်းပႃႇၵိူဝ် ဢွၼ်ၼမ်းၸတ်းဢေႃႈ။ ၽိူဝ်ႇထိုင်မႃး 2018 ၼႆႉ ၸုမ်းၵူၼ်းၼုမ်ႇတႆး ၸင်ႇဢွၼ်ၼမ်းၸတ်းမႃး ထိုင်ႁၢၼ်ႉမိူဝ်ႈလဵဝ်ဢေႃႈ။

ထၢမ် – ၶႂ်ႈယွၼ်းထၢမ်ဝႃႈ ပေႃးၸူးၸႂ် ၶႂ်ႈႁႂ်ႈၵူၼ်းၼုမ်ႇတႆး တၢင်းထုင်ႉလိၼ်ပဵင်းပဵၼ်ၸိူင်ႉႁိုဝ် ၶႂ်ႈပူၵ်း ပွင်ပၼ်ၶဝ်ၸိူင်ႉႁိုဝ်?

တွပ်ႇ – ပေႃးၸူးၸႂ်တႄႉ သင်ဝႃႈ ပဵၼ်တႆးၼႆ ၶႂ်ႈႁႂ်ႈမေႃလိၵ်ႈတႆး ၶႂ်ႈႁႂ်ႈမေႃလၢတ်ႈၵႂၢမ်းတႆး။ ၶႂ်ႈႁႂ်ႈၶဝ် မေႃႁူႉၸိူဝ်ႉၸၢတ်ႈတႆး။ ႁဝ်းၶႃႈ ၶႂ်ႈပူၵ်းပၼ် ႁႂ်ႈတႆးသိုပ်ႇပဵၼ်တႆး။

ထၢမ် – ဢိင်ၼိူဝ် ပၢင်သွၼ်လိၵ်ႈတႆး ပွတ်းထုင်ႉလိၼ်ပဵင်းၼႆႉသေ ၶႂ်ႈသင်ႇထိုင်ပီႈၼွင်ႉတႆး ၼႂ်းမိူင်း ၼွၵ်ႈမိူင်းၸိူင်ႉႁိုဝ်ၽွင်ႈ?

တွပ်ႇ – ၶႃႈၶႂ်ႈသင်ႇထိုင်တႄႉ ဝၢၼ်ႈမိူင်းၶႂ်ႈပဵၼ်ၸိူင်ႉႁိုဝ်ၵေႃႈပဵၼ် ၶႂ်ႈယၢပ်ႇၽိုတ်ႇၸိူင်ႉႁိုဝ်ၵေႃႈယဝ်ႉ။ တႃႇၸိူဝ်ႉၶိူဝ်းႁဝ်း တႃႇၸိူဝ်ႉၸၢတ်ႈႁဝ်း တေလႆႈႁဵတ်းၸိူင်ႉႁိုဝ်ၼႆၼၼ်ႉ ပဵၼ်ပုၼ်ႈၽွၼ်းႁဝ်း ၸၢဝ်း တႆးၵူႈၵေႃႉယဝ်ႉ။ ပေႃးဢမ်ႇႁဵတ်းၵေႃႈ ၸၢင်ႈမွတ်ႇဝၢႆးႁၢႆၵႂႃႇပႅတ်ႈ။ ပေႃးႁဝ်းဢမ်ႇႁဵတ်း ၽႂ်တေႁဵတ်း။ ၵၢၼ်တႆး ပေႃးတႆးဢမ်ႇႁဵတ်း ဢမ်ႇမီးၽႂ်မႃးႁဵတ်းပၼ်ၶႃႈ။ ယွၼ်ႉၼၼ် ၵၢၼ်ၸိူဝ်ႉၶိူဝ်းတႆးၼႆႉ တႆးတိုၼ်းမီးပုၼ်ႈၽွၼ်းၵူႈၵေႃႉၼႆ ၶႂ်ႈသင်ႇထိုင်ၼင်ႇၼႆၶႃႈ။

ထၢမ် – ၵမ်းလိုၼ်းသုတ်း ဢၼ်ၶႃႈဢမ်ႇလႆႈထၢမ်မႅၼ်ႈသေ ဢၼ်ၶႂ်ႈထႅမ်လၢတ်ႈ ၸွင်ႇတေမီးသင် ထႅင်ႈ?

တွပ်ႇ – ပႆႇမီးသင်ၶႃႈ ။တဵမ်ထူၼ်ႈယဝ်ႉၼင်ႇၵဝ်ႇၶႃႈ။

ဢၼ်ဝႆႉ ၸႂ်ယႂ်ႇၸႂ်ယၢဝ်း ပၼ်ၶၢဝ်းယၢမ်းသေ တွပ်ႇပၼ်ႁဝ်းၶႃႈၸိူင်ႉၼႆ ယိၼ်းၸူမ်းယႂ်ႇၼမ်ၶႃႈ