ၸူဝ်ႈၶၢဝ်းမိၼ်းဢွင်ႇလၢႆႇ ၵႂႃႇၽႅဝ်ရတ်ႉသျႃးလႄႈ ၿႄးလႃႊရုတ်ႉ AA ၸုမ်းသိုၵ်းရၶႅင်ႇ ၶတ်းၸႂ်လူင်းတိုၵ်းလၢပ်ႈပႃႇၵိူဝ်လႄႈ ဢေႇရႃႇဝတီႇယူႇယႂ်းယႂ်း ၊ KIA ၵေႃႈ သိုပ်ႇလေႃႇမၢၼ်ႈမေႃႇယူႇ ဢမ်ႇထၢတ်ႇ။

ၽိူဝ်ႇဝႃႈ မိၼ်းဢွင်ႇလၢႆႇ ၽႅဝ်မႃးၶိုၼ်းၵေႃႈ တိူင်ႉသျီႊၵျုၼ်ႊ တူဝ်တႅၼ်းၶိုၵ်ႉတွၼ်းမိူင်းၶႄႇ လင်ႇမႃး ၸူးၼေႇပျီႇတေႃႇၵမ်းလဵဝ်။ ဢွၵ်ႇၶၢဝ်ႇဝႃႈ မႃးဢုပ်ႇလွင်ႈပၢင်လိူၵ်ႈတင်ႈၼႆသေတႃႉ ပိူင်ယႂ်ႇတေၶႂ်ႈႁူႉ ၸွမ်း လွင်ႈၵႂႃႇတူၵ်းလူင်းၸွမ်းမိူင်းရတ်ႉသျႃး ၼၼ်ႉယဝ်ႉ။

ရတ်ႉသျႃးလႄႈ ၶႄႇၼႆႉ ၶဝ်ႈၸိုဝ်ႈဝႃႈ ပဵၼ်ၸိုင်ႈမိူင်းႁူမ်ႈၽၢၵ်ႈၵၼ်ၵေႃႈယႃႇ ပေႃးၵဵဝ်ႇလူၺ်ႈၽွၼ်း ပၢင်ႈဢေႃးၸႃႇမႃး ၽႂ်ၵေႃႈၶႂ်ႈတွၼ်းလိူဝ်ၽႂ်ယဝ်ႉ။ ဢဝ်ၼမ်ႉတွၼ်းမၢၵ်ႈမီးဝႃႈ ၸိုင် မိူင်းမၢၼ်ႈၼႆႉ ဢမ်ႇမီးၼမ်ႉၽၵ်းၵႃႈႁိုဝ်သေတႃႉ ဢေႇသုတ်းတႄႉ လဵင်ႉဝႆႉမိူင်းလုၵ်ႈၼွင်ႉ ဢၼ်တေၸၢင်ႈၵွၼ်း ၵိူင်ႈတေႃႇ မိူင်းႁုၼ်ႈမုၼ်းလူင် ၸိူင်ႉၼင်ႇ ဢိၼ်ႊတီႊယိူဝ်ႊၼၼ်ႉၵူၺ်းၵေႃႈ လႅပ်ႈပေႃးၸႂ်တႃႇမၼ်း ယူႇ။

တီႈတႄႉၵေႃႈ လုမ်ႈၾႃႉလူင်ၼႆႉ ပဵၼ်တႃႇ ဢမေႊရိၵၼ်ႊ၊ ရတ်ႉသျႃးလႄႈ မိူင်းၶႄႇ ၸႅၵ်ႇၵၼ်သုမ်ႇ ငုမ်းၵုမ်းၵမ်ၵူၺ်းၼႆ ႁူႉထိုင်ၵၼ်ဝႆႉပတ်းပိုၼ်ႉတူဝ်ႈလူၵ်ႈယဝ်ႉ။ ၼႂ်းၼင်ႇၼၼ် တေႁဵတ်းႁိုဝ်ယူႇ ႁႂ်ႈ ထုၵ်ႇမေႃလွတ်ႈၽေးၶဝ်သေ ၼင်ႇႁိုဝ် တေဢမ်ႇပဵၼ်ၶမ်း တၢႆတၢင်ၶဝ်ၼၼ်ႉၵူၺ်း ၵႃႈလႆႈၵၼ်ႉၵူၵ်ႉ လဵၼ်ႈလွၵ်းယူႇၽႂ်မၼ်း။

ၸိူင်ႉၼင်ႇမိူင်းၶႄႇၼႆ ၵႃႈပေႉၶႂ်ႈဝႃႈမၼ်း တေဢမ်ႇၶဝ်ႈၵႅဝ်ၸွမ်းလိူင်ႈၼႂ်းမိူင်းပိူၼ်ႈၼႆလႃႈ။ ထိုင်ၼႃႈၼႅၼ်ႈမႃး မၼ်းတိုၼ်းႁဵတ်းတူဝ်ၼင်ႈႁၢင်လေႇယဝ်ႉ။ ယိပ်းၵမ်ၸိူင်းၵျုး ၽႅၼ်ႉသေ ငမ်ႁူဝ်ၸုမ်း ဢူၺ်းလီသၢမ်ပီႈၼွင်ႉ လေႃႇသွင်ႉပၼ် SAC ယဝ်ႉ ၶိုၼ်းလိမ်ႇႁူဝ်ၶွၼ်ႉၸီႉ ပူၵ်းႁႂ်ႈ SAC တင်ႈတူဝ် မင်ႁူဝ်ၶိုၼ်း ပိူဝ်ႈတႃႇသုၼ်ၵၢင် ဢမ်ႇၵူၼ်ႇပင်းလႄႈ ႁပ်ႉထွမ်ႇဢေႃးၸႃႇမၼ်းတင်းပိုၵ်းၼၼ်ႉ ႁၼ်လီၸႅင်ႈလႅင်းၼႃႇၼႅၼ်ႇ၊ ထိုင်တီႈ ဢမလ ပေႃးဢမ်ႇႁၢၼ်ႉၸႂ်လႆႈသေ လႅၼ်ႈပိုင်ႈၸူး ပူႊတိၼ်ႊ ၼၼ်ႉယဝ်ႉ။

ၽိူဝ်ႇပဵၼ်ၼၼ်မႃး ၸင်ႇသမ်ႉၼႅတ်ႈႁွင်ႉဢုပ်ႇ ၽူႈၵွၼ်းသိုၵ်းၸႄႈတွၼ်ႈ ၶွင်ၵဝ်ႈၵၢင်ႉၶဝ်သီႇၵေႃႉ ႁႂ်ႈလႆႈမိူဝ်းထွမ်ႇၶေႃႈပူင်ၼၵ်းၶဝ် တီႈၶုၺ်ႊမိင်ႊ၊ ႁူဝ်ပဝ်ႈၶဝ်ၵေႃႈ တမ်ႉပႆႇပွႆႇမိူဝ်းၶိုၼ်းႁိူၼ်း။

ၼႂ်းၵႄႈၼႆႉ PDF လႄႈ ၵူၼ်းၵဝ်ႇၸုမ်းလုၵ်ႈႁဵၼ်း 88 ၶဝ် တိုၵ်ႉၶႂ်ႈၸၢမ်းၸင်ႈတူၺ်း ဢေႃးၸႃႇၶႄႇယူႇ၊ ၽၢမ်းႁဵတ်းၵူၼ်းမိူင်းယဝ်ႉ ၸူဝ်းဢဝ်ၵူၼ်းပိုၼ်ႉတီႈသေ တေၶွမ်ႈၶတ်းတေႃႇ လိူင်ႈမိူင်းၶႄႇ ၶဝ်ႈၵႅဝ်ၸွမ်း ၼႃႈၵၢၼ်မိူင်းမၢၼ်ႈဝႃႈၼႆ၊ လွၵ်းတႅၼ်းတႄႉၵေႃႈ ၶႂ်ႈဝႃႈ ယႃႇႁႂ်ႈလႆႈထွႆပၼ်လႃႈသဵဝ်ႈ၊ သႅၼ်ဝီ ၼၼ်ႉယဝ်ႉ။

ၵူၺ်းၵႃႈ မိူင်းၶႄႇၵေႃႈ ႁူႉတေၼပ်ႉသွၼ်ႇယူႇ၊ ထႃႈဢမ်ႇပႃး ႁႅင်းမိူင်းၶႄႇၵမ်ႉတၢင်းလင် ၸွင်ႇၶဝ်တေ ယိုတ်းလႆႈ မိူင်းတႆးပွတ်းႁွင်ႇႁိုဝ် ၼၼ်ႉၼႃႇ။ ၸင်ႇဝႃႈ ၼႂ်းလိူၼ်ၼႆႉ ၸမ်သဵင်ႈ တေၶိုင်ႁႂ်ႈ SAC လႄႈ ၵဝ်ႈၵၢင်ႉ ႁူပ်ႉဢုပ်ႇၵၼ်၊ ၼႂ်းလိူၼ်ၼႃႈ တေႁွင်ႉပလွင်ႈလႄႈ SAC ဢုပ်ႇၵၼ်။ ပေႃးယဝ်ႉ တေႁွင်ႉပႃး AA ႁေၵွၼ်ႇ။

ၸိူဝ်းၼႆႉ ပဵၼ်ဝႆႉတူင်ႇသိုပ်ႇၵၼ် ဢၼ်ဢမ်ႇလိူဝ်လႆႈ ယွၼ်ႉလႆႈပိုင်ႈႁူမ်ႈပိုင်ႈၽူၺ်းမၼ်းမႃးၼၼ်ႉၼႆ ၸုမ်းဢူၺ်းလီသၢမ်ပီႈၼွင်ႉၵေႃႈ ႁူႉထိုင်ဝႆႉယူႇ။ ၾၢႆႇၼိုင်ႈတႄႉ ၼင်ႇႁိုဝ် တေမီးၽွၼ်းလီ တီႈတပ်ႉ ၸုမ်း ဢမ်ႇၼၼ် ၸိူဝ်ႉၶိူဝ်းတူဝ်ၵဝ်ႇၽႂ်မၼ်းၼၼ်ႉ ၵႃႈလႆႈၵၼ်ႉၵူၵ်ႉလိင်ႉလွၵ်း ဝၵ်ႉတၢဝ်းပဵၼ်တိုဝ်ႉတၢင်း ယူႇယဝ်ႉ။

မိူင်းၶႄႇၼႆႉ ဢဝ်ၸိူင်းၵျႃးၽႅၼ်ႉမၼ်း ႁဵတ်းယႃႈၶူမ်ဝၢၼ်လႅၵ်ႈၼမ်ႉၶိုဝ်ႇသေ လုၵ်ႉတၢင်းႁွင်ႇၽၢင်ႈပွင်ႇထိုင်တၢင်းၸၢၼ်း ၸိူဝ်းဢိူမ်ႈၸမ်မိူင်းထႆးၼၼ်ႉပႃးထႅင်ႈၼႆႉ တိုၼ်းပဵၼ် ၽႅၼ်သွၼ်ႉၽႅၼ်ၼႆ ၼင်ႇႁဝ်းၶႃႈ ယၢမ်ႈပၢမ်ႉထိုင်ၵၼ်မႃးယဝ်ႉ၊ ယူႇတီႈၸုမ်းၸၢဝ်းၶၢင်လႄႈ ၶျၢင်းၶဝ်ၵေႃႈ ယုၵ်ႉႁူႉၸဵမ် ပိုင်းဝႆႉလႄႈ ၸင်ႇႁႃလၢႆးတေဝႄႈပူၼ်ႉလႆႈ လွင်ႈသုမ်ႇငုမ်းမၼ်းယူႇယဝ်ႉ။

KIA ၼႆႉ လၢင်းလၢင်းဢမ်ႇလိူဝ်လႆႈႁႅင်းဢီးသေ တိူၵ်ႈတီႈလႆႈဢုပ်ႇတင်း SAC ၵေႃႈ ၼင်ႇႁိုဝ် တေၸၢင်ႈယူႇၼိူဝ်ၾၢႆသေ တၵ်းၼမ်ႉလႆႈၼၼ်ႉ မၼ်းၸင်ႇၶတ်းၸႂ်တိုၵ်းႁုပ်ႈ ၼႃႈတီႈလမ်ႇလွင်ႈၼႂ်းမိူင်း မၼ်းယဝ်ႉ။ ယဝ်ႉသမ်ႉ ၼင်ႇႁိုဝ် တေဝႄႈလႆႈ လွင်ႈၵမ်ၵိၼ်းမိူင်းၶႄႇၼၼ်ႉ မၼ်းပေႃးလွမ်ၶိုင်သၢင်ႈဝႆႉ ပၢင်သဝ်းငဝ်ႈငုၼ်းမႂ်ႇမၼ်း တၢင်းၾၢႆႇဝၼ်းတူၵ်းယဝ်ႉ။

ထႃႈဢမ်ႇတူၵ်းလူင်းၵၼ်လႆႈတင်း SAC ပႄႇ တၢၼ်ႇလီမႅင်ႇဢဝ် မိူင်းၶၢင်၊ မိူင်းၶျၢင်း၊ မိူင်းရၶႅင်ႇလႄႈ ၸႄႈၵႅင်းၸိူဝ်းၼႆႉ ႁဵတ်းပဵၼ်မိူင်းႁူမ်ႈတုမ်မႂ်ႇ ႁင်းၶေႃၶဝ်ၵေႃႈ လႅပ်ႈပေႃးဝူၼ်ႉဝႆႉယဝ်ႉၵွၼ်ႇ။

Sub-State ဝႃႇ၊ ပၼ်ႁႃဢၼ်ပဵၼ်လူၺ်ႈ တင်းပလွင်ႈလႄႈ ၵဝ်ႈၵၢင်ႉဝႃႇ ၸိူဝ်းၼႆႉ လႅပ်ႈပဵၼ်ႁူဝ်ႉၶႅၼ် လႅၼ်ၵၢၼ်မိူင်းၶဝ် ပိူဝ်ႈတႃႇၵႅတ်ႇၶၼ်ႈ တႆးမိူင်းတႆးလႄႈ တႆးမိူင်းၶၢင်၊ ၸႄႈၵႅင်း ယႃႇႁႂ်ႈလႆႈၸပ်းၸမ် ၵၼ်ၵူၺ်းႁိုဝ်ၼႆၵေႃႈ ယင်းလႆႈၶႆႈၸႂ်ပႃးယဝ်ႉ။

ၵၢၼ်မိူင်းၼႆႉ တေပဵၼ်ဢူၺ်းလီၵၼ်ၵႂႃႇထႃႇဝရၼႆ ဢမ်ႇမီး၊ တေပဵၼ်ၶဵၼ်ၵၼ်ၵႂႃႇ ထႃႇဝရၼႆၵေႃႈ ဢမ်ႇမီး။ ဢၼ်ပဵၼ်မီးဝႆႉထႃႇဝရတႄႉ လွင်ႈတူၺ်းတေႃႇၼမ်ႉတွၼ်းၽွၼ်းပၢင်ႈၼႆ ႁူႉထိုင်ၵၼ်ယူႇသေတႃႉ ယၢမ်းမိူဝ်ႈလူင်လိုမ်း ၵႂႃႇၸူဝ်ႈၵႅပ်ႉၼၼ်ႉ ၸၢင်ႈလူႉယႂ်ႇသုမ်းလူင်တႄႉယဝ်ႉ။

ယွၼ်ႉၸိူင်းၵျႃးၽႅၼ်ႉသေ ဢူၺ်းလီသၢမ်ပီႈၼွင်ႉလႄႈ KIA မေႃဝၵ်ႉႁၼ်တိုဝ်ႉတၢင်းလီယဝ်ႉ ယိုတ်းလႆႈၼႃႈတီႈတင်းၼမ်တင်းလၢႆၼႆႉ ႁူမ်ႈဝႃႈပႆႇမီးၶေႃႈတူၵ်းလူင်းၵၢၼ်မိူင်းၵေႃႈယႃႇ တႃႇယူႇၼိူဝ်လၢင်း တႅင်းၸၢင်ႉၵၢၼ်မိူင်းတႄႉ မၼ်ႈၸႂ်လႆႈတၢၼ်ႇတၢၼ်ႇယဝ်ႉသႄႈ။

World Super ၸိုင်ႈမိူင်းႁႅင်းယႂ်ႇလူင်ၼႆႉ တေတႃႉႁႅင်းတေႃႇမၼ်းဢမ်ႇၸၢင်ႈၵေႃႈယႃႇ ပေႃးတင်းၶႆႈၸႂ် ၾၢင်ႉတိူၼ်ယူႇၵူႈမိူဝ်ႈၵူႈလွၵ်းတႄႉ ဢေႇသုတ်းတႄႉ ၸၢင်ႈလွတ်ႈပဵၼ်ၶမ်းတၢႆတၢင်မၼ်းယူႇဢေႃႈ။

ၼႂ်းဝၼ်းမိူဝ်ႈလဵဝ် ဝႆႉဝႃႈတိုၵ်ႉပဵၼ်ၽွင်းႁွမ်ႁႅင်းယူႇ ၼႆၵွၼ်ႇလႃႈ၊ ယႃႇၽူမ်ႈဝႃႈ တေၶူင်ဢွၵ်ႇၶိူင်ႈၶိုတ်းၵၢပ်ႈ တႃႉတေလႆႈၶတ်းၸႂ်ႁႂ်ႈမေႃၸႂ်ႉတိုဝ်းထိုင်တီႈၵူၺ်း။

ယႃႇၽူမ်ႈဝႃႈ တေတႃႉၶဵင်ႇတေႃႇ မိူင်းႁိမ်းႁွမ်း တႃႉတေလႆႈဝႄႈလွတ်ႈ ယႃႇႁႂ်ႈလႆႈပဵၼ်ၶွၼ်ႉတဝ်ႉ မၼ်းၵူၺ်း။ ၽိူဝ်တေၵေႃႇသၢင်ႈ လွင်ႈၽွမ်ႉႁူမ်ႈပိူင်လဵဝ် တႃႉတမ်းၽႅၼ်ၵိူတ်ႇလဵင်ႉပႃး ၸိူဝ်ႉသႅၼ်းႁုၼ်ႈမႂ်ႇ ဢၼ်တေႁတ်းတိုၵ်းႁတ်းတၢႆ ႁတ်းတူင်ႉႁတ်းတိုၼ်ႇ ႁတ်းၸိုၼ်ႇႁတ်းၸုၼ်ႉၼၼ်ႉၸင်ႇ တေၸၢင်ႈမုင်ႈမွင်ႈလႆႈ လွင်ႈၶိူဝ်းဢမ်ႇႁၢႆ မိူင်းဢမ်ႇယၢႆႈယဝ်ႉ ဢေႃႈ။