မိူင်းၶႄႇ တုၵ်းယွၼ်းမႃးၶိုၼ်း ၶိူင်ႈၶူဝ်းၸၢၵ်ႈ ၶွမ်ႊပိဝ်ႊတိူဝ်ႊ ၸိူဝ်းၸႂ်ႉၼႂ်းၵၢၼ်လွၵ်ႇလႅၼ်ၵိၼ်ငိုၼ်း တင်းဢွၼ်ႊလၢႆႊ ၵျႃးၽႅၼ်ႉ ဢၼ်တပ်ႉပႂ်ႉလႅၼ်လိၼ်ယၢင်းၽိူၵ်ႇ BGF ယိုတ်းသိမ်းဝႆႉၼၼ်ႉ ဝႃႈၼႆ။
ၸွမ်းၼင်ႇ မိူင်းၶႄႇ ပၼ်ႁႅင်းဢီးသေ မိူဝ်ႈၵၢင်လိူၼ်ၾႅပ်ႊပိဝ်ႊရီႊမႃးၼႆႉ တပ်ႉပႂ်ႉလႅၼ်လိၼ်ယၢင်းၽိူၵ်ႇ ၶဝ်ႈၵူတ်ႇထတ်းတီႉၺွပ်း ၵူၼ်းႁဵတ်းၵၢၼ်ၵျႃးၽႅၼ်ႉ တီႈဝဵင်းမႂ်ႇ သူၺ်ႇ ၵူၵ်ႉၵူဝ်ႇ၊ မျႃႉဝတီႇ၊ KK Park တီႈလႅၼ်လိၼ်ယၢင်းၽိူၵ်ႇ – ထႆး၊ တီႉၺွပ်းလႆႈၵူၼ်းႁဵတ်းၵၢၼ်ၵျႃးၽႅၼ်ႉ ၼပ်ႉႁူဝ်ႁဵင်ၵေႃႉ ဢိၵ်ႇပႃး ၵူၼ်းမိူင်းၶႄႇ။ ဝၢႆးလင်ၼၼ်ႉ BGF သူင်ႇပွၵ်ႈ ၶိုၼ်းၵူၼ်းမိူင်းၶႄႇ တီႈလူင်ပွင်ၸိုင်ႈၶဝ် ဝႃႈၼႆ။
ၽွင်းၵူတ်ႇထတ်းတီႉၺွပ်း ၵူၼ်းႁဵတ်းၵၢၼ်ၵျႃးၽႅၼ်ႉၼၼ်ႉ ၸုမ်းသိုၵ်း BGF ယိုတ်းသိမ်းဝႆႉပႃး ၶိူင်ႈၶူဝ်း ၸႂ်ႉသွႆ မိူၼ်ၼင်ႇ ၶွမ်ႊပိဝ်ႊတိူဝ်ႊ၊ ၾူၼ်း၊ ၶိူင်ႈၸႂ်ႉ တႃႇဢိၼ်ႊထိူဝ်ႊၼႅတ်ႊ ၸိူဝ်းၼၼ်ႉတင်းၼမ်။
ယၢမ်းလဵဝ် လူင်ပွင်ၸိုင်ႈမိူင်းၶႄႇ တုၵ်းယွၼ်းမႃးၶိုၼ်း ႁႂ်ႈၸတ်းသူင်ႇပၼ် ၶိူင်ႈၶူဝ်းၸႂ်ႉသွႆ ဢၼ်ယိုတ်း သိမ်းဝႆႉတင်းသဵင်ႈ၊ ဢိင်ၼိူဝ်လွင်ႈၼႆႉ တိုၵ်ႉၶပ်းၶိုင် တႃႇတေသူင်ႇပၼ် ၶိုၼ်းၼႆ ၸဝ်ႈသိုၵ်း ၼၢႆႇမွင်ႇသေႃႇ (နိုင်မောင်ဇော်) ၽူႈၶၢၼ်ပၢၵ်ႇ တပ်ႉပႂ်ႉလႅၼ်လိၼ်ယၢင်းၽိူၵ်ႇ BGF တွပ်ႇဝႆႉတီႈသိုဝ်ႇ The Irrawaddy ၼင်ႇၼႆ။
ဝၢႆးလင် ၶဝ်ႈၵူတ်ႇထတ်းတီႉၺွပ်း ၵူၼ်းႁဵတ်းၵၢၼ်ၵျႃးၽႅၼ်ႉ တီႈလႅၼ်လိၼ်ထႆး – မၢၼ်ႈ၊ တႄႇဝၼ်းတီႈ 14 လိူၼ်ၾႅပ်ႊပိဝ်ႊရီႊၼၼ်ႉမႃး တေႃႇထိုင် ဝၼ်းတီႈ 12 လိူၼ်မၢတ်ႊၶျ် ၶၢဝ်းတၢင်းၸမ်လိူၼ်ၼႆႉ လႆႈသူင်ႇၵူၼ်းၼွၵ်ႈမိူင်း ပွၵ်ႈၶိုၼ်းၸမ် 3,000 ၵေႃႉ၊ ပဵၼ်ၵူၼ်းမိူင်းၶႄႇ၊ ဢိၼ်ႊတီႊယိူဝ်ႊ၊ ဝႅတ်ႉၼၢမ်း၊ ယူႊၵၼ်ႊတႃႊ၊ ပႃႊၵိတ်ႊသတၢၼ်ႊ၊ ဢိၼ်ႊတူဝ်ႊၼီႊသျႃႊ ဢိၵ်ႇပႃးထႅင်ႈလၢႆလၢႆမိူင်း ႁူမ်ႈသဵၼ်ႈ 30 မိူင်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ