သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း ၶိူင်ႈၵွင်ႈလူင်လႄႈ ၻရူၼ်ႊ ပွႆႇမၢၵ်ႇတိူဝ်ႉၺႃး ၵူၼ်းမိူင်းတႆး ပွတ်းႁွင်ႇ 3 ၸႄႈဝဵင်းလူႉတၢႆ 17 ၵေႃႉ မၢတ်ႇၸဵပ်း 41 ၵေႃႉ ၼႂ်းၶၢဝ်းတၢင်းလိူၼ်လဵဝ် ၵူၺ်း – ယူႇတီႈ SHRF ပိုၼ်ၽၢဝ်ႇဢွၵ်ႇဝႆႉ ၼႂ်းဝၼ်းတီႈ 10/03/2025 ၼႆႉၼင်ႇၼႆ။  

တႄႇဢဝ် ဝၼ်းတီႈ 06/02/2025 ထိုင် 07/03/2025 ၼႆႉ ယူႇတီႈ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း၊ ၵွင်ႈလူင်လႄႈ ၻရူၼ်ႊ ပွႆႇမၢၵ်ႇတိူဝ်ႉၺႃးၵူၼ်းမိူင်းတၢႆ 17 ၵေႃႉ၊ မၢတ်ႇၸဵပ်း 41 ၵေႃႉ ႁိူၼ်းယေး/ တိုၵ်း 85 လင် ပႃးၸဵမ်ဝတ်ႉ/ ၵျွင်း 2 လင်၊ ႁူင်းယႃ 1 လင်လႄႈ ႁူင်းႁဵၼ်း 1 လင် လူႉၵွႆ ၼႂ်းပိုၼ်ႉတီႈ ၸႄႈဝဵင်းၼွင်ၶဵဝ်၊ မိူင်းမိတ်ႈလႄႈ မိူင်းၵုတ်ႈ ၸိုင်ႈတႆးပွတ်း ႁွင်ႇ ၸွမ်းၼႃႈတီႈ တပ်ႉသိုၵ်းတဢၢင်း TNLA ၵုမ်းၵမ်ဝႆႉ ဝႃႈၼႆ။

ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းပွတ်းႁွင်ႇၼႆႉ မၼ်းၵဵဝ်ႇၸွမ်း ၼမ်ႉတွၼ်းၽွၼ်းလီၽွၼ်းႁၢႆႉ မိူင်းႁိမ်းႁွမ်း မိူၼ်မိူင်းၶႄႇ​​ယဝ်ႉ။ ၵွပ်ႈဝႃႈ တင်ႈတႄႇပဵၼ်ပၢင်တိုၵ်း သိုၵ်းသိူဝ်မႃး ​​တေၵႆႉလႆႈႁၼ် မိူင်းၶႄႇ ႁႃတၢင်းၶဝ်ႈၵႄႈၵၢင် ႁႃပၢင်ဢုပ်ႇဢူဝ်းၵိုတ်းယိုဝ်းပၼ်လႄႈ မိူင်းၶႄႇ ၵႆႉလၢတ်ႈဝႃႈ ယႃႇႁႂ်ႈတုမ်ႉတိူဝ်ႉၵၢၼ်လူင်းတိုၼ်းမၼ်းၼႂ်းမိူင်းတႆး မိူင်းမၢၼ်ႈၼႆမႃးတႃႇ​​သေႇ ၶႄႇမီး​​ဢေႃးၸႃႇၼိူဝ် တင်းသွင်ၾၢႆႇ တင်းသိုၵ်းမၢၼ်ႈလႄႈ သိုၵ်းၸၢဝ်းၶိူဝ်းလုၵ်ႉၽိုၼ်ႉယဝ်ႉ”- ဝႃႈၼႆ။

သိုပ်ႇလၢတ်ႈဝႃႈ – “ၼင်ႇႁိုဝ် ပၢင်တိုၵ်း​​တေၵိုတ်းသိုၵ်း ​​တေယဵၼ်ၼၼ်ႉ​​ၵေႃႈ ၶႂ်ႈႁႂ်ႈမိူင်းၶႄႇ ဢဝ်ၵၢင်ၸႂ် ၽိူၵ်ႇၸိုၼ်ႈ ၽႃႇၵၢင်ဝၢင်းၶိုင်ႈ ဢမ်ႇသိုပ်ႇႁႂ်ႈဝၢၼ်ႈမိူင်းႁဝ်း လူႉလႅဝ် ယွၼ်ႉပၢင်တိုၵ်း​​သေ ႁႃတၢင်းၸွႆႈၵႄႈ ၶႆပၼ် ဢၼ်ဢမ်ႇဢဝ်ၼမ်ႉတွၼ်းၽွၼ်းလီ ပုၼ်ႈတူဝ်ၵဝ်ႇပူၼ်ႉလိူဝ်လႄႈ ၸွႆႈႁႃတၢင်းငမ်းယဵၼ်ပၼ် ၼၼ်ႉယဝ်ႉ”- ဝႃႈၼႆ။

ၼႂ်းၽိုၼ်တမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇဝႆႉတႄႉ – လွင်ႈသိုၵ်းမၢၼ်ႈ ဢဝ်ၶိူင်ႈမိၼ်တိုၵ်းပွႆႇမၢၵ်ႇၼၼ်ႉ ဢၼ်ႁၢဝ်ႈႁႅင်းသုတ်းပဵၼ်ၼႂ်းၵၢင်လိူၼ်ၾႅပ်ႊပိဝ်ႊရီႊ ႁိမ်းတွင်းၶမ်း ဢၼ် ယူႇတၢင်းၸၢၼ်းဝဵင်းၼွင်ၶဵဝ် တီႈဢၼ်သိုၵ်းမၢၼ်ႈလေႃႇတိုၵ်း ပိူဝ်ႈတႃႇၶဝ်ႈယိုတ်းဢဝ်ၶိုၼ်းတပ်ႉၵဝ်ႇ ၸိူဝ်းၶဝ်သုမ်းသေလႆႈထွႆ၊ လွင်ႈၼႆႉ ပဵၼ်ၼႂ်းၶၢဝ်းတၢင်းဢၼ်ၶႄႇ ယူႇၵႄႈၵၢင်ၸတ်းပၢင်ၵုမ်တီႈ ၶုၺ်ႊမိင်ႊ မိူင်းၶႄႇ တႃႇႁႃတၢင်းၵိုတ်းသိုၵ်း ၼႂ်းၵႄႈသိုၵ်းမၢၼ်ႈလႄႈ သိုၵ်းပလွင်ႈ။

မိူဝ်ႈဝၼ်းတီႈ 19/02/2025 ဝၢႆးပၢင်ၵုမ်ႁႃလွင်ႈၵိုတ်းတိုၵ်း ဢၼ်ဢမ်ႇလႆႈၶေႃႈတွပ်ႇသင်ယဝ်ႉ ၵႂႃႇလၢႆဝၼ်း ၵူၺ်းသိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇၼႂ်းဝဵင်းၼွင်ၶဵဝ် ပႃးတင်းႁူင်းယႃ ႁဵတ်းႁႂ်ႈၵူၼ်းမိူင်းလူႉတၢႆ 3 ၵေႃႉ မၢတ်ႇၸဵပ်း 4 ၵေႃႉ။

လိူဝ်ၼၼ်ႉ လွင်ႈသိုၵ်းမၢၼ်ႈ သိုပ်ႇဢဝ်ၶိူင်ႈမိၼ်လႄႈ ၵွင်ႈလူင်ယိုဝ်းၼႂ်းၸႄႈဝဵင်းၼွင်ၶဵဝ်ၼၼ်ႉ ပဵၼ်ၸွမ်းႁိမ်းႁွမ်းသၢႆသဵၼ်ႈတၢင်းတေႃႈၵႅတ်ႊလႄႈ ၼမ်ႉမၼ်းၶႄႇ။

ဝၼ်းတီႈ 20/02/2025 သိုၵ်းမၢၼ်ႈ ဢဝ်ၻရူၼ်ႊ ပွႆႇမၢၵ်ႇတီႈဝၢၼ်ႈဢုမ်ႇမႆႉတီး (ဢုမ်းမတီး) ဢၼ်ႁၢင်ႇၵႆ တေႃႈၵႅတ်ႊ မွၵ်ႈ 1 ၵီႊလူဝ်ႊမႄႊတိူဝ်ႊသေ တိူဝ်ႉၺႃးဝတ်ႉ/ ၵျွင်း ဢုမ်ႇမႆႉတီး လူႉၵွႆ။ ဝၼ်းၼၼ်ႉၵူၺ်း ၼင်ႇၵဝ်ႇ သိုၵ်းမၢၼ်ႈ ဢဝ်ၵွင်ႈလူင် ယိုဝ်းၶဝ်ႈဝၢၼ်ႈသၢမ်သိူဝ်လႄႈ မၢၼ်ႈၽုၺ်း ဢၼ်ယူႇၸမ် တေႃႈၵႅတ်ႊသေ တိူဝ်ႉၺႃးႁိူၼ်းၵူၼ်းဝၢၼ်ႈ လူႉၵွႆ 3 လင်။

ဝၼ်းတီႈ 24/02/2025 ဝၢႆးဝၼ်းၼၼ်ႉ သိုၵ်းမၢၼ်ႈ ဢဝ်ၶိူင်ႈမိၼ်ပွႆႇမၢၵ်ႇ 2 လုၵ်ႈ တီႈႁၢၼ်ႉၶၢႆၶဝ်ႈၽၵ်း ၼႂ်းဝၢၼ်ႈဢုမ်ႇမႆႉတီးသေ တိူဝ်ႉၺႃးႁၢၼ်ႉၶၢႆၶဝ်ႈၽၵ်းလႄႈ ႁိူၼ်းၵူၼ်းဝၢၼ်ႈ 5 လင် လူႉၵွႆ။ တင်ႈတႄႇ ဝၼ်းတီႈ 05-07/03/2025 ၼၼ်ႉ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်းၻရူၼ်ႊ ပွႆႇမၢၵ်ႇၼိူဝ်ဝၢၼ်ႈဢုမ်ႇမႆႉတီးသေ ႁဵတ်းႁႂ်ႈႁိူၼ်းၵူၼ်းဝၢၼ်ႈ 10 လင် ၺႃးၾႆးမႆႈ။

ၽွင်းသိုၵ်းမၢၼ်ႈ ဢဝ်ၶိူင်ႈမိၼ်တိုၵ်းပွႆႇမၢၵ်ႇ ၵမ်ႈၼမ်ၼႂ်းၸႄႈဝဵင်းၼွင်ၶဵဝ်ယူႇၼၼ်ႉ ၶိူင်ႈမိၼ်သိုၵ်း မၢၼ်ႈ ယိူင်းၸူးဢွင်ႈထၢင်ၶုတ်းမိူင်ႁႄႈသေ ပွႆႇမၢၵ်ႇလူင်းသွင်လုၵ်ႈၼႂ်းပိုၼ်ႉတီႈ မိူင်းမိတ်ႈလႄႈ မိူင်းၵုတ်ႈ။

မိူဝ်ႈဝၼ်းတီႈ 10/02/2025 ၶၢဝ်းယၢမ်းၵၢင်ၼႂ်ၸဝ်ႉ 1 မူင်း သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း Jet Fighter Y – 12 သေပွႆႇမၢၵ်ႇ 20 လုၵ်ႈပၢႆတီႈ ထၢင်ၶုတ်းသႅင်ထၢင်ၼိုင်ႈ ဢၼ်မီးတၢင်းၸဵင်ႇႁွင်ႇဝၼ်းတူၵ်း ဝဵင်းမိူင်း ၵုတ်ႈ ယၢၼ်ၵႆၵၼ် 3 ၵီႊလူဝ်ႊမႄႊတိူဝ်ႊ တိူဝ်ႉၺႃးၵူၼ်းမိူင်းတၢႆ 5 ၵေႃႉလႄႈ မၢတ်ႇၸဵပ်း 20 ၵေႃႉ။

ဝၼ်းတီႈ 20/02/2025 ၶၢဝ်းယၢမ်းၵၢင်ၶမ်ႈ 8 မူင်း ၶိူင်ႈမိၼ်တိုၵ်း Jet Fighter သိုၵ်းမၢၼ်ႈ လမ်းၼိုင်ႈ ပွႆႇ မၢၵ်ႇၼမ်ႉၼၵ်း 500 ပွင်ႊ တီႈဢွင်ႈၶုတ်းၶမ်း ဝၢၼ်ႈဝၢႆးပွင်း ႁိမ်းဝဵင်းမိူင်းမိတ်ႈသေ တိူဝ်ႉၺႃးၵူၼ်းဝၢၼ်ႈ တၢႆ 3 ၵေႃႉ၊ မၢတ်ႇၸဵပ်း 7 ၵေႃႉလႄႈ ႁိူၼ်းယေးလူႉၵွႆ 10 လင် ပႃးၸဵမ်ႁိူၼ်းႁဵၼ်း 1 လင် ၼႆယဝ်ႉ။