ၵႆႉလႆႈငိၼ်းဝႃႈ “ပေႃးမီးၼီႈ ၸင်ႇမီးၼႃႈမီးတႃ” – “ပေႃးမီးၼႃႈမီးတႃ ၸင်ႇမီးၼီႈ” ၼႆသေ ပီႈၼွင်ႉတႆး ၵမ်ႈၼမ် ၵႆႉဢဝ်ၵႂၢမ်းၶေႃႈၼႆႉ ပၼ်ႁႅင်းၸႂ်ၵၼ်မႃးတႃႇသေႇယဝ်ႉ။ ပေႃးမႃးပိုတ်ႇ တီႈပွင်ႇၶေႃႈၵႂၢမ်းဢၼ်ဝႃႈ “ၼီႈ” ၼႆၼၼ်ႉ ၼီႈၼႆႉ ပွင်ႇဝႃႈ ႁိမ်မႃးၵူႈမႃးသေၵေႃႉၵေႃႉ မိူၼ်ၼင်ႇ ၶူဝ်းၶွင်သေဢၼ်ဢၼ် ငိုၼ်းတွင်း ၸိူဝ်းၼႆႉ ႁိမ်မႃးယဝ်ႉ တၵ်းတေလႆႈသၢႆႈတႅၼ်းၶိုၼ်း။ ပိူင်တႅၵ်ႈမၼ်း ႁိမ်မႃးငိုၼ်း 1,000 ပျႃးၼႆ တေလႆႈတႅၼ်းၶိုၼ်း 1,000 ပျႃး ၼၼ်ႉယဝ်ႉ။

မၢင်ၸိူဝ်းပၢႆမီးပႃး (ၶီႈငိုၼ်း) မိူၼ်ၼင်ႇ ႁိမ်ငိုၼ်းမႃး 1,000 ပျႃး တေႃႇလိူၼ် ပေႃးသၢႆႈတႅၼ်းၶိုၼ်း တေလႆႈပၼ် 10,50 ပျႃး ဢမ်ႇၼၼ် 11,00 ပျႃး လိူင်ႈၼႆႉ ယူႇတီႈ တင်းသွင်ၾၢႆႇတူၵ်းလူင်းၵၼ်ဝႃႈ တေပၼ်ၵၼ် ၸိူင်ႉႁိုဝ်ၼႆၼၼ်ႉၵူၺ်း။

ယၢမ်းလဵဝ်သမ်ႉ ပဵၼ်ၶၢဝ်းလိူၼ်သၢမ် – လိူၼ်သီႇ ၽွင်းၶၢဝ်းဢဝ်ၶဝ်ႈဢဝ်ၼမ်ႉယဝ်ႉ ၽွင်းၵၢၼ်ဢေႇ သဵၼ်ႈတႃႈသၢႆတၢင်းၵႂႃႇမႃးၸူးၵၼ်ငၢႆႈ ပဵၼ်ၶၢဝ်းႁႅင်ႈႁွင်လႄႈ ၵူၼ်းမိူင်းတႆး ၸိူဝ်းၼပ်ႉယမ် ၸၢဝ်းပုတ်ႉထၽႃသႃ ဢွၼ်ၵၼ်ဢဝ်လုၵ်ႈလၢၼ် ၽႂ်မၼ်းႁဵတ်းပွႆးၶၢမ်ႇသၢင်ႇၶၢမ်ႇၸၢင်းၵၼ်မႃး။ ၵမ်ႈၼမ် ယုမ်ႇယမ်ဝႃႈ ပေႃးၵိူတ်ႇပဵၼ်ၸၢဝ်းပုတ်ႉထယဝ်ႉ တိုၼ်းလူဝ်ႇဢဝ်လုၵ်ႈၸၢႆးလၢၼ်ၸၢႆး ၶၢမ်ႇသၢင်ႇၶၢမ်ႇၸၢင်း ဢဝ် လွင်ႈၼႆႉသေ ၾင်ၸႂ်ၵၼ်မႃး ပၢၼ်သိုပ်ႇပၢၼ် ႁၢၼ်ႉတေႃႇထိုင်ယၢမ်းလဵဝ်ၼႆႉ။

ပၢၼ်ယၢမ်းလဵဝ်ၼႆႉသမ်ႉ ဢၼ်ႁဵတ်းပွႆးႁဵတ်းလၢမ်းၼႆႉ ႁဝ်းၶႃႈသမ်ႉၶေႉၵၼ်သေႁဵတ်း တႃႇလႆႈၼႃႈလႆႈတႃ မၢင်ၸိူဝ်း ဢမ်ႇမီးငိုၼ်းႁဵတ်း ၵႃႈလႆႈႁႃၵူႈယိမ်ပီႈႁိမ်ၼွင်ႉ ဢမ်ႇမီးၵေႃႈႁႃ ဢမ်ႇမႃးၵေႃႈလႅၼ်ႈ ၼႅတ်ႈၶိုင်ၼႅတ်ႈၸတ်း တႃႇတေပဵၼ်ၼႃႈပဵၼ်တႃမႃး ၼႆၸိူဝ်းၼႆႉၵေႃႈ မီးတင်းၼမ်ယဝ်ႉ။ မၢင်ၸိူဝ်းသမ်ႉဝႃႈ ၼီႈၼႆႉဝႆႉသေၵွၼ်ႇ ပေႃးဝၢႆးပွႆးယဝ်ႉ ၸင်ႇဝႃႈ ၵၼ် ၸင်ႇႁႃသေ တႅၼ်းၵႂႃႇၵမ်းလွႆးလွႆး ၸိူဝ်းၼႆႉၵေႃႈမီး။

ၵူၺ်းၵႃႈ ပွႆးဝၢႆးယဝ်ႉၵေႃႈ ၸႂ်ၼႆႉတိုၵ်ႉသုၵ်ႉၸွမ်းလွင်ႈၼီႈ ဢၼ်ႁိမ်မႃးႁဵတ်းပွႆးၶၢမ်ႇသၢင်ႇလွင်းၼႆႉ ယင်းပႆႇႁၢႆ တိုၵ်ႉလႆႈႁႃသေ တႅၼ်ႈၶိုၼ်းတီႈလႆႈႁိမ်မႃးၸႂ်ႉၸၢႆႇၼၼ်ႉယဝ်ႉ။ မၢင်ၸိူဝ်း ပဵၼ်ၼီႈၼပ်ႉႁူဝ်သိပ်းသႅၼ်၊ မၢင်ၸိူဝ်းပဵၼ်ၼီႈၼပ်ႉႁူဝ်ပၢၵ်ႇသႅၼ်ပျႃး။ လွင်ႈၸိူဝ်းၼႆႉ မိူဝ်ႈၽွင်းပွႆးတႄႉ လႆႈလဵင်ႉလႆႈလူႉပျေႃႇၸႂ် ယူႇသေတႃႉၵေႃႈ ဝၢႆးပွႆးမႃး ၸွင်ႇမီးတင်းသိူဝ်းႁိုဝ် ၼႆႉၵေႃႈ ပဵၼ်ဢၼ်လီဝူၼ်ႉယူႇ။

မႁႃႇမုင်ႉ (မိူင်းၸႄႈ) လၢတ်ႈဝႃႈဝႆႉ – ဢၼ်ႁဵတ်းသေ ၸႂ်ပျေႃႇၸွမ်း ဢမ်ႇထုၵ်ႇၼီႈထုၵ်ႇၶွတ်ႇသင် ပဵၼ်ပွႆးသၢင်ႇလွင်းဢၼ်လီ။ ပေႃးႁဵတ်းယဝ်ႉ ဝၢႆးပွႆးမႃး ပေႃႈမႄႈထုၵ်ႇၼီႈထုၵ်ႇၶွတ်ႇပိူၼ်ႈ ၸႂ်ဢမ်ႇလီၸွမ်း ၸိူဝ်း ၼၼ်ႉ ပဵၼ်ပွႆးသၢင်ႇလွင်း ဢမ်ႇမီးၽွၼ်းလီသင် လူႇတၢၼ်းယဝ်ႉၵေႃႈ ဢမ်ႇမီးၽွၼ်းလီသင် – ဝႃႈၼႆ။

သိုပ်ႇလၢတ်ႈဝႃႈ – ယွၼ်ႉၵူဝ်ပိူၼ်ႈသေႉလႄႈ ႁဵတ်းၵူၺ်း ဢမ်ႇၸႂ်ႈဝႃႈ ႁႂ်ႈပေႃးလႆႈၵုသူလ်သေလႄႈႁဵတ်း။ ၵူဝ်ပိူၼ်ႈသေႉဝႃႈ လုၵ်ႈႁဝ်း ဢမ်ႇလႆႈဢဝ်ႁဵတ်းသၢင်ႇၼႆသေ လႆႈၵႂႃႇၵူႈႁိမ်ပိူၼ်ႈမႃးႁဵတ်းပွႆးယႂ်ႇလၢမ်းလူင်၊ ပဵၼ်ၼီႈပိူၼ်ႈၸိူင်ႉၼႆ ပေႃးဝၢႆးသၢင်ႇလွင်းယဝ်ႉ ႁႃသၢႆႈၼီႈပိူၼ်ႈၼၼ်ႉ မၼ်းပဵၼ်လွင်ႈဢမ်ႇလီ ပွႆးသၢင်ႇလွင်းပၢၼ်မိူဝ်ႈလဵဝ်ၼႆႉ လူဝ်ႇလႆႈႁူႉၵၼ်ဝႆႉ- ဝႃႈၼႆ။

ၵဵဝ်ႇလူၺ်ႈလွင်ႈ ၼမ်ႉၸႂ်ၸေႇတၼႃႇၼႆႉ ၽႂ်ၵေႃႈ ႁၢမ်ႈၵၼ်ဢမ်ႇလႆႈ မီးငိုၼ်းလႄႈ ၸင်ႇလူႇတၢၼ်း ႁဵတ်းပွႆးလူး ၸွင်ႇႁဝ်းသမ်ႉ ၵႂႃႇၵူႈၵႂႃႇႁိမ်သူ မႃးႁဵတ်းပၼ်ႁႃႁဝ်း ႁဝ်းတေၵႄႇလိတ်ႈဢိူဝ်ႈ ၼႆၸိူဝ်းၼႆႉၵေႃႈ တေမီးယူႇ ၸိူဝ်းပဵၼ်ပေႃႈမႄႈသၢင်ႇလွင်းၶဝ်တႄႉ ႁူႉၵႃႈတေတွပ်ႇထဵင်ၶိုၼ်း ၸိူင်ႉၼႆယူႇ။

ၵူၺ်းၵႃႈ ပွႆးသၢင်ႇလွင်းၼႆႉ ဢမ်ႇႁဵတ်းသေလႄႈ တေဢမ်ႇလႆႈၵုသူလ်ႁိုဝ် ႁဵတ်းသေလႄႈ တေလႆႈၵုသူလ် ၶိုၼ်ႈၼိပ်ႉပၢၼ်ႇႁိုဝ် ဢမ်ႇၼၼ် ႁဵတ်းဢဝ်တၢင်းပျေႃႇတၢင်းမူၼ်း မၼ်း ၵူၺ်းႁိုဝ် လွင်ႈၼႆႉၵေႃႈ ၵူႈၵေႃႉ ထုၵ်ႇလီထတ်းသၢင်ဝူၼ်ႉတူၺ်းယူႇ။

“တႃႇတေပဵၼ်သၢင်ႇပဵၼ်လွင်းၼႆၼၼ်ႉ တိုၼ်းတေလႆႈႁဵတ်းၵူႈၵေႃႉဢိူဝ်ႈၼႆ ၽြႃးပဵၼ်ၸဝ်ႈ ဢမ်ႇလႆႈလၢတ်ႈဝႆႉ၊ ဢမ်ႇလႆႈႁေႃးဝႆႉ ၼႂ်းဝိၼီးၵေႃႈ ဢမ်ႇလႆႈလၢတ်ႈဝႆႉ။ ဝိၼီးဢၼ်ဝႃႈၼၼ်ႉ မၼ်းပဵၼ်ပိူင်ငဝ်ႈပိုင်းမိူင်း ၶွင်သင်ၶၸဝ်ႈ (လၵ်းပိူင်သင်ၶၸဝ်ႈ တေလႆႈႁဵတ်းၸွမ်း ၼႆၵေႃႈၸႂ်ႈ)။ ၼႂ်းၼၼ်ႉၵေႃႈ ဢမ်ႇလၢတ်ႈဝႆႉ တေလႆႈႁဵတ်းဢိူဝ်ႈ ၼႆၸိူဝ်းၼႆႉ။ ပေႃး ဢမ်ႇႁဵတ်းဢမ်ႇလႆႈ ၼႆၸိူဝ်းၼႆႉ ဢမ်ႇမီး။ ပဵၼ်ၵူၼ်း တိုၼ်းတေလႆႈႁဵတ်းဢိူဝ်ႈၼႆၵေႃႈ ဢမ်ႇလၢတ်ႈဝႆႉ”- မႁႃႇမုင်ႉ (မိူင်းၸႄႈ) လၢတ်ႈၼႄၼင်ႇၼႆ။

ထႅင်ႈလွင်ႈၼိုင်ႈၵေႃႈ ထိုင်ဢႃယု ၸူဝ်ႈပၢၼ် လုၵ်ႈဢွၼ်ႇလူဝ်ႇၶၢမ်ႇသၢင်ႇၶၢမ်ႇၸၢင်းယဝ်ႉ လူဝ်ႇႁဵတ်းပၼ်ဢိူဝ်ႈ ပေႃႈမႄႈတႄႉ ၼႅတ်ႈႁႃ ဢမ်ႇမီးၵေႃႈႁႃ ဢမ်ႇမႃးၵေႃႈလႅၼ်ႈ ၼႅတ်ႈႁိမ်ပီႈၼွင်ႉသေ ၼႅတ်ႈၸတ်း ႁဵတ်းပွႆးလၢမ်းၵႂႃႇယဝ်ႉ။ ၵူၺ်းၵႃႈ လွင်ႈၼႆႉ ယူႇတီႈတူဝ်ႁဝ်းသေ လူဝ်ႇထတ်းသၢင်လိုၵ်ႉလိုၵ်ႉ ယႃႇယုမ်ႇၵူၼ်းတင်းၼမ်ဝႃႈသေ ၼႅတ်ႈၶိုင်သၢင်ႈႁဵတ်းၵႂႃႇၸွမ်း ႁႂ်ႈႁဝ်းၽွမ်ႉၸွမ်းၼင်ႇႁဝ်းပွင်ပဵၼ်လႆႈၼၼ်ႉၵူၺ်း။

“တီႈတႄႉမၼ်းၼႆႉ ဢမ်ႇၶၢမ်ႇၵေႃႈ ဢမ်ႇပဵၼ်သင် ၸဝ်ႈသၢင်ႇၸဝ်ႈၸၢင်းၼၼ်ႉ။ မိူဝ်ႈလႂ်ႁဵတ်းၵေႃႈလႆႈ ၶၢမ်ႇသၢင်ႇၶၢမ်ႇၸၢင်းၼႆႉ ႁဵတ်းမိူဝ်ႈဢႃယု 15 ပီ ၵေႃႈလႆႈ၊ ဢႃယု 20 ပီ ၵေႃႈလႆႈ၊ ဢႃယု 50 ပီ 70 ပီ ၸမ် တေၶဝ်ႈပႃႇႁဵဝ်ႈၵေႃႈလႆႈ ဢႃယု 80 ပီ 90 ပီ ၵေႃႈလႆႈ။ ဢမ်ႇၸႂ်ႈဝႃႈ လူဝ်ႇႁဵတ်းမိူဝ်ႈဢႃယုလဵၵ်ႉၵူၺ်း ၵိူတ်ႇမႃးယဝ်ႉ ပႆႇႁဵတ်းသေပွၵ်ႈ ဢႃယု 80 ၵႂႃႇႁဵတ်းၼႆၵေႃႈလႆႈ ၶၢမ်ႇသၢင်ႇၶၢမ်ႇၸၢင်းၼႆႉ မၼ်းပဵၼ်ၾိင်ႈၽႂ် ၾိင်ႈမၼ်းၵူၺ်း။ မၼ်းဢမ်ႇၵဵဝ်ႇၵၼ်တင်းၾိင်ႈသႃသၼႃသင်”- မႁႃမုင်ႉ (မိူင်းၸႄႈ) လၢတ်ႈ။

ၵမ်းလိုၼ်းသုတ်း ဢၼ်လူဝ်ႇတွင်းဝႆႉတႄႉ လွင်ႈၶၢမ်ႇသၢင်ႇၶၢမ်ႇၸၢင်းၼၼ်ႉ မီး 2 ယိူင်ႈၵူၺ်း။ 1) ၶၢမ်ႇမဵတ်ႉ သၢင်ႇလွင်းၸၢင်းလွင်း။ 2) ၶၢမ်ႇသၢင်ႇလွင်း ဢုၼ်ႇငၢၼ်း။  

ၶၢမ်ႇမဵတ်ႉ ဢၼ်ဝႃႈၼၼ်ႉ ၵႂႃႇႁဵတ်းႁင်းၵူၺ်း ဢမ်ႇၼၼ် ပေႃႈမႄႈသူင်ႇၵႂႃႇ ဢမ်ႇလၢတ်ႈၽႂ်။ ၶၢမ်ႇသၢင်ႇလွင်း ဢုၼ်ႇငၢၼ်း ဢၼ်ဝႃႈၼၼ်ႉသမ်ႉ မီးပေႃႈမႄႈ ဝႃႈလႆႈပွင်ပဵၼ်လႆႈ ၶႂ်ႈလဵင်ႉပီႈလဵင်ႉၼွင်ႉ ၶႂ်ႈလဵင်ႉဢူၺ်းၵေႃႉဢူၺ်းသေႈသေ ႁွင်ႉလဵင်ႉ။ ယဝ်ႉၵေႃႈ ဢွၼ်ၵၼ်ၵႂႃႇတီႈဝတ်ႉသေ ၶၢမ်ႇပၼ် သွင်မဵဝ်းၼႆႉၵူၺ်း ဢၼ်ၵဵဝ်ႇၵၼ်တင်း သၢင်ႇလွင်းၸၢင်းလွင်း ၼႆႉ။

ပွႆးသၢင်ႇလွင်းၼႆႉ ဢမ်ႇသဵင်ႈသင် ဢမ်ႇပဵၼ်ၼီႈပဵၼ်ၶွတ်ႇၼၼ်ႉယဝ်ႉ ပေႃႈမႄႈလႆႈၵုသူလ်ၸႂ်လီ။ ၵွပ်ႈပိူဝ်ႈၸႂ်လီလႄႈ ၸင်ႇတေလႆႈၵုသူလ် ပေႃးၸႂ်ႁုၵ်ႉႁၢႆႉ ၸႂ်ဢမ်ႇလီၸွမ်း၊ ဝူၼ်ႉလွင်ႈၼီႈလွင်ႈၶွတ်ႇ ၼႆၼၼ်ႉ လူႇတၢၼ်းၵေႃႈ ဢမ်ႇလႆႈၵုသူလ်သင် ဢၼ်ႁဝ်းလူႇၵႂႃႇယဝ်ႉၼၼ်ႉ သဵင်ႈငိုၼ်းလၢႆလၢႆၵူၺ်း ဢမ်ႇလႆႈၽွၼ်းလီသင် ပၼ်တင်းတုၵ်ႉၶၸႂ် ပဵၼ်တၢင်း ၽိတ်းပွႆးသၢင်ႇလွင်း ႁဵတ်းႁႂ်ႈၵူၼ်းလူႇမၼ်း ဢမ်ႇလႆႈၵုသူလ်ၵူၺ်းဢမ်ႇၵႃး ႁဵတ်းႁႂ်ႈပေႃႈမႄႈဢွၵ်ႇမၼ်း ၸႂ်တုၵ်ႉၶၸွမ်း ပဵၼ်ၼီႈပဵၼ် ၶွတ်ႇၸွမ်းၼၼ်ႉ ပဵၼ်လွင်ႈဢမ်ႇလီယဝ်ႉ – မ ႁႃႇမုင်ႉ (မိူင်းၸႄႈ) လၢတ်ႈၼင်ႇၼႆ။

ၵွပ်ႈၼႆလႄႈ ဢိင်ၼိူဝ် လွင်ႈယုမ်ႇယမ်ၼႆႉသေ ၸၢဝ်းတႆးႁဝ်း ၸိူဝ်းလုၵ်ႉတီႈမႆႈ ပၢႆႈႁွတ်ႈထိုင်တီႈၵတ်း မိူၼ်ၼင်ႇ မိူင်းထႆး ၸိူဝ်းၼၼ်ႉၵေႃႈ ပေႃးထိုင်ၶၢဝ်းၼႆႉ ဢွၼ်ၵၼ်ႁဵတ်းပွႆးၶၢမ်ႇသၢင်ႇၶၢမ်ႇၸၢင်းၵၼ် ပေႃးၵိုၼ်းၶွၼ်ႈလူင်ဝႆႉ တီႈၼိုင်ႈယဝ်ႉတီႈၼိုင်ႈ ၼင်ႇႁိုဝ် ၾိင်ႈထုင်းတႆး ပေႃးတေဢမ်ႇၸူမ်ႁၢႆၼၼ်ႉ ဢွၼ်ၵၼ်ႁၵ်ႉသႃ (ထိင်းသိမ်း) ဝႆႉၼႆ လွင်ႈၼႆႉၵေႃႈ ပဵၼ်ဢၼ်လီယုၵ်ႉယွင်ႈၼမ်ႉၸႂ်ယူႇတႄႉတႄႉ။

ၵူၺ်းၵႃႈ သင်ပဵၼ်လႆႈတႄႉ ပွႆးသၢင်ႇလွင်းၼႆႉ ဢမ်ႇႁဵတ်းဢမ်ႇၸႂ်ႈၼင်ႇၵဝ်ႇ ႁဵတ်းၸွမ်းၼင်ႇ ပွင်ပဵၼ်လႆႈ ထိုင်တီႈပဵၼ်ၼီႈပဵၼ်ၶွတ်ႇၸိူင်ႉၼၼ်တႄႉ ယႃႇႁႂ်ႈလႆႈပဵၼ်။ ပီၼႆႉ ငိုၼ်းတႃႇၸတ်းပွႆးသၢင်ႇလွင်း ပႆႇၽွမ်ႉ ဝႆႉတႃႇပီၼႃႈပီၼႂ်းၵေႃႈလႆႈ ငိုၼ်းၽွမ်ႉမိူဝ်ႈလႂ် ၸင်ႇႁဵတ်းၵေႃႈလႆႈ။ မၢင်ၸိူဝ်း တေဝႃႈတူဝ်မၼ်း ပေႃးၵေႃႉယႂ်ႇၼႃႇယဝ်ႉ ၸွင်ႇတေၶီႇၶေႃးလႆႈ ၼႆ ၸိူဝ်းၼႆႉ လွင်ႈၼႆႉ တေဢမ်ႇယၢပ်ႇၼင်ႇၵဝ်ႇ ၶီႇမႃႉလႆႈ၊ ၶီႇရူတ်ႉၶိူင်ႈ ၶီႇၵႃးလႆႈ ပဵၼ်ပၢၼ်ၶိုတ်ႈၵၢပ်ႈ ၶိုၼ်ႈယႂ်ႇယဝ်ႉ။ ဢမ်ႇၸႂ်ႈဝႃႈ လူဝ်ႇလႆႈၶီႇၶေႃး မဵဝ်းလဵဝ်ၵူၺ်း။

ထႅင်ႈလွင်ႈၼိုင်ႈၼႆႉ ယၢမ်းလဵဝ်သမ်ႉ ပဵၼ်ၶၢဝ်းႁဵတ်းဝတ်းႁဵတ်းဝႂ် တေႃႇဝတ်းတေႃႇဝႂ်ၵၼ်ယဝ်ႉလႄႈ ၼိုင်ႈၵေႃႉလႂ် သဵင်ႈငိုၼ်းဢမ်ႇယွမ်း 10,000 ဝၢတ်ႇ(ငိုၼ်းထႆး)။ လွင်ႈၼႆႉ ပဵၼ် ၵၢၼ်လမ်ႇလွင်ႈတီႈသုတ်း ၼႂ်း ၸူဝ်ႈပၢၼ်ႁႅင်းၵၢၼ်ယဝ်ႉ။ သင်ဝႃႈ ဝတ်းဝႂ်ဢမ်ႇမီး ဢမ်ႇတဵမ်ထူၼ်ႈ ၺႃးၸဝ်ႈၼႃႈတီႈၶဝ် တီႉၺွပ်းလႆႈၸိုင် ႁူႉၵႃႈတေၺႃးတၢမ်ႇပၵ်းပိူင်မၢႆမီႈဝၢၼ်ႈမိူင်းပိူၼ်ႈ ဢမ်ႇႁၢင်ႉ။ ပွႆးသၢင်ႇလွင်းၼႆႉ ဢမ်ႇႁဵတ်းၵေႃႈလႆႈ ဢမ်ႇမီးၽႂ်မႃးတီႉၺွပ်းႁဝ်း မီးငိုၼ်းမိူဝ်ႈလႂ် ႁဵတ်းမိူဝ်ႈၼၼ်ႉၵေႃႈလႆႈ ဝႃႈၼႆ။

ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ယၢၼ်မိူင်း MAP Foundation လၢတ်ႈၼႄဝႃႈ -“မိူဝ်ႈလဵဝ်ၼႆႉ ငဝ်းလၢႆး ၵၢၼ်ဝၢၼ်ႈၵၢၼ်မိူင်းၵေႃႈ ဢမ်ႇလီ။ မၢၼ်ႈၵေႃႈ ဢမ်ႇယွမ်းလူင်းလၢႆးမိုဝ်းပၼ်တႃႇႁႅင်းၵၢၼ် ႁဵတ်းဝတ်းႁဵတ်းဝႂ်ယဝ်ႉ ႁႅင်းၵၢၼ်ႁဝ်းသမ်ႉ ၵုမ်ႇမိုင်ႉႁဵတ်းပွႆးႁဵတ်းလၢမ်းယူႇၸိူင်ႉၼႆ။ ပေႃးပွင်ပဵၼ်လႆႈတႄႉ ႁဵတ်းတၢၼ်ႇတၢၼ်ႇမၼ်းၵေႃႈလႆႈ ယႃႇပေၶေႉၶဵင်ႇၵၼ် ႁဝ်းပဵၼ်လႆႈၵႃႈႁိုဝ် လူႇၵႃႈၼၼ်ႉၵေႃႈလႆႈ ၵူၼ်းလူႇဢၼ်ဝႃႈၼႆႉ ယုၵ်ႉမိုဝ်းဝႆႈသိပ်းၼိဝ်ႉၵေႃႈ လႆႈၵုသူလ်မၼ်းၵၼ်ယဝ်ႉ”- ဝႃႈၼႆ။

တွၼ်ႈတႃႇႁႅင်းၵၢၼ် ယၢမ်းလဵဝ်သမ်ႉ လွင်ႈဝတ်းဝႂ်ၵေႃႈ ယင်းပႆႇတဵမ်ထူၼ်ႈ လႄႈ ယင်းပႆႇပဵၼ်ပွႆးလၢမ်း ၸဝ်ႈၼႃႈတီႈထႆး ပေႃးလူင်းၵူတ်ႇထတ်းႁၢဝ်ႈႁႅင်းယဝ်ႉ ယွၼ်ႉမီးလွင်ႈတၢင်း ပိူင်ပဵၼ် ႁႅင်းၵၢၼ် ၵေႃႇၵၢၼ်ႁၢႆႉ ၶႃႈႁႅမ်ၵူၼ်းပိုၼ်ႉတီႈတၢႆ။ မိူၼ်ၼင်ႇၵႂၢမ်းထုင်းမီးဝႆႉဝႃႈ – ပႃၼဝ်ႈ တူဝ်ၼိုင်ႈ ၼဝ်ႈတင်းၵူၺ်လႄႈ ပေႃးပဵၼ်လႆႈ ပွႆးၼႆႉ ဢမ်ႇၵႂႃႇၵေႃႈ ဢမ်ႇပဵၼ်သင် ယွၼ်ႉဝတ်းဝႂ်ဢမ်ႇတဵမ်ထူၼ်ႈလႄႈ ပေႃးၺႃးမႃးဢမ်ႇၸႂ်ႈငၢႆႈ တေၺႃးသူင်ႇပွၵ်ႈၶိုၼ်းလႄႈ သင်ပိူၼ်ႈႁူႉဝႃႈ တီႈလႂ်မီးပွႆးလၢမ်းၼႆ ပလိၵ်ႈတေတင်ႈလၢၼ်ႇၵႂႃႇၵူႈၸွၵ်ႉၵူႈၸဵင်ႇယဝ်ႉ ႁႅင်းၵၢၼ်ၵူႈၵေႃႉ ထုၵ်ႇလီၾၢင်ႉသတိၵၼ် – ထွင်းၶမ်း သိုပ်ႇပၼ်ၾၢင်ႉၼင်ႇ ၼႆထႅင်ႈ။

ပီၼႆႉ ၼႂ်းၸႄႈတွၼ်ႈၵဵင်းမႂ်ႇ ၸိုင်ႈထႆး ပွႆးသၢင်ႇလွင်းမီး ဢမ်ႇယွမ်း 20 တီႈ မိူၼ်ၼင်ႇတီႈ – ဝတ်ႉဝၢင်းထၢၼ်း၊ ဝတ်ႉၵူႇတဝ်ႈ၊ ဝတ်ႉၵူႇမၼ်ႈမူင်းၶူၼ်းၶျႆး၊ ဝတ်ႉၼွင်ဢူႇပူဝ်းသူတ်ႇ၊ ဝတ်ႉသီဝူဝ်ငိုၼ်း၊ ဝတ်ႉမွၼ်ႉ၊ ဝတ်ႉ ၼွင်ပိုင်၊ ဝတ်ႉဢမ်းၽႃးဝၼ်း၊ ဝတ်ႉသၼ်ၵၢင်ႈပႃ၊ ဝတ်ႉတီႇယသထၢၼ်၊ ဝတ်ႉပၢၵ်ႇမိူင်၊ ဝတ်ႉဢႃးရၢမ်းပႃႇ ၵူၺ်ႈ၊ ဝတ်ႉသီလွမ်ႉ၊ ဝတ်ႉၶုၼ်ၶူင်း၊ ဝတ်ႉ ၸၼ်ထႃႉရင်းသီ ပုၼ်းထႃးရၢမ်း၊ တၢင်းဢိူင်ႇပဵင်းလူင် ၸႄႈဝဵင်းႁႅင်လႄႈ ၼႂ်းၸႄႈတွၼ်ႈလမ်းပုၼ်းထႅင်ႈ 3 ဢွင်ႈတီႈ။ လိူဝ်ၼၼ်ႉ ဢိၵ်ႇထႅင်ႈလၢႆလၢႆတီႈ ၸဵမ်ၸိူဝ်းၼႆႉ။