ဝၼ်းတီႈ 7/3/2025 ယၢမ်းၵၢင်ၼႂ် ပလိၵ်ႈ သိုၵ်းမၢၼ်ႈ တႄႇ ၵူတ်ထတ်း တီႉၺွပ်းရူတ်ႉၵႃး ဢမ်ႇမီး ဝတ်းဝႂ် တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။

ၼၢင်းယိင်းဢႃယု 23 ၵူၼ်းမိူင်းဝဵင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ-“ မိူဝ်ႈၼႆႉၶဝ်တႄႇၺွပ်း ၊ ၶႂ်ႈဝႃႈ ၵူႈတၢင်းယဝ်ႉ ၸဵမ်ရူတ်ႉၶိူင်ႈၸဵမ်ၵႃး  ၸိူဝ်းဢမ်ႇမီးဝႂ်ၶွၼ်ႇ ပႃးၵႂႃႇၼမ်ၼႃႇ ၊ ၶဝ်ႈၵူတ်ႇထတ်း ၵူၼ်းဢၼ်ဢမ်ႇပႃးမၢၵ်ႇႁူဝ်ရူတ်ႉ ၸိူဝ်းၼႆႉပႃး။    ၵိုင်ႉၵၢင်ႉၺွပ်းလႄႈ ပႃးၵႂႃႇၼမ် ၊ လႆႈႁူႉဝႃႈ ပၼ်ငိုၼ်းဢမ်ႇလႆႈယဝ်ႉ ၊ ၶဝ်ယိုတ်းဢဝ်တႄႉဝႃႇၵမ်းၼႆႉတႄႉ ” – ဝႃႈၼႆ ။

လွင်ႈဢၼ်တီႉၺွပ်း ရူတ်ႉၵႃး ၼႂ်းဝဵင်းၼႆႉ ပွၵ်ႈၼႆႉဢမ်ႇၵႂႃႇထုတ်ႇဢဝ်လႆႈၶိုၼ်းမိူၼ်ၵူႈပွၵ်ႈ  ၊ ပလိၵ်ႈၶဝ် တေဢဝ်ႁဵတ်းသင် ၊ သူင်ၵႂႃႇတီႈလႂ်ၼႆၼၼ်ႉတႄႉ ဢမ်ႇမီးၽႂ်ႁူႉ – ၵူၼ်းမိူင်းဝဵင်းတူၼ်ႈတီး လၢတ်ႈၼင်ႇၼႆ။   

 ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“  ဝူင်ႈၼႆႉၵူၺ်း ပျီႇတူႉၸိတ်ႉပဢူဝ်း ဢွၵ်ႇလိၵ်ႈ ပိုၼ်ၽၢဝ်ႇဝႃႈ တေတီႉၺွပ်းရူတ်ႉၵႃးၸိူဝ်းဢၼ်ဢမ်ႇမီးဝတ်းဝႂ်  ဢၼ်ယူႇတီႈၶဝ်ဢွၵ်ႇပၼ်ဝႆႉၸိူဝ်းၼၼ်ႉ ၊ လုၵ်ႉၼႂ်းဝဵင်းတူၼ်ႈတီးသေပေႃးပူၼ်ႉ ၵႂႃႇတင်းပွၵ်ႉၵၢၼ်ႇၵျီးၼၼ်ႉ တေႃႇပေႃးထိုင် ႁူဝ်ပူင်းၼႆႉ ပေႃးပဵၼ်ၵႃး ဢမ်ႇမီးဝတ်းဝႂ် ၊ ၵူၼ်းၶပ်း ဢမ်ႇမီးဝတ်းဝႂ်ၶပ်းႁေႃႈ ၸိူဝ်းၼႆႉၶဝ်ယိုတ်းဢဝ်မူတ်း။  ၵွပ်ႈၼႆပေႃးၶပ်းၵႂႃႇမႃးၼႆႁႂ်ႈဢွၼ်ၵၼ်ၾၢင်ႉၽွင်ႈ”- ဝႃႈၼႆ ။

ၵူႈပွၵ်ႈ ရူတ်ႉၵႃးဢၼ်ၺႃးပလိၵ်ႈမၢၼ်ႈတီႉၺွပ်းၸိူဝ်းၼၼ်ႉ ဢဝ်ငိုၼ်း ၵႂႃႇထုတ်ႇဢဝ်ၶိုၼ်းတီႈ ႁူင်းပလိၵ်ႈ ၼိုင်ႈလမ်း 30 သႅၼ်ထိုင် 50 သႅၼ်ပျႃး။  ၵမ်းၼႆႉတႄႉ တိုၼ်းဢမ်ႇပၼ်ဢဝ်ငိုၼ်းမႃးထုတ်ႇဢဝ်ၶိုၼ်းလႃးလႃး – ၵူၼ်းၼုမ်ႇ ဢၼ်လႆႈႁူႉႁၼ်ၸွမ်း ၵူၼ်းၵေႃႉထုၵ်ႇယိုတ်းရူတ်ႉၵေႃႉၼိုင်ႈလၢတ်ႈၼင်ႇၼႆ။

ယၢမ်းလဵဝ်ၵူၼ်းမိူင်းဝဵင်းတူၼ်ႈတီး ဢွၼ်ၵၼ်ၶၢႆ ရူတ်ႉၵႃးဢမ်ႇမီးဝတ်းဝႂ်ႁင်းၽႂ်မၼ်းၵႃႈထုၵ်ႇၵႃႈပေႃးသေ ဢဝ်ငိုၼ်းၵႂႃႇလူင်းတိုၼ်းလၢင်း တၢင်ႇပိူင်ဝႆႉ- ၵူၼ်းၼုမ်ႇတူၼ်ႈတီးလၢတ်ႈ။   

ပျီႇတူႉၸိတ်ႉပဢူဝ်းဢွၵ်ႇလိၵ်ႈပိုၼ်ၽၢဝ်ႇ ဝၼ်းတီႈ 4/3/2025 ဝႃႈ ရူတ်ႉၵႃး  ၸိူဝ်းဢမ်ႇမီးဝတ်းဝႂ်  ၼႂ်းၸႄႈဝဵင်း သီႇသႅင်ႇ ၊ ပၢင်လွင်း ၊ ႁူဝ်ပူင်း ၸိင်ႈတႆးပွတ်းၸၢၼ်းၼႆႉ တေၵူတ်ႇထတ်းသေ တီႉၺွပ်းၵႂႃႇ ဝႃႈၼႆ  ။

လွင်ႈၼႆႉၾၢႆႇတင်းၵူၼ်းမိူင်းဢၼ်လႆႈပၼ်ၶွၼ်ႇရူတ်ႉၵႃးတႃႇ ပျီတူႉၸိတ်ႉၼၼ်ႉ ပဵၼ်ဢၼ်ယၢပ်ႇၽိုတ်ႇၵိၼ်းၸႂ်ဝႆႉဝႃႈၼႆ ။ လွင်ႈဢၼ်တီႉၺွပ်းဝတ်းဝႂ်ရူတ်ႉၵႃးၼႆႉၵေႃႈ ပဵၼ်ယွၼ်ႉ PNO ၶဝ်ၶႆႈတဵၵ်းၶၢၼ်းရူတ်ႉၵႃး ၵႂႃႇတင်း ၼႃႈတီႈပဵၼ်ပၢင်တိုၵ်း – ၵူၼ်းပိုၼ်ႉတီႈလၢတ်ႈ ။

ၵူၼ်းမိူင်းဝဵင်းႁူဝ်ပူင်းလၢတ်ႈၽူႈတွႆႇႁွၵ်ႈဝႃႈ-“ၶွၼ်ႇၵႃးၵေႃႈလႆႈပၼ်ၵူႈလိူၼ် ၊ တလဵဝ် ပေႃးဢမ်ႇမီးဝတ်းဝႂ်ရူတ်ႉၵႃး သမ်ႉတေတီႉၺွပ်းထႅင်ႈ ၊ ၵူၼ်းမိူင်းႁဝ်းၶႃႈ ယၢပ်ႇယဝ်ႉယၢပ်ႇထႅင်ႈ ၊ ဢၼ်ႁဝ်းၶႃႈ ပၼ်ၶွၼ်ႇယူႇၵူႈလိူၼ်ၼႆႉ ပႂ်ႇၵုမ်ႇထူၼ်ႈၶႃႈႁႃႉၼႆ ၶႆႈထၢမ် PNO  ၊ ဢၼ်ႁဝ်းၶႃႈလႆႈပၼ်ၶွၼ်ႇၼႆႉ မီးဝႆႉဝႂ်မၼ်းယူႇ”- ဝႃႈၼႆ ။

လွင်ႈဢၼ်ပျီႇတူႉၸိတ်ႉပဢူဝ်းPNO ၵူတ်ႇထတ်းတီႉၺွပ်းရူတ်ႉၵႃးတီႈ ႁူဝ်ပူင်း ၊ သီသႅင် ၊ပၢင်လွင်းၼႆႉ ပဵၼ်ပွၵ်ႈဢွၼ်တၢင်းသုတ်း ၊ ဢွၼ်တၢင်းလွင်ႈၵူတ်ႇထတ်းရူတ်ႉၵႃးဢမ်ႇမီးဝတ်းဝႂ်ၼႆႉ ၵႆႉမီးတင်းဝဵင်းတူၼ်ႈတီး – ၵူၼ်းပိုၼ်ႉတီႈလၢတ်ႈ ။