မိူဝ်ႈၼႆႉ ဝၼ်းတီႈ 07/03/2025 ယၢမ်းၵၢင်ၼႂ် သိုၵ်းထႆးထႅမ်ႁႅင်းသိုၵ်း ဢဝ်ႁူမ်ႇလူမ်ႈၼႅၼ်ႈၼႃ ၸွမ်းသၢပ်ႇ မႄႈၼမ်ႉသွင်ယၢင်း (သောင်းရင်းမြစ်) လႅၼ်လိၼ်ထႆး – မၢၼ်ႈၼႆ – သိုဝ်ႇၶၢဝ်ႇထႆး Khaosod ဢွၵ်ႇဝႆႉၼင်ႇၼႆ။

ဝၢႆးသိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်တိုၵ်း MiG-29 ပွႆႇမၢၵ်ႇ တိုၵ်းတေႃးၸွမ်းလႅၼ်လိၼ်ႁၢဝ်ႈႁႅင်းယဝ်ႉ ၾင်ႇမိူင်းထႆး လႆႈထႅမ်ႁႅင်းသိုၵ်း ဢဝ်ႁူမ်ႇလူမ်ႈ။ ယွၼ်ႉလႆႈငိၼ်းသဵင်မၢၵ်ႇသဵင်ၵွင်ႈ တႅၵ်ႇလင်ႁႅင်းၸွမ်း လႅၼ်လိၼ်ထႆး ယၢၼ်ၵၼ်မွၵ်ႈ 800 မီႊတိူဝ်ႊၵူၺ်း ဝႃႈၼႆ။

သိုၵ်းမၢၼ်ႈတင်း သိုၵ်းယၢင်းၽိူၵ်ႇ KNLA ၼႆႉ ပဵၼ်ပၢင်တိုၵ်းၵၼ် တီႈႁိမ်းၸႄႈတွၼ်ႈတၢၵ်ႇ လႅၼ်လိၼ် ထႆးၼၼ်ႉမႃး လၢႆဝၼ်းယဝ်ႉ။ ၼႂ်းဝၼ်းတီႈ 2 ပူၼ်ႉမႃးၼႆႉၵေႃႈ သိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇ 500 ပွင်ႇ  2 လုၵ်ႈ တီႈႁိမ်းလႅၼ်လိၼ်ထႆး။ မိူဝ်ႈၼၼ်ႉၵေႃႈ ၾၢႆႇမိူင်းထႆး လႆႈဢဝ်ၶိူင်ႈမိၼ်တိုၵ်း 2 လမ်းသေ ပၼ်ႇလဵပ်ႈယၢမ်း – သိုဝ်ႇၶၢဝ်ႇထႆးႁၢႆးငၢၼ်းဝႆႉၼင်ႇၼႆ။

ယွၼ်ႉပၢင်တိုၵ်းႁိမ်းလႅၼ်လိၼ်ၼၼ်ႉသေ ၵူၼ်းမိူင်းၸိူဝ်းပၢႆႈၽေး ၶဝ်ႈၵႂႃႇၼႂ်းမိူင်းထႆး မီး 400 ပၢႆၼႆ – သိုဝ်ႇၶၢဝ်ႇ Chiangrai Times ႁၢႆးငၢၼ်းဢွၵ်ႇဝႆႉၼႂ်းဝၼ်းတီႈ 2 ပူၼ်ႉမႃးၼႆႉၼင်ႇၼႆ။

ဢၢင်ႈဢိင် – RFA