သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇ ၸွမ်းၼႂ်းပိုၼ်ႉတီႈ ၵူၼ်းမိူင်းယူႇသဝ်းလႄႈ ပူၼ်ႉပႅၼ်သုၼ်ႇလႆႈၵူၼ်း ၽွင်းၶၢဝ်းယိုတ်းဢႃႇၼႃႇ 4 ပီမႃးၼႆႉ ၼႂ်းလိူၼ်ၾႅပ်ႊပိဝ်ႊရီႊပူၼ်ႉမႃးၼႆႉၵူၺ်း ၼၢင်းယိင်းလႆႈလူႉတၢႆၵႂႃႇ 66 ၵေႃႉ။

ဝၼ်းတီႈ 06/03/2025 ၼႆႉ ယူႇတီႈ ၸုမ်းၼၢင်းယိင်း မိူင်းမၢၼ်ႈ (BWU) ၾၢႆႇလဵပ်ႈႁဵၼ်းၶူၼ်ႉၶႂႃႉ ႁဵတ်း ဢွၵ်ႇ ၽိုၼ်ႁၢႆးငၢၼ်း ၵဵဝ်ႇၵပ်းလွင်ႈၼၢင်းယိင်း ပိုၼ်ၽၢဝ်ႇဢွၵ်ႇဝႆႉဝႃႈ ၼၢင်းယိင်းဢၼ်လႆႈလူႉတၢႆ ယွၼ်ႉ ၽေးၶဵၼ်မၢၵ်ႇၶိူင်ႈမိၼ်တိုၵ်းလႄႈ လွင်ႈပူၼ်ႉပႅၼ်ၵူႈလွင်ႈလွင်ႈ ဢၼ်သိုၵ်းမၢၼ်ႈႁဵတ်းၼႆႉ ၶၢဝ်းတၢင်း လိူၼ်လဵဝ်ၵူၺ်း မီးၵႂႃႇ 66 ၵေႃႉ ဝႃႈၼႆ။

ၼၢင်းယိင်းၸိူဝ်းတၢႆၵႂႃႇ ယွၼ်ႉၶိူင်ႈမိၼ်တိုၵ်းၼၼ်ႉ မီး 45 ၵေႃႉ၊ တၢႆယွၼ်ႉၶိူင်ႈၵွင်ႈလူင် မီး 11 ၵေႃႉလႄႈ ၺႃးသိုၵ်းမၢၼ်ႈဢဝ်ၾႆးၽဝ်သေ လူႉတၢႆၵႂႃႇမီး 2 ၵေႃႉ။ လိူဝ်ၼၼ်ႉ ၼၢင်းယိင်း ဢၼ်တိုၵ်ႉၶမ်ၶွၵ်ႈဝႆႉ သေ ဢမ်ႇမီးသုၼ်ႇလႆႈႁပ်ႉၵၢၼ်ယူတ်းယႃမီး 1 ၵေႃႉ၊ တၢႆယွၼ်ႉမၢၵ်ႇၾင်လိၼ် မီး 7 ၵေႃႉ ၼႆယဝ်ႉ။

လႆႈႁူႉဝႃႈ ၼႂ်းၼၢင်းယိင်းဢၼ်လႆႈလူႉတၢႆၵႂႃႇ တင်းသဵင်ႈၼၼ်ႉ ပႃးဝႆႉလုၵ်ႈဢွၼ်ႇသႅၼ်းဢႃႇယု ပႆႇတဵမ် 18 ပီၼၼ်ႉ မီး 13 ၵေႃႉ ပဵၼ်ၵူၼ်းမိူင်းၸိူဝ်းယူႇသဝ်းၼႂ်းတိူင်းၸႄႈၵႅင်း 21 ၵေႃႉ၊ တိူင်းမၵူၺ်း 9 ၵေႃႉ လႄႈ ၼႂ်းမိူင်းတႆး 9 ၵေႃႉ ၼႆယဝ်ႉ။

ၼႂ်းလိူၼ်ၾႅပ်ႊပိဝ်ႊရီႊၼႆႉ သိုၵ်းမၢၼ်ႈ တိူဝ်းၸႂ်ႉၶိူင်ႈမိၼ်တိုၵ်းသေ ပွႆႇမၢၵ်ႇသႂ်ႇ ၼႂ်းပိုၼ်ႉတီႈၵူၼ်းမိူင်း ၼမ်မႃးလိူဝ်ၵဝ်ႇ။ ၶေႃႈမုလ်းၸိူဝ်းၼႆႉ ၾၢႆႇၸုမ်းၼၢင်းယိင်း မိူင်းမၢၼ်ႈ (BWU) လႆႈၵဵပ်းႁွမ်မႃး ၸွမ်းၼင်ႇ ယိုၼ်းထိုင်လႆႈၼၼ်ႉၵူၺ်း လွင်ႈလူႉတၢႆမၢတ်ႇၸဵပ်း ၸၢင်ႈမီးၼမ်လိူဝ်ၼႆႉထႅင်ႈယူႇ ဝႃႈၼႆ။  

မိူဝ်ႈပူၼ်ႉမႃး လိူၼ်ၵျႅၼ်ႊၼိဝ်ႊရီႊၼၼ်ႉၵေႃႈ ယွၼ်ႉလွင်ႈပူၼ်ႉပႅၼ်သိုၵ်းမၢၼ်ႈၵူႈလွင်ႈလွင်ႈသေ ၼၢင်းယိင်းဢၼ်လႆႈလူႉတၢႆၵႂႃႇၼႆႉ မီးယူႇ 86 ၵေႃႉ ၼႆယဝ်ႉ။

တႅမ်ႈ – ၽူၺ်းၼုမ်ႇ