ဝၢႆးလင် သိုၵ်းမၢၼ်ႈတင်း သိုၵ်းၵဝ်ႈၵၢင်ႉ လႆႈၶေႃႈတူၵ်းလူင်း ၵိုတ်းသိုၵ်းယဝ်ႉ လူင်ပွင်ၸိုင်ႈမိူင်းၶႄႇ ပိုတ်ႇ ပၼ်သဵၼ်ႈတၢင်း ၵၢၼ်တေႃႉသူင်ႇ ၼမ်ႉမၼ်းၸိူဝ်ႉၾႆးလႄႈ ၶူဝ်း ၵုၼ်ႇၵူႈၸိူဝ်းၸိူဝ်း ၸွမ်းလႅၼ်လိၼ် တိတ်းၸပ်းၼႃႈလိၼ်ၶိုၵ်ႉတွၼ်း မၢႆ 4 တပ်ႉသိုၵ်းမိူင်းလႃး NDAA လႄႈ တပ်ႉသိုၵ်းၵဝ်ႈၵၢင်ႉ MNDAA သေတႃႉ ၼႂ်းၼႃႈလိၼ်သိုၵ်းဝႃႉ UWSA ၵုမ်းၵမ်ဝႆႉတႄႉ ႁၢၼ်ႉထိုင်ယၢမ်းလဵဝ် ပႆႇပိုတ်ႇပၼ်ၶိုၼ်း။  

ၼႂ်းၸႄႈတွၼ်ႈ ၸိူဝ်းတပ်ႉသိုၵ်းဝႃႉ UWSA ၵုမ်းၵမ်ဝႆႉၼၼ်ႉ ယၢမ်းလဵဝ် ၼမ်ႉမၼ်းၸိူဝ်ႉၾႆး (ထၢတ်ႈသီႇ၊ တီႇၸေႇ) ၶၢတ်ႇၵႂႃႇႁိုင်ၶၢဝ်းတၢင်းၼိုင်ႈဝူင်ႈယဝ်ႉသေဢမ်ႇၵႃး ၶူဝ်းၵုၼ်ႇၵူႈၸိူဝ်းၸိူဝ်း ဢၼ်တေတေႃႉသူင်ႇၶဝ်ႈၸူး ၼႂ်းၼႃႈလိၼ်ၵုမ်းၵမ် သိုၵ်းဝႃႉ ၸိူဝ်းၼၼ်ႉၵေႃႈ ၺႃးႁၢမ်ႈဝႆႉ ၼႆယဝ်ႉ။

ၵူၼ်းၼႂ်းပိုၼ်ႉတီႈ ဝဵင်းပၢင်သၢင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶၼ်ထၢတ်ႈသီႇ၊ တီႇၸေႇၼႆႉ ပုင်ႈၶိုၼ်ႈႁႅင်းၼႃႇ။ ၼိုင်ႈတီႈလႄႈ ၼိုင်ႈတီႈၵေႃႈ ၶၼ်မၼ်းဢမ်ႇမိူၼ် ၵၼ်။ တီႈပၢင်သၢင်းၼႆႉ ၼိုင်ႈလီႇတႃႇ တူၵ်းမႅၼ်ႈယူႇငိုၼ်းၶႄႇ 8 ယႂၼ်ႊ တေႃႇထိုင် 12 ယႂၼ်ႊ။ ၵူၼ်းၸိူဝ်းၵႂႃႇသိုပ်ႇဢဝ် ၼမ်ႉမၼ်းမႃး တမ်းၶၢႆၸွမ်းတၢင်းၸိူဝ်းၼၼ်ႉသမ်ႉ တဝ်ႈၼမ်ႉၼိုင်ႈလီႇတႃႇၼႆႉ ၶဝ်ၶၢႆယူႇ 30 ယႂၼ်ႊ။ တီႇၸေႇတႄႉ လိူင်ႇယူႇ။ ဢၼ်ႁႃသိုဝ်ႉယၢပ်ႇၼႆႉ ပဵၼ်ထၢတ်ႈသီႇ”- ဝႃႈၼႆ။

ၼမ်ႉမၼ်းၸိူဝ်ႉၾႆး (ထၢတ်ႈသီႇ) တႃႇၸႂ်ႉတိုဝ်းၼႂ်းၼႃႈတီႈၵုမ်းၵမ် သိုၵ်းဝႃႉၼႆႉ တေႃႉဢဝ်တၢင်းၼႃႈတီႈ ၵုမ်းၵမ် သိုၵ်းၵဝ်ႈၵၢင်ႉ ၵႂႃႇလႆႈယူႇသေတႃႉ လႆႈပၼ်ၵႃႈၶၼ်သုင်ႁႅင်းသေ ဝၢႆးလင် ၽႅၼ်ယၼ်ႇသိုၵ်း 1027 မႃး ၼႂ်းၼႃႈလိၼ်သိုၵ်းဝႃႉ ၵုမ်းၵမ် ႁူပ်ႉတၢင်းယၢပ်ႇၼမ်ႉမၼ်းၸိူဝ်ႉၾႆးမႃးတႄႉတႄႉ ၼႆယဝ်ႉ။

တႄႇမိူဝ်ႈ လူင်ပွင်ၸိုင်ႈမိူင်းၶႄႇ ႁဵတ်းၶဵဝ်ယူႇၵၢင် ၸတ်းပၢင်ဢုပ်ႇဢူဝ်း လွင်ႈငမ်းယဵၼ် သိုၵ်းမၢၼ်ႈ တင်း သိုၵ်းၵဝ်ႈၵၢင်ႉသေ လႆႈၶေႃႈတူၵ်းလူင်း ၵိုတ်းတိုၵ်းၵၼ်မႃး တႄႇဝၼ်းတီႈ 20/01/2025 တပ်ႉသိုၵ်းဝႃႉ UWSA ပိုၼ်ၽၢဝ်ႇပဵၼ်တၢင်းၵၢၼ် ပၼ်ၶႂၢင်ႉတႄႇတေႃႉသူင်ႇၶူဝ်းၵုၼ်ႇလႄႈ ၼမ်ႉမၼ်းၸိူဝ်ႉၾႆးၵႂႃႇမႃး လႆႈထိုင်ၼႂ်းပိုၼ်ႉတီႈသိုၵ်းၵဝ်ႈၵၢင်ႉ ၵုမ်းၵမ် ဝႃႈၼႆ။

တႅမ်ႈ – ၽူၺ်းၼုမ်ႇ