ၸဝ်ႈဢႃႇၼႃႇသိုၵ်းၼႆႉ မိူင်းလႂ်သေဢမ်ႇဝႃႈ ၵူၼ်းမိူင်းထတ်းသၢင်တိုၼ်းဢမ်ႇလႆႈ။ ၽႂ်ထတ်းသၢင် ၵေႃႈ ၺႃးလိုပ်ႈလမ်း တီႉၺွပ်းပၼ်တူတ်ႈတၢမ်ႇၶွၵ်ႈ တိၵ်းတိၵ်း။ ၸဝ်ႈဢႃႇၼႃႇသိုၵ်းမၢၼ်ႈ ယိင်ႈၶႅၼ်းတွၼ်း။ သူပ်းတႄႉဝႃႈ ၶႂ်ႈၵေႃႇသၢင်ႈ မိူင်းတီႊမူဝ်ႊၶရေႊသီႊ ဢၼ်မီးလွင်ႈၽဵင်ႇပဵင်းပဵၼ်ထမ်းၼႆသေတႃႉ ပေႃးပဵၼ်ၵူၼ်းထတ်းသၢင် လွင်ႈႁဵတ်းသၢင်ႈၶဝ်ၸိုင် မုၼ်ၸဝ်ႈ ၼၢင်းယိင်း လုၵ်ႈဢွၼ်ႇၶဝ် တိုၼ်းဢမ်ႇဝူၼ်ႉ – တီႉၺွပ်းပၼ်တူတ်ႈတၢမ်ႇၵႃႈဝႃႈၵႃႈပဵၼ်။

တီႈဝဵင်းတႃႈၶီႈလဵၵ်း ဢၼ်တိတ်းၸပ်းလႅၼ်လိၼ်ထႆးၼၼ်ႉၵေႃႈ ၼႄးဝႃႈ သင်ႇၶၸဝ်ႈတူၼ်ၼိုင်ႈ ထတ်းသၢင်လွင်ႈၵၢၼ်ၽွင်းငမ်းၶဝ်ၼႆသေ တီႉၺွပ်းယဵတ်ႈၶွၵ်ႈယဝ်ႉ တႅပ်းတတ်းပၼ်တူတ်ႈတၢမ်ႇ ၶွၵ်ႈ 3 ပီ။ ၽွင်းဢႃႇၼႃႇမီးၼႂ်းမိုဝ်းၶဝ်ၼႆႉ ဢမ်ႇမီးၽႂ်ယူႇၾၢႆႇၵူၼ်းမိူင်း။ ဢမ်ႇႁၼ်တၢင်းတႃႇပဵၼ် ၸိုင်ႈမိူင်းတီႊမူဝ်ႊၶရေႊသီႊ။ ဢမ်ႇမီးလွင်ႈၽဵင်ႇပဵင်းပဵၼ်ထမ်း ၼႆယဝ်ႉ။

သင်ႇၶၸဝ်ႈတူၼ်ၼိုင်ႈ တီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ တႅမ်ႈတၢင်ႇၼိူဝ်ၾဵတ်ႉသ်ပုၵ်ႉၶ် သုၼ်ႇတူဝ်မၼ်းၸဝ်ႈ – ထတ်းသၢင်လွင်ႈ ႁွင်ႈၵၢၼ်ၾၢႆႇ တႂ်ႈသိုၵ်းမၢၼ်ႈ ၸတ်း ၵၢၼ်ဢမ်ႇမီးလွင်ႈ ၽဵင်ႇပဵင်းၼႆလႄႈ ၺႃးသိုၵ်းမၢၼ်ႈ တီႉၺွပ်းယဵတ်ႈၶွၵ်ႈ။ ႁိုင်ၶၢဝ်းတၢင်း 2 လိူၼ်ပၢႆ ၸင်ႇတႅပ်းတတ်း တြႃး ပၼ်တူတ်ႈတၢမ်ႇၶွၵ်ႈ 3 ပီ။ 

သင်ႇၶၸဝ်ႈ ဢၼ်ၺႃးတီႉၺွပ်းၼႆႉ ၸိုဝ်ႈႁွင်ႉ ဢူးသုမၼ ဢႃယု 46 ပီ ဝႃႇသႃ 27 ဝႃႇ ပဵၼ်ၸဝ်ႈၼင်ႈ ဝတ်ႉ/ ၵျွင်းၵုသိင်ႇၼႃႇယူင်ႇ (ကုသိန္နာရုံကျောင်းတိုက်) ၼႂ်းဝၢၼ်ႈလွႆတေႃႇၶမ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ လႅၼ်လိၼ်တႆး – ထႆး။

မိူဝ်ႈဝၼ်းတီႈ 12/12/2024 မၼ်းၸဝ်ႈ တႅမ်ႈလိၵ်ႈတၢင်ႇၼိူဝ်ၼႃႈၾဵတ်ႉသ်မၼ်းၸဝ်ႈဝႆႉဝႃႈ –   ႁွင်ႈ ၵၢၼ် ဢၼ်ယူႇတႂ်ႈသိုၵ်းမၢၼ်ႈ မႃးၸႂ်ႉၵူၼ်းမိူင်း ၼႂ်းပွၵ်ႉပုင်းထုၼ် ၶၢႆႉဢွၵ်ႇၵႂႃႇယူႇတၢင်ႇတီႈ ၼႄ ၶေႃႈဢၢင်ႈဝႃႈ တႃႇပူၼ်ႉလွတ်ႈၽေးၼမ်ႉထူမ်ႈ။ ၵူၺ်းၵႃႈ ၵူၼ်းၸိူဝ်းပိုတ်ႇဝႆႉႁၢၼ်ႉယႂ်ႇလူင် မိူၼ်ၼင်ႇ ပၢမ်ႉၼမ်ႉမၼ်း ႁူင်းၼမ်ႉသႅၼ်ႈသႂ် ၸိူဝ်းၼႆႉသမ်ႉ ဢမ်ႇမီးၸုမ်းလႂ်ၵႂႃႇသင်ႇႁႂ်ႈၶၢႆႉ။ လွင်ၼႆႉ ၼႄဝႃႈ ပၵ်းပိူင်ၼႆႉ ၵုမ်းၵမ်လႆႈၵူၼ်းၽၢၼ်ၵူၺ်း ၵူၼ်းမီးငိုၼ်းၶဝ်တႄႉ ဢမ်ႇလႆႈၵူဝ်ပၵ်းပိူင်သင် – ဝႃႈၼႆ။

ဝၢႆးမၼ်း ၸဝ်ႈတႅမ်ႈတၢင်ႇဢမ်ႇႁိုင်လၢႆၸူဝ်ႈမူင်း – ထိုင်မႃးဝၼ်းတီႈ 13/12/2024 ယၢမ်းၵၢင်ၶိုၼ်း 10 မူင်းပၢႆ ပလိၵ်ႈမၢၼ်ႈ ၵိုင်ႉၵၢင်ႉၶဝ်ႈမႃးတီႉၺွပ်း ဢဝ်မၼ်းၸဝ်ႈသေ ၵႂႃႇၵူတ်ႇထတ်းထဵတ်ႈထၢမ်ယဝ်ႉ ၵုမ်းၶင်ဝႆႉ ႁိုင်ၶၢဝ်းတၢင်း 2 လိူၼ်။ ၼႂ်းဝူင်ႈထီႉသွင် လိူၼ်ၾႅပ်ႊပိဝ်ႊရီႊ 2025 ၼႆႉ ၸင်ႇပိုၼ်ၽၢဝ်ႇဝႃႈ ပၼ်တူတ်ႈတၢမ်ႇၶွၵ်ႈတႃႇ 3 ပီ (လူၺ်ႈတၢင်းၽိတ်း မတ်ႉတႃ – ရာဇသတ်ကြီးပုဒ်မ ၅၀၅ – က လႄႈ ၂၉၅- က) – ၵူၼ်းပိုၼ်ႉတီႈလၢတ်ႈၼင်ႇၼႆ။

ၸဵမ်မိူဝ်ႈသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း ၼႂ်းပီ 2021 ၼၼ်ႉမႃးသေ တီႈဝဵင်းတႃႈၶီႈလဵၵ်းၼႆႉ ၵူၼ်းမိူင်း ဢၼ်ၺႃးပလိၵ်ႈမၢၼ်ႈတီႉၺွပ်းလူၺ်ႈ မတ်ႉတႃ ပုဒ်မ ၅၀၅ – က မီးၼမ်မႃး။ ၽူႈလၵ်ႉ ၸၵ်ႉၶုတ်ႈ ၵူၼ်းၵေႃႇၵၢၼ်ႁၢႆႉလိူင်ႇၼမ်ၽႄႈမႃးသေတႃႉ ဢမ်ႇသူႈတီႉၺွပ်း ဢဝ်လိူင်ႈပၼ်တူတ်ႈ တၢမ်ႇသင်လႆႈ။ ၵူၺ်းၵႃႈ ပေႃးပဵၼ်ၵူၼ်းမိူင်း ဢၼ်သၢၼ်ၶတ်းသိုၵ်းမၢၼ်ႈတႄႉ ၺႃးတီႉၺႃးၺွပ်း တႃႇသေႇ။ လွင်ႈၼႆႉ ၼၢင်းယိင်း ၵူၼ်းတႃႈၶီႈလဵၵ်းလၢတ်ႈၼႄဝႃႈ – ၵူၼ်းမိူင်း ဢမ်ႇမီးသုၼ်ႇလၢတ်ႈ ဢမ်ႇမီးသုၼ်ႇထတ်းသၢင် ၼိူဝ်သိုၵ်းမၢၼ်ႈ ပၼ်ႇၵၢၼ်ၽွင်းငမ်းသင်သေဢိတ်း ဝႃႈၼႆ။

“ၵူၼ်းမိူင်းႁဝ်းၶႃႈၼႆႉ မီးလွင်ႈၶွင်ႈၶမ်သင်ၵေႃႈ လၢတ်ႈဢွၵ်ႇဢမ်ႇလႆႈ ယွၼ်ႉဝႃႈ ဢႃႇၼႃႇမီးၼႂ်းမိုဝ်း ၶဝ်ၶႃႈလူးၼေႃႈ။ မီးသင်ၵေႃႈ ၵဵပ်းဝႆႉ ၼႂ်းၸႂ်ၸိူင်ႉၼႆၵူၺ်းယဝ်ႉၶႃႈ။ ပေႃးလၢတ်ႈၵေႃႈ တေမိူၼ်ၼႆ ၶႃႈၼႃႇၼေႃႈ။ တီႈတႄႉမၼ်း မုၼ်ၸဝ်ႈပႃးၼႆႉ ၵႂႃႇတၵ်ႉပႃးလွင်ႈၵူၼ်းမိူင်းၼႂ်းပွၵ်ႉပုင်းထုၼ် တေလႆႈၶၢႆႉႁိူၼ်းယေးၼႆသေ သမ်ႉၵႂႃႇလၢတ်ႈတိူဝ်ႉပႃး ၸဝ်ႈပၢမ်ႉၼမ်ႉမၼ်း။ ပၢမ်ႉၼမ်ႉမၼ်းၼၼ်ႉသမ်ႉ လႅပ်ႈတေပဵၼ်ၶွင်ၵူၼ်းမီးဢၢမ်းၼၢတ်ႈ။ ႁဵတ်းၼၼ်သေ မုၼ်ၸဝ်ႈၼႆႉ ၸင်ႇၺႃးၺွပ်း ၵႂႃႇၸိူင်ႉၼၼ်ႉၶႃႈ။ ယွၼ်ႉၼၼ် ၶႃႈယူႇတီႈပဵၼ်ၵူၼ်းတႃႈၶီႈလဵၵ်းၵေႃႉၼိုင်ႈသေ ၸၢင်ႈလၢတ်ႈလႆႈဝႃႈ ႁဝ်းမီး တၢင်းႁၼ်ထိုင်ၸိူင်ႉႁိုဝ်ၵေႃႈ ဢမ်ႇၸၢင်ႈဢွၵ်ႇသဵင်လႆႈၼၼ်ႉယဝ်ႉ”- ဝႃႈၼႆ။  

တီႈတႄႉမၼ်း လွင်ႈထတ်းသၢင်ၼိူဝ်သိုၵ်းမၢၼ်ႈ ႁဵတ်းၵၢၼ်ၽွင်းငမ်းဢမ်ႇလီၼႆႉ ဢမ်ႇၸႂ်ႈဝႃႈမီး  သင်ႇၶၸဝ်ႈတူၼ်ၼႆႉၵူၺ်း။ ဢၼ်ၸႂ်ႉၾဵတ်ႉသ်ပွမ်သေ တႅမ်ႈတၢင်ႇလႃႇဝႆႉ ဝႃႈဝႆႉမီးတင်းၼမ်တင်း လၢႆ ။ လွင်ႈၼႆႉ ၾၢႆႇသိုၵ်းမၢၼ်ႈ ဢမ်ႇႁဵတ်းသင်လႆႈ ဢမ်ႇၵုမ်းၵမ်သင်လႆႈ ဢမ်ႇၸၢင်ႈဢဝ်တၢင်း ၽိတ်းၽႂ်။ သင်ႇၶၸဝ်ႈ ဢူးသုမၼ ဢၼ်ၺႃးၺွပ်းၼႆႉ မၼ်း ၸဝ်ႈမီးၸႂ်ဢီးလူး ၼိူဝ်တၵ်ႉၵႃႇၵူၼ်း မိူင်းပိုၼ်ႉတီႈသေ တႅမ်ႈတၢင်ႇၸီႉၸမ်ႈၼႄဝႆႉၵူၺ်း။ သိုၵ်းမၢၼ်ႈသမ်ႉ ဢမ်ႇလူင်းပိုၼ်ႉတီႈဢမ်ႇ ထတ်းသၢင်သင်သေ ၵိုင်ႉၵၢင်ႉမႃးႁဵတ်းတေႃႇသင်ႇၶၸဝ်ႈၸိူင်ႉၼႆ ဢမ်ႇထုၵ်ႇလီပဵၼ်သေဢိတ်း –   ၵူၼ်းတႃႈၶီႈလဵၵ်း ၵေႃႉၼိုင်ႈ သိုပ်ႇလၢတ်ႈဝႆႉၼင်ႇၼႆ။

တႄႇဢဝ်ႁၢင်ပီ 2024 ၼၼ်ႉမႃး တႃႈၶီႈလဵၵ်းၼႆႉ ၽူႈမီးၸၼ်ႉၼႂ်းပလိၵ်ႈမၢၼ်ႈ သုတ်ႉၶၢႆႉလၢႆႈ တီႈယူႇ တၼ်းႁဵင်းၵၢၼ်ငၢၼ်း။ မၢင်ၸိူဝ်းၵေႃႈ လုၵ်ႉၵဵင်းတုင်မႃး မၢင်ၸိူဝ်းၵေႃႈ လုၵ်ႉတီႈၼေႇပျီႇတေႃႇ မႃး ၵမ်းသိုဝ်ႈ ၵေႃႈမီး။ လွင်ႈၼႆႉ ႁဵတ်းႁႂ်ႈၵူၼ်းမိူင်း ယူႇယၢပ်ႇၸွမ်းၼႂ်းၵႄႈမၼ်း။ ၵူၼ်းမိူင်း ၸိူဝ်းၵႂႃႇမႃး ယူႇၵူႈဝၼ်းၵေႃႈ ၺႃးတွင်ႈထၢမ်တႂ်ႈတႂ်ႈၼိူဝ်ၼိူဝ်။ ၵူၼ်းမိူင်းၵူၺ်း ထူပ်းတၢင်းယၢပ်ႇၽိုတ်ႇ ၵပ်ႉၵိၼ်း ယူႇတိၵ်းတိၵ်းၼႆ ၵူၼ်းၸၢႆး ယူႇဝဵင်းတႃႈၶီႈလဵၵ်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ပေႃးမႃးတူၺ်း ပွတ်းတၢင်းတႃႈၶီႈလဵၵ်းၼႆႉ ပလိၵ်ႈမၢၼ်ႈ ပၵ်းတႃပႂ်ႉတူၺ်းတၢင်းၼႆႉ ႁႅင်းတႄႉယဝ်ႉ ၵမ်းၼႆႉ။ ၸဵမ်ဢဝ်လွင်ႈပၢႆးမၢၵ်ႈမီး ၶၢႆတီႈလိၼ်ၸိူဝ်းၼႆႉ ၶဝ်ႁိပ်ႇမႃးၵူႈႁူးၵူႈတၢင်း ၶဝ်ပၵ်းတႃပႂ်ႉ တူၺ်းၼၼ်ႉယဝ်ႉ။ ပေႃးဝႃႈ ပဵၼ်ၵူၼ်းဢၼ်ၶႂ်ႈၶတ်းၶဝ် ဢမ်ႇၼၼ် ၶဝ်ဢမ်ႇလႆႈၵိၼ်ၸွမ်းၼႆ  တေ ႁဵတ်းႁႂ်ႈၸိုဝ်ႈသဵင်ၶဝ်လူႉၸိူဝ်းၼႆႉ ၶဝ်ၸွပ်ႇသေ ယဝ်ႉၵေႃႈ လမ်းႁႃဢဝ် လိုပ်ႈဢဝ်လိူင်ႈ မၼ်းတိၵ်း တိၵ်းၼေႈမိူဝ်ႈလဵဝ်ၼႆႉ”- ဝႃႈၼႆ။  

ၵူၼ်းၸႃႇတိ တႃႈၶီႈလဵၵ်းတႄႉ ယူႇယၢပ်ႇၵပ်ႉၵိၼ်းမႃးၵူႈဝၼ်း။ ၸဵမ်မိူဝ်ႈ သိုၵ်းမၢၼ်ႈ ယိုတ်းမိူင်းမႃး သေ ၵူၼ်းတၢင်ႇတီႈသီႇလႅၼ်မႃးယူႇထင်သဝ်းၼမ်။ ပႃးၸဵမ်ၵူၼ်းလီၵူၼ်းႁၢႆႉ။ ဢၼ်လၵ်ႉဢၼ်ၸူၼ် ၵၼ်ၵေႃႈ မီးၵူႈလိူၼ် ၊ ၸုမ်းလွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ ၸုမ်းၵျႃးၽႅၼ်ႉၵေႃႈ လိူင်ႇၼမ် ပဵၼ်ဢၼ်လႆႈသုၵ်ႉၸႂ်ယူႇၵူႈဝၼ်း၊ လိုၼ်းသုတ်းၼႆႉသမ်ႉ ၺႃးတတ်းၾႆးၾႃႉ ၺႃးတတ်းၼမ်ႉမၼ်း ၸိူဝ်ႉၾႆးလႄႈ တၢင်းၵိၼ်တၢင်းယႅမ်ႉ ယွၼ်ႉၸုမ်းၵျႃးၽႅၼ်ႉထႅင်ႈ၊ ၵူၼ်းပိုၼ်ႉတီႈလၢတ်ႈဝႃႈ မုင်ႈမွင်း ဝၼ်းတေပူၼ်ႉလွင်ႈသုၵ်ႉသၵ်ႉလူင်ၼႆႉၼႃႇယဝ်ႉ၊ ၶႂ်ႈလႆႈၶိုၼ်းဝဵင်းတႃႈၶီႈလဵၵ်း ဢၼ်မီးငဝ်းလၢႆး ယူႇသႃႇလူမ်ၸႂ် ႁႃၵိၼ်လဵင်ႉတွင်ႉငၢႆႈလူမ်ၼၼ်ႉၶႃႈယဝ်ႉ – ဝႃႈၼႆ။