သိုၵ်းၵႅတ်ႇၶႄၵူၼ်းမိူင်း ၼႂ်းပိုၼ်ႉတီႈ လၢတ်ႈဝႃႈ – ၼႂ်းႁူဝ်ပီ 2025 ၼႆႉ သိုၵ်းမၢၼ်ႈ ၸႂ်ႉၵူၼ်းၶီႇၸွင်ႈမိၼ် (Paramotor) သေ ပွႆႇမၢၵ်ႇၼႂ်းတိူင်းတႃႈၵုင်ႈ၊ တိူင်းၸႄႈၵႅင်း ၊ တိူင်းမၵူၺ်းလႄႈ တိူင်းပႃႇၵိူဝ် ၸိူဝ်းၼႆႉ ဝႃႈၼႆ။

လိူၼ်ၾႅပ်ႊပိဝ်ႊရီႊၼႆႉၵူၺ်း ၼႂ်းတိူင်းၸႄႈၵႅင်းၼၼ်ႉ သိုၵ်းမၢၼ်ႈၸႂ်ႉ ၵူၼ်းၶီႇၸွင်ႈမိၼ်သေ ပွႆႇမၢၵ်ႇၼႂ်းၸႄႈဝဵင်း ၵၼီႇ 2 ပွၵ်ႈ မီးၵူၼ်းလူႉတၢႆ 2 ၵေႃႉ။

ယွၼ်ႉသိုၵ်းမၢၼ်ႈ ၸႂ်ႉၵူၼ်းၶီႇၸွင်ႈမိၼ်သေ လၢမ်းပွႆႇမၢၵ်ႇၶိူဝ်းယႂ်းလႄႈ သင်ဝႃႈ ၶၢဝ်းႁိုင်မႃး လွင်ႈၵူၼ်းမိူင်း တုမ်ႉတိူဝ်ႉမၢတ်ႇၸဵပ်းၸွမ်းၵေႃႈ ၸၢင်ႈၼမ်ၶိုၼ်ႈမႃး ဝႃႈၼႆ။

မိူၼ်ၼင်ႇ ၼႂ်းၸႄႈဝဵင်းတွင်ႇတႃႇ တိူင်းဝဵင်းလိူဝ်ႇၵေႃႈ  တႄႇဢဝ်လိူၼ်ၵျႅၼ်ႊၼိဝ်ႊရီႊပူၼ်ႉမႃးၼႆႉ သိုၵ်းမၢၼ်ႈ ၸႂ်ႉ ၵူၼ်းၶီႇၸွင်ႈမိၼ်သေ ပွႆႇမၢၵ်ႇ။ ၼႂ်းလိူၼ်လဵဝ်ၵူၺ်း ၵူၼ်းမိူင်းလူႉတၢႆ 5 ၵေႃႉ။

မိူၼ်ၼင်ႇ ၼႂ်းတိူင်းမၵူၺ်း ၊ တိူင်းပႃႇၵိူဝ် ၊ လႅၼ်လိၼ်တိတ်းၸပ်း မိူင်းရၶႅင်ႇတင်း တိူင်းဢေႇရႃႇဝတီႇ ၸိူဝ်းၼၼ်ႉ ၵေႃႈ  သိုၵ်းမၢၼ်ႈ ၸႂ်ႉၵူၼ်းၶီႇၸွင်ႈမိၼ်သေ ပွႆႇမၢၵ်ႇ။

ၶၢဝ်းတၢင်း သိုၵ်းမၢၼ်ႈ ယိုတ်းဢႃႇၼႃႇမႃး 4 ပီၼႆႉ တူဝ်ႈမိူင်းမၢၼ်ႈ ပတ်းပိုၼ်ႉ သိုၵ်းမၢၼ်ႈၸႂ်ႉၶိူင်ႈမိၼ် ပွႆႇမၢၵ်ႇ 8,000 ၵမ်းပၢႆၼႆ – ၸုမ်း ISP- Myanmar ပိုၼ်ၽၢဝ်ႇဝႆႉ မိူဝ်ႈဝၼ်းတီႈ 03/02/2025 ၼၼ်ႉၼင်ႇၼႆ။

ၸွမ်းၼင်ႇ သဵၼ်ႈမၢႆ ၸုမ်းသိုဝ်ႇၶၢဝ်ႇ RFA ၵဵပ်းဝႆႉတႄႉ ၼႂ်းပီ 2024 ၼၼ်ႉ တူဝ်ႈမိူင်းမၢၼ်ႈပတ်းပိုၼ်ႉ ၵူၼ်းမိူင်းလူႉတၢႆ ယွၼ်ႉၶိူင်ႈမိၼ် သိုၵ်းမၢၼ်ႈပွႆႇမၢၵ်ႇ မီးႁိမ်းၸမ် 2,000 ၵေႃႉ ၼႆယဝ်ႉ။