သိုၵ်းပလွင်ႈ TNLA ဢၼ်ပိုၼ်ၽၢဝ်ႇဝႆႉဝႃႈ တေလုၵ်ႉၽိုၼ်ႉ ၽဵဝ်ႈမူၺ်ႉပႅတ်ႈၶွင်ႇသီႇသိုၵ်းမၢၼ်ႈ ႁၢၼ်ႉတေႃႇပေႃးယဝ်ႉတူဝ်ႈၼႆၼၼ်ႉ မိူဝ်ႈဝၼ်းတီႈ 15 ၼႆႉ တႄႇႁူပ်ႉဢုပ်ႇၵၼ်တင်း ၾၢႆႇၶွင်ႇသီႇသိုၵ်းမၢၼ်ႈ တီႈဝဵင်းၶုၼ်ႊမိင်ႊ ယူႇယဝ်ႉ။

ၵမ်းၼႆႉ ဢမ်ႇပႃးၸွမ်းဢူၺ်းလီၶဝ် ႁူပ်ႉၵၼ်ၸုမ်းတေႃႇၸုမ်းၵွႆး။ တၢမ်တူဝ်ၵႅမ်ၸွမ်ပွင်ၵၢၼ်သိုၵ်း ၵေႃႉဢွၼ်ႁူဝ် ၶိုၼ်ႈၼႃႈဝႃႈၼႆလႄႈ တေပႆႇၸႂ်ႈ ဢၼ်တေတႅပ်းတတ်းယဝ်ႉတူဝ်ႈပွၵ်ႈလဵဝ်။ လႅပ်ႈတေယဵပ်ႇၸွမ်းႁွႆးတိၼ်ၵဝ်ႈၵၢင်ႉ MNDAA သေ ဢုပ်ႇယဝ်ႉဢုပ်ႇထႅင်ႈ ဢေႇသုတ်းမွၵ်ႈသွင်သၢမ်ၵမ်း ယူႇ။

AA, MNDAA လႄႈ TNLA ၼႆႉ ဢဝ်ငဝ်းလၢႆးပၢင်တိုၵ်းဝႃႈ ၶဝ်ယူႇဝႆႉၾၢႆႇပေႉပုၼ်ႈယႃႇယႃႇ ၵွပ်ႈသင် လႆႈယွမ်းဢုပ်ႇတေႃႇ ၶွင်ႇသီႇသိုၵ်းမၢၼ်ႈ။ ၵွပ်ႈဢမ်ႇလိူဝ်လႆႈမိူင်းၶႄႇ ယူႇၾၢႆႇလင်သူၼ်းဢီးၼႆ ႁူႉထိုင်ၵၼ်ယူႇ ၊ ၵူၺ်းၼႃႇ ၵွပ်ႈသင်သမ်ႉ ဢမ်ႇလိူဝ်လႆႈမိူင်းၶႄႇလႃႇ ပေႃးဝႃႈၼႆတႄႉ တေမီးၶေႃႈဢၢင်ႈ ယူႇလၢႆလၢႆလွင်ႈ။

တီႈၵေႇသုတ်းတႄႉ လူဝ်ႇလႆႈတူၺ်းတေႃႇၼႃႈပေႃႈလဵင်ႉ ဢၼ်ၸွႆႈၵၢၼ်တိုၵ်းႁႂ်ႈပေႃးဢွင်ႇၼၼ်ႉဢိူဝ်ႈ ပေႃးဝႃႈၼႆ လႅပ်ႈတေဢမ်ႇၽိတ်း။ ဢမ်ႇၸႂ်ႈလၢႆးသိုဝ်ႈၵေႃႈ တင်းလၢႆးဢွမ်ႈတႄႉ တိုၼ်းမီးၵေးၸူး တီႈၵၼ်ယဝ်ႉ။

ပေႃးဝႃႈၼၼ်သမ်ႉ ပၢင်တိုၵ်းဢၼ်ဢွၵ်ႇၸိုဝ်ႈ ဢူၺ်းလီသၢမ်ၸုမ်း ပိူင်လဵဝ်သေ ယိုတ်းလႆႈၼႃႈတီႈ ၼႂ်းမိူင်းတႆးလၢႆလၢႆဝဵင်းၼႆႉ ၸွင်ႇၸႂ်ႈၶဝ်သၢမ်ၸုမ်းလူင်းတိုၵ်းၵွႆးႁိုဝ်။

ပၢတ်ႈတွင်း၊ ယၢင်းလႅင်၊ ထၼုလႄႈ ၸုမ်းၵူၼ်းထိူၼ်ႇမၢၼ်ႈ ပဵၼ်လၢႆလၢႆၸုမ်း ၶဝ်ႈပႃးၸွမ်း၊ တၢႆႁၢႆ ၸွမ်း ၵလွၵ်ႈၵသွၵ်ႈလူး။ ၵေးၸူးတီႈၶဝ်ၸိူဝ်းၼၼ်ႉၼႃႇ ဢမ်ႇတူၺ်းထိုင်တုမ်ႉတွပ်ႇၶိုၼ်းႁႃႉၼႆ ပဵၼ် ဝႆႉၶေႃႈထၢမ်ယူႇယဝ်ႉ။

ပေႃးတူၺ်းသိုၵ်းမၢၼ်ႈ SAC ၼႆၵေႃႈ လႆႈႁဵတ်းၼႃႈလဵၵ်ႉတႃတႅမ်ႇသေ ၶဝ်ႈၸူးၵွႆးၼင်ႇၵဝ်ႇ။ မိူဝ်ႈဝၼ်းတီႈ 2 လိူၼ်သႅပ်ႊထႅမ်ႊပိူဝ်ႊ တိုၵ်ႉႁႃပိုၼ်ၽၢဝ်ႇဝႃႈ ဢူၺ်းလီသၢမ်ပီႈၼွင်ႉ ပဵၼ်ၸုမ်းၵေႃႇၵၢၼ်ႁၢႆႉၼႆလႄႈ ၼင်ႇႁၢင်ႈတေၶိုၼ်း တုမ်ႉတွပ်ႇႁၢဝ်ႈႁၢဝ်ႈႁႅင်းႁႅင်းသေတႃႉ တိုၵ်းပွၵ်ႈလႂ်သုမ်းပွၵ်ႈၼၼ်ႉ တွၼ်းသေ ဢမ်ႇပႃးၵႂႃႇထႅင်ႈႁူဝ်ပၢင်ႇ မေႇမဵဝ်ႉၵွႆး။

ၸင်ႇၼၼ် မိူင်းၶႄႇ ပေႃးလႆႈတဵၵ်းလိပ်းတဵၵ်းလႅင် ၸႂ်ႉႁႂ်ႈ MNDAA ဢွၵ်ႇလိၵ်ႈဝႃႈ ၽႅဝ်ထိုင်လႂ် ၵိုတ်းၵႃႈၼၼ်ႉသေ တေဢုပ်ႇၸွမ်း SAC ၼႆယဝ်ႉ။ ဢမ်ႇပေႃးယၢၼ်ႁိုင်သင် TNLA ၵေႃႈ ၵႃႈလႆႈပိုၼ်ၽၢဝ်ႇ မိူၼ်ၼၼ်ၼင်ႇၵဝ်ႇ။

ဢမ်ႇၸႂ်ႈဝႃႈ တူဝ်ၵဝ်ႇပေႉသိုၵ်းလႄႈ ယူႇၾၢႆႇၼိူဝ်ၸီႉသင်ႇလူင်း ႁႂ်ႈမႃးဢုပ်ႇ၊ တၢမ်တူဝ်ၵေႃႉပေႉ လိူဝ်ဢမ်ႇလႆႈတၢင်းၼွၵ်ႈသေ ႁဵတ်းၵႅင်ႈဢွၵ်ႇလိၵ်ႈယွမ်းၸူးၵွႆး။ ၼင်ႇၼႆ တေလႆႈႁဵတ်းၼႃႈဢမ်ႇဢၢႆ တႃဢမ်ႇၶၢၼ်ႉသေ လူင်းဢုပ်ႇၸွမ်းၼႆႉ ပေႃးမေႃဢၢႆယင်းပေႃး ၸူမ်တၢႆၼမ်ႉလၢႆးပိူၼ်ႈၵွၼ်ႇ။

ၵူၺ်းၵႃႈ မၼ်းတေၼပ်ႉဝႃႈ ၾၢႆႇၼိုင်ႈၵေႃႈ ၵမ်းၼိုင်ႈပဵၼ်ၾႆး ၵမ်းၼိုင်ႈပဵၼ်ၼမ်ႉ ၼင်ႇၵဝ်ႇၼႆယူႇ။ ၶွင်ပိုၼ်ၽၢဝ်ႇဝႃႈ တေၽဵဝ်ႈမူၺ်ႉပႅတ်ႈၼၼ်ႉ ၼမ်ႉမိုၵ်ႉယင်းပႆႇႁႅင်ႈ သမ်ႉပေႃးၶဝ်ႈႁႃယွမ်းဢုပ်ႇ ယဝ်ႉလႄႈ ၽႂ်ဢမ်ႇၼႃႈလိူမ်ႈယွမ်းၽႂ်ၼင်ႇၵဝ်ႇသႄႈ။ ၼႃႈလိူမ်ႈလိူဝ်သုတ်း မီးၵေႃႉယူႇၵၢင်ၶိုင်ပဵၼ်ပၢင် ဢုပ်ႇၵုမ်ၵၼ် ၼၼ်ႉယူႇယိုင်။

ၵွပ်ႈၼႆ မိူဝ်ႈတင်း MNDAA ဢုပ်ႇၵၼ်ပွၵ်ႈသွင်ယဝ်ႉၵႂႃႇၼၼ်ႉ တင်းသွင်ၾၢႆႇ ၽႂ်ဢမ်ႇယိုၼ်တူဝ် ပိုၼ်ၽၢဝ်ႇသေတႃႉ မိူင်းၶႄႇလူင်ၵွႆး ပၢၵ်ႇဢွၵ်ႇဝႃႈ SAC တင်း MNDAA ၵိုတ်းတိုၵ်းၵၼ်ပဵၼ်တၢင်းၵၢၼ် ယဝ်ႉၼႆၼေႃႈ။

လိူဝ်ၼၼ်ႉ ပၢႆမီးၶၢဝ်ႇဝွင်းဝႅင်းဝႃႈ တေလႆႈထွႆပၼ်လႃႈသဵဝ်ႈၼႆၵွၼ်ႇ။ ၵူၺ်းၵႃႈ တႃႇတေထွႆဢွၵ်ႇ လႃႈသဵဝ်ႈၼၼ်ႉ တေလႆႈဢဝ်သင်ၵႆႈ ဢဝ်သင်လႅၵ်ႈၼႆ သမ်ႉဢမ်ႇဢွၵ်ႇသဵင်လူး။ တႃႉသေဝႃႈ ဢမ်ႇၸႂ်ႈ ၶူဝ်းၶွင်ၶဝ် ၶႂ်ႈဢဝ်သင် ၵႆႈၶႂ်ႈ ဢဝ်သင်လႅၵ်ႈၵေႃႈ တေလပ်းႁူလပ်းတႃ ႁဵတ်းႁွတ်းလူင်ၵႂႃႇႁိုဝ်၊ ပေႃးပဵၼ်ၼၼ်တႄႉပႄႇ သိုၵ်းၵၢင်မိူင်းၼႆႉ ႁိုဝ်တေမီးတီႈသုတ်းဝၢႆးလႆႈယဝ်ႉလေႃႇ။

ၸဝ်ႈၶွင်လိၼ်မိူင်းလႄႈ ႁိၼ်ႁႄႈၶူဝ်းပူၺ်ႈၼႆႉ ဢမ်ႇၸႂ်ႈတပ်ႉသိုၵ်း၊ ဢဝ်ၸဵမ်ဢႃႇၼႃႇ ပၢၼ်ႇပွင်မၢၼ်ႈမိူင်း တေႃႇထိုင် ၼမ်ႉလိၼ်ႁိၼ်ၽႃ၊ ၶူဝ်းၶွင်ၵဝ်ႇၵႄႇတင်းသဵင်ႈၼႆႉ ၸဝ်ႈၶွင်ၶိၼ်ႈမၼ်း ပဵၼ်ၵူၼ်းမိူင်း ပိုၼ်ႉတီႈႁူမ်ႈၵၼ်ပိူင်ႇငမ်းယဝ်ႉ။

ဢဝ်ပၵ်းပိူင်ထိူၼ်ႇၶိူဝ်းတႅပ်းတတ်းလူင်ၵႂႃႇ ဢမ်ႇမၼ်ႈလႆႈၶၢဝ်းယၢဝ်းသႄႈ။ ၵူၺ်းၵႃႈ ၵၢၼ်ဢုပ်ႇတင်း MNDAA ပႆႇယဝ်ႉပႆႇတူဝ်ႈ သမ်ႉလႆႈယွမ်းဢုပ်ႇတင်း TNLA ထႅင်ႈၼႆလႄႈ SAC ၼႆႉ တႃႇမၼ်းတေ ဢမ်ႇႁတ်းၵႆႈႁတ်းလႅၵ်ႈ လႅပ်ႈဢမ်ႇမီး၊ ဢဝ်ဢၼ်လႂ်ပၼ်ၽႂ်ၵေႃႈ ၶွင်ဢမ်ႇၸႂ်ႈၶူဝ်းၶဝ်လႄႈ တိုၼ်းသိူဝ်းလႆႈယဝ်ႉလေႃႇ။

ပၢႆသေလိူဝ်တူၵ်းၸၢၼ်းၵၢၼ်တိုၵ်း သမ်ႉၺႃးၵၢၼ်း ICC ပုင်ႈၸွမ်းထႅင်ႈၼႆတႄႉ ပွႆႇႁႂ်ႈပေႃႈလဵင်ႉမၼ်း ႁိပ်ႇႁွမ်ႈဢိတ်းဢီႈၵွႆးၵေႃႈ တႃႇဝႃႈတေထဵင် မၼ်းတိုၼ်းဢမ်ႇမီးႁႅင်းၸၢင်ႈတူဝ်ယဝ်ႉသႄႈ။

လွင်ႈၵႆႈလႅၵ်ႈလႄႈ လွင်ႈၶဝ်ပၼ်ၵၼ်ဢဝ်ၵၼ်ၼၼ်ႉ ပႅၵ်ႉသမ်ႉဢမ်ႇၶဝ်ႈတၢင်းၵၢၼ်ၵေႃႈယႃႇ ပေႃး ပဵၼ်ၵႂႃႇယဝ်ႉတႄႉ တႃႇတေမႄးၶိုၼ်း တိုၼ်းဢမ်ႇငၢႆႈငႅမ်ႈၼႆ လီလႆႈပွင်ႇၸႂ်ႁူႉတူဝ်ၸွမ်းၶိုတ်းတၼ်း ယူႇ။ ၵုမ်ႇတေဝႄႈႁူဝ်ၵႄႈတူဝ် ႁဵတ်းၵႃၼႄးၵဝ်ႉ ၵဝ်ႉၼႄးၵႃတေႃႇၵၼ်ၵွႆးတႄႉ တေဢမ်ႇၶိုတ်းၶၼ် ပိူၼ်ႈယဝ်ႉ။

ပၢင်ၵုမ်ၵိုတ်းတိုၵ်း ၼႂ်းၵႄႈ TNLA တင်း SAC ၼႆႉ တေဢမ်ႇယဝ်ႉတူဝ်ႈလႆႈ ၼႂ်းပွၵ်ႈလဵဝ် ဝႃႈၼႆသေတႃႉ ႁႂ်ႈပေႃးၸိူင်ႉၼၢၼ်းၼႃႇဢႃးလႃးၵေႃႈ တေဢမ်ႇပဵၼ်လႆႈ။

ၸဵမ်တင်း AA ရၶႅင်ႇၵေႃႈ မိူင်းၶႄႇ တေလႆႈႁဵတ်းပၼ်ၶဵဝ်ထႅင်ႈၵွၼ်ႇလူး။ ယဝ်ႉသမ်ႉ ပေႃႇလသီႇ ဢၼ်မၼ်းဝႆႉၼိူဝ်မိူင်းမၢၼ်ႈၵေႃႈ မၼ်းၶႂ်ႈၽေႃႇသၢင်ႈပဵၼ်ႁၢင်ႈ ပႃးသီၼႃႇယဝ်ႉယိုင်။

ၽွင်းၽူႈၶႅင်ႇမၼ်းတၢင်းတူၵ်း တိုၵ်ႉယုင်ႈယၢင်ႈၸွမ်းတၢင်ႇလိူင်ႈယူႇၼႆႉ မိူင်းၶႄႇ ႁူႉၵႃႈတေၶတ်းၸႂ် ငၢမ်ဝၵ်ႉသၵ်ႉသဵပ်ႇ သွႆႉသွတ်ႇသႂ်ႇထွင်းမၼ်း ၵႃႈၼင်ႇပွင်ပဵၼ်လႆႈယဝ်ႉ။

ၽွင်းမိူၼ်ၼႆ ၸိူဝ်းပေႉသိုၵ်း ယင်းၶႆႈၸႂ်ဝေႈယၢပ်ႇ ၸိူဝ်းဝေႉၸိုၵ်းသမ်ႉဝႃႈ ဢၢင်ႈယူႇငၢႆႈၵိၼ်လူမ်ၼႆ တႄႉ ပဵၼ်ၵၢၼ်ပႅတ်ႉလႅၼ်ၶိုၼ်းတူဝ်ၵဝ်ႇၵွႆးၼႆ ႁူႉတေၺႃးၵူၼ်းပႃႈလင် တႅမ်ႈတၢင်ႇပိုၼ်းႁၢႆႉထၢမ် ထိုင်ယူႇယဝ်ႉ။ လီလႆႈလုၵ်ႉတိုၼ်ႇ ၽိုၼ်ႉဢွၵ်ႇ ၼႂ်းၵူင်ၼွၼ်းၾၼ်ၼၼ်ႉယဝ်ႉၼႆ ၶႂ်ႈယွၼ်းပူၵ်းသူၼ်း လူၺ်ႈယိၼ်းမႆႈၸႂ်ၸွမ်းငဝ်းလၢႆးပၢႆးမိူင်း ၼမ်ႉလိၼ်ႁိၼ်ၽႃ ၶၢႆႉထွၵ်ႇလႅၵ်ႈလၢႆႈ ယူႇၵူႈမိုဝ်ႉယၢမ်း ၼၼ်ႉယူႇယဝ်ႉ။