ၽူႈလၵ်ႉလိူင်ႇၼမ် တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ရူတ်ႉၶိူင်ႈၵႃႈၶၼ်ယႂ် ႁၢႆ ၵူႈဝၼ်း ၊ ၼႂ်းၶၢဝ်းတၢင်းသွင်ဝၼ်း ရူတ်ႉၶိူင်ႈႁၢႆ 25 လမ်း ဝႃႈၼႆ ။

ၼႂ်းလိူၼ် ၾႅပ်ႊပိဝ်ႊရီႊ ဝၼ်းတီႈ 12-13 ၼႂ်းၶၢဝ်းတၢင်းသွင်ဝၼ်းရူတ်ႉၶိူင်ႈႁၢႆ 25 လမ်း ။ သႅၼ်းဢၼ်ရူတ်ႉၶိူင်ႈဢၼ်ထုၵ်ႇလုၵ်ႉၸိူင်းၼႆႉၵေႃႈ ပဵၼ်သႅၼ်းၵႃႈၶၼ်ယႂ်လၢႆလၢႆ ဝႃႈၼႆ ။

ၼၢင်းယိင်းပိုၼ်ႉတီႈဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ၸူဝ်ႈဝူင်ႈဝၢင်ႈၼႆႉ ၶႂ်ႈဝႃႈႁၢႆ ၵူႈဝၼ်းယဝ်ႉ ၼႂ်းၶၢဝ်းတၢင်း သွင်ဝၼ်းၼႆႉၵူၺ်း ႁၢႆ 25 လမ်း ၊ ပဵၼ်သႅၼ်း Honda click လၢႆလၢႆ  ၊ ၵမ်ႈၼမ် ဢၼ်ပိူၼ်ႈႁၢႆၼႆႉ တေပဵၼ်ရူတ်ႉဢၼ်ၵိုတ်းဝႆႉ ၶၢင်ႈတၢင်း  ၸွမ်းတၢင်းလူင်ၸိူဝ်းၼႆႉ ၊ မီးၵွင်ႈထႆ CCTVၵေႃႈဢမ်ႇလႆႈ ႁၢႆၼမ်ၼႃႇ”- ဝႃႈၼႆ ။

ရူတ်ႉၶိူင်ႈဢၼ်ႁၢႆၵႂႃႇၼၼ်ႉ မၢင်ၸိူဝ်း ၵႂႃႇမီးတီႈ ႁူင်းပလိၵ်ႈၾၢႆႇၵုမ်းရူတ်ႉၵႃး ၊ ပဵၼ်သႅၼ်း ၵႃႈၶၼ်ယႂ် မၢင်ၸိူဝ်း ပဵၼ် သႅၼ်းဢၼ်ၸႂ်ႉသေႃး-  smart key ၸိူဝ်းၼႆႉ – ၵူၼ်းပိုၼ်ႉတီႈလၢတ်ႈ ။

မိူၼ်ၼႆၼင်ႇၵဝ်ႇ ဝၼ်းတီႈ 10/2/2025 ယၢမ်းၵၢင်ဝၼ်း ရူတ်ႉၶိူင်ႈမိၵ်ႈ  Honda သႅၼ်းၵႃႈၶၼ်ယႂ်ႇ ႁၢႆလၢႆလၢႆလမ်း   ။ ဝၼ်းၼၼ်ႉၵူၺ်းၼင်ႇၵဝ်ႇ ရူတ်ႉၶိူင်ႈ သႅၼ်း Honda Wave လမ်းၼိုင်ႈ ဢၼ်ၵိုတ်းဝႆႉ ၼႃႈႁူင်းယႃ ၸဝ်ႈၸၢမ်ႇထုၼ်း ၵေႃႈ ၺႃးလၵ်ႉလႄႈႁၢႆလမ်းၼိုင်ႈ။ ၼႂ်းဝၼ်းတီႈ 11 သမ်ႉ ရူတ်ႉၶိူင်ႈ Click လမ်းၼိုင်ႈ ၽွင်းၵိုတ်းဝႆႉၼႃႈႁူင်းသဝ်း ၵၢင်ဝဵင်းတူၼ်ႈတီး ၺႃးလၵ်ႉၵႂႃႇထႅင်ႈ ဝႃႈၼႆ ။

ၵူၼ်းမိူင်းဝဵင်းတူၼ်ႈတီးၵေႃႉၼိုင်ႈလၢတ်ႈဝႃႈ – ပဵၼ်ရူတ်ႉၶိူင်ႈမႂ်ႇ သိုဝ်ႉဝႆႉ တိုၵ်ႉမီးမွၵ်ႈ 2လိူၼ်၊ ဝၼ်းၼၼ်ႉဝၢႆးဝၼ်း မွၵ်ႈ 4 မူင်း ၵိုတ်းဝႆႉၼႃႈႁၢၼ်ႉသေ ၶဝ်ႈသိုဝ်ႉၶူဝ်း ၼိူဝ်သဵၼ်ႈတၢင်းလူင်ၵၢင်ဝဵင်းတူၼ်ႈတီး၊ ၽွင်းဢွၵ်ႇႁၢၼ်ႉမႃး  ရူတ်ႉၶိူင်ႈဢမ်ႇမီးယဝ်ႉ ဝႃႈၼႆ။

လိူဝ်ၼၼ်ႉ ၼႂ်းဝၼ်းတီႈ 12 ယၢမ်းၵၢင်ၼႂ် ထဝ်ႈၸၢႆးၵေႃႉၼိုင်ႈ ၶီႇရူတ်ႉၶိူင်ႈ Honda သီလမ် ၵႂႃႇယူတ်းယႃတူဝ်တီႈ ႁိမ်းလုမ်းၾၢႆႇၽုၵ်ႇသွမ်ႈ ၼိူဝ်သဵၼ်ႈတၢင်းလူင်၊   ၵိုတ်းၸွတ်ႇရူတ်ႉဝႆႉတီႈ ၼႃႈႁွင်ႈယူတ်းယႃ ၶၢင်ႈတၢင်း ၊ ၽိူဝ်ႇဢွၵ်ႇႁွင်ႈယူတ်းယႃမႃး ရူတ်ႉၶိူင်ႈၺႃးလၵ်ႉ ဢမ်ႇမီးရူတ်ႉၶိူင်ႈတႃႇၶီႇပွၵ်ႈႁိူၼ်းၶိုၼ်း – ပဵၼ်ဢၼ်ယၢပ်ႇၸႂ်။

မိူၼ်ၼင်ၼႆ တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းၵေႃႈ ရူတ်ႉၶိူင်ႈ ဢမ်ႇၵႃး ၶိူဝ်းၶွင်ဢၼ်ၵႃႈၶၼ်ယႂ်ႇၸိူဝ်းၼႆႉ ၵႆႉႁၢႆၼႆႉ ပဵၼ်ယွၼ်ႉၵူၼ်းၵိုၼ်းၶွၼ်ႈမႃးၼမ် ဝႃႈၼႆ ။

ၼၢင်းယိင်းဢႃယု 40 လၢတ်ႈၽူႈတွႆႇႁွၵ်ႈဝႃႈ -“ယႃႇဝႃႈ ရူတ်ႉၶိူင်ႈၵွၺ်းႁၢႆ ၊ သၢႆၾႆး ၊ပူင်းၼမ်ႉမၼ်း ၸိူဝ်းၼႆႉ ဢၼ်တမ်းဝႆႉ တီႈတၢင်းၼႃႈႁိူၼ်းၸိူဝ်းၼႆႉ ၵေႃႈယင်းႁၢႆ  ၊ ဢၼ်ဢဝ်ၶၢႆလႆႈၸိူဝ်းၼႆႉႁၢႆၵူႈမဵဝ်းယဝ်ႉတလဵဝ်ၼႆႉ ၊ ပေႃးႁၢႆၵေႃႈ ဢမ်ႇၸၢင်ႈၵႂႃႇလၢတ်ႈၽႂ်  ၊ ဢမ်ႇၸၢင်ႈၵႂႃႇႁႃတီႈလႂ်ၶိုၼ်း ”- ဝႃႈၼႆ ။

ဝၢႆးလင်သိုၵ်းမၢၼ်ႈယိုတ်းမိူင်းမႃးၼႆႉ ၼွၵ်ႈလိူဝ်ဝဵင်းတူၼ်ႈတီး ၼႂ်းမိူင်းတႆးတၢင်ႇတီႈတၢင်ႇဝဵင်းၵေႃႈ မီးၽူႈလၵ်ႉၸၵ်ႉၶုတ်ႈ၊ ၵူၼ်းၸူၼ် လိူင်ႇၼမ်  ။ ယူႇတီႈ ၽူႈမီးပုၼ်ႈၽွၼ်း ပလိၵ်ႈ သိုၵ်းမၢၼ်ႈၵေႃႈ ဢမ်ႇဢဝ်ပုၼ်ႈၽွၼ်းၵႄႈလိတ်ႈပၼ်လႆႈႁႂ်ႈထိုင်တီႈ။