သိုၵ်းၵဝ်ႈၵၢင်ႉ MNDAA ပိုတ်ႇပၢင်တေႃႇလွင်းၼမ် ၼႂ်းဝဵင်းလႃႈသဵဝ်ႈ ႁဵတ်းႁႂ်ႈၵူၼ်းပိုၼ်ႉတီႈ ဢွၼ်ၵၼ်မႆႈၸႂ်လွင်ႈႁူမ်ႇလူမ်ႈ ယွၼ်ႉၽူႈလၵ်ႉၸၵ်ႉၶုတ်ႈ လိူင်ႇၼမ်ႁႅင်း။
တႄႇဢဝ် ဝၼ်းတီႈ 28/01/2025 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းၵဝ်ႈၵၢင်ႉ ဢဝ်တိုဝ်ႉတၢင်းပီမႂ်ႇၶႄႇ ၼၼ်ႉသေ ပၼ်ၶႂၢင်ႉပိုတ်ႇပၢင်တေႃႇလွင်းမႃး မိူၼ်ၼင်ႇ – တီႈမၢဝ်းၸတႃး၊ ဝၢၼ်ႈၼမ်ႉဢုၼ်ႇလႄႈ ၸွမ်းၼႂ်းပွၵ်ႉယွမ်ႇ ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တႃႇၶၢဝ်းတၢင်း 1 လိူၼ် ဝႃႈၼႆ။
ၽူႈယိင်း ဢႃယု 40 ပၢႆ ၵေႃႉၼိုင်ႈ ၵူၼ်းဝဵင်းလႃႈသဵဝ်ႈ လၢတ်ႈၽူႈတွႆႇႁွၵ်ႈဝႃႈ – “တီႈမၢဝ်းၸတႃးၼၼ်ႉ ၶဝ်တေပိုတ်ႇပၢင်တေႃႇလွင်း တႃႇ 1 လိူၼ် ၶဝ်တႄႇပိုတ်ႇမႃး ၸဵမ်မိူဝ်ႈလိူၼ်သီႇၶႄႇပုၼ်ႉၼၼ်ႉယဝ်ႉ ယွၼ်ႉပၢင်လွင်းၼမ်သေ ၽူႈလၵ်ႉ ၵူၼ်းၸူၼ်ရူတ်ႉၶိူင်ႈၵေႃႈ ၼမ်မႃး ထိုင်တီႈဢဝ်ၽႃႉလမ်းၽၼ်းၵၼ် ၸိူင်ႉၼၼ်ၵေႃႈ မီးမႃးယဝ်ႉ ၽိူဝ်လိူဝ် ၵူၼ်းမိူင်းတုၵ်ႉၶ ယွၼ်ႉပၢင်တိုၵ်းယဝ်ႉ ဢမ်ႇဝူၼ်ႉ တႃႇတေပူၵ်းပွင်ပၼ်ၵူၼ်းမိူင်း လွင်ႈႁႃလဵင်ႉတွင်ႉ၊ ၵုမ်ႇဝူၼ်ႉပိုတ်ႇပၢင်လွင်း တႃႇပၢႆးမၢၵ်ႈမီးၶဝ်ၵူၺ်း”- ဝႃႈၼႆ။
ၼႂ်းပၢင်တေႃႇလွင်း တီႈဝဵင်းလႃႈသဵဝ်ႈၼၼ်ႉ မိူၼ်ၼင်ႇ ပၢင်လေးၵွင်ႇၵျိၼ်ႇ၊ မၢၵ်ႇၵိင်ႈလွႆ (မၢၵ်ႇၶူၵ်းၶူၵ်း)၊ ၽၢႆႉၵဵဝ်း၊ ၽၢႆႉၸေႈ (ရှမ်းကိုးမီး) ၸိူဝ်းၼႆႉ။
“ပၢင်လွင်း ဢၼ်ၶဝ်ပိုတ်ႇၼႆႉ ၼိုင်ႈဢွင်ႈတီႈလႂ် လႆႈသႂ်ႇၶွၼ်ႇပၼ်သိုၵ်းၶဝ် 200 သႅၼ်ပျႃး မိူၼ်ၼင်ႇ တႅင်ႇဢွၼ်ႇ 1 ၶူင်ႇလႂ် 10 သႅၼ်ပျႃး တေႃႇၼိုင်ႈၶိုၼ်း ၵူၼ်းႁဵတ်းၵၢၼ်တၢင်ႇမၢၵ်ႇၶူၵ်းၶူၵ်းသမ်ႉ 1 ဝၼ်းလႂ် လႆႈ 1 သႅၼ်ပျႃး”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
လိူဝ်ၼၼ်ႉ တီႈဝဵင်းသႅၼ်ဝီၵေႃႈ မိူၼ်ၵၼ် တင်ႈတႄႇပီမႂ်ႇၶႄႇၼၼ်ႉမႃး သိုၵ်းၵဝ်ႈၵၢင်ႉ ပၼ်ၶႂၢင်ႉပိုတ်ႇပၢင်တေႃႇလွင်း ၸတ်းႁဵတ်းတီႈပၢင်ႇပွႆးလိူၼ်သီႇ ၵၢင်ဝဵင်းသႅၼ်ဝီလႄႈ ၸတ်းႁဵတ်းပႃး ၼႂ်းဝၢၼ်ႈၼမ်ႉဢုၼ်ႇ၊ ၼႂ်းဢိူင်ႇပၢင်ႇလေႃႉ၊ ဢိူင်ႇၸေႈဢူ၊ ဢိူင်ႇၼမ်ႉၸလၢပ်ႈ ဢိၵ်ႇတင်း ဢိူင်ႇမိူင်းပႃး ၸိူဝ်းၼႆႉ။
ပၢင်တေႃႇလွင်းၼႆႉ တေၸတ်းႁဵတ်းတႃႇၶၢဝ်းတၢင်း 1 ပီ ၼႂ်းပၢင်တေႃႇလွင်းၼၼ်ႉ မီးပၢင်လေးၵွင်ႇၵျိၼ်ႇ၊ မၢၵ်ႇၵိင်ႈလွႆ၊ ပၢင်ၶႅင်ႇမၢၵ်ႇၶင်ႇလႄႈ ပၢင်ၽၢႆႇၵူႈသႅၼ်း။ ပၢင်တေႃႇလွင်း ၼိုင်ႈၶူင်ႇၼႆႉ လႆႈပၼ်တီႈပေႃႈလဵင်ႉ ၸဝ်ႈတႅင်ႇလူင် (ၵၼ်ႇထရႅၵ်ႉ) ၼိုင်ႈလိူၼ်ဢေႇသုတ်း 600,000 ပျႃး ဝႃႈၼႆ။
ဝဵင်းလႃႈသဵဝ်ႈတင်း ဝဵင်းသႅၼ်ဝီၼႆႉ ယူႇတီႈ တပ်ႉသိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈဝႆႉ တင်ႈတႄႇၽႅၼ်ယၼ်ႇသိုၵ်း 1027 ၼၼ်ႉမႃးသေ ယၢမ်းလဵဝ် ပၼ်ၶႂၢင်ႉပိုတ်ႇပၢင်တေႃႇလွင်း ၵူၺ်းဢမ်ႇၵႃး မိူၼ် ၼင်ႇ ႁူင်းမိပ်ႇၼူတ်ႈလႄႈ KTV ၸိူဝ်းၼၼ်ႉၵေႃႈ လိူင်ႇၼမ်မႃးလိူဝ်ၵဝ်ႇသေ ၵူၼ်းၸိူဝ်းၵႂႃႇႁဵတ်းၵၢၼ်ၼၼ်ႉ လႆႈႁူႉဝႃႈ ပဵၼ်ၼၢင်းယိင်းၼုမ်ႇ သႅၼ်းႁုၼ်ႈမႂ်ႇ ဢႃယု 18 လႄႈ 20 ၶိုၼ်ႈၼိူဝ်၊ မီးလၢႆၸၢဝ်းၶိူဝ်း ပႃးၸဵမ် တႆး၊ လွႆ၊ မၢၼ်ႈ၊ ၶႄႇ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ